1-2. Kakɔna kakokaso ndjambola lo kɛnɛ kendana l’alɔmbɛlɔ aso?

 ONDE wɛ atayambolaka dia kana Jehowa kadimolaka lo alɔmbɛlɔ ayɛ? Naka ngasɔ, kete wɛ bu wɛmɛ. Anangɛso ndo akadiyɛso efula ndo vɔ la wɔ mbutaka dia vɔ ndjambolaka dikambo sɔ, djekoleko etena kahomanawɔ l’ekakatanu. Naka tekɔ lo nsowa, kete sho koka monga l’okakatanu wa nshihodia woho wakadimola Jehowa alɔmbɛlɔ aso .

² Nyɛsɔ tɔsɛdingole lande na kahombaso monga l’eshikikelo dia Jehowa kadimolaka alɔmbɛlɔ w’ɔlɔmba atɛmɔdi ande. (1 Jni. 5:15) Tayɔsɛdingola nto ambola anɛ: Lande na kakokaso mɛna dia lo ntena dimɔtshi diele oko Jehowa hakadimola alɔmbɛlɔ aso? Lo toho takɔna takadimola Jehowa alɔmbɛlɔ aso ɛlɔ kɛnɛ?

3. Lande na kalanga Jehowa sho mbɔlɔmbaka?

³ Afundelo toshikikɛka dia Jehowa tokaka ngandji efula ndo nde tɔsaka la nɛmɔ di’efula. (Han. 2:7; 1 Jni. 4:10) Diakɔ diatɔlɔmbande dia sho mbɔlɔmbaka ekimanyielo lo dɔmbɛlɔ. (1 Pe. 5:6, 7) Nde nangaka dia tokimanyiya dia sho mongaka suke suke la nde ndo ndɔshana l’ekakatanu wahomana la so.

4. Ngande weyaso dia Jehowa kadimolaka lo alɔmbɛlɔ w’atɛmɔdi ande? (Enda ndo osato.)

⁴ Lo Bible, mbala efula sho mbadiaka dia Jehowa akakadimolaka alɔmbɛlɔ w’atɛmɔdi ande. Onde wɛ koka nkanyiya ɛnyɛlɔ kɛmɔtshi? Kayotota dia Nkumekanga Davidɛ? Nde aki l’atunyi wa waale efula lo lɔsɛnɔ lande ndo mbala efula nde akayangaka ekimanyielo ka Jehowa lo dɔmbɛlɔ. Lo diaasɔ dimɔtshi, nde akasɛngasɛnga Jehowa ate: “Jehowa le, ooke dɔmbɛlɔ diami; ohokame ɔsɛngɔsɛngɔ wayangami ekimanyielo. Onkadimole lo  kɔlamelo yayɛ ndo lo losembwe layɛ.” (Os. 143:1) Jehowa akakadimola lo alɔmbɛlɔ wa Davidɛ lo mbotshungola. (1 Sa. 19:10, 18-20; 2 Sa. 5:17-25) Davidɛ akakoke mbuta l’eshikikelo ɔnɛ: “Jehowa ekɔ suke la wanɛ tshɛ wa welɛ.” Sho la wɔ nto koka monga l’eshikikelo kakɔ kaamɛ.​—Os. 145:18.

5. Onde atɛmɔdi wa Jehowa wa lo nshi yakete, wakalongolaka ekadimwelo lo alɔmbɛlɔ awɔ lo yoho yakawalongamɛka? Sha ɛnyɛlɔ. (Enda ndo osato.)

⁵ Mbeyaka monga ko Jehowa hakadimola alɔmbɛlɔ aso lo yoho yalongamɛso. Ngasɔ mbakidiɔ ndo lo dikambo dia ɔpɔstɔlɔ Pɔɔlɔ. Nde akalɔmbɛ Nzambi dia nde mbonyɛ “tɛndɛ lo demba.” Lo waaso asato, Pɔɔlɔ akalɔmbɛ djekoleko dikambo di’okakatanu ɔsɔ. Onde Jehowa akakadimola lo alɔmbɛlɔ asɔ? Eelo, koko aha lo yoho yakalongamɛka Pɔɔlɔ. Lo dihole dia nde mbonyɛ okakatanu akɔ, Jehowa akawosha wolo wakinde la wɔ ohomba dia ntetemala mbokambɛ la kɔlamelo tshɛ.​—2 Kɔr. 12:7-10.

