Onde wɛ ekɔ l’ohomba w’ɔlɛmbɛ lo dikambo tshɛ?

LAM’AKIYƐ dikɛnda, aha la taamu, ambutshi ayɛ wakakondjɛka ɛlɛmbɛ efula. Lam’akayolaka, wɛ akashihodia dia aki lo wahɔ wakiyɛ, woho ɔnɛ wele kaanga ɛlɔ kɛnɛ, etena kayayɛ opalanga ndo kayayɛ bu l’ɛse ka lowandji lawɔ, wɛ ekɔ lo ntetemala la nsɛdingola atɔndɔ amɔtshi wakawaketsha.

Oko wende Shɛso lele l’o longo, Jehowa todjɛka ɛlɛmbɛ wa shikaa lo tshimbo y’Ɔtɛkɛta ande, Bible. Ɛnyɛlɔ, nde toshimbaka ɔtɛmwɛlɔ wa dikishi, monanyi, loseka kana wovi. (Etombelo 20:1-17; Etsha 15:28, 29) Lo ‘mpaka l’akambo tshɛ’ l’awui wa lo nyuma, sho shihodiaka dia nde salaka ngasɔ dikambo dia wahɔ aso ndo ɔnɛ wadjango ande hawotodje lo shasa.​—Ɛfɛsɔ 4:15; Isaya 48:17, 18; 54:13.

Ɔnkɔnɛ, ekɔ awui efula wahalɔmbɛ ɛlɛmbɛ wa shikaa. Anto amɔtshi mbokaka dia vɔ wekɔ la lotshungɔ la nsala akambo woho walangawɔ. Lo kanyi yawɔ, otonga Nzambi akɛnyi ɔlɔlɔ, tshike ndo ototewoya losango lande lo yoho yokɛma hwe lo dikambo tshɛ.

Anto wele la tokanyi ta ngasɔ mbɔsaka mbala efula tɛdikɔ ta kɔlɔ tayowonyangaka heyama l’ɔkɔngɔ. Vɔ mbohɛka dia Bible bu tsho paka l’ɛlɛmbɛ, koko tɔ kekɔ nto l’awui wɛnya woho woho wɛna Jehowa akambo. Lo mbeka Afundelo, sho ndjaekesanyiyaka la yoho ya nkana yimba yaki Nzambi ndo sho mbekiyaka nkum’otema kaso ndo ndjongaka wɔdu le so dia mbɔsa tɛdikɔ tɔɔngɛnyangɛnya. Lo nsala ngasɔ, sho ngɛnyangɛnyaka Nzambi ndo kondjaka ɛlɔlɔ waya lo mbɔsa tɛdikɔ ta lomba.​—Ɛfɛsɔ 5:1.

Bɛnyɛlɔ dia lo Bible di’amɛna efula

Ekambi efula waki Nzambi wa lo nshi yakafundamaka Bible wakayele kanyi ya Nzambi l’awui wele ndooko ɔlɛmbɛ shikaa wakikɔ. Tɔshi ɛnyɛlɔ ka Yɔsɛfu. Etena kakandatone dia nsala awui wa mindo nde la wadi aki Pɔtifara, ko ɔlɛmbɛ wa lofunda oma le Nzambi wasekɛ monanyi watonge. Koko Yɔsɛfu akashihodia dia naka nde nsala monanyi, kete nde ayosalɛ nkum’otema kande ndo “Nzambi pɛkato.” (Etatelo 39:9.) Mbokɛmaka hwe dia nde akashihodia dia monanyi kaki kɔlɔ lo kanyi ya Nzambi ndo kɔmbɔtɔnɛka la lolango lande oko wakandaliɛnya l’ekambɔ k’Ɛdɛna.​—Etatelo 2:24.

