Lekɔ la lowando lo woho wambomokambɛ Jehowa kânga l’atei w’ekakatanu

Kɔndwama oma le Maatje de Jonge-van den Heuvel

LEKƆ l’ɛnɔnyi 98. Lekɔ l’ɔngɛnɔngɛnɔ wa kambɛ Jehowa ɛnɔnyi 70 l’atei w’ɛnɔnyi ɛsɔ, koko mbetawɔ kami kakɔtɔ l’ehemba. L’etena kakalɔmaka Ta dia hende dia l’andja w’otondo, lakatɔlama lo mpango ka lokanu lɛnɛ ele ɔkɔmwɛlɔ wakakonya mbala kɛmɔtshi dia mbɔsa yɛdikɔ yakamayonyangaka l’ɔkɔngɔ. Ɛnɔnyi ɛmɔtshi l’ɔkɔngɔ, lakayohomanaka l’ohemba okina wa wolo efula. Kânga mbakidiɔ ngasɔ, lekɔ la lowando le Jehowa lo diɛsɛ diakandambisha dia mbôkambɛ kânga l’atei w’ekakatanu.

Lɔsɛnɔ lami lakatshikitana lo Ngɔndɔ ka dikumi 1940. Laki la Hilversum, osomba wele lo kilɔmɛtɛlɛ 24 lo sidɛ ka Amsterdam lo wodja wa Pays-Bas. Wodja ɔsɔ wakalɔmbwamaka oma le ase Nazi. Lâsɔ ko lambotshukana ɛnɔnyi etanu dimi la Jaap de Jonge, omɛmi la ngandji ndo taya l’ɔna womoto laki l’ɛnɔnyi esato lakatɔlɛ Willy. Takadjasɛ suke la nkumbo kɛmɔtshi k’ase wola ndo kaki l’okakatanu efula dia ndesha anawɔ enanɛi. Koko, vɔ wakahangia ndo wakaleshaka ɔlɔngɔlɔngɔ ɔmɔtshi wakayodjasɛ la wɔ edja. Lakayambola nte: ‘Lande na ketawɔwɔ mɛmba wotsho okina wa ngasɔ?’ Etena kakamâtɔlɛ yangɔ ya ndɛ, wakambutɛ dia ɔlɔngɔlɔngɔ ɔsɔ aki ombatshi mboka. Nde akambutɛ akambo wendana la Diolelo diaki Nzambi ndo ɛtshɔkɔ wayodiela. Kɛnɛ kakamoke kɛsɔ kakamunanda efula ndo aha la ntshimbatshimba, laketawɔ akambo wa mɛtɛ. Paka ko ɔnɔnyi akɔ mbakamayakimɔ le Jehowa ndo mbakamabatizama. Ɔnɔnyi ɔtɔi l’ɔkɔngɔ wa batismu kami, omɛmi nde lawɔ aketawɔ akambo wa mɛtɛ.

Kânga mbakimi komonga l’ewo k’efula k’awui wa lo Bible, lakashihodia dia lo nkoma Ɔmɛnyi wa Jehowa, lakɔtɔ l’okongamelo wakashimbama oma le lɛɛta. Lakeyaka nto dia efula k’Ɛmɛnyi wa Jehowa wamboshilaka tomama lo lokanu l’ɔtɛ wa nsambisha losango la Diolelo. Kânga mbakidiɔ ngasɔ, aha la ntshimbatshimba lakatatɛ nsambisha lo luudu la luudu ndo dimi l’omɛmi taketawɔ dia pangiyaka ambatshi mboka ndo emendji weteta lakaso. Luudu laso lakayoyala nto dihole diakombamaka ekanda walembetshiya Bible wakatelaka anangɛso l’akadiyɛso w’oma la Amsterdam. Vɔ wakɔmbaka abuku la dipɛma ko mɛmba l’akalo awɔ wakɛmbaka wetsho efula. Ande ngandji ndo dihonga diaki l’anangɛso wakɛmbaka ekanda ɛsɔ lee! Vɔ wakadjaka nsɛnɔ yawɔ lo wâle lo wahɔ w’anangɛwɔ.—1 Joa. 3:16.

