Tɔsake diwala la nɛmɔ oko wediɔ woshasha w’oma le Nzambi
Tɔsake diwala la nɛmɔ oko wediɔ woshasha w’oma le Nzambi
“Uma lu dikambu ne, pami ayutshika shi la nyangu, ayumamana la wadendi, ku vo wayuyala dimba otoi.”—ETAT. 2:24.
1. Lande na kakoka Jehowa nɛmiyama?
JEHOWA NZAMBI Kiɔkɔ ya diwala kokaka mɛtɛ nɛmiyama. Oko wende Otungi aso Nkum’Olongo ndo Shɛso lele l’olongo, Bible mbutaka dia nde mbele Ombishi wa ‘woshasha tshɛ w’ɔlɔlɔ ndo wa kokele.’ (Jak. 1:17; Eny. 4:11) Ɔsɔ ekɔ woho ɔmɔtshi wɛnama ngandji kande ka mamba. (1 Joa. 4:8) Kɛnɛ tshɛ kakandatetsha, kɛnɛ tshɛ katɔlɔmbande, kɛnɛ tshɛ kakandatosha ekɔ paka dia wahɔ aso.—Is. 48:17.
2. Alako akɔna wakasha Jehowa atshukanyi wa ntondo?
2 Bible mbutaka dia diwala diekɔ woshasha ɔmɔtshi ‘w’ɔlɔlɔ’ w’oma le Nzambi. (Ruta 1:9; 2:12) Etena kakandatshukanya Adama la Eva, Jehowa akawasha alako wa shikaa lo woho wakawahombe ntondoya diwala diawɔ. (Adia Mateu 19:4-6.) Otowoyela ɛlɔmbwɛlɔ kaki Nzambi, tshike vɔ wotoyala l’ɔngɛnɔngɛnɔ wa pondjo. Koko, vɔ wakɔnyɔla ɔlɛmbɛ waki Nzambi ndo wakadiɛnɛ l’etombelo wa kɔlɔ w’oma lo dikambo sɔ.—Etat. 3:6-13, 16-19, 23.
3, 4. a) Ngande wahalɛmiya anto efula diwala ndo Jehowa Nzambi ɛlɔ kɛnɛ? b) Bɛnyɛlɔ diakɔna diayangaso nsɛdingola lo sawo nɛ?
3 L’ɛnyɛlɔ k’atshukanyi wa ntondo, ɛlɔ kɛnɛ anto efula wekɔ lo mbɔsa tɛdikɔ tendana la diwala aha la mbidja yimba l’ɛlɔmbwɛlɔ k’oma le Jehowa. Anto amɔtshi mɔnyɔlaka diwala, akina salaka tshɛ dia ndjadjɛ ɛlɛmbɛ wendana la diwala dia nkotsha nsaki yawɔ. (Romo 1:24-32; 2 Tim. 3:1-5) Vɔ mbohɛka dia diwala diekɔ woshasha w’oma le Nzambi ndo woho wahawɔshi woshasha ɔsɔ la nɛmɔ, vɔ hawɔlɛmiya Jehowa Nzambi lakatoshawɔ.
4 Lo tena dimɔtshi, kânga ekambi waki Nzambi tokomaka ko hawoyɔsa diwala woho wadiɔsa Jehowa. Atshukanyi amɔtshi w’Akristo mbɔsaka yɛdikɔ ya nkakitɔna kana ndjaka diwala aha la ɔkɔkɔ w’oma l’Afundelo. Ngande wakokaso mbewɔ dikambo sɔ? Ngande wakoka dako diaki Nzambi diele lo Etatelu 2:24 nkimanyiya atshukanyi w’Akristo dia vɔ nkeketsha diwala diawɔ? Ndo ngande wakoka anto wasangoya dia tshukana ndjalɔngɔsɔla dia dikambo sɔ? Nyɛsɔ tende awala asato w’amɛna wa lo nshi yakafundamaka Bible wɛnya dia monga la dilɛmiyɛlɔ le Jehowa ekɔ dui di’ohomba diakimanyiya dia diwala nomba.
Nyonge la kɔlamelo
5, 6. Dui diakɔna diakakoke mbidja Zɛkariya la Elizabɛtɛ l’ohemba, ndo ngande wakafutama kɔlamelo yawɔ?