Tɔsɛdingole ɛnyɛlɔ kekina. Etsha 16:3 totɛka dia la ntondo ka nde minda nkɛndɔ kaamɛ la Timɔte, Pɔɔlɔ akawonya mpota. Divɛsa 4 mɛnyaka di’apami akɔ ahende waketeta l’esomba dia tshikɛ tshumanelo “wadjango wakawahombe nkitanyiya wakatome apɔstɔlɔ la dikumanyi diaki la Jɛrusalɛma.” Koko didjango dimɔtshi l’atei awɔ diakashikikɛ di’Akristo kɔnɔmbamaka nto dia paka minya mpota! (Etsha 15:5, 6, 28, 29) Ko lande na kakɛnyi Pɔɔlɔ ohomba dia Timɔte minyɛma mpota? ‘Aki lo dikambo di’ase Juda waki l’ahole asɔ, nɛ dia vɔ tshɛ wakeyaka dia she Timɔte aki ose Ngirika.’ Pɔɔlɔ konanga ntakanya anto akina tshanana. Nde akalangaka di’Akristo ntetemala ‘ndjalowola le nkum’otema k’onto tshɛ lo washo wa Nzambi.’​—2 Kɔrɛtɔ 4:2; 1 Kɔrɛtɔ 9:19-23.

Dionga sɔ mbaki la Pɔɔlɔ nde la Timɔte. Nyadia avɛsa wele oko Rɔmɔ 14:15, 20, 21 ndo 1 Kɔrɛtɔ 8:9-13; 10:23-33; dia mɛna woho wakayakiyanyaka Pɔɔlɔ dikambo dia lonyuma l’anto akina, djekoleko la wanɛ wakakoka ntakana l’ɔtɛ w’ɛngɔ kɛmɔtshi kele tɔamɛ bu kɔlɔ. Pɔɔlɔ akafunde lo dikambo dia Timɔte ate: “Dimi ndooko la onto okina lele la dionga diele oko nde layoyakiyanya l’otema ɔtɔi dikambo dianyu. Dikambo anto akina tshɛ wekɔ lo nyanga wahɔ awɔ hita, koko aha wa Yeso Kristo. Koko, nyu mbeyaka dia ndamɛ akɛnya dia nde kokaka ndo nde akakambe kaamɛ la mi oko ɔna nde la she dia ntɔla lokumu l’ɔlɔlɔ otsha la ntondo.” (Filipɛ 2:20-22) Ɛnyɛlɔ kakɔna kakatotshikɛ Akristo ahende asɔ! Kaanga mbele ndooko ɔlɛmbɛ wa shikaa wakikɔ lo dikambo sɔ, vɔ kombetsha nango kana wahɔ awɔ hita lo dihole dia ntondo, koko vɔ wakokoya ngandji ka Jehowa ndo k’Ɔnande lo mbidja yimba lo etombelo wayonga la tɛdikɔ tawɔ lo lonyuma l’anto akina.

Ɛnyɛlɔ k’ekomelo: Yeso Kristo, mbele ɛnyɛlɔ kaso koleki dimɛna. Nde akate hwe lo Dako dia lo dikona dia naka onto nshihodia oyango w’ɛlɛmbɛ wa Nzambi, kete hatokitanyiya lo kɛnɛ kasekɛtɔ lo yoho yokɛma hwe. (Mateo 5:21, 22, 27, 28) Le Yeso, Pɔɔlɔ, Timɔte ndo Yɔsɛfu, vɔ kosala akambo woho walangawɔ l’ɔtɛ w’ɔnɛ ɔlɛmbɛ bu. Lo ndjaɔtɔnganyiya la kanyi ya Nzambi, apami asɔ wakasɛdingolaka lo waaso tshɛ kɛnɛ kakelɛ Yeso ɔnɛ ɛlɛmbɛ ehende woleki weke: nanga Nzambi ndo nanga wonyaso onto.​—Mateo 22:36-40.

Ko kayotota ɛlɔ kɛnɛ di’Akristo?

