Nyuma k’ekila toshaka wolo wa ntondoya oseka okakatanu tshɛ
Nyuma k’ekila toshaka wolo wa ntondoya oseka okakatanu tshɛ
“Dimi mbeyaka ntsha akambu tshe la wulu wa one latunkikitshaka.”—FIL. 4:13.
1. Lande na kahomana ekambi waki Jehowa la asui efula?
EKAMBI waki Jehowa pomanaka mbala la mbala l’ɔlɔshamelo wa weho la weho. Ekakatanu ɛmɔtshi ndja oma lo munga yaso hita kana oma lo dikongɛ di’akambo diasɛnaso nɛ. Ekina ndja oma lo lohetsho lele lam’asa ekambi waki Nzambi la wanɛ wahokambɛ. (Etat. 3:15) Oma k’etatelo ka ɔkɔndɔ w’ana w’anto, Nzambi okokimanyiyaka ekambi ande wa kɔlamelo dia nshika tanga la ntondo ka ɛhɛnyɔhɛnyɔ wendana l’awui w’ɔtɛmwɛlɔ, tɔsɛngiya t’oma le angɛnyi ndo weho tshɛ w’asui. Nyuma kande k’ekila kokaka tosha ndo sho lawɔ wolo wa nsala ngasɔ.
Nyuma k’ekila tokimanyiyaka dia nshika tanga la ntondo k’ɛhɛnyɔhɛnyɔ w’awui w’ɔtɛmwɛlɔ
2. Naa oyango wele l’ɛhɛnyɔhɛnyɔ wendana l’awui w’ɔtɛmwɛlɔ ndo lo toho takɔna takokawɔ monga?
2 Ɛhɛnyɔhɛnyɔ wendana l’awui w’ɔtɛmwɛlɔ kɛdikɛdi ɔlɔshamelo kana kɔlɔ kasalɛwɔ anto amɔtshi l’ɔtɛ wa mbetawɔ kana dietawɔ diawɔ. Oyango awɔ ele wa dinyadinya dietawɔ diakɔ, nshimba anto dia vɔ monga la diɔ ndo ndanya olowanyi w’ambetawudi. Ɛhɛnyɔhɛnyɔ wekɔ weho efula, tena dimɔtshi vɔ mɛnamaka ndo tena dikina hawɛnama. Bible mbɛdikaka ɛlɔshɛlɔ waki Satana la wa ɔna tambwɛ ndo wa dikuha.—Adia Osambu 91:13.
3. Ngande watɔlɔsha Diabolo oko tambwɛ kana oko dikuha?
3 L’ɛnyɛlɔ ka tambwɛ, Satana mbeyaka tɔlɔsha lo yoho yɛnama l’ekimanyielo k’awui wa ngala, lokanu kana oshimbelo w’olimu aso. (Osam. 94:20) Annuaire watɛkɛta dia akambo wendana l’Ɛmɛnyi wa Jehowa wa nshi nyɛ ndola la ɛkɔndɔ wa weho w’ɛhɛnyɔhɛnyɔ ɛsɔ. L’ahole efula elui w’anto wele la kɛlɛ watshutshuyama oma le ewandji w’ɛtɛmwɛlɔ ɛmɔtshi ndo ase pɔlitikɛ pɛnyahɛnyaka ekambi waki Nzambi. Ɛlɔshɛlɔ wele oko wa tambwɛ ɛsɔ wakakonya anto amɔtshi dia ntshika kambɛ Jehowa. L’ɛnyɛlɔ ka dikuha, Diabolo mbeyaka ndɔsha anto oma lo dihole dia woshɛshɛ dia ndanya tokanyi tawɔ ndo mbakesa dia vɔ nsala lolango lande. Ɛlɔshɛlɔ ɛsɔ wekɔ l’oyango wa mbɔdia kana ndanya lonyuma laso, koko lo tshimbo ya nyuma k’ekila, sho kokaka nshika tanga la ntondo ka toho tɔsɔ t’ɛlɔshɛlɔ.
4, 5. Naa yoho yoleki dimɛna ya ndjalɔngɔsɔla dikambo di’ɛhɛnyɔhɛnyɔ, ndo lande na? Sha ɛnyɛlɔ.
