Enda lokombo l’okidi

SAINT-MORITZ. Onde wɛ mbeyaka lokombo lɔsɔ? Mbeyaka monga ko wɛ lieyaka nɛ dia lɔ lekɔ lushi la fɛtɛ kɛmɔtshi keyama l’andja w’otondo kakatombe oma lo Engadine, okidi ɔmɔtshi wa lo wodja wa Suisse. Koko, Saint-Moritz ekɔ dihole dimɔtshi diokokotɔmaka anto l’edja k’ɛnɔnyi efula dia tenda okidi w’olangala ɔsɔ wele lam’asa akona w’etale wakombama la loonge l’ekama wele lo lɛkɛ la sidɛ ɛstɛ ka wodja wa Suisse suke l’olelo wasawɔ la wodja w’Italie. Lo wekeke akɔ mbele ndo parkɛ, mbuta ate dihole diakokɛwɔ nyama dia lo wodja wa Suisse, ɛtshi ka nkɛtɛ ka dimɛna kele la weho efula w’alɛmbɔlɛmbɔ, esongo ndo nyama yatombola Jehowa, Otungi a Woke. (Osam. 148:7-10) Ngasɔ mbasala ndo kutimɛ yambotshikala yaki l’atei atei wa ntambe 17.

Dikambo dimɔtshi dia lânde diele lo mvudu efula ya l’okidi ɔsɔ mbeyaka nkotola yambalo yayɛ. Mbala efula lokombo la Nzambi fundama  lo mpele kana lo nkuke ya mvudu. Lo ntambe yakete, anto waki la mbekelo ka nɛngaka l’andja wa mvudu lo mfunda awui amɔtshi, nkita pɛmbɛ, nshingola kana lo mata ave wa lɔsɛla. Lanɛ wɛ ekɔ lo mɛna sango dia luudu lɔmɔtshi la lo ngielongelo ya Bever. Ekadimwelo ka kɛnɛ kofundami ele: “Lo ɔnɔnyi 1715. Jehowa ekɔ etatelo ndo Jehowa ekɔ ekomelo. Nzambi mbakatonge diangɔ tshɛ, ndo ndoko ɛngɔ kakinde kotonga.” Eelo, efundelo w’edjedja ɛnɛ wakadje lokombo laki Nzambi mbala hiende y’etondo.

Wɛ koka mɛna efundelo woleki edja lo ngielongelo ya Madulain. Efundelo ɛnɛ mbutaka ɔnɛ: “Osambu 127. Naka Jehowa hahiki luudu, kete wanɛ walohika wambokamba olimu w’okambakamba. Lucius Rumedius. Lo ɔnɔnyi 1654.”

Lande na katanema lokombo laki Nzambi lo sɛkɛ l’okidi ɔsɔ? L’etena kɛmɔtshi kakasalema etshikitanu, Bible kakatondjama lo romanche, ɔtɛkɛta ɔmɔtshi woye oma lo latin wakatɛkɛtamaka la Engadine. Lo mɛtɛ, ɔsɔ aki dibuku dia ntondo diakakadimɔma l’ɔtɛkɛta ɔsɔ. Lam’ele vɔ wakatshutshuyama la kɛnɛ kakawadiaka l’Ɔtɛkɛta wa Nzambi, anto efula wa lo ngielongelo shɔ wakafundaka l’andja wa mvudu yawɔ aha nkombo yawɔ tsho, koko ndo awui w’oma lo Bible, mbidja ndo lokombo laki Nzambi.

Eelo, polo ndo nshi nyɛ efundelo ɛsɔ wekɔ lo ntetemala mbewoya lokombo laki Jehowa ndo mbôtombola ntambe efula l’ɔkɔngɔ w’awui asɔ fundama. Angɛndangɛnda ndo ase ngielongelo ya l’okidi shɔ keketshamaka dia mbeka akambo efula wendana la Jehowa, Nzambi ka diambo efula, lo ntshɔ lo luudu lokina lele la lokombo lande, mbuta ate lo Mbalasa ka Diolelo k’Ɛmɛnyi wa Jehowa ka la Bever.

[Efundelo wɛnya kanga osato wa lo lɛkɛ 7]

© Stähli Rolf A/age fotostock