5 Zɛkariya la Elizabɛtɛ wakasalaka akambo w’ɛlɔlɔ. Vɔ tshɛ waki la lonyuma l’ɔlɔlɔ. Zɛkariya akakotshaka olimu ande w’ɔlɔmbɛdi la kɔlamelo tshɛ ndo vɔ akɔ ahende wakakitanyiyaka Ɛlɛmbɛ waki Nzambi lo yɛdikɔ yakɛdima l’akoka awɔ. Vɔ mɛtɛ wakasale akambo efula wakokawɔ mandɔma. Koko, otondongaka wɛ akatshu lo luudu la wɔ la Juda, tshike wɛ akakoke mɛna esadi eto dia vɔ komonga la ana. Elizabɛtɛ aki ekomba ndo vɔ akɔ ahende waki waya esombe.—Luka 1:5-7.
6 Lo Isariyɛlɛ w’edjedja, diwotshi akɔsamaka la nɛmɔ di’efula ndo mbala efula nkumbo yakafulanɛka. (1 Sam. 1:2, 6, 10; Osam. 128:3, 4) Pami k’ose Isariyɛlɛ ka lo nshi y’edjedja akakokaka ndjaka diwala la lokeso tshɛ naka wadɛnde hote. Koko, la kɔlamelo tshɛ, Zɛkariya akatshikala la Elizabɛtɛ. Ndo nde ndo wadɛnde ndoko lakayange yoho ya wɔdu ya mbota ana l’andja wa diwala diawɔ. Kânga mbele woho wakiwɔ komonga l’ana akawashaka lonyangu, vɔ wakatetemala monga la kɔlamelo lam’asawɔ ndo l’olimu wakawakambɛka Jehowa. L’edjedja ka wonya, lo yoho ya dihindo, Jehowa akayakimanyiyaka dia vɔ mbota ɔna kânga mbakiwɔ waya esombe.—Luka 1:8-14.
7. Lo yoho yakɔna kina yakakɛnɛmɔla Elizabɛtɛ kɔlamelo otsha le omɛnde?
7 Elizabɛtɛ akakɛnɛmɔla kɔlamelo lo yoho kina. Etena kakotɔ Joani y’ɔnawɔ, Zɛkariya kokoka ntɛkɛta nɛ dia nde akakome lomi l’ɔtɛ wakandadje yema ya tâmu lo kɛnɛ kakawotɛ ondjelo waki Nzambi. Koko, Zɛkariya akewoya wadɛnde kɛnɛ kakawotɛ ondjelo waki Jehowa dia vɔ mbɔlɛ ɔna ɔnɛ: “Joani.” Asukanyi ndo ase nkumbo wakalange mbɔlɛ ɔna lokombo aha la she mbeya. Koko, la kɔlamelo tshɛ Elizabɛtɛ akasukɛ ɛlɔmbwɛlɔ kakawosha omɛnde. Nde akate ate: “Kema; wawole vati: Joani.”—Luka 1:59-63.
8, 9. a) Ngande wakeketsha kɔlamelo diwala? b) Naa toho tɔmɔtshi ta shikaa takoka wadi l’omi mɛnyana kɔlamelo?
8 L’ɛnyɛlɔ ka Zɛkariya la Elizabɛtɛ, atshukanyi wa nshi nyɛ pomanaka l’ekakatanu. Diwala diele atshukanyi bu la kɔlamelo hadiolowana. Tɔkɛnyɔ ta lo demba ta l’asa pami la womoto, esato wɛnyawɔ anto etakataka, loseka ndo awui akina konyaka dia onto nshisha wɛkamu le olonganyi ande ndo dui sɔ kitshakitshaka ngandji kele lam’asawɔ. Lo toho tɔmɔtshi, kɔlamelo ekɔ oko lokombo l’ekokelo lele l’omamu wa luudu lakimanyiya diaha ase kɔlɔ mbɔtɔ ndo dia anto wele l’etei ka luudu ndjaoka lo yema ya lotui tshitshi. Ɔnkɔnɛ, etena konga wadi l’omi la kɔlamelo lam’asawɔ, vɔ kokaka mbidjasɛ kâmɛ aha l’ekakatanu ndo ndihwanɛ etema ndo nsala dia ngandji kawɔ tahamaka. Eelo, kɔlamelo ekɔ ohomba efula.
