Onde sho mbɔsaka ɛtshɔkɔ aso la nɛmɔ?

L’ƆKƆNGƆ wa vɔ ntshungɔ lo dihindo oma lo lɔhɔmbɔ la l’Edjibito, l’etatelo ase Isariyɛlɛ waki l’ɔngɛnɔngɛnɔ dia ntɛmɔla Jehowa. (Etum. 14:29–15:1, 20, 21) Koko yema tshitshɛ l’ɔkɔngɔ diko, vɔ wakatshikitanya tokanyi tawɔ. Vɔ wakatatɛ nkiyana l’ɔtɛ w’ekakatanu waki la wɔ lo lɔsɛnɔ. Lande na? Nɛ dia vɔ wakaleke ndjakiyanya dikambo di’ekakatanu wakahomana la wɔ l’oswe wa shɛnga lo dihole dia mbika washo lo kɛnɛ kakasalɛ Jehowa. Vɔ wakatɛ Mɔsɛ ɔnɛ: “Okoko wana wakanyatutundja uma l’Edjibitu dia shu ndjuvo l’usui wa shenga? Ma kema ndu ashi kema, akundju asu wambutuna ma dia shoko ne [mana].”—Wal. 21:5.

Ntambe efula l’ɔkɔngɔ, nkumekanga Davidi ka l’Isariyɛlɛ w’edjedja akembe ate: “Dimi latekamaka l’ololo aye. Utema ami atuyalaka la ongenongeno ne dia panda kaye. Dimi layimbelaka [Jehowa] esambu ne dia ndi akantshela ololo.” (Osam. 13:5, 6) Davidi kombohɛ etsha wa ngandji ka lɔsɛngɔ waki Jehowa otsha le nde. Koko, nde akakanaka yimba mbala la mbala dikambo di’etsha akɔ. (Osam. 103:2) Jehowa ayotofuta sho lawɔ naka sho monga la lowando l’ɔtɛ wa kɛnɛ tshɛ katosalɛnde. Ɔnkɔnɛ, nyɛsɔ tɔsɛdingole ɛtshɔkɔ ɛmɔtshi w’oma le Nzambi wele la so ɛlɔ kɛnɛ.

‘Diɔtɔnganelo dia ma ma la Jehowa’

Omembi w’esambo akembe ate: ‘Wanɛ woka Jehowa wɔma mbele la diɔtɔnganelo dia ma ma lam’asawɔ la nde.’ (Osam. 25:14) Kânga mbeso bu kokele, tekɔ mɛtɛ la diɛsɛ dia monga la diɔtɔnganelo dia ma ma lam’asaso la Jehowa. Ko kayotota naka tôleka ndjakiyanya l’ɔtɛ w’akambo aso wa lo lɔsɛnɔ la lushi la lushi polo ndo hatoyokondja etena ka nsala dɔmbɛlɔ? Tokanyiya yema kɛnɛ kayokomɛ diɔtɔnganelo dia dimɛna diele lam’asaso la Jehowa. Oko wende Ɔngɛnyi aso, Jehowa nongamɛka dia sho ndjaɛkɛ le nde ndo mbɔkɛnɛnɛ etema aso lo dɔmbɛlɔ lo mbotɛ tokanyi taso t’oma k’ɛse otema ndo ekiyanu aso. (Tuk. 3:5, 6; Fil. 4:6, 7) Ɔnkɔnɛ,  shi sho pombaka mbidja yimba dia ndowanya alɔmbɛlɔ aso?

Etena kakandakanaka yimba lo dikambo di’alɔmbɛlɔ ande, Ɔmɛnyi wa Jehowa ɔmɔtshi w’ɔlɔngɔlɔngɔ welɛwɔ Paul akɛnyi dia nde pombaka ndjalowanya lo dikambo sɔ. * Nde mbutaka ate: “Laki la mbekelo ka kalolɛka paka ɛtɛkɛta akɔ wâmɛ etena kakamalɔmbaka Jehowa.” L’ɔkɔngɔ wa nde nsala eyangelo wendana la dɔmbɛlɔ lo Index des publications Watch Tower, Paul akayɛnaka dia alɔmbɛlɔ suke la 180 fundama lo Bible. Lo alɔmbɛlɔ asɔ, ekambi waki Jehowa wa lo nshi y’edjedja wakakɛnɛmɔla tokanyi tawɔ t’oma k’ɛse otema. Paul akate ate: “Lo nkana yimba la bɛnyɛlɔ di’oma l’Afundelo sɔ, lakayɛnaka dia dimi pombaka nɔmbaka dia dikambo dimɔtshi shikaa. Kɛsɔ akayokimanyiyaka dia dimi kɛnɛmɔlɛ Jehowa otema ami. Kakianɛ, lekɔ l’ɔngɛnɔngɛnɔ dia ndjasukanyaka la nde lo dɔmbɛlɔ.”

‘Mbo ya ndɛ ya lo nyuma lo etena kahombama’

Ɔtshɔkɔ okina wakondjaso oma le Jehowa, ele akambo efula wa mɛtɛ wamboteka oma l’Afundelo. Etena kangɛnangɛnaso la mbo ya ndɛ efula ya lo nyuma, tekɔ l’ɔkɔkɔ w’oshika wa “[m]imba esambu la etema w’ongenongeno.” (Is. 65:13, 14) Koko, sho pombaka ndjalama diaha tɔsɛngiya ta kɔlɔ ndjotoshishɛ ohetoheto wele la so l’akambo wa mɛtɛ. Ɛnyɛlɔ, pokamɛ awui wa kashi wadianganya waa apɔsta kokaka monga la shɛngiya ya kɔlɔ lo yimba yaso ndo ndjotoshimba dia sho mbɔsa la nɛmɔ ‘mbo ya ndɛ ya lo nyuma lo etena kahombama’ yatosha Jehowa lo tshimbo ya ‘ɔhɔmbɔ wa kɔlamelo ndo wa kɛsɔ.’—Mat. 24:45-47.

Ɔnangɛso ɔmɔtshi lelɛwɔ André lakakambɛ Jehowa l’edja k’ɛnɔnyi efula akɛnyi etombelo wa kɔlɔ waya lo mbetawɔ dia minganyiyama oma le waa apɔsta. Nde akafɔnyaka ɔnɛ mboka sso tsho lo sitɛ Web ka waa apɔsta hatonga wâle le nde. Nde mbohɔka ate: “L’etatelo, lakakotwama oma lo kɛnɛ kakataka waa apɔsta ɔnɛ tɔ mbele mɛtɛ. Etena kakamatalekaka nsɛdingola kɛnɛ kakawataka, mbakamatalekaka mbɔsa dia dimi kokaka mbisha tɛkɛ nɛndɛ dia ntomba oma l’okongamelo waki Jehowa. Koko l’ɔkɔngɔ diko, lakayosalaka eyangelo ɛmɔtshi lo kɛnɛ kakataka waa apɔsta lo dikambo di’Ɛmɛnyi wa Jehowa, ko lakayoshihodiaka dia embetsha wa kashi ɛsɔ wekɔ la lokeso l’efula. Kɛnɛ kakataka waa apɔsta ɔnɛ ‘tolembetelo ta mɛtɛ’ aki awui wa kashi wakawafɔnyaka vɔamɛ. Ɔnkɔnɛ, lakayɔsaka yɛdikɔ ya ntatɛ mbadia ekanda aso nto ndo ya mbɔtɔka lo nsanganya. Lakashihodia esadi eto dia lakahandja awui efula.” Diɛsɛ ko, André akayokalolaka l’atei w’etshumanelo.

‘Nkumbo k’onto l’ɔnango ka l’andja w’otondo’

Nkumbo kaso koludi la ngandji ndo kele kâmɛ k’onto l’ɔnango ka l’andja w’otondo ekɔ ɔtshɔkɔ okina w’oma le Jehowa. (Osam. 133:1) Diakɔ diakafunde ɔpɔstɔlɔ Petero ate: ‘Toke anangɛso wa lo nkumbo k’onto la ɔnango ka lo andja w’otondo ngandji.’ (1 Pet. 2:17) Oko weso amɔtshi wa l’atei wa nkumbo k’Akristo k’onto l’ɔnango ka l’andja w’otondo, tekɔ l’ɔngɛnɔngɛnɔ lo woho wasukamɛso la ngandji  tshɛ oma le waa papa, waa mama, anangɛso ndo akadiyɛso wa lo nyuma.—Mako 10:29, 30.

Koko, lo tena dimɔtshi akambo wotshikitanyi wele la so mbeyaka ndjotondja ekakatanu lo diɔtɔnganelo diele lam’asaso l’anangɛso ndo l’akadiyɛso. Ɛnyɛlɔ, sho kokaka monga la lonyangu l’ɔtɛ wa wandja wele l’anangɛso ndo l’akadiyɛso amɔtshi ko ndjotatɛ monga la dionga dia diɔnyɔ otsha le wɔ. Naka dikambo dia ngasɔ diambotomba, shi ayonga dui dia lomba dia sho mbohɔ ɔnɛ Jehowa mbokaka ekambi ande tshɛ ngandji oyadi wandja wele la wɔ? Ndo nto, Bible mbutaka ɔnɛ: “Naka shu tambuta shati: Shu kema la kolo, shu tambuyadimbiya, akambu wa mete kema l’etema asu.” (1 Joa. 1:8) Shi sho pombaka nsala la wolo dia ‘ntetemala mbikikanɛ kɔlɔ ndo dimanyiyana onto la onyande’?—Kol. 3:13.

Kadiyɛso kɛmɔtshi k’osekaseka kelɛwɔ Ann akeyaka nɛmɔ diele la lɔngɛnyi l’Akristo oma l’awui wa kɔlɔ wakokomɛ. Lo nsala akambo oko ɔna la lotshito la lo wɛɛla waki Yeso, nde akangana etale la etshumanelo k’Akristo. L’ɔkɔngɔ diko, nde akayotshitanyaka kanyi ndo akayokalolɛka akambo wa mɛtɛ. (Luka 15:11-24) Wetshelo akɔna wakakondja Ann oma lo kɛnɛ kakokomɛ? Nde mbutaka ate: “Etena kɛnɛ kamomokalola l’okongamelo waki Jehowa, lɔsaka anangɛmi la akadiyɛmi tshɛ la nɛmɔ oyadi wandja wele la wɔ. Lo nshi yakete, laki la dionga dia diɔnyɔ otsha le wɔ. Koko kakianɛ, lamboyashikikɛ diaha ndoko dikambo shishɛmi ɛtshɔkɔ wakondjami l’atei w’asekaso ambetawudi. Ndoko ɛngɔ ɔtɔi l’andja ɔnɛ kakokaso mbetawɔ dia tɔ toshishɛ paradiso kaso ka lo nyuma.”

Tongake nshi tshɛ la lowando l’ɔtɛ wa ɛtshɔkɔ aso

Elongamelo kele la so lo Diolelo diaki Nzambi diayoyokandola ekakatanu tshɛ wele l’anto, ekɔ ɛngɔ kele la nɛmɔ diahakoke mbɛdikama. Etema aso wakalole tɔɔ la lowando mbala ka ntondo kakatakondja elongamelo kɛsɔ. Takayaoke oko omindji w’okanda wa lo wɛɛla wa Yeso “[l]akatusundja kene tshe kaki la ndi” dia nsomba “lowoko l’ushinga wulu.” (Mat. 13:45, 46) Yeso kombuta dia kana omindji w’okanda ɔsɔ akayoshishaka nɛmɔ diakandɔsaka lɔwɔkɔ lɔsɔ. Woho akɔ wâmɛ mbele, tatoshishake pondjo lowando laso lo elongamelo ka diambo efula kele la so.—1 Tes. 5:8; Heb. 6:19.

Tɔshi ɛnyɛlɔ ka kadiyɛso Jean lambokambɛ Jehowa ndekana ɛnɔnyi 60. Nde mbutaka ate: “Kɛnɛ kakakimanyiya dia nama Diolelo diaki Nzambi lo yimba yami, ele woho watɛmi anto akina akambo wendana la diɔ. Etena kɛnama dia wamboshihodia elɛwɔ Diolelo, dui sɔ mongaka la shɛngiya ya wolo le mi. Lo mɛna otshikitanu wasala akambo wa mɛtɛ wa Diolelo lo lɔsɛnɔ l’ombeki wa Bible, dimi ndjatɛka nte: ‘Ande akambo wa mɛtɛ wa diambo efula wahombami mbutɛ anto akina lee!’”

Tekɔ l’ɛkɔkɔ w’eshika wa monga la lowando l’ɔtɛ w’ɛtshɔkɔ efula wa lo nyuma wele la so. Kânga mbakokaso diɛnɛ l’ekakatanu wele oko ɔlɔshamelo, hemɔ, lotshundu l’osombe, ɔkɔmwɛlɔ, ovushelo wa lakiso la ngandji ndo ekakatanu wendana l’ekondjelo, sho mbeyaka dia akambo asɔ tshɛ wekɔ paka wa lo tshanda mɔtshi tsho. L’ɛlɔmbwɛlɔ ka Diolelo diaki Nzambi, ɛtshɔkɔ wa lo demba wayokotshama lâdiko di’ɛtshɔkɔ wa lo nyuma wele la so. Asui tshɛ wele la so ɛlɔ kɛnɛ wayoshila l’andja w’oyoyo.—Eny. 21:4.

Koko, l’etena kakatakongɛ ɛtshɔkɔ ɛsɔ, nyɛsɔ tonge la lowando l’ɔtɛ w’ɛtshɔkɔ wa lo nyuma wele la so ndo tɔkɛnɛmɔlɛ lowando lɔsɔ l’ɛnyɛlɔ k’omembi w’esambo lakembe ate: “We [Jehowa], [Nzambi k]ami, akambu wa mamba wakayatshi, la tukanyi takayakani lu dikambu diasu, weko efula; nduku ledimi la ye. Kuyanga layuhimba mbata, vo weko efula kaheyama mbala.”—Osam. 40:5.

[Nɔtɛ ka l’ɛse ka dikatshi]

[Osato wa lo lɛkɛ 18]

Tambɔtshɔkwama oma l’osukɔ wa lo nyuma wakondjaso lo tena di’ekakatanu