Tombola Otungi ayɛ lo ndjadjɛ eyango wa lo nyuma

“AHA otsha lɛnɛ apɛpa lɔpɛpɛ mbata dikambo.” Ɛtɛkɛta watawɔ di’ombewi ɔmɔtshi wa filozofi w’ose Rɔma wa lo ntambe ka ntondo mbakaatondja ɛsɔ mɛnyaka ɔnɛ dia mbisha lɔsɛnɔ ɛlɔmbwɛlɔ, ekɔ ohomba monga la eyango.

Bible kekɔ la bɛnyɛlɔ di’anto waki la eyango. L’edja k’ɛnɔnyi oko 50, Nɔa “akasale waato wa luudu dia nshimbɛ ase nkumbo kande.” Omvutshi Mɔsɛ “akake washo lo difuto.” (Hɛbɛru 11:7, 26) Jashua, ɔhɛna wa Mɔsɛ, akalongola oyango oma le Nzambi wa nɛndja wodja wa Kanana.​—Eohwelo k’Ɛlɛmbɛ 3:21, 22, 28; Jashua 12:7-24.

Lo ntambe ka ntondo T.D., eyango wa lo nyuma w’ɔpɔstɔlɔ Pɔɔlɔ wakasɛngiyama efula l’ɛtɛkɛta wa Yeso w’ɔnɛ “lokumu l’ɔlɔlɔ lɔnɛ la Diolelo layosambishama lo nkɛtɛ k’otondo.” (Mateo 24:14) Nde akakeketshama la nsango ndo waɛnɛlɔ wakandalongola oma le Nkumadiɔndjɔ Yeso, mbidja ndo ɔkɛndɛ wa “mɛmbɛ ase wedja ... lokombo [la Yeso].” Diakɔ diakakambe olimu w’efula dia nkenga tshumanelo l’Asie Mineure w’otondo ndo l’Erɔpɛ.​—Etsha 9:15; Kɔlɔsayi 1:23.

Eelo, ekambi wa Jehowa wa lo deko tshɛ wakayadjɛ eyango w’amɛna wakawakotsha dikambo dia lotombo la Nzambi. Ngande wakokaso sho lawɔ ndjadjɛ eyango wa lo nyuma ɛlɔ kɛnɛ? Eyango akɔna wakokaso ndjadjɛ ndo wanya akɔna wahombaso ntakola dia mbaakotsha?

Ekɔ ohomba monga la tokanyi t’amɛna

Sho koka ndjadjɛ eyango l’oseka dikambo tshɛ dia lo lɔsɛnɔ. Efula k’anto wa lo nshi yaso nyɛ ndjadjɛka eyango. Koko eyango wa lo nyuma ntshikitana l’eyango w’ase andja ɔnɛ wayanga lokumu. Ɔkɔkɔ wa ntondo wayadjɛ anto wa l’andja ɔnɛ eyango ele dia monga ɛngɔnyi, monga la dihole dia woke lo tshunda di’anto ndo monga la lowandji. Ayonga munga ka woke naka sho ndjadjɛ oyango wa monga la lowandji kana la lokumu! Eyango washa Jehowa lotombo mendanaka mbala kakɔ ɔtɔi la ɔtɛmwɛlɔ aso ndo la wahɔ wa Diolelo. (Mateo 6:33) Ngandji kokaso Nzambi ndo wonyaso onto ndo woho walangaso mbomamema mbatotshutshuya dia ndjadjɛ eyango ɛsɔ.​—Mateo 22:37-39; 1 Timɔte 4:7.

Tonge la tokanyi ta pudipudi etena kayadjɛso eyango wa lo nyuma, oyadi oyango wa nkondja waɛsɛ w’olimu kana wa ndowanya lonto laso. Koko ntena dimɔtshi, sho mbeyaka ndjadjɛ eyango la tokanyi t’amɛna, ko monga hatakotshisha. Ngande wakokaso ndjadjɛ eyango ndo nsala tshɛ dia mbaakotsha?

Sho pombaka monga la nsaki k’efula

Tɔsɛdingole woho wakakotsha Jehowa sangwelo diande diendana la ntonga andja ɔnɛ. Ɛtɛkɛta w’ɔnɛ “dikɔlɔ diakayala, pindju kakayala,” mɛnyaka dia Jehowa kotonga diangɔ tshɛ lo etena ɔtɔi. (Etatelo 1:5, 8, 13, 19, 23, 31) Lo etatelo k’etena tshɛ k’etongelo, nde akeyaka oyango ande wa lushi longo. Ndo Nzambi akakotsha oyango ande wa ntonga diangɔ. (Ɛnyɛlɔ 4:11) Owandji wa nkumbo Jɔbɔ akate dia etena “kalanga anima [wa Jehowa] nsala dui dimɔtshi, nde disalaka.” (Jɔbɔ 23:13) Jehowa akangɛnangɛna efula dia mɛna “diangɔ tshɛ diakandasale,” ndo nde akate dia “diɔ diekɔ amɛna efula”!​—Etatelo 1:31.