4 Nkanyiya woho w’ehemba wayohomana la so bu yoho ya dimɛna ya ndjalɔngɔsɔla dia ehemba akɔ. Nɛ dia hatokoke mbeya woho w’ehemba wayohomana laso. Ɔnkɔnɛ, hatotokondja etombelo w’ɛlɔlɔ lo ndjakiyanya dikambo di’akambo wele ondo hawototokomɛ. Koko, ekɔ dui dimɔtshi diakokaso nsala. Anto efula wakatondoya dia mbikikɛ ɛhɛnyɔhɛnyɔ wakasale dikambo sɔ lo nkana yimba lo bɛnyɛlɔ di’ekambi waki Jehowa wa kɔlamelo diɔkɔndwami l’Afundelo ndo lo wetshelo la ɛnyɛlɔ ka Yeso. Kɛsɔ akâkimanyiya dia mfudia ngandji kokawɔ Jehowa. Ngandji kɛsɔ lo wedi atɔ kâkimanyiya dia nshika tanga la ntondo ka weho w’ehemba tshɛ.
5 Tɔshi ɛnyɛlɔ ka akadiyɛso ahende wa lo wodja wa Malawi. Dia mbatshutshuya dia vɔ nsomba kartɛ ka tshunda dimɔtshi dia pɔlitikɛ, olui w’anto wa ngala wakâkɔmɔla, wakâkolola ahɔndɔ ndo wakawanɛ dia mbeyana la wɔ la wolo. Olui w’anto ɔsɔ wakâkese lo mbatɛ ɔnɛ kânga ase nkumbo ka Bɛtɛlɛ wamboshila nsomba kartɛ yawɔ. Akadiyɛso akawasale? Vɔ wakate ɔnɛ: “Sho Jehowa Nzambi mbakambɛso. Ɔnkɔnɛ naka anangɛso wa lo Bɛtɛlɛ wambosomba kartɛ, ɔsɔ diawaenda. Sho hatosombaki pondjo oyadi kânga nyoyanga dia todiaka.” L’ɔkɔngɔ wa vɔ mamɛ akambo wa mɛtɛ la dihonga tshɛ, wakakimɔ akadiyɛso asɔ.
6, 7. Ngande washa Jehowa ekambi ande wolo dia vɔ ndɔshana l’ɛhɛnyɔhɛnyɔ?
6 Ɔpɔstɔlɔ Paulo akɛnyi dia Akristo wa la Tɛsalɔnika waketawɔ losango l’akambo wa mɛtɛ ‘l’atei w’asui efula,’ koko “la ongenongeno a nyuma k’[ekila].” (1 Tes. 1:6) Lo mɛtɛ, efula k’Akristo wa nshi nyɛ ndo wa lo nshi yakete wakahomana ndo wakakikɛ ɛhɛnyɔhɛnyɔ mbutaka dia l’etena kakaleke ehemba wolo, vɔ waki la wɔladi wa l’etei k’otema wele dionga dimɔtshi dia lo olowa wa nyuma k’ekila kaki Nzambi. (Ngal. 5:22) Wɔladi ɔsɔ lo wedi awɔ akalame etema awɔ ndo ekanelo kawɔ ka yimba. Eelo, Jehowa kambaka la wolo wakamba la nde olimu dia mbisha ekambi ande wolo wa ndɔshana l’ekakatanu ndo nsala akambo la lomba etena kewɔ l’asui. *
7 Anto watenda mambaka efula etena kɛnawɔ woho wayashikikɛ ekambi waki Nzambi dia nama olowanyi awɔ kânga etena kalɔshamawɔ lo yoho ya wolo efula. Anto mɛnaka dia Ɛmɛnyi wa Jehowa ndodiama la wolo woleki wɔnɛ wokongaka l’onto ndo ngasɔ mbediɔ mɛtɛ. Ɔpɔstɔlɔ Petero toshikikɛka ɔnɛ: “Naka nyu nyambotengama dia lukumbu la Kristu, nyu nyeko la otshoko, ne dia nyuma ka lutumbu, ndu ka [Nzambi] keko la nyu.” (1 Pet. 4:14) Woho wahɛnyahɛnyamaso lo woho wasukɛso ɛlɛmbɛ wosembwe mɛnyaka dia sho mbetawɔmaka le Nzambi. (Mat. 5:10-12; Joa. 15:20) Woho wɛnama dia Jehowa tɔtshɔkɔlaka ɔsɔ toshaka mɛtɛ ɔngɛnɔngɛnɔ w’efula!