Hatohombe mbadia Bible oko mukanda w’awui wa dombo, lo nyanga dia ntana vwuiwi tshɛ yalɔmbama onto dia nsala. Sho mbishaka Jehowa ɔngɛnɔngɛnɔ w’efula lo ndjaɔtɔnganyiya la yoho yande ya nkana yimba, kaanga lo dui diele ndooko didjango dia shikaa. Dui sɔ nembetshiyaka dia bu ohomba dia vɔ totɛka mbala tshɛ kɛnɛ kalongamɛ Nzambi le so, koko dia sho ‘nshihodia ele lolango lande.’ (Ɛfɛsɔ 5:17; Rɔmɔ 12:2) Lande na kele Jehowa l’ɔngɛnɔngɛnɔ etena katɛnande tasala ngasɔ? Ekɔ nɛ dia dui sɔ mɛnyaka dia dui dioleki ohomba le so ele mbɔɔngɛnyangɛnya koko aha nango yaso kana lotshungɔ laso. Dui sɔ mɛnyaka nto dia ngandji katokande kekɔ la nɛmɔ lo washo aso diakɔ diakombolaso mbookoya, nsala woho wa tshɛ kasalaso sɛngiyama la ngandji. (Tokedi 23:15; 27:11) Lo wedi okina, mbetawɔ dia nɔmbwama l’Afundelo kimanyiyaka dia monga la lonyuma la dimɛna ndo la yoonge ya demba ya dimɛna.

Tende kakianɛ woho wakokaso nkamba la ntɔndɔ l’awui aso hita.

Ɔkɔkwɛlɔ wa demba

Tɔshi k’ɔlɔngɔlɔngɔ walanga nsomba woho ɔmɔ wa CD. Anto efula wekɔ lo ntɛkɛta dimɛna di’albumu ɔsɔ, nɛ dia lo lohoso lalɔ vɔ mɛnya dia nkembo yatɛkɛta di’awui wa dieyanelo ndo wa mindo mbele lɔkɔ. Ndo nde mbeyaka nto dia kɔnsɛrɛ yande mongaka l’awui wa nkɛlɛ ndo wa ngala. Ɔlɔngɔlɔngɔ ɔsɔ nangaka Jehowa, ndo nde ndjakiyanyaka dia kanyi ndo dia nsaki yande. Ngande wakokaso nshihodia ele lolango la Nzambi lo dikambo sɔ?

Lo mukanda ande le ase Ngalatiya, ɔpɔstɔlɔ Pɔɔlɔ ekɔ lo nshila etsha wa demba, oma laasɔ ko nde ntɛkɛta di’olowa wa nyuma. Aha la taamu, wɛ mbeyaka waonga wakenga olui wa nyuma: ngandji, ɔngɛnɔngɛnɔ, wɔladi, solo dia lotutsha, ɔlɔlɔ, ɔlɔlɔ w’otema, mbetawɔ, memakana ndo ndjakimɛ. Ko awui akɔna wakenga etsha wa demba? Pɔɔlɔ akafunde ate: “Etsha wa demba mɛnamaka lo sɛkɛ ndo vɔ ɛnɛ: Awui wa mindo wa dieyanelo, akambo wa mindo, lɔkɛwɔ la fumbɔ nsɔnyi, ɔtɛmwɛlɔ wa dikishi, diɔtɔnganelo dia la ɛdiɛngɛ, ɔlɔshanelo, mindjo, kandjema, nkɛlɛ ka tshambandeko, ewanu, diatɔnelo, taato t’ɛtɛmwɛlɔ, ɔkɔmiya, wodjwelo wa wanu, fɛtɛ yele l’awui wa tshambandeko ndo akambo wa woho ɔsɔ. Dia akambo asɔ mbanyewolami woho wakamanyewola ntondo nte: Wanɛ wasala akambo asɔ hawotokita Diolelo dia Nzambi.”​—Ngalatiya 5:19-23.