Dia sho nkotsha eyango aso, sho pombaka monga la nsaki k’efula ka mbaakotsha. Kakɔna kayotokimanyiya dia monga la nsaki ka ngasɔ? Kaanga etena kaki nkɛtɛ yatalɔngɔswama ndo komonga ndooko ɛngɔ, Jehowa akɛnaka woho wayokoma nkɛtɛ, mbuta ate dihole dia dimɛna efula, diayowosha lotombo ndo kɛnɛmɔ. Woho akɔ waamɛ mbele, sho koka mfudia nsaki kaso ka nsala kɛnɛ kakatasangoya lo nkana yimba lo etombelo ndo wahɔ wayotokondja lo nkotsha oyango akɔ. Kɛsɔ mbakakomɛ Tony laki l’ɛnɔnyi 19. Nde kombohɛ pondjo kɛnɛ kakandɛnyi mbala ka ntondo kakandembola Bɛtɛlɛ kɛmɔtshi k’Ɛmɛnyi wa Jehowa ka lo Europe occidentale. Ntatɛ oma l’etena kɛsɔ, nde akayambolaka ate: ‘Ngande wayonga lɔsɛnɔ ndo olimu ami lo dihole dia nganɛ?’ Tony kotshika nkanyiya dia diaaso sɔ ndo nde akasalaka tshɛ dia dui sɔ kotshama. Ɛnɔnyi efula l’ɔkɔngɔ, nde akayongaka l’ɔngɛnɔngɛnɔ heyama etena kaketawɔma dɛmandɛ diande dia nkamba lo Bɛtɛlɛ!

Ndjaekesanyiya la wanɛ wakakotsha oyango awɔ ɔmɔtshi mbeyaka tosha nsaki ka sho lawɔ nkotsha oyango aso. Jayson, lele l’ɛnɔnyi 30, kɔngɛnangɛnaka esambishelo lam’akinde l’ɛnɔnyi dikumi l’ɛmɔtshi. Koko l’ɔkɔngɔ wa nde nshidiya kalasa y’ambeki, nde akayɔsaka olimu w’ombatshi mboka, ndo akakome osambisha wa Diolelo wa lo tena tshɛ. Kakɔna kakakimanyiya Jayson dia monga la nsaki ka monga ombatshi mboka? Nde kadimolaka ate: “Woho wakamasawolaka ndo wakamasambishaka l’ambatshi mboka akonge la shɛngiya y’efula le mi.”

Wahɔ waya lo mfunda eyango aso lofunda

Sho koka ndjoshihodia dui dimɔtshi diakiso l’okandokando etena katanaso tɔtɛkɛta tahombama dia mbuta dui diakɔ. Sɔlɔmɔna akɛnyi dia tɔtɛkɛta tɔsɔnami dimɛna koka monga l’etombelo w’amɛna oko diangɔ di’ɛsɔdi diatɛnya mboka ka ndjela. (Ondaki 12:11) Etena kafundaso tɔtɛkɛta tɔsɔ lofunda, tɔ minandaka yimba ndo otema aso. Shi l’ɔkɔkɔ ɔsɔ mbakadjangɛ Jehowa nkumi ya dikanga ya l’Isariyɛlɛ di’onto l’onto ndjasangolɛ Ɛlɛmbɛ? (Eohwelo k’Ɛlɛmbɛ 17:18) Tofunde eyango aso ndo woho walangaso mbakotsha lo dikatshi, ndo wekamu wayohomana laso ndo woho wayotekola wekamu akɔ. Koka monga ohomba nshikikɛ dui dialangaso mbeya dimɛna, akoka walɔmbama dia dieya ndo anto wakoka tokimanyiya kana tosukɛ.

Ndjadjɛ eyango wa lo nyuma akakeketsha Geoffrey, ombatshi mboka wa laande w’edjedja wa l’ɛtshi ka nkɛtɛ kakangana etale l’osomba ka lo wodja ɔmɔtshi wa l’Asie. Nde akavusha wadɛnde la shashimoya. L’ɔkɔngɔ wa nde ndjaoka yema dimɛna, nde akɔshi yɛdikɔ ya ntetemala ndjasha l’olimu ande wa lo ntena tshɛ lo ndjadjɛ eyango. Nde akafunde eyango ande lofunda ndo nde akɔshi yɛdikɔ lo dɔmbɛlɔ dia ntatɛ mbeka l’anto asato Bible la ntondo ka ngɔndɔ nshila. Lushi tshɛ, nde akasɛdingolaka kɛnɛ kosadinde, ndo l’ɔkɔngɔ wa nshi dikumi tshɛ, nde akasɛdingolaka ehamelo ande. Onde nde akakotsha oyango ande? Nde kadimolaka l’ɔngɛnɔngɛnɔ tshɛ ɔnɛ eelo, nɛ dia nde akonge l’ambeki anɛi!