Nyuma k’ekila toshaka wolo wa nshika tanga la ntondo ka tɔsɛngiya t’oma le angɛnyi
8. a) Kakɔna kakakimanyiya Jashua la Kalɛba dia nshika tanga la ntondo ka tɔsɛngiya t’oma le angɛnyi awɔ? b) Wetshelo akɔna wakokaso nkondja oma lo ɛnyɛlɔ kaki Jashua la Kalɛba?
8 Ɔlɔshamelo ɔmɔtshi wa wolo wa lo mayɛlɛ wahomba Akristo mbikikɛ ele tɔsɛngiya ta kɔlɔ t’oma le angɛnyi. Koko, lam’ele nyuma kaki Jehowa ndeka yimba y’andja ɔnɛ wolo, sho kokaka nshika tanga la ntondo k’anto watɔnyɔla wadianganya akambo wa kashi lo lokombo laso ndo wayanga dia totshutshuya dia sho nsala akambo oko vɔ. Ɛnyɛlɔ, kakɔna kakakimanyiya Jashua la Kalɛba diaha nsanga lolemi l’atɔpi akina dikumi wakatomama dia tokemba nkɛtɛ ya Kanana? Nyuma k’ekila akawasha ‘yimba’ kana ekanelo kotshikitanyi la k’asekawɔ.—Adia Walelu 13:30; 14:6-10, 24.
9. Lande na kahomba Akristo mbetawɔ dia ntshikitana l’anto efula?
9 Woho akɔ wâmɛ mbele nyuma k’ekila akasha apɔstɔlɔ waki Yeso wolo wa nkitanyiya Nzambi lo dihole dia nkitanyiya wanɛ wakɔsamaka oma le anto efula oko embetsha wa l’ɔtɛmwɛlɔ wa mɛtɛ. (Etsha 4:21, 31; 5:29, 32) Anto efula kombolaka nsala kɛnɛ kasala anto wâdingi dia mbewɔ ekakatanu. Koko, mbala efula Akristo wa mɛtɛ mamɛka la wolo tshɛ kɛnɛ keyawɔ dia kekɔ ɔlɔlɔ. Kânga mbediɔ ngasɔ, oma l’ekimanyielo ka wolo waki Nzambi wakamba la nde olimu, vɔ hawoke wɔma wa ntshikitana l’anto akina. (2 Tim. 1:7) Tɔsɛdingole dikambo dimɔtshi diahatahombe mbetawɔ sɛngiyama oma le angɛnyi.
10. Okakatanu akɔna wakoka mpomana l’Akristo amɔtshi?
10 Akɛnda amɔtshi mbeyaka monga l’okakatanu etena keyawɔ dia osekawɔ ɔmɔtshi akasale dui dia kɔlɔ diahetawɔma la Afundelo. Vɔ mbeyaka mbɔsa dia nyanga dia ɔngɛnyi awɔ nkondja ekimanyielo ka lo nyuma ayokonya diaha nde ndjɛkɛ etema le wɔ, ɔnkɔnɛ vɔ tonaka dia mbewoya anto akina dui sɔ l’ɔtɛ wa kɔlamelo ya kɔlɔ yele la wɔ otsha le ɔngɛnyi awɔ. Otshi wa kɔlɔ ɔsɔ mbeyaka ntshutshuya angɛnyi ande dia vɔ mbishɛ kɔlɔ kande. Eelo, akɛnda pomanaka mbala efula la weho w’akambo wa ngasɔ. Ndo epalanga ɛmɔtshi mbeyaka mɛna wolo nsawola la dikumanyi dia l’etshumanelo lo kɛnɛ kendana la pɛkato kakasale ɔngɛnyi awɔ kana ose nkumbo ɔmɔtshi. Ko kakɔna kahomba Akristo wa mɛtɛ nsala la ntondo ka tɔsɛngiya ta ngasɔ?
11, 12. Naa yoho yoleki dimɛna ya nsala naka ose etshumanelo ɔmɔtshi ambokotɛ diaha mbishola kɔlɔ kande, ndo lande na?