“Ima, onde wɛ ayoviya?”

Ngɔndɔ oko shamalo l’ɔkɔngɔ wa batismu kami, apulushi asato wakɔtɔ lo luudu laso. Vɔ wakasɛngɛ lo ahole tshɛ wa lo luudu. Kânga mbakiwɔ kombishola dihole diakatombaka ekanda, vɔ wakashola abuku amɔtshi wakatashɛ l’ɛse ka mbeto. Vɔ wakambutɛ dia mbayela lo biro ka apulushi ka la Hilversum. Etena kakamakumbatɛ ɔnami dia mbolaka, nde  akamimbola ɔnɛ: “Ima, onde wɛ ayoviya?” Lakokadimola nte: “Kema hatoviya, ɔnami.” Koko, ngɔndɔ 18 ya pâ yakahombe mbeta la ntondo ka dimi ndjɛnana la nde nto.

Owandji ɔmɔtshi w’apulushi akatshu la mi lo kawolo otsha la Amsterdam dia tonombosha. Lo kilombo, vɔ wakatshutshuya dia dimi mbishola anangɛso asato w’oma la Hilversum dia vɔ wekɔ Ɛmɛnyi wa Jehowa. Dimi lakate nte: “Ɔtɔi oto layotosondjaka abɛlɛ mbeyami, akina halowaeye.” Nde akate mɛtɛ nɛ dia ɔnangɛso ɔsɔ akasondjaka abɛlɛ. Dimi lakakotsha nte: “Dia mbeya kana nde ekɔ Ɔmɛnyi wa Jehowa, nyowombole ndamɛ, aha dimi.” Etena kakamatone dia nkotsha awui akina oma lâsɔ, vɔ wakakɔmɔla l’elungi ndo wakambidje lo lokanu lo vuduvudu mɔtshi yakamatshikala ngɔndɔ hiende. Etena kakayeyaka omɛmi lɛnɛ akimi, nde akayombela ahɔndɔ ndo diangɔ dia ndɛ. Oma lâsɔ, lo Ngɔndɔ k’enanɛi 1941, wakatome lo Ravensbrück, mpango ka lokanu ka kɔlɔ efula kakawadjaka wamato kaki lo kilɔmɛtɛlɛ oko 80 lo nɔrdɛ ka Berlin lo wodja w’Allemagne.

“Yakeketsha kadiyɛmi”

Etena kakatakome, wakatotɛ dia sho kokaka nkalola la ngelo naka sho nsinya mukanda wɛnya dia tambɔsɛka mbetawɔ kaso. Koko, dimi kosinya. Lakahombe nkimɔ diangɔ diami ndo nkolola ahɔndɔ ami lo luudu lengolawɔ ahɔndɔ ndo lɛkɔ lakatane akadiyɛso amɔtshi w’oma la Pays-Bas. Wakatosha ahɔndɔ w’ase mpango k’ase lokanu waki la trianglɛ k’etokotoko, dɔnga dia dikale, dikɔhɔ la lotshibi. Otsho wa ntondo, takalale lo lokanu lakawadjaka anto lo tshanda mɔtshi. Lɛkɔ mbakamatotondɔ la delo mbala ka ntondo ntatɛ lam’akamandama. Lakayambola nte: “Kakɔna kayanga komɛmi? Nshi ngana yayomotshikala lanɛ?” Lo mɛtɛ, l’etena kɛsɔ diɔtɔnganelo diasami la Jehowa komonga wolo, nɛ dia lâsɔ ko leke ngɔndɔ ngana tsho oma la mbeya akambo wa mɛtɛ. Lakahombe mbeka akambo efula. La wedi a pindju, wonya w’apɛlɔ, kadiyɛso kɛmɔtshi k’oma la Hollande akɛnyi dia lekɔ la lonyangu. Nde akambutɛ ate: “Yakeketsha kadiyɛmi, yakeketsha! Kakɔna kakoka tosalɛ kɔlɔ?”