6. Lo ntena dimɔtshi, lande na ondo kakokadiɔ mɛnama diele oko Jehowa hakadimola lo alɔmbɛlɔ aso?

⁶ Sho la wɔ ondo lo ntena dimɔtshi nongolaka ekadimwelo wotshikitanyi la kɛnɛ kalongamɛso. Sho koka monga l’eshikikelo dia Jehowa mbeyaka shikaa kɛnɛ koleki dimɛna le so dia tokimanyiya. Nde koka kaanga “nsala akambo efula oleki kɛnɛ tshɛ kalɔmbaso kana kakanyiyaso.” (Ɛf. 3:20) L’ɔtɛ w’ɔkɔkɔ ɔsɔ, ekadimwelo wa lo alɔmbɛlɔ aso koka ndja lo etena kana lo yoho yahatalongamɛ.

7. Lande na ondo keso l’ohomba wa ntshikitanya alɔmbɛlɔ aso? Sha ɛnyɛlɔ.

⁷ Ondo sho koka monga l’ohomba wa ntshikitanya kɛnɛ kalɔmbaso dia nyomoleka mɛna hwe lolango la Jehowa. Tɔsɛdingole ɛnyɛlɔ ka Martin Poetzinger. Yema tshitshɛ l’ɔkɔngɔ wa nde ntshuka, Ɔnangɛso Poetzinger akadjama lo mpango ka lokanu k’ase Nazi. L’etatelo, nde akalɔmbaka Jehowa dia nde mbotshungola oma lo mpango ka lokanu k’ase Nazi, l’oyango wa nde tokokɛka wadɛnde ndo tokalolɛ olimu ande w’esambishelo. Koko, l’ɔkɔngɔ wa mingu hiende, nde kɔmɛna ndooko djembetelo yɛnya dia Jehowa ayowotshungola. Ɔnkɔnɛ, nde akatatɛ nɔmba ate: “Jehowa, lam’alangayɛ ɔmɛnya kɛnɛ kalangayɛ dimi nsala.” Oma laasɔ, nde akatatɛ nkanyiya dikambo di’anangɛso akina waki ndo vɔ la wɔ lo lokanu. Efula ka l’atei awɔ wakayakiyanyaka efula dikambo dia wadiɛwɔ ndo dia anawɔ. Oma laasɔ, Ɔnangɛso Poetzinger akalɔmbɛ ate: “Jehowa, losaka l’ɔkɛndɛ w’oyoyo wami. Okimanyiya dia dimi nkeketsha  analengo.” Nde aketsha ɛnɔnyi divwa lo lokanu dia salaka paka dui sɔ!

8. Kakɔna kakokaso ntetemala mbohɔka etena kalɔmbaso?

⁸ Sho pombaka mbohɔka dia Jehowa ekɔ la sangwelo dimɔtshi, ndo nde ayodikotsha lo etena kakandashikikɛ. Sangwelo sɔ mendanaka ndo la minya tshɛ lo tshɛ ndo lo pondjo ekakatanu tshɛ watokonya dia sho nsowa ɛlɔ kɛnɛ, mbuta ate ekakatanu wendana la mpokoso y’oma lo diangɔ diakatongama, hemɔ ndo nyɔi. Jehowa ayokotsha sangwelo diande sɔ lo tshimbo ya Diolelo diande. (Dan. 2:44; Ɛny. 21:3, 4) Koko, polo ndo l’etena kɛsɔ, ko Jehowa aketawɔ dia Satana mbolɛ andja. b (Jni. 12:31; Ɛny. 12:9) Naka Jehowa nkandola ekakatanu tshɛ w’anto ɛlɔ kɛnɛ, kete dui sɔ koka mɛnama diele oko ɛlɔmbwɛlɔ ka Satana kambotondoyama. Kaanga mbahombaso monga l’eshikikelo dia Jehowa ayokotsha alaka ande, dui sɔ hɛnya dia nde totshikaka aha l’ekimanyielo. Nyɛsɔ tɔsɛdingole toho tɔmɔtshi tatokimanyiya Jehowa.