11 Tokane yimba la ɛnyɛlɔ kɛnɛ. Tɔshi dia Alex, ɔnangɛso leke dikɛnda ambeya dia Steve ka ɔngɛnyi ande wa l’etshumanelo ekɔ la mbekelo ka mendaka esato wɛnyawɔ anto etakataka. Alex ambotɛ Steve dia nde ekɔ lo ndjakiyanya efula lo dikambo dia kɛnɛ kasalande. Koko, Steve hadje yimba lo kɛnɛ kawotɛnde. Etena kambowotɛ Alex dia nde tosawola la dikumanyi dikambo sɔ, Steve ambowotɛ ɔnɛ naka wɛ ekɔ mɛtɛ ɔngɛnyi ami, kete wɛ hatofunda le dikumanyi. Onde Alex pombaka mboka wɔma dia lɔngɛnyi lawɔ layohembɔ? Nde mbeyaka ndjambola ɔnɛ ngande wayowɔsa dikumanyi naka Steve manguna. Koko, dikambo sɔ hadiotɔlɔngɔswama naka Alex hadishodi nɛ dia diɔ mbeyaka ndjokonya dia Steve ndjoshisha diɔtɔnganelo diasande la Jehowa. Alex ayosala dimɛna dia mbohɔ dia “woma w’untu watuwambaka djunga. Keli one latekamaka [Jehowa], ayushimbamela.” (Tuk. 29:25) Kakɔna nto kahomba Alex nsala? La ngandji tshɛ, nde pombaka nsawola la Steve ndo mbɛnya kɔlɔ kande. Dui sɔ nɔmbaka dia monga la dihonga. Koko, mbeyaka monga ko mbala kɛsɔ Steve ayetawɔ dia vɔ nsawola dimɛna lo kɛnɛ kendana la dikambo sɔ. Alex pombaka nkeketsha Steve nto dia nde tosawola la dikumanyi ndo mbotɛ dia naka nde hasadi dikambo sɔ lo nshi ngana, kete Alex ndamɛ ayotɛ dikumanyi.—Lew. 5:1.
12 Naka wɛ ambohomana l’okakatanu wa ngasɔ, kete mbeyaka monga ko l’etatelo ɔngɛnyi ayɛ hatɔngɛnangɛna welo wadjayɛ dia mbokimanyiya. Koko, l’edjedja ka wonya nde mbeyaka ndjoshihodia dia kɛnɛ kasalayɛ kekɔ dia wahɔ ande. Naka onto latatakɔ mboka nongola ekimanyielo ndo kietawɔ, kete nde mbeyaka monga la lowando le yɛ l’ɔtɛ wa dihonga ndo kɔlamelo yayɛ. Lo wedi okina, naka nde komalɛ, onde nde ekɔ mɛtɛ woho w’ɔngɛnyi wakombolayɛ? Ngɛnyangɛnya Jehowa Ɔngɛnyi aso woleki woke mbele dui dia dimɛna dia nsala. Etena kawetshaso lo dihole dia ntondo, anto akina wawoka ngandji wayotɔlɛmiya l’ɔtɛ wa kɔlamelo yaso ndo wayokoma angɛnyi aso w’eshika. Hatohombe pondjo tshikɛ Diabolo dihole l’etshumanelo k’Akristo. Naka sho nsala ngasɔ, kete tayonyangiya nyuma k’ekila kaki Jehowa. Koko, sho salaka akambo lo yoho yɔtɔnɛ la tɔ lo nsala la wolo dia nama etshumanelo k’Akristo pudipudi.—Ef. 4:27, 30.
Nyuma k’ekila toshaka wolo wa mbikikɛ weho tshɛ w’asui
13. Weho akɔna w’asui wahomana l’Ɛmɛnyi wa Jehowa, ndo lande na kamboleka awui asɔ salema nshi nyɛ?
13 Asui kokaka mɛnama lo weho efula, vɔ kokaka mendana la ekakatanu wendana la ekondjelo, oshishelo w’olimu, mpokoso y’oma lo diangɔ diakatongama, nyɔi ka wakiso wa ngandji ndo hemɔ ya wolo. Lam’ele tekɔ lo nsɛna lo “tena dia wulu,” sho kokaka nongamɛ dia lo weho akɔ tshɛ, tayohomana la weho ɛmɔtshi w’ehemba. (2 Tim. 3:1) Etena kayotokomɛ dikambo sɔ, hatohombe nsaka lokomba nɛ dia nyuma k’ekila kokaka tosha wolo wa mbikikɛ weho tshɛ w’asui.