L’ɔkɔngɔ w’apɛlɔ, wakatɔtɔlɛ lo lokanu lokina ndo lɛkɔ akadiyɛso nkama w’oma la Allemagne ndo oma la Pays-Bas wakatolongola. Lâsɔ ko akadiyɛso amɔtshi w’oma la Allemagne wambetsha ndekana ɔnɔnyi w’otondo lo lokanu lɔsɔ. Lo mɛtɛ, monga kâmɛ la wɔ akakeketsha. Dimi lakambe efula lo woho wele lokanu laki akadiyɛso laki pudipudi efula oleki nkanu nkina tshɛ ya lo mpango. Lâdiko dia pudipudi, lokanu laso lakeyamaka nto oko dihole diele komonga ndoko wovi, ndoko ewanu, ndo anto kɔndɔka ata. Kânga mbakawatɛnyaka pâ efula lo mpango ka lokanu kɛsɔ, lokanu laso laki oko disɛnga dia pudipudi l’atei wa ndjale ka mindo efula.

Lɔsɛnɔ la lushi la lushi lo mpango ka lokanu

Lo mpango, takakambaka olimu efula ndo takalɛka yema tshitshɛ. Takahombaka mbetɔ lo eshidi etanu kokele wa pindju ndo yema tshitshɛ oma lâsɔ, apɛlɔ wakatatɛka. Alami wakatemadjaka l’andja suke la wonya a tango w’otondo oyadi lo mvula kana lo yanyi. Lo eshidi etanu wa dikɔlɔ kokele, l’ɔkɔngɔ wa nkamba olimu wa wolo lushi l’otondo, takatshɔka l’apɛlɔ mbala ka hende. Oma lâsɔ, takalɛka yema ya mapa la oshi ko sho ntshɔ tolala demba yɛkɛ.

 Oma lo Lushi l’ɔtɔi polo la samalo, wakatɔlaka dia tokamba l’ekambɔ lɛnɛ akamahombaka mina eponga la hiaka ndo nsola lokoto la nsombo. Kânga mbele olimu wakikɔ wolo ndo mindo, lakakokaka mbokamba lushi la lushi nɛ dia lâsɔ ko leke osekaseka ndo laki la wolo efula. Ndo nto, lo memba esambo wele la losango la lo Bible etena kakamakambaka, lakayakeketshaka. Koko, lushi tshɛ lakohɔka omɛmi ndo ɔnami.

Wakatoshaka diangɔ dia ndɛ yema tshitshɛ, koko sho tshɛ takasalaka la wolo dia momba yema ya mapa lushi tshɛ dia sho ndjonga la yangɔ ya ndɛ Lushi la lomingu etena kakatongaka la diaaso dia nkɛtshanya awui wa lo Bible kâmɛ. Sho komonga ndoko la okanda walembetshiya Bible, koko lakahokamɛka la yambalo tshɛ etena kakakɛtshanyaka akadiyɛso w’epalanga wa kɔlamelo w’oma la Allemagne akambo wa lo nyuma. Takasale ndo Eohwelo ka nyɔi ka Kristo.

Lɔkɔnyɔ, lonyangu ndo ekeketshelo

Lo tena dimɔtshi, wakatotshutshuyaka dia nkamba elimu wakasukɛka ta di’ase Nazi. Lam’ele taki la lomangemange l’awui wa pɔlitikɛ, akadiyɛso tshɛ wakatonaka dia nkamba elimu akɔ ndo dimi lakayele ɛnyɛlɔ kawɔ ka dihonga. Dia tosha dilanya, wakatodimaka mbo ya ndɛ ya nshi mɔtshi ndo takahombaka memala wenya a tango efula lo apɛlɔ. Lo nshi y’ɔwɔ, mbala kɛmɔtshi wakatodihe lo lokanu lɔmɔtshi l’edja ka nshi 40 aha la diangɔ dia ndjakokɛ oma lo tshitshi.