Tolembete dia listɛ lɔsɔ nkomɛ l’ɛtɛkɛta w’ɔnɛ: “Akambo wa woho ɔsɔ.” Pɔɔlɔ kombisha l’otale lamboleka dia dui tshɛ diakoka mbɔtɔ l’atei w’etsha wa demba. Aha oko onto lata ɔnɛ: ‘Lo ndjela Bible, lekɔ la lotshungɔ dia nsala dui tshɛ diahawadjisha l’ɔnɔngɔ w’etsha wa demb wakate Pɔɔlɔ.’ Aha ngasɔ. Ambadia wa mukanda ɔsɔ wakahombe nkamba l’akoka w’ekanelo ka yimba dia nshihodia awui wele kaanga mbewɔ bu lo listɛ lɔsɔ, vɔ wekɔ “akambo wa woho akɔ.” L’ɛtɛkɛta ekina, anto wasala akambo wa “woho akɔ” ndo wahayatshumoya hawotokita ɛtshɔkɔ wa Diolelo dia Nzambi.

Laasɔ, sho pombaka nshihodia kɛnɛ kahangɛnyangɛnya Nzambi. Onde ekɔ wolo? Naka onganga ayɛ kɔlɔmba dia ndɛka elowa ndo akatshikatshi efula, ndo dia mbewɔ wa matɛka, crɛmɛ ndo diangɔ dia woho ɔsɔ, onde wɛ ayonga l’okakatanu dia mbeya wedi akɔna wakokayɛ mbidja ekate? Tɔtɛkɛta nto di’olowa wa nyuma ndo di’etsha wa demba. L’ɔnɔngɔ akɔna wakoka mbidjama CD kakatatɛkɛtshi? Tɔ hendana kaanga yema la ngandji, ɔlɔlɔ w’otema, ndjakimɔ ndo waonga akina wa l’olowa wa nyuma. Sho bu l’ohomba w’ɔlɛmbɛ wa shikaa dia nshihodia ɔnɛ woho wa mishiki ɔsɔ hawɔtɔnɛ la kanyi ya Nzambi. Tɔndɔ diamɛ sɔ mendanaka l’awui wadiaso, filmɛ, emisiɔ wa televiziɔ, tɔkɛnyɔ ta lo tovidɛo, sitɛ y’Ɛtɛrnɛtɛ ndo awui akina.

Ɛnamelo ketawɔma

Sho tanaka nto lo Bible atɔndɔ wendana l’ɔlɔtɔ ndo wonyelo wa divo wakimanyiya Okristo dia monga l’ɛnamelo ka dimɛna ndo ka kɔmba. Ndo lo dikambo sɔ, onto loka Jehowa ngandji mɛnaka dia ndo lo dikambo sɔ, nde hatosala kɛnɛ kalangande, koko kɛnɛ kayɔngɛnyangɛnya She lele l’olongo. Tambɔtɛtɛ dia: Aha naka Jehowa hatosha ɔlɛmbɛ shikaa lo dikambo dimɔtshi, kete laasɔ ɔnɛ nde ayɔngɛnangɛna tshɛ kayotosala. Ɛlɔtɔ ntshikitana lo dihole la dihole, wodja la wodja, kana la eleko la eleko. Koko kɛnɛ kele mɛtɛ ele Nzambi akatosha atɔndɔ wele ohomba wahomba nɔmbɔla ekambi ande lo ntena tshɛ ndo l’ahole tshɛ.