14. Kakɔna kakakimanyiya Jɔbɔ dia mbikikɛ asui?
14 Jɔbɔ akadiɛnɛ la asui wa weho efula. Nde akashisha diangɔ diande, angɛnyi ande, akavusha anande, akatate hemɔ ndo wadɛnde akayoshisha wɛkamu waki la nde le Jehowa. (Jobo 1:13-19; 2:7-9) Koko, Jɔbɔ akɛnyi dia Elihu aki mɛtɛ osambi w’oshika. Losango lande ndo kɛnɛ tshɛ kakataka Jehowa lo dikambo dia Jɔbɔ aki ɔnɛ: “Ukungi, ukani yimba lu akambu wa mamba wa [Nzambi]!” (Jobo 37:14) Kakɔna kakakimanyiya Jɔbɔ dia mbikikɛ ehemba? Ndo kakɔna kakoka tokimanyiya dia mbikikɛ ehemba? Ele mbohɔ ndo nkana yimba lo toho totshikitanyi takɛnama wolo ndo nyuma k’ekila kaki Jehowa. (Jobo 38:1-41; 42:1, 2) Ondo sho kokaka mbohɔ tena dimɔtshi dia lo lɔsɛnɔ laso diakatɛnyi woho wakayasha Nzambi le so l’onto ndo l’onto. Polo ndo ɛlɔ kɛnɛ, nde âkayasha le so.
15. Kakɔna kakakimanyiya ɔpɔstɔlɔ Paulo dia mbikikɛ ehemba?
15 Ɔpɔstɔlɔ Paulo akakikɛ asui efula wakadje lɔsɛnɔ ndo mbetawɔ kande lo wâle. (2 Kor. 11:23-28) Ngande wakandalame wɛdimu ndo wakandashikimala lo tena dia pâ sɔ? Ele lo ndjaɛkɛ le Jehowa lo dɔmbɛlɔ. Lo tena di’ehemba diele ondo wakokonya lo ndjakema, Paulo akafunde ɔnɛ: “Koko owanji aaki nsuke lami ndo akakekeca wooho wakamakoke mbewoya losango wooho wa kokele ndo mbolookiya lee ase weja cɛɛ. Ko lakatombe oma l’onyɔ wa kimbwee.” (2 Tim. 4:17, Dyookaneelo dy’Oyooyo) Ɔnkɔnɛ, oma lo kɛnɛ kakôkomɛ, Paulo akakoke nshikikɛ asekande ambetawudi dia takawahombe ‘ndjakananya amboleka.’—Adia Filipi 4:6, 7, 13.
16, 17. Sha ɛnyɛlɔ kɛnya woho washa Jehowa ekambi ande wolo wa ndɔshana l’asui ɛlɔ kɛnɛ.
16 Ombatshi mboka ɔmɔtshi welɛwɔ Roxana akɛnyi woho wasukɛ Jehowa ekambi ande. Etena kakandalɔmbɛ owandji ande w’olimu dikimɔ dia tɔtɔ losanganya lɔmɔtshi la distrikɛ, nde akokadimola la kɛlɛ ate naka wɛ ntshɔ kete wɛ ayomɔ l’olimu. Roxana akatshu ndo akalɔmbaka Jehowa l’etete tshɛ diaha nde nshisha olimu ande. L’ɔkɔngɔ diko, nde akayaoke dimɛna. Oko wakandolake, Lushi l’ɔtɔi l’ɔkɔngɔ wa losanganya mbeta, owandji ande akawonya l’olimu. Roxana akatshimbe wɔɔngɔ efula. Nde aki l’ohomba w’olimu ɔsɔ nɛ dia kânga mbaki lofuto yema tshitshɛ, vɔ wakokimanyiyaka dia nkotsha ehomba w’ase nkumbo kande. Nde akalɔmbɛ nto, ndo akakane yimba ɔnɛ Nzambi akakotshɛ ohomba wa lo nyuma lo losanganya, ɔnkɔnɛ nde ayokotshɛ ndo ehomba ami wa lo demba. Lam’akandatakalolaka otsha la ngelo, Roxana akɛnyi wofundji la soko dia kɔpanyi kɛmɔtshi ɔnɛ: “Tekɔ l’ohomba w’ase olimu” wele la diewo, ko nde akayange olimu lo kɔpanyi kakɔ. Kânga mbakandɛnyi dia nde bu la diewo, owandji w’olimu aketawɔ dia mbɔsa l’olimu ndo difuto diande diaki nɛ diakandalongolaka ntondo ndodia l’ahende. Roxana akashihodia dia nde ambokondja ekadimwelo k’alɔmbɛlɔ ande. Koko, kɛnɛ kakaleke tshɛ ɔlɔlɔ le nde ele nde aki l’akoka wa nsambisha ase olimu akina lokumu l’ɔlɔlɔ. Atanu wa l’atei awɔ, mbidja ndo owandji w’olimu, waketawɔ akambo wa mɛtɛ ndo wakabatizama.