Oko wakiso Ɛmɛnyi wa Jehowa, wakatotɛka mbala la mbala dia wayotokimɔ dia sho nkalola la ngelo naka sho nsinya mukanda wɛnya dia tambɔsɛka mbetawɔ kaso. L’ɔkɔngɔ wa dimi ntshikala la Ravensbrück olekanyi ɔnɔnyi w’otondo, lakayɔkɔmɔka efula. Mposa ka mɛnana la omɛmi ndo ɔnami kakakome wolo diakɔ diakamatshu le alami dia tɔlɔmba mukanda ndo lakasinya dia laya bu Ombeki wa Bible.

Etena kakeye akadiyɛso kɛnɛ kakamasale, amɔtshi wakatatɛ mbewewɔmi. Koko, akadiyɛso ahende w’epalanga w’oma la Allemagne, Hedwig nde la Gertrud wakanyange ndo wakashikikɛ dia vɔ mbokakami ngandji. Etena kakatakambaka kâmɛ lo lokoto la nsombo, la lɔsɛngɔ tshɛ vɔ wakanembetshiya ohomba wa nama olowanyi le Jehowa ndo woho wɛnyaso ngandji kawokaso lo ntona dia nsɛka mbetawɔ kaso. Woho wakawayasha le mi ndo ngandji kele oko k’ombutshi wa womoto kakawambokaka akananda otema ami efula. * Lakeyaka dia kɛnɛ kakamasale kaki kɔlɔ, ndo lakakombolaka dia mbata mukanda wakamasinya. La dikɔlɔ dimɔtshi, lakatɛ kadiyɛso kɛmɔtshi yɛdikɔ yakamɔshi ya mbata mukanda wakamasinya. Ondo olami wa mpango akoke sawo diaso nɛ dia ko dikɔlɔ diakɔ, wakaminya oma lo mpango kɛsɔ ko wakatome lo kawolo otsha la Pays-Bas. Olami ɔmɔtshi wele lâkakoke mbohɔ elungi kande akambutɛ ate: “Wɛ eke Ombeki wa Bible ndo wɛ ayongaka nshi tshɛ Ombeki wa Bible.” Lakôkadimola nte: “Eelo, layongaka nshi tshɛ Ombeki wa Bible, naka Jehowa alanga.” Koko, lakatetemala kanyiya nte: ‘Ngande wakokami ntshika ndjala Ombeki wa Bible?’

Dui dimɔtshi dia lo mukanda ɔsɔ diakataka ɔnɛ: “Lambonyoshikikɛ dia hamongaki nto pondjo kâmɛ la tshunda di’Ambeki wa Bible wa l’andja w’otondo.” Lakeyaka kɛnɛ kakamahombe nsala. Lo Ngɔndɔ ka ntondo 1943, yema tshitshɛ l’ɔkɔngɔ wa dimi nkalola la ngelo, lakatatɛ nsambisha nto. Lo mɛtɛ, otomondama mbala ka hende oma le ewandji w’ase Nazi etena kakamasambishaka akambo wendana la Diolelo diaki Nzambi, tshike wotombisha dilanya dia wolo.

Dia mɛnya Jehowa nsaki k’oma k’ɛse otema kaki la mi ka mbokambɛ la kɔlamelo nto, dimi l’omɛmi taketawɔ dia pangiyaka wanɛ wakɛmbaka ekanda ndo emendji weteta lo luudu laso. Ande ɔngɛnɔngɛnɔ waki la mi dia nkondja diaaso dikina dia mɛnya ngandji kakamokaka Jehowa la ekambi ande lee!