9. Ngande wakoka Jehowa tokimanyiya etena keso l’ohomba wa mbɔsa tɛdikɔ? Sha ɛnyɛlɔ.

⁹ Nde toshaka lomba. Jehowa ndakaka dia tosha lomba lele la so ohomba dia mbɔsa tɛdikɔ t’amɛna. Tekɔ l’ohomba wa lomba la Nzambi lo yoho ya laande etena kahombaso mbɔsa tɛdikɔ tayonga la shɛngiya lo lɔsɛnɔ laso l’otondo, ɛnyɛlɔ yɛdikɔ yendana la ntetemala ntshikala onyemba kana ntshuka. (Jak. 1:5) Tɔsɛdingole ɛnyɛlɔ ka kadiyɛso kɛmɔtshi k’onyemba kelɛwɔ Maria. c Nde akakambaka l’ɔngɛnɔngɛnɔ tshɛ olimu w’ombatshi mboka wa pondjo etena kakandahomana l’ɔnangɛso ɔmɔtshi. Nde mbutaka ate: “Oko wakatahamaka lɔngɛnyi laso, mbakatalekaka ndo nsaki yaso nkotɔma lam’asaso. Lakeye dia lakahombe mbɔsa yɛdikɔ mɔtshi. Lakalɔmbɛ edja efula lo kɛnɛ kendana la dui sɔ. Laki l’ohomba w’ɛlɔmbwɛlɔ ka Jehowa, koko nto lakeyaka dia Jehowa hambɔsɛki yɛdikɔ pondjo.” Nde akayaoke dia Jehowa akakadimola lo alɔmbɛlɔ ande lo mbosha lomba. Lo ngande? Etena kakandasale eyangelo l’ekanda aso, nde akatɛna asawo amɔtshi shikaa wakokimanyiya dia nde ntana ekadimwelo lo ambola waki la nde. Nde akahokamɛ nto alako wananda otema oma le mama kande ka kɔlamelo. Alako asɔ wakakimanyiya Maria dia nde nsɛdingola nsaki yande. L’ekomelo, nde akayongaka l’akoka wa mbɔsa yɛdikɔ ya lomba.

10. Lo yoho yɔtɔnɛ la Filipɛ 4:13, kakɔna kayosala Jehowa dia nkimanyiya atɛmɔdi ande? Sha ɛnyɛlɔ. (Enda ndo osato.)

¹⁰ Nde toshaka wolo wa mbikikɛ. Paka oko wakandasale lo dikambo dia ɔpɔstɔlɔ Pɔɔlɔ, Jehowa ayotosha wolo wele la so ohomba dia mbikikɛ ehemba aso. (Adia Filipɛ 4:13.) Tɔsɛdingole woho wakakimanyiya Jehowa ɔnangɛso ɔmɔtshi lelɛwɔ Benjamin dia mbikikɛ ntena  di’ekakatanu. Lo etenyi ka woke ka lɔsɛnɔ lande la dikɛnda, Benjamin nde la nkumbo kande wakadjasɛka lo mpango y’ase dawo l’Afrikɛ. Benjamin mbutaka ate: “Lakatetemala nɔmba Jehowa, lakɔlɔmbaka dia nde mbishami wolo wa nsala kɛnɛ kɔngɛnyangɛnya lo washo ande. Jehowa akakadimola lo alɔmbɛlɔ ami lo mbishami wɔladi wa lo yimba, dihonga dia ntetemala nsambisha ndo ekanda wakakimanyiyaka dia dimi monga la wolo wa lo nyuma.” Nde tetemalaka lo mbuta ɔnɛ: “Wadielo w’awui wakakomɛka anangɛmi l’akadiyɛmi ndo mbeya woho wakaakimanyiyaka Jehowa dia mbikikɛ akakeketsha yɛdikɔ yami ya ntshikala la kɔlamelo.”   

11-12. Ngande ondo wasɔna Jehowa dia nkamba l’anangɛso l’akadiyɛso dia nkadimola lo alɔmbɛlɔ aso? (Enda ndo osato.)

¹¹ Nde kambaka la nkumbo kaso ka lo nyuma. L’otsho wa la ntondo ka nde nambola lɔsɛnɔ lande, Yeso akalɔmbɛ efula. Nde akasɛngasɛnga Jehowa diaha nde nkonya anto akina dia vɔ mfɔnya dia nde ambolongola dilanya nɛ l’ɔtɛ wakinde ɔtɛnganyi. Lo dihole dia nde nsala ngasɔ, Jehowa akakimanyiya Yeso lo ntoma ondjelo ɔmɔtshi w’ɔnango dia ndjokeketsha. (Luka 22:42, 43) Ondo Jehowa mbeyaka tokimanyiya nto lo tokeketsha lo tshimbo ya apɛlɛ wa telefɔnɛ kana ya wembwelo w’ɔnangɛso kana kadiyɛso kɛmɔtshi. Sho tshɛ koka nyanga waaso wa mbisha “tshɛkɛta y’ɔlɔlɔ” otsha le asekaso ambetawudi.​—Tok. 12:25.