Toyadje eyango wa totshitshɛ

Ekɔ eyango ɛmɔtshi wakokaso mɛna l’etatelo dia hatokoke mbaakotsha. Tony lakatatɛkɛtshi l’etatelo, akɔsaka dia tokamba lo Bɛtɛlɛ aki oko dɔ le nde. Nde aki la kanyi shɔ nɛ lo nshi yande y’ɔlɔngɔlɔngɔ nde aki la lɔsɛnɔ la kɔlɔ ndo nde kondjakimɔ le Nzambi. Koko Tony akayɔsa yɛdikɔ ya nsɛna lo yoho yɔtɔnɛ la mboka ya Jehowa ndo dia nkotsha kɛnɛ kalɔmbama dia batizama. L’ɔkɔngɔ wa nde nkotsha oyango ɔsɔ, nde akayadjɛ oyango wa nkoma ombatshi mboka wa tshanda ndo wa pondjo ndo nde akafunde lo yomb’awui yande adatɛ wakandasangoya ntatɛ. L’ɔkɔngɔ wa nde nkamba oko ombatshi mboka lo tshanda mɔtshi, nde kondjɔsa nto dia nde hakokaki nkamba lo Bɛtɛlɛ.

Sho lawɔ kokaka mpendjahendja eyango aso wa lo nshi yayaye lo totenyi totenyi. Eyango wa totshitshɛ koka tokimanyiya dia ndjokotsha eyango wa weke. Sɛdingolaka mbala la mbala woho watatahame ayotokimanyiya dia mbika washo lo eyango wakatayadjɛ. Nɔmbaka Jehowa mbala la mbala lo dikambo di’eyango aso ayotokimanyiya dia ntshikala lo mboka ka dimɛna. Ɔpɔstɔlɔ Pɔɔlɔ tokeketshaka ate: “Nyotetemale nɔmba.”​—1 Tɛsalɔnika 5:17.

Ekɔ ohomba ndjashikikɛ ndo monga la etete

Oyadi tekɔ la dikongelo di’amɛna ndo la nsaki ka nkotsha eyango aso, teye dia ekɔ eyango ɛmɔtshi wahatakoke nkotsha. Joani Makɔ akakoke monga la lonyangu etena kakatone ɔpɔstɔlɔ Pɔɔlɔ dia nde mbotshindɛ lo lɔkɛndɔ lande la hende la misiɔnɛrɛ! (Etsha 15:37-40) Makɔ akahombe nkondja wetshelo oma lo dui sɔ ndo ntshikitanya oyango ande. Kɛsɔ mɛtɛ mbakandasale. L’ɔkɔngɔ diko, Pɔɔlɔ akayɔtɛkɛta dimɛna lo dikambo diande ndo nde aki nto la diɛsɛ dia monga kaamɛ l’ɔpɔstɔlɔ Petero la Babilɔna. (2 Timɔte 4:11; 1 Petero 5:13) Ondo diɛsɛ dioleki woke diakandakondja ele dia mfunda ɔkɔndɔ wa lɔsɛnɔ ndo olimu wa Yeso.

Etena katatawese eyango wa lo nyuma, sho lawɔ koka mpomana la wekamu. Lo dihole dia mpekɔ, sho la dia mvusola, nsɛdingola ndo ntshikitanya akambo. Naka tambohomana la wekamu, sho la dia ntshɔ otsha la ntondo l’eshikikelo ndo aha mpekɔ. Nkumekanga ka lomba Sɔlɔmɔna toshikikɛka ate: “Yaɛkɛ le Jehowa lo kɛnɛ tshɛ kasalayɛ, ko sangwelo diayɛ diayolowana.”​—Tokedi 16:3.

Koko lo ntena dimɔtshi, ekɔ eyango ɛmɔtshi wahatakoke nkotsha. Ɛnyɛlɔ, hemɔ kana ɛkɛndɛ wa lo nkumbo koka toshimba dia nkotsha eyango ɛmɔtshi. Koko tatohɛke pondjo dia difuto dioleki woke diayotokondja ele lɔsɛnɔ la pondjo, l’olongo kana lo Paradiso ka la nkɛtɛ. (Luka 23:43; Filipɛ 3:13, 14) Ngande wayotolikondja? Ɔpɔstɔlɔ Joani akafunde ate: “Ɔnɛ lasala lolango la Nzambi tshikalaka pondjo.” (1 Joani 2:17) Kaanga mbakoka awui wele la so toshimba dia nkotsha oyango ɔmɔtshi wa laande, sho koka ntetemala ‘mboka Nzambi ka mɛtɛ wɔma ndo nkitanya ɛlɛmbɛ ande.’ (Ondaki 12:13) Eyango wa lo nyuma tokimanyiyaka dia mbika washo l’osalelo wa lolango la Nzambi. Laasɔ, tokambe la wɔ dia ntombola Otungi aso.

[Kiombo]

Eyango wa lo nyuma wa ndjasɛ

○ Mbadiaka Bible lushi la lushi

○ Mbadiaka numɛlɔ tshɛ ka Tshoto y’Etangelo ndo ka Emɔ!

○ Ndowanya alɔmbɛlɔ aso

○ Nkɛnɛmɔla olowa wa nyuma

○ Nkombola waɛsɛ w’olimu

○ Nkoma tomanana l’olimu wa nsambisha ndo wa mbetsha

○ Monga l’akoka wa nsambisha lo telefɔnɛ, lo tshakitudi ndo l’ahole wandawɔ okanda