 Dikambo dia kandji efula

Ngɔndɔ ngana la ntondo ka ta nkomɛ, dikambo dimɔtshi dia kandji efula diakatokomɛ dimi l’omɛmi. Lo Ngɔndɔ ka dikumi 1944, ɔnaso akandama la hemɔ ka diphtérie la shashimoya. Hemɔ kakoheke wolo ndo nde akavu l’ɔkɔngɔ wa nshi shato. Nde aki l’ɛnɔnyi esambele eto.

Nyɔi ka tshɔi yaso y’ɔna akatɔkɔmɔla efula. Lo mɛtɛ ehemba wakahomana la mi la Ravensbrück waki anyanya lo mbɛdika la kandji kakamoke etena kakatavusha ɔnaso. Koko, lo tena dia lɔkɔnyɔ sɔ, takakondjaka esambelo oma lo ɛtɛkɛta wele lo Osambu 16:8 wata ɔnɛ: “Latukitshaka [Jehowa] la ntundu kami nshi tshe. Lam’atunduyalaka lu lunya lami la pami, dimi hatudidimaka la woma.” Dimi l’omɛmi takayaɛkɛ tshɛ lo daka diaki Jehowa dia eolwelo. Takatetemala lo akambo wa mɛtɛ ndo takongaka nshi tshɛ l’ohetoheto l’esambishelo ka lokumu l’ɔlɔlɔ. Polo ndo lam’akayovɔka omɛmi lo 1969, nde akakimanyiya dia kambɛ Jehowa l’ɔngɛnɔngɛnɔ.

Ɛtshɔkɔ ndo ɛngɛnɔngɛnɔ

Lo ɛnɔnyi akumi wetshi, dui dimɔtshi diakalekaka mbishami ɔngɛnɔngɛnɔ ele diɔtɔnganelo dia ma ma dia la ekambi wa lo tena tshɛ. Oko wakidiɔ lo nshi ya ta, luudu laso laki nshi tshɛ suke dia nongola emendji weteta la wadɛwɔ etena kakawembolaka etshumanelo kaso. Maarten lele omendji weteta nde la wadɛnde Nel Kaptein wakadjasɛ lakaso ɛnɔnyi 13. Etena kakandama Nel la hemɔ wolo, laki la diɛsɛ dia mbolama lo luudu laso ngɔndɔ shato y’etondo polo lam’akandayovɔka. Diɔtɔnganelo dia la wɔ ndo la anangɛso la akadiyɛso akina wa l’etshumanelo akakimanyiya dia ngɛnangɛna paradiso ka lo nyuma kele la so nshi nyɛ.

Dui dimɔtshi di’ohomba dia lo lɔsɛnɔ lami diakasalema lo 1995 etena kakamalongola leeta la tɔɔtɔ lo eohwelo la Ravensbrück. Lakatohomana la akadiyɛso waki la mi lo mpango ka lokanu wele aya ɛnɔnyi ndekana 50 wakiso hatɛnana! Woho wakimi kâmɛ la wɔ aki dui diahamohɛki ndo diasalanganya otema ndo ɔsɔ aki diaaso dia sho keketshana dia nkongɛ lushi layolɔ wakiso wa ngandji wakavu.

Ɔpɔstɔlɔ Paulo akate lo Romo 15:4 dia ‘oma l’ekikelo ndo oma l’esambelo k’oma l’Afundelo, sho koka monga l’elongamelo.’ Lekɔ lo mboka Jehowa losaka lo woho wakandatosha elongamelo kɛsɔ kakimanyiya dia mbôkambɛ l’ɔngɛnɔngɛnɔ kânga l’atei w’ekakatanu.

[Nɔtɛ ka l’ɛse ka dikatshi]

[Osato wa lo lɛkɛ 10]

Dimi la Jaap lo 1930

[Osato wa lo lɛkɛ 10]

Willy k’ɔnaso lam’akinde l’ɛnɔnyi esambele

[Osato wa lo lɛkɛ 12]

Lo 1995, lakɔtɔ losanganya lakasalanganya otema. Lekɔ l’ɔnɔngɔ wa ntondo, onto la hende oma lo lonya la lɔmɔsɔ