¹² Tɔsɛdingole dui dimɔtshi diakakomɛ kadiyɛso kɛmɔtshi kelɛwɔ Miriam. Mingu ngana l’ɔkɔngɔ wa nyɔi k’omɛnde, Miriam akatshikala ndamɛ la ngelo, akayaokaka opoko ndo akakɔmɔ. Nde akalelaka mbala la mbala ndo nde aki l’ohomba wa ntɛkɛta l’onto ɔmɔtshi. Nde mbutaka ate: “Takimi la wolo wa mbelɛ onto akɔna tshɛ, ɔnkɔnɛ lakalɔmbɛ Jehowa. Etena kakamatetemalaka ndela ndo nɔmba, wakelɛ lo telefɔnɛ kami. Aki ekumanyi kɛmɔtshi, ɔngɛnyi wa dimɛna.” Miriam akalongola esambelo oma le ekumanyi kɛsɔ la wadɛnde. Nde akayashikikɛ dia Jehowa mbakatshutshuya ɔnangɛso ɔsɔ dia mbelɛ.

13. Sha ɛnyɛlɔ kɛmɔtshi kɛnya woho wakoka Jehowa nkamba la wanɛ wahɔtɛmɔla dia nkadimola lo alɔmbɛlɔ aso.

¹³ Nde mbeyaka nkamba l’anto wahɔtɛmɔla. (Tok. 21:1) Lo ntena dimɔtshi, Jehowa kadimolaka alɔmbɛlɔ w’ekambi ande lo  ntshutshuya anto wahɔtɛmɔla dia nsala akambo lo wahɔ awɔ. Ɛnyɛlɔ, nde akatshutshuya Nkumekanga Aratashasha dia mbetawɔ kɛnɛ kakɔlɔmbɛ Nɛhɛmiya dia nde nkalola la Jɛrusalɛma l’oyango wa tokimanyiya dia nyomoka nto osomba. (Nɛh. 2:3-6) Ɛlɔ kɛnɛ nto, Jehowa koka ntshutshuya kaanga wanɛ wahɔtɛmɔla dia vɔ tokimanyiya etena keso lo dihombo.

14. Ngande wakokeketsha kɛnɛ kakakomɛ Soo Hing? (Enda ndo osato.)

¹⁴ Kadiyɛso kɛmɔtshi kelɛwɔ Soo Hing akoke dia Jehowa akokimanyiya lo tshimbo ya dɔkɔtɛlɛ diande. Ɔnande akadiɛnɛka la hemɔ ka wolo ka lo yimba. Etena kakandasale aksida wa wolo efula, nde la omɛnde wakatshike olimu awɔ dia mbokokɛ. Etombelo waki la dui sɔ ele, vɔ wakayongaka l’okakatanu wendana l’ekondjelo. Soo Hing mbutaka dia nde akayaokaka dia nde hayokoka mbikikɛ ndo ambokoma ewo. Nde akadiholɛ Jehowa otema ndo akɔlɔmbɛ ekimanyielo. Dɔkɔtɛlɛ diande akɔshi yɛdikɔ ya ntana yoho mɔtshi ya mbokimanyiya nde la nkumbo kande. Dui sɔ diakaakimanyiya dia vɔ nongola ekimanyielo k’oma le ewandji wa lɛɛta ndo wakaatanɛ dihole dia dimɛna dia mbidjasɛ. Oma laasɔ, Soo Hing mbutaka ate: “Takɛnyi lonya la Jehowa lo dikambo nɛ. Nde ekɔ mɛtɛ ‘Ɔnɛ latokaka dɔmbɛlɔ.’”​—Os. 65:2.