17 Lo tena dimɔtshi, mbeyaka mɛnama oko Nzambi hakadimola lo alɔmbɛlɔ aso lo wonya kana woho walongamɛso. Naka ngasɔ, kete aha la tâmu ɔkɔkɔ ɔmɔtshi w’oshika wekɔ. Jehowa mbeyaka ɔkɔkɔ akɔ, koko sho mbeyaka ndjeya ɔkɔkɔ akɔ paka lo nshi yayaye. Sho koka monga l’eshikikelo dia Nzambi hakalɛ ekambi ande wele la kɔlamelo.—Heb. 6:10.
Nyuma k’ekila tokimanyiyaka dia tondoya ekakatanu ndo ehemba
18, 19. a) Lande na kakokaso nongamɛ dia tayohomana l’ekakatanu ndo l’ehemba? b) Ngande wakokaso ntondoya ekakatanu?
18 Ekambi waki Jehowa hawokashimɔ lam’ahomanawɔ l’ehemba, ɔkɔmwɛlɔ, ɛhɛnyɔhɛnyɔ ndo tɔsɛngiya t’oma le angɛnyi. Andja ɔnɛ wekɔ lo tohetsha. (Joa. 15:17-19) Koko, nyuma k’ekila kokaka tokimanyiya dia ntondoya ekakatanu tshɛ wakoka mpomana la so l’olimu wakambɛso Nzambi. Jehowa hatetawɔ dia sho pembama lo yɛdikɔ yahatakoke mbikikɛ. (1 Kor. 10:13) Nde hatokalɛki kana totshika. (Heb. 13:5) Nkitanyiya Ɔtɛkɛta ande wakasambiyama tokokɛka ndo tokeketshaka. Ndo nto, nyuma kaki Nzambi kokaka ntshutshuya asekaso ambetawudi dia vɔ tosha ekimanyielo keso la tɔ ohomba l’etena kolekiso monga la tɔ ohomba.
19 Nyɛsɔ sho tshɛ totetemale nyanga nyuma k’ekila lo tshimbo ya dɔmbɛlɔ ndo ya wekelo w’Afundelo. Nyɛsɔ totetemale keketshama “la wulu tshe, uku wulu a lutumbu [la Nzambi], dia [sho] ndjala la etetemalu lu memakana, kame la ongenongeno.”—Kol. 1:11.
[Nɔtɛ ka l’ɛse ka dikatshi]
^ od. 6 Dia ntana bɛnyɛlɔ, enda lo Tshoto y’Etangelo ya Ngɔndɔ ka tanu 1, 2001, lɛkɛ 27 ndo Réveillez-vous ! wa Ngɔndɔ ka hende 8, 1993, lɛkɛ 21 ndo 22 lo Falase.
Ngande wayoyokadimola?
• Ngande wakokayɛ ndjalɔngɔsɔla dia ndɔshana l’ɔhɛnyɔhɛnyɔ?
• Ngande wayoyosala naka onto ɔmɔtshi ambokotshutshuya diaha wɛ mbishola pɛkato?
• Eshikikelo kakɔna kakokaso monga la tɔ la ntondo ka weho tshɛ w’asui?
[Ambola wa wekelo]
[Osato wa lo lɛkɛ 28]
Wetshelo akɔna wakokaso nkondja oma le Jashua la Kalɛba?
[Osato wa lo lɛkɛ 29]
Ngande wakokayɛ nkimanyiya ɔngɛnyi ayɛ lakasale pɛkato?