Dui diasungana mbidja welo lɔkɔ

ƆTƐMWƐLƆ WA LO NKUMBO ndo wekelo wa Bible ekɔ ohomba efula dia mbodia ana “lu elembe la lu wetshelu wa [Jehowa].” (Ef. 6:4) Koko, naka nyekɔ ambutshi, kete nyu mbeyaka dia ana w’akɛnda nɛmbaka esadi eto. Ngande wakokanyu mbakimanyiya dia vɔ mbidjaka yimba etena kasalema Ɔtɛmwɛlɔ wa lo nkumbo? Tɔsɛdingole kɛnɛ kasala ambutshi amɔtshi.

Papa kɛmɔtshi kelɛwɔ George kadjasɛ la Californie lo États-Unis mbutaka ate: “Etena kaki anaso weke akɛnda, dimi la wadɛmi takasalaka la wolo dia nɛndjalɛndja wekelo wa Bible wa lo nkumbo. Tena dimɔtshi, takalɔtaka ahɔndɔ woho wakalɔtaka anto watɛkɛtama l’ɛkɔndɔ wa lo Bible wakatadiaka oma lo Buku di’Ɛkɔndɔ wa lo Bible. Takasalaka ana wa pɔpi ndo diangɔ diele oko tɔɔmbɔ, alɔnga, asaka ndo diangɔ dikina. Takakɛnyaka nto tɔkɛnyɔ t’oma lo Bible t’ɔnɛ: ‘Emi na?’ lo mfunda nkombo y’anto wɔtɛkɛtami lo Bible l’akatshi ndo mbokanaka ambola dia mbeya lokombo l’onto. Nkombo mɔtshi yaki wɔdu mbeya ndo nkina yaki wolo. Oma lâsɔ, takakambaka lo olui lo nsala tɔkɛnyɔ tele oko wâto wa Nɔa ndo akambo akina wakasalemaka lo nshi yakafundamaka Bible. Tena dimɔtshi, takakɛnyaka lo ndɔta ahɔndɔ oko anto watɛkɛtama l’ɛkɔndɔ wa lo Bible. Kombeta edja, takasangaka asango w’ɛlɔtɔ tshɛ wa ta wa lo nyuma wɔtɛkɛtami lo Efeso 6:11-17 ndo sho tshɛ takalembetshiyaka ɔlɔtɔ l’ɔlɔtɔ. Toho tɔsɔ takatokimanyiya dia ngɛnangɛna wekelo aso wa lo nkumbo.”

Kadiyɛsɔ kɛmɔtshi kelɛwɔ Debi kadjasɛ la Michigan lo États-Unis mbutaka ate: “Dimi l’omɛmi taki l’okakatanu dia mbodia ɔnaso la womoto etena kakinde suke la nkotsha ɛnɔnyi esato. Oma lâsɔ, lushi lɔmɔtshi etena kakatadiaka la dui dia wolo ɔkɔndɔ waki Isaka la Rɛbɛka oma lo Buku di’Ɛkɔndɔ wa lo Bible, lakasale ana wa pɔpi ahende ndo takatatɛ nkamba la wɔ oko akɛnyi wa lo kɛnyɔ. Ntatɛ oma l’etena kɛsɔ, nde akayotatɛka mbidja yimba efula lo wekelo. Lo ngɔndɔ yakayele oma lâsɔ, takayokambaka la ana wa pɔpi asɔ ahende oko didjidji di’anto amɔtshi watɛkɛtama lo Bible. Akayokomaka dia l’ɔkɔngɔ wa sho mbadia ɔkɔndɔ ɔmɔtshi, ɔnaso la womoto akayangaka ana wa pɔpi asɔ ahende lo luudu kana diangɔ dikina diakatakoke ndjokamba ladiɔ oko didjidji di’anto watɛkɛtama l’ɔkɔndɔ. Ɔsɔ aki mɛtɛ oko anto watayange diangɔ di’oshinga wolo! Takasale bwatɛ ya sabata la oshinga wa beela dia monga didjidji dia luudu laki Rahaba. Takasale ekundji kɛmɔtshi kaki la mɛtɛlɛ ɔtɔi l’etenyi ko takadinge oloyi ɔmɔtshi lɔkɔ oko didjidji dia oloyi wɔtɛkɛtami lo dibuku dia Walelu 21:4-9. Takalamaka ana wa pɔpi lo tapa dia woke. Takangɛnangɛnaka dia mɛna ɔnaso atayange tapa diakatadje diangɔ diaki didjidji di’anto wɔtɛkɛtami lo Bible lo luudu. Ande ɔngɛnɔngɛnɔ wa mɛna ɔnaso alembetshiya ɛkɔndɔ ɛsɔ l’ɛtɛkɛta ande ndamɛ lee!”

Wodielo w’ana kema dui dia wɔdu ndo vɔ nɔmbaka akambo efula lâdiko di’ɔsɛdingwelo wa lomingu la lomingu w’awui wakoka mbakimanyiya dia monɛ nsaki ka kambɛ Jehowa l’etema awɔ. Koko, Ɔtɛmwɛlɔ wa lo nkumbo ndo wekelo wa Bible kokaka monga kiɔkɔ ya wetshelo ekina w’akambo wa lo nyuma. Aha la tâmu, ekɔ mɛtɛ ohomba dia mbidja welo!