15. Kakɔna kakakimanyiya kadiyɛso kɛmɔtshi dia nde nshihodia dia alɔmbɛlɔ ande wakakadimɔma?

¹⁵ Aha mbala tshɛ mbatokadimɔmaka alɔmbɛlɔ aso lo toho ta diambo. Koko ekadimwelo walongolaso ele paka kɛnɛ keso l’ohomba dia ntetemala ntshikala la kɔlamelo le Shɛso ka l’olongo. Ɔnkɔnɛ, djaka yimba lo woho wakadimola Jehowa alɔmbɛlɔ ayɛ. Kadiyɛso kɛmɔtshi kelɛwɔ Yoko akayaoke dia Jehowa hakadimola lo alɔmbɛlɔ ande, koko oma laasɔ, nde akayotatɛka mfunda kɛnɛ kakandalɔmbaka Jehowa lo kalupɛ. L’ɔkɔngɔ w’etena kɛmɔtshi, nde akayendaka lo kalupɛ yande ko akayɛnaka dia Jehowa akakadimola lo alɔmbɛlɔ ande ndo kaanga l’alɔmbɛlɔ ande amɔtshi wakandohɛ. Ntena la ntena, tekɔ l’ohomba wa mongaka suke ndo kanaka yimba lo woho wakadimola Jehowa alɔmbɛlɔ aso.​—Os. 66:19, 20.

16. Ngande wakokaso mɛnya mbetawɔ lo kɛnɛ kendana l’alɔmbɛlɔ aso? (Hɛbɛru 11:6)

¹⁶ Sho mɛnyaka mbetawɔ aha tsho lo nɔmba Jehowa koko ndo lo mbetawɔ ekadimwelo ande l’alɔmbɛlɔ aso oyadi woho akɔna wele ekadimwelo akɔ. (Adia Hɛbɛru 11:6.) Tɔsɛdingole ɛnyɛlɔ ka Mike nde la wadɛnde, Chrissy. Vɔ waki l’oyango wa tokamba lo Bɛtɛlɛ. Mike mbutaka  ate: “Takalodia adɛmandɛ dimi la wadɛmi l’edja k’ɛnɔnyi efula ndo takalɔmbaka Jehowa mbala la mbala lo dikambo di’oyango ɔsɔ, koko vɔ kotelɛ.” Mike nde la Chrissy wakatetemala monga l’eshikikelo dia Jehowa mboleki mbeya woho woleki dimɛna wayondokamba la wɔ l’olimu ande. Vɔ wakatetemala nsala kɛnɛ tshɛ kakawakoke nsala, nkamba oko ambatshi mboka wa pondjo lɛnɛ akiwɔ l’ohomba efula ndo tosukɛ wokelo wa mvudu y’okongamelo. Ɛlɔ kɛnɛ vɔ wekɔ lo nkamba l’olimu w’otshimbedi. Mike mbutaka ate: “Aha mbala tshɛ mbatokadimolaka Jehowa alɔmbɛlɔ aso lo yoho yalongamɛso, koko nde akaakadimola lo yoho yoleki dimɛna yakiso konongamɛka.”

17-18. Lo yoho yɔtɔnɛ la Osambo 86:6, 7, lo na akokaso monga l’eshikikelo?

¹⁷ Adia Osambo 86:6, 7. Omembi w’esambo Davidɛ, akayashikikɛ dia Jehowa akahokamɛka ndo akakadimolaka alɔmbɛlɔ ande. Wɛ lawɔ koka monga l’eshikikelo kɛsɔ. Bɛnyɛlɔ diɔtɛkɛtshiso lo sawo nɛ toshikikɛka dia Jehowa koka tosha lomba ndo wolo weso la wɔ ohomba dia mbikikɛ. Nde mbeyaka nkamba la nkumbo kaso ka lo nyuma kana kaanga l’anto wahɔtɛmɔla l’etena kɛnɛ dia tokimanyiya lo yoho mɔtshi.

¹⁸ Kaanga mbahatokadimolaka Jehowa alɔmbɛlɔ aso lo yoho yalongamɛso, sho mbeyaka dia nde ayowakadimola. Nde ayotosha paka kɛnɛ keso la tɔ ohomba ndo l’etena mɛtɛ keso la tɔ ohomba. Ɔnkɔnɛ tetemala nɔmba la mbetawɔ, l’eshikikelo dia Jehowa ayokokokɛ l’etena kɛnɛ ndo dia nde ayokotsha “nsaki ka ɛngɔ tshɛ kasɛna” lo andja w’oyoyo wayaye.​—Os. 145:16.