9 Jehowa akatɛ Adama ate: “Pami ayutshika shi la nyangu, ayumamana la wadendi.” (Etat. 2:24) Kakɔna kalembetshiya dikambo sɔ? Losambi laki la elonganyi la angɛnyi ndo la ewotɔ awɔ pombaka ntshikitana. Olonganyi l’olonganyi pombaka nkamba la wenya ndo la yambalo yande ntondotondo dikambo di’osekande. Wanɛ weke katshukana hawohombe mbetsha angɛnyi la ewotɔ awɔ lo lo dihole dia ntondo lo diwala diawɔ. Ndo vɔ hawokoke mbetawɔ dia ambutshi awɔ mbekama lo tɛdikɔ tɔsawɔ. Ɛlɔmbwɛlɔ k’oma le Nzambi ele di’atshukanyi mamana lam’asawɔ.
10. Kakɔna kayokimanyiya atshukanyi dia vɔ monga la kɔlamelo?
10 Kânga l’atei w’atshukanyi wahasangi ɔtɛmwɛlɔ, kɔlamelo mbelaka etombelo w’ɛlɔlɔ. Kadiyɛso kele l’olonganyi wele kema ombetawudi mbutaka ate: “Dimi kaloyaka Jehowa losaka lo woho wambetshande dia dimi nɛmbɛ omɛmi ndo monga la dilɛmiɛlɔ di’efula otsha le nde. Monga la kɔlamelo lam’asaso ambotokimanyiya dia sho mbidjasɛ ɛnɔnyi 47 wokanaso ngandji ndo walɛmiyanaso.” (1 Kor. 7:10, 11; 1 Pet. 3:1, 2) Ɔnkɔnɛ, sala tshɛ dia olonganyi ayɛ ndjaoka dimɛna. Oma lo ɛtɛkɛta ndo etsha ayɛ, yanga toho ta nshikikɛ olonganyi ayɛ dia nde mbele onto loleki ohomba lo nkɛtɛ k’otondo le yɛ. Lo yɛdikɔ yendana dikambo sɔ la yɛ, tetawɔke dia onto kana ɛngɔ kakɔna tshɛ mbekama lam’asayɛ l’olonganyi ayɛ. (Adia Tukedi 5:15-20.) Ɔnangɛso Ron nde la wadɛnde Jeannette wambodjasɛ l’ɔngɛnɔngɛnɔ tshɛ lo diwala diawɔ ndekana ɛnɔnyi 35 mbutaka ɔnɛ: “Lam’ele sho kotshaka la kɔlamelo tshɛ kɛnɛ katɔlɔmba Nzambi, tekɔ l’ɔngɛnɔngɛnɔ ndo tambotondoya diwala diaso.”
Kâmɛ keketshaka diwala
11, 12. Ngande wakakambe Akula la Piriskila kâmɛ a) la ngelo, b) l’olimu awɔ wa l’emunyi, ndo c) l’olimu w’Okristo?
11 Mbala tshɛ kakatɛkɛtaka ɔpɔstɔlɔ Paulo dikambo di’angɛnyi ande w’eshika, Akula la Piriskila, nde akashilaka nkombo yawɔ vɔ akɔ ahende. Atshukanyi waki kâmɛ asɔ wekɔ ɛnyɛlɔ k’ɔlɔlɔ lo kɛnɛ kakalange Nzambi mbuta etena kakandate dia wadi l’omi pombaka monga “dimba otoi.” (Etat. 2:24) Vɔ wakakambaka kâmɛ la ngelo, l’olimu wa l’emunyi ndo w’Okristo. Ɛnyɛlɔ, etena kakakome Paulo la Kɔrɛtɔ mbala ka ntondo, la ngandji tshɛ Akula la Piriskila wakawelɛ dia nde ndjodjasɛ la wɔ ndo ondo dihole sɔ diakayokomaka l’etena kɛmɔtshi mpango kande lo kɛnɛ kendana la elimu ande. L’ɔkɔngɔ diko lam’akiwɔ l’Ɛfɛsɔ, vɔ wakakambaka la luudu la wɔ dia salaka nsanganya ya l’etshumanelo ndo wakakambaka kâmɛ dia nkimanyiya eyoyo dia vɔ mpama lo nyuma, ɛnyɛlɔ oko Apolo. (Etsha 18:2, 18-26) Atshukanyi waki l’ohetoheto asɔ wakatshu otsha la Rɔma ndo lɛkɔ nto wakatokambaka la luudu la wɔ dia salaka nsanganya ya l’etshumanelo. Oma lâsɔ, vɔ wakakalola l’Ɛfɛsɔ dia tokeketsha anangɛso l’akadiyɛso.—Romo 16:3-5.