Diakɔ diata 1 Timɔte 2:9, 10 ɔnɛ: “Woho akɔ waamɛ mbele, wamato pombaka ndjalɛnga la ɔlɔtɔ wa kɔmba, wele la wɛdimo ndo la yimba y’ɔlɔlɔ, aha la tosambo ta mbɛla divo, la paonyi kana la adidi kana la ahɔndɔ w’oshinga wolo efula, koko lo yoho yasungana le wamato wata dia wekɔ lo mamema Nzambi, mbuta ate oma lo etsha w’ɛlɔlɔ.” Akristo wa wamato ndo w’apami la dia mbidja yimba lo woho ɛnamelo kalanga anto wa l’ɛtshi kawɔ ka nkɛtɛ dia ‘wanɛ wamamema Nzambi’ monga la tɔ. Lo yoho ya laande, Okristo nkana yimba lo yoho nyɛ yele ɛnamelo kande koka monga la shɛngiya lo woho wayɔsa anto losango la lo Bible latandɛmbɛ. (2 Kɔrɛtɔ 6:3) Okristo washa ɛnyɛlɔ k’ɔlɔlɔ hatshininala lo lotshungɔ lele lande, koko nde ayoleka ndjakiyanya diaha monga otamba wa ntakanya le anto akina.​—Mateo 18:6; Filipɛ 1:10.

Naka Kristo ambɛna yoho y’ɔlɔlɔ yande koka ntakanya anto amɔtshi, nde koka mbokoya ɔpɔstɔlɔ Pɔɔlɔ lo mbetsha lonyuma l’anto akina la ntondo ka nango yande hita. Pɔɔlɔ akate ate: “Nyombokoyaka oko wokoyami Kristo.” (1 Kɔrɛtɔ 11:1) Ndo nde akafunde lo diakmbo dia Yeso ate: “Kaanga Kristo kondjangɛnyangɛnya ndamɛ.” Akristo tshɛ mendanaka la tɔndɔ nɛ: “Sho wanɛ wele wolo pombaka mɛmba wɛɔdu wa wanɛ wele bu wolo, koko aha ndjangɛnyangɛnya shoamɛ. Sho tshɛ onto l’onto angɛnyangɛnya wonyande lo mbosalɛ ɔlɔlɔ, lo mbokeketsha.”​—Rɔmɔ 15:1-3.

Woho wa ndowanya akoka aso w’ekanelo ka yimba

Ngande wakokaso ndowanya akoka aso w’ekanelo ka yimba dia mbeya woho wa ngɛnyangɛnya Jehowa, kaanga etena kahandatosha wadjango wa shikaa? Ele lo mbadiaka, lo mbekaka ndo lo kanaka yimba l’Ɔtɛkɛta ande lushi tshɛ. Ohamelo mbɔsaka etena. Oko wola ɔna, ohamelo wa lo nyuma salemaka yema yema, vɔ hawɛnama mbala kakɔ ɔtɔi. Paka monga la solo dia lotutsha ndo sho nkɔmɔ naka hatɛnyi elowanyelo esadi. Lo wedi okina, mbɔsaka etena k’otale dia ndowanya akoka aso w’ekandelo ka yimba. Oko wakataditshi, tokambe l’etena kɛsɔ dia mbekaka Ɔtɛkɛta wa Nzambi mbala la mbala ndo ndjaɔtɔnganyiya wetshelo ande.​—Hɛbɛru 5:14.

Naka ɛlɛmbɛ wa Nzambi wambodja okitanyiya aso l’ohemba, kete atɔndɔ ande wayodja lonyuma ndo woke woke wa nsaki kaso ka mbɔngɛnyagɛnya l’ohemba. Lo yɛdikɔ yayotoleka mpama lo nyuma, mbayotoleka nyanga dia mbokoya Jehowa l’Ɔnande. Tayosala dia tɛdikɔ taso mpikama lo kɛnɛ katɛnya Afundelo lo kɛnɛ kenana la yoho yɛna Jehowa akambo. Tayɛna dia lo ngɛnyangɛnya Shɛso lele l’olongo lo lɔkɛwɔ laso tshɛ, sho lawɔ mongaka l’ɔngɛnɔngɛnɔ.

[Esato]

Toho t’ɛlɔtɔ tshikitanaka lo ndjela dihole la dihole, koko atɔndɔ wa lo Bible mbahomba tɔlɔmbɔlaka nshi tshɛ l’ɛsɔnwɛlɔ aso