Kana yimba lo kɛnɛ kambokosalɛ Jehowa

YEMA tshitshɛ l’ɔkɔngɔ wa eolwelo ka Yeso, ambeki ande amɔtshi ahende wakatatshɔka oma la Jerusalɛma otsha la Emayo. Ɔkɔndɔ wa lo Evanjiliɔ wa Luka mbutaka ɔnɛ: “Lam’akawatasawulaka, ndu lam’akawatambwanaka, Jesu ndame akayi lasuki la wo, akatshu kame la wo. Keli ashu awo wakashimbama dia mbêya.” Oma lâsɔ, Yeso akawambola ate: “Aui akona watanyasawula lam’atanyakendakenda? Vo wakemala ki, waki la dundji dia lunyangu.” Lande na kakiwɔ la lonyangu? Ambeki waki l’elongamelo k’ɔnɛ Yeso ayotshungola Isariyɛlɛ l’etena kɛsɔ oma l’ɛlɔmbwɛlɔ k’ase Wedja, koko nde kombatshungola ndo nde akadiakema. Diakɔ diakiwɔ la lonyangu.—Luka 24:15-21; Etsha 1:6.

Yeso akatatɛ nkana l’ambeki ande yimba. “Ndi akatatela uma le Mose, la uma le amvutshi tshe, akâmanya akambu andi fundu uma lu Afundelu tshe.” Lo mɛtɛ, akambo efula w’ohomba ndo wakeketsha mbetawɔ wakasalema etena kakakambaka Yeso olimu ande! Etena kakahokamɛ ambeki elembetshiyelo waki Yeso, lonyangu lawɔ lakayokadimɔ ɔngɛnɔngɛnɔ. L’ɔkɔngɔ la dikɔlɔ dia lushi lɔsɔ, vɔ wakate vɔate: “Undi, etema asu kompeta lam’akandateketaki la su lu mbuka, ndu lam’akandatumanyaki afundelu fundu?” (Luka 24:27, 32) Wetshelo akɔna wakokaso nkondja oma lo kɛnɛ kakasale ambeki waki Yeso kɛsɔ?

Shɛngiya yakɔna yele l’akambo walongamɛso wele watakotshama le so?

Ambeki ahende wakatatshɔka otsha la Emayo waki la lonyangu nɛ dia akambo wakawalongamɛka kokotshama. Kɛnɛ kotami lo Tukedi 13:12 ɔnɛ: “Elungamelu k’engo kahakumi esadi, katukiaka utema kandji” kakakotshama le wɔ. Woho akɔ wâmɛ mbele, anto amɔtshi wa l’atei aso wambokambɛ Jehowa la kɔlamelo tshɛ l’edja k’ɛnɔnyi akumi wakafɔnyaka ɔnɛ dia tokoma lo nshi yaso nyɛ ko ‘fɔnu ka woke’ ambotayaka edja. (Mat. 24:21; Eny. 7:14) Mbokɛmaka dia l’etena kɛnɛ, woho wele akambo asɔ watakotshama mbeyaka mbakonya dia vɔ monga la lonyangu.

Koko, tohɔ dia ambeki ahende asɔ wakayonga l’ɔngɛnɔngɛnɔ nto l’ɔkɔngɔ wa Yeso mbakimanyiya dia vɔ nkana yimba lo prɔfɛsiya yamboshilaka kotshama kânga etena  kakiwɔ la lɔsɛnɔ. Sho kokaka nama ɔngɛnɔngɛnɔ aso wa l’etei k’otema ndo ndɔshana la ɔkɔmwɛlɔ lo yoho yakɔ yâmɛ. Michael, ekumanyi kɛmɔtshi k’Okristo kambohokɔ akambo ate: “Tatokake washo lo kɛnɛ kele Jehowa atasale. Koko tokane yimba lo kɛnɛ kambondoshilaka nsala.” Ɔsɔ ekɔ mɛtɛ dako dia dimɛna efula!

Kɛnɛ kambosala Jehowa

Tɔsɛdingole akambo amɔtshi wa diambo wele Jehowa amboshilaka nsala. Yeso akate ate: “One lambetawo, ndu ndi ayutsha elimu watumutshaka. Ndu elimu wuleki ene mbayundutsha.” (Joa. 14:12) Ɛlɔ kɛnɛ, ekambi waki Nzambi wekɔ lo nkamba olimu woleki woke w’Akristo woho wewɔ atakambemaka. Anto ndekana miliyɔ esambele wekɔ lo nongamɛ dia shimbamɛ lo fɔnu ka woke. Ohokanyiya yema, ndoko lushi lambonga ekambi waki Jehowa wa kɔlamelo efula ngasɔ wokambɛ lo wedja efula wa lo nkɛtɛ k’otondo! Jehowa ambokotsha ɛtɛkɛta wa prɔfɛsiya waki Yeso wendana la “elimu wuleki ene.”

Naa akambo akina wambotosalɛ Jehowa? Nde ambokimanyiya akanga w’etema ɛlɔlɔ dia ntomba oma l’andja wa kɔlɔ ɔnɛ lo yoho ya didjidji ndo mbɔtɔ lo paradiso ka lo nyuma kambondotonga. (2 Kor. 12:1-4) Ohokana yimba lo akambo amɔtshi wendana la paradiso kɛsɔ kele laso. Ɛnyɛlɔ, oka sso lo lɔkɔtɔ layɛ l’ekanda kana lo lɔkɔtɔ la lo Mbalasa ka Diolelo. Enda Index des publications Watch Tower kana lo Wathtower Library. Hokamɛ dramɛ di’oma lo Bible. Ohɔ akambo wakayoke ndo wakayɛnyi lo losanganya la distrikɛ leke kambeta. Lâdiko dia lâsɔ, kana yimba lo lɔngɛnyi la dimɛna lele lam’asaso la anangɛso ndo la akadiyɛso w’Akristo. Ande lokaho lele la Jehowa lo woho watoshande mbo ya ndɛ ya lo nyuma tshavutshavu ndo nkumbo k’onto l’ɔnango kele la ngandji, mbuta ate paradiso ka lo nyuma lee!

Omembi w’esambo Davidi akate ate: “We [Jehowa], [Nzambi k]ami, akambu wa mamba wakayatshi, la tukanyi takayakani lu dikambu diasu, weko efula.” (Osam. 40:5) Eelo, lo nkana yimba lo akambo wa diambo wamboshilaka tosalɛ Jehowa ndo lo tokanyi ta ngandji tele la nde lo dikambo diaso, tayonga la wolo w’oyoyo dia mbikikɛ la kɔlamelo tshɛ l’olimu wakambɛso Jehowa Shɛso lele l’olongo l’otema ɔtɔi.—Mat. 24:13.

[Osato wa lo lɛkɛ 31]

Yeso akakimanyiya ambeki ande dia vɔ nkana yimba lo kɛnɛ kamboshilaka Jehowa nsala lo dikambo diawɔ

[Esato wa lo lɛkɛ 32]

Ohɔ akambo wakayoke ndo wakayɛnyi lo losanganya la distrikɛ leke kambeta