12 Lo tshanda mɔtshi, Akula la Piriskila wakakambe nto la Paulo l’olimu wakawakambaka kâmɛ wa salaka mvudu y’apɛma. Ndo lanɛ nto, sho mɛnaka woho wakakambaka atshukanyi asɔ kâmɛ, aha la shɛmanedi kana l’ewanu. (Etsha 18:3) Lo mɛtɛ, etena kakawetshaka kâmɛ l’elimu w’Akristo mbakakimanyiya dia vɔ monga la lonyuma l’ɔlɔlɔ. Oyadi la Kɔrɛtɔ, l’Ɛfɛsɔ kana la Rɔma, vɔ wakeyamaka efula le Akristo w’asekawɔ oko “ekambi lu Kristu Jesu.” (Romo 16:3) Vɔ wakakambaka dihɛka lo dihɛka dia ntɔla olimu w’esambishelo ka Diolelo otsha la ntondo l’ahole tshɛ wakiwɔ.
13, 14. a) Naa akambo amɔtshi wakoka ndɔshana la kâmɛ ka lo diwala? b) Naa awui amɔtshi wakoka atshukanyi nsala dia nkeketsha dimama diawɔ oko wewɔ “dimba otoi”?
13 Lo mɛtɛ, monga l’eyango wâmɛ ndo nkamba elimu kâmɛ keketshaka diwala. (Und. 4:9, 10) Lonyangu ko, ɛlɔ kɛnɛ efula k’atshukanyi hawetsha wenya efula kâmɛ. Vɔ mbetshaka wenya efula l’elimu awɔ wotshikitanyi. Akina mundaka nkɛndɔ y’etale l’elimu awɔ wa l’emunyi kana monɔka lo wedja ekina wa tale dia tokamba elimu ko tomɛka ase nkumbo falanga. Kânga la ngelo, atshukanyi amɔtshi mɛnaka dia vɔ nkakitɔna l’ɔtɛ wa wenya wetshawɔ lo mendaka televiziɔ, kɛnyaka tɔkɛnyɔ tɔmɔtshi kana kambaka la Ɛtɛrnɛtɛ. Onde ngasɔ mbediɔ lo diwala dianyu? Naka eelo, onde hanyokoke nsala etshikitanu dia nyu ndeka mbetsha wenya kâmɛ? Kayotota lo kɛnɛ kendana la elimu wa la ngelo wele oko nkatɛ, nsola alɔnga kana mɔmba sɛkɛ? Onde hanyokoke nkamba kâmɛ dia mbodia ana kana dia nkimanyiya ambutshi anyu waya esombe?
14 Kɛnɛ koleki ohomba ele, mbetshaka wenya kâmɛ mbala la mbala l’akambo wendana l’ɔtɛmwɛlɔ wa Jehowa. Kɛtshanyaka kâmɛ divɛsa dia lushi la lushi ndo salaka ɔtɛmwɛlɔ wa lo nkumbo ekɔ waaso woleki amɛna w’ase nkumbo monga la tokanyi ndo l’eyango wâmɛ. Ndo nto, nyosambishake kâmɛ. Naka kokaka, nyohembe dia nkamba olimu w’ombatshi mboka kâmɛ, oyadi awui wele la nyu nyoshaka paka diaaso dia nsala dikambo sɔ ngɔndɔ ɔtɔi kana ɔnɔnyi ɔtɔi. (Adia 1 Koreto 15:58.) Kadiyɛso kɛmɔtshi kakakambe olimu w’ombatshi mboka kâmɛ l’omɛnde mbutaka ate: “Olimu w’esambishelo aki yoho mɔtshi yakatakokaka mbetsha wenya kâmɛ ndo sawolaka dimɛna. Lam’ele sho tshɛ taki l’oyango wâmɛ wa nkimanyiya anto akina lo nyuma, lakayaokaka dia tekɔ mɛtɛ lo nkamba kâmɛ. Lakaleke ndjaoka suke la nde aha tsho oko omi, koko ndo oko ɔngɛnyi w’ɔlɔlɔ.” Naka wɛ nkamba kâmɛ l’olonganyi ayɛ lo eyango w’amɛna, kete kɛnɛ ketshayɛ lo dihole dia ntondo ndo mbekelo yayɛ yayoyɔtɔnganɛka yema yema la y’olonganyi ayɛ polo ndo lo nyu ndjokoma dia nkanyiya, ndjaoka ndo nsala akambo oko “dimba otoi” l’ɛnyɛlɔ ka Akula la Piriskila.
Nyetsha Nzambi lo dihole dia ntondo lo diwala dianyu
15. Naa dui di’ohomba efula diakimanyiya dia atshukanyi monga l’ɔngɛnɔngɛnɔ lo diwala? Lembetshiya.
15 Yeso akeyaka ohomba wa mbetsha Nzambi lo dihole dia ntondo lo diwala. Nde akɛnyi woho wakatshukanya Jehowa anto wa ntondo. Nde akɛnyi woho waki Adama la Eva l’ɔngɛnɔngɛnɔ etena kakawayelaka ɛlɔmbwɛlɔ kaki Nzambi ndo ekakatanu wa ntondo wakahomana la wɔ etena kakawatshike ndjela ɛlɔmbwɛlɔ kaki Nzambi. Ɔnkɔnɛ, etena kaketshaka Yeso anto akina, nde akakambaka la dako diaki Nzambi diatanema lo Etatelu 2:24. Nde akakotsha ate: “Untu tamamitulaki kene kakamamanya [Nzambi].” (Mat. 19:6) Ɔnkɔnɛ, dilɛmiɛlɔ di’efula otsha le Jehowa ekɔ dui di’ohomba efula dia atshukanyi monga l’ɔngɛnɔngɛnɔ lo diwala. Lo dikambo sɔ, ambutshi waki Yeso wa la nkɛtɛ, Yɔsɛfu nde la Mariya wakatotshikɛ ɛnyɛlɔ k’oshika.
16. Ngande wakɛnya Yɔsɛfu nde la Mariya dia vɔ wakayashaka l’akambo wa lo nyuma lo nkumbo kawɔ?
16 Yɔsɛfu aki la ngandji ndo la dilɛmiyɛlɔ otsha le Mariya. Kam’akandeye dia nde aya la diemi, nde akayange dia mbosalɛ akambo la kɛtshi la ntondo ka ndo ondjelo waki Nzambi ndjôlembetshiya woho wakatshu Mariya diemi. (Mat. 1:18-20) Oko atshukanyi, vɔ wakakitanyiyaka ɔlɛmbɛ waki Kayisa ndo wakayelaka dimɛna Ɛlɛmbɛ wa Mɔsɛ. (Luka 2:1-5, 21, 22) Ndo kânga mbele apami ato mbakadjangemɛ dia tshɔka lo afɛstɔ wa weke w’ɔtɛmwɛlɔ la Jerusalɛma, Yɔsɛfu la Mariya wakatshɔka ɔnɔnyi tshɛ la ase nkumbo kawɔ. (Euh. 16:16; Luka 2:41) Lo yoho shɔ ndo lo toho tokina, atshukanyi wakokaka Nzambi wɔma asɔ wakasale tshɛ dia ngɛnyangɛnya Jehowa ndo wakɛnya dilɛmiɛlɔ di’efula diaki la wɔ l’akambo wa lo nyuma. Diakɔ diele Jehowa akâsɔnɛ dia mbodia Ɔnande l’etenyi ka ntondo ka lɔsɛnɔ lande la la nkɛtɛ.
17, 18. a) Lo toho takɔna takoka atshukanyi mbetsha Jehowa lo dihole dia ntondo lo nkumbo kawɔ? b) Ɛlɔlɔ akɔna wayowokondja lo nsala dikambo sɔ?
17 Onde akambo wa lo nyuma wa ngasɔ mbalɔmbɔla lɔsɛnɔ la nkumbo kayɛ? Ɛnyɛlɔ, etena kɔsanyu tɛdikɔ ta weke, onde nyu nyangaka ntondo atɔndɔ wa lo Bible, nɔmbaka ndo nyangaka tokanyi oma le Akristo wambotshunda? Kana onde nyu nyangaka dia nkandola ekakatanu lo ndjela tokanyi tanyu, t’ase nkumbo kana t’angɛnyi anyu? Onde nyu salaka la wolo dia nkamba l’alako w’eshika watondja ɔhɔmbɔ wa kɔlamelo wendana la diwala ndo la lɔsɛnɔ la nkumbo? Kana onde nyu ndjelaka mbekelo ya lo ngelo kanyu kana alako w’oma le ase andja ɔnɛ wayela anto tshɛ? Onde mbala la mbala nyu nɔmbaka, mbekaka, ndjadjɛka eyango wa lo nyuma ndo tɛkɛtaka mbala la mbala awui wahombanyu mbetsha lo dihole dia ntondo?
18 Lo kɛnɛ kendana l’ɛnɔnyi 50 wambowetsha lo diwala l’ɔngɛnɔngɛnɔ tshɛ, ɔnangɛso Ray mbutaka ɔnɛ: “Ndoko okakatanu wakahomana laso wakiso kokoka ntondoya nɛ dia takatetemala mbetɛ Jehowa ‘ɔkɔdi wa sato’ wa lo diwala diaso.” (Adia Undaki 4:12.) Ɔnangɛso Danny nde la wadɛnde Trina suyaka dikambo sɔ ndo mbutaka ɔnɛ: “Woho wakambɛso Nzambi kâmɛ amboleka nkeketsha diwala diaso.” Aya ɛnɔnyi ndekana 34 wewɔ l’ɔngɛnɔngɛnɔ lo diwala. Naka nyu mbetshaka Jehowa lo dihole dia ntondo lo diwala dianyu, kete nde ayonyokimanyiya dia nyu ditondoya ndo ayonyɔtshɔkɔla efula.—Osam. 127:1.
Totetemale mbɔsa woshasha w’oma le Nzambi la nɛmɔ
19. Lande na kakasha Nzambi anto woshasha wa diwala?
19 Le anto efula ɛlɔ kɛnɛ, ɔngɛnɔngɛnɔ awɔ hita mbele dui dioleki ohomba. Koko, ekambi waki Jehowa hawɛnyi akambo lo yoho shɔ. Vɔ mbeyaka dia diwala diekɔ woshasha w’oma le Nzambi dia nkotsha sangwelo diande. (Etat. 1:26-28) Otondonga Adama la Eva wakɔshi woshasha ɔsɔ la nɛmɔ, tshike nkɛtɛ k’otondo kotonga paradiso koludi l’ekambi waki Nzambi wele l’ɔngɛnɔngɛnɔ ndo la losembwe.
20, 21. a) Lande na kahombaso mbɔsa diwala oko ekila? b) Woshasha akɔna wayotɔsɛdingola lomingu layaye?
20 Kɛnɛ koleki tshɛ ele, ekambi waki Nzambi mbɔsaka diwala oko diaaso dia ntombola Jehowa. (Adia 1 Koreto 10:31.) Oko wambotodiɛna, kɔlamelo, kâmɛ ndo mbetsha Nzambi lo dihole dia ntondo ekɔ akambo w’ɛlɔlɔ wakeketsha diwala. Ɔnkɔnɛ, oyadi wɛ ekɔ lo ndjalɔngɔsɔla dia tshukana, dia nkeketsha kana dia mbitsha diwala diayɛ, wɛ pombaka ntondo mbɔsa diwala oko wediɔ mɛtɛ, mbuta ate yɛdikɔ y’ekila y’oma le Nzambi. Nama dui sɔ lo yimba ayototshutshuya dia nsala kɛnɛ kakokaso nsala dia mbɔsa tɛdikɔ tendana la diwala lo ndjela Ɔtɛkɛta wa Nzambi. Lo nsala ngasɔ, sho mɛnyaka dilɛmiyɛlɔ aha tsho lo woshasha wa diwala, koko ndo le Ombishi awɔ, mbuta ate Jehowa Nzambi.
21 Lo mɛtɛ, aha diwala to mbele woshasha wakatosha Jehowa. Ndo aha diɔ to mbasha ɔngɛnɔngɛnɔ lo lɔsɛnɔ. Lo sawo diaso diayela, tayɔsɛdingola woshasha okina wa nɛmɔ w’oma le Jehowa, mbuta ate lonyemba.
Ngande wayoyokadimola?
• Shɛngiya yakɔna yele la kɔlamelo le Akristo wotshukanyi?
• Lande na kele nkamba kâmɛ keketshaka diwala?
• Naa toho tɔmɔtshi takoka atshukanyi mbetsha Nzambi lo dihole dia ntondo dia nde mbalɔmbɔla?
• Ngande wakokaso mɛnya dilɛmiɛlɔ le Jehowa lele Kiɔkɔ ya diwala?
[Ambola wa wekelo]
[Osato wa lo lɛkɛ 15]
Nkamba kâmɛ kimanyiyaka atshukanyi dia ntshikala kâmɛ