Tekɔ l’ɛkɔkɔ wa monga l’ɔngɛnɔngɛnɔ

NTATƐ oma lo tɔtshɔngu toleki totshitshɛ tele la lɔsɛnɔ polo lo ndo lo elui wa galaksi ndo elui wa galaksi woleki weke, diangɔ diakatongama mɛnyaka dia diɔ diakakongɛma dimɛna. Ɔsɔ kema dui dia diambo, nɛ dia Otungi adiɔ ‘kema Nzambi k’ofukutanu.’ (1 Kor. 14:33) Woho wakakongɛ Nzambi dia ekambi ande mbɔtɛmɔlaka ekɔ nto dikambo dia diambo efula. Tɔsɛdingole kɛnɛ kakasale Jehowa. Nde akatonge okongamelo ɔtɔi wa l’andja w’otondo wele la miliyɔ ya ditongami diele la lomba, mbuta ate anto ndo ditongami dia lo nyuma, akawasha lotshungɔ la vɔ nsɔna kɛnɛ kalangawɔ ndo vɔ tshɛ wekɔ kâmɛ l’ɔtɛmwɛlɔ wa pudipudi. Ɔsɔ mɛtɛ ekɔ dikambo dia diambo efula.

Lo Isariyɛlɛ w’edjedja, Jerusalɛma mbaki didjidji dia etenyi ka la nkɛtɛ k’okongamelo waki Nzambi, lɛnɛ aki tɛmpɛlɔ kaki Jehowa ndo lɛnɛ akadjasɛka nkumi ya dikanga yande yakakitamaka esɔ. Ose Isariyɛlɛ ɔmɔtshi laki lo lɔhɔmbɔ la Babilɔna akɛnya nsaki kaki la nde lo dikambo di’osomba w’ekila ɔsɔ lo mbuta ɔnɛ: “Naka dimi hakuho, naka hakete ongenongeno ami wuleki, we Jerusalema, ku dimi ndjala lumi!”—Osam. 137:6.

Onde ngasɔ mbayaokayɛ lo kɛnɛ kendana l’okongamelo waki Nzambi ɛlɔ kɛnɛ? Onde okongamelo ɔsɔ kelaka ɔngɛnɔngɛnɔ oleki ɛngɔ kekina tshɛ? Onde anayɛ mbeyaka ɔkɔndɔ ndo woho wakɛndakɛnda etenyi ka la nkɛtɛ k’okongamelo waki Nzambi? Onde vɔ shihodiaka ndo mbɔsaka la nɛmɔ woho wewɔ amɔtshi wa lo nkumbo k’onto l’ɔnango ka l’andja w’otondo k’Ɛmɛnyi wa Jehowa? (1 Pet. 2:17) Lande na kahanyakambe l’alako wayela anɛ lo Ɔtɛmwɛlɔ wa lo nkumbo wa la dikɔlɔ dia mfudia lowando lele la nyu l’okongamelo waki Jehowa?

Ɔkɔndɔ w’awui wa “lu nshi . . . y’edjedja”

Ɔnɔnyi tshɛ, nkumbo y’ase Isariyɛlɛ wakasanganaka dia nsala difɛstɔ di’Elekanelo. Etena kakakongɛma difɛstɔ sɔ, Mɔsɛ akatɛ ase Isariyɛlɛ ate: “Ku lam’ayunyumbula an’anyu w’apami lu nshi yayayi vati: Na dikambu ne? Kanyuwakaluyaki diui nyati: [Jehowa] akatutundja uma l’Edjibitu, uma lu luudu la lohombo, la lