Ambola w’oma le ambadi

Lande na kakomalɛ Mɔsɛ Eliazara nde la Itamara, ana waki Arɔna l’ɔkɔngɔ wa nyɔi kaki Nadaba la Abihu w’anangɛwɔ ndo kakɔna kakayotutshaka kɛlɛ kande?—Lew. 10:16-20.

Yema tshitshɛ l’ɔkɔngɔ wa dioho di’ɛlɔmbɛdi shikikɛma, Jehowa akadiake Nadaba nde la Abihu ana waki Arɔna lo woho wakawela dja ko dja oko olambo la ntondo kande. (Lew. 10:1, 2) Mɔsɛ akatɛ ana waki Arɔna waki kondjakema diaha vɔ ndela anangɛwɔ wakadiakema asɔ. Yema tshitshɛ l’ɔkɔngɔ wa lâsɔ, Mɔsɛ akomalɛ Eliazara nde la Itamara nɛ dia vɔ kɔndɛ wombe a mbudi w’olambo wa pɛkato. (Lew. 9:3) Lande na kakomala Mɔsɛ na?

Ɛlɛmbɛ wakasha Jehowa Mɔsɛ wakataka dia ɔlɔmbɛdi wakalambolaka olambo wa pɛkato akahombaka ndɛ etenyi katɔ lo sɛkɛ dia luudu l’esanganelo la dipɛma. Nsala ngasɔ akɛnyaka dia ɔlɔmbɛdi ambɛmba pɛkato ya wanɛ wokimwe olambo. Koko, naka yema ya dikila di’olambo diakatɔlami lo Dihole di’Ekila, mbuta ate lo etenyi ka ntondo ka ediakelo, kete olambo ɔsɔ takawahombaka ndɛma. Vɔ wakahombaka tshumbama.—Lew. 6:24-26, 30.

Mɛnamaka dia l’ɔkɔngɔ w’akambo wa kandji wakasalema lushi lɔsɔ, Mɔsɛ akɛnyi ohomba wa ndjashikikɛ dia kana wadjango tshɛ waki Jehowa wakakitanyiyama. Etena kakandayosholaka dia wombe a mbudi w’olambo wa pɛkato wakatshumbama, nde akambola Eliazara nde la Itamara la kɛlɛ tshɛ lande na kakiwɔ kɔndɛ nyama kɛsɔ oko wakalɔmbaka ɛlɛmbɛ, nɛ dia dikila diatɔ kɔtɔlama la ntondo ka Jehowa lo Dihole di’Ekila.—Lew. 10:17, 18.

Arɔna akakadimola lo ambola waki Mɔsɛ nɛ dia ondo ɛlɔmbɛdi waki kondjakema ɛsɔ wakasale dikambo sɔ la lotshungɔ lande. Lo menda woho wakadiakema anande ahende, ondo Arɔna akayambola dia kana ɔlɔmbɛdi ɔmɔtshi akakoke ndɛ nyama k’olambo wa pɛkato lushi lɔsɔ la nkum’otema ka pudipudi. Ondo nde akafɔnya dia Jehowa hɔngɛnangɛna dia vɔ kilɛ kânga mbakiwɔ komonga la onongo wa munga kakasale Nadaba nde la Abihu.—Lew. 10:19.

Lo yoho ya lânde, mbeyaka monga ko Arɔna akafɔnya dia lo lushi lɔsɔ etena kakasale ase nkumbo kande elimu awɔ w’ɛlɔmbɛdi mbala ka ntondo, vɔ wakahombe mbidja yimba efula dia ngɛnyangɛnya Nzambi kânga l’akambo woleki totshitshɛ. Koko, lokombo la Jehowa lakashama sɔnyi oma le Nadaba nde la Abihu ndo kɛlɛ ka Nzambi kakayala wolo le wɔ. Ɔnkɔnɛ, mbeyaka monga ko Arɔna akafɔnya dia ase nkumbo k’ɛlɔmbɛdi kakasale pɛkato kɛsɔ takawahombe ndɛ olambo w’ekila.

Mɛnamaka dia Mɔsɛ aketawɔ ekadimwelo wakawosha ɔnango nɛ dia divɛsa sɔ komiyaka ɔnɛ: “Ku lam’akuki Mose aui aso, ndi aketawo.” (Lew. 10:20) Lo mɛtɛ, Jehowa nde lawɔ aketawɔ ekadimwelo wakasha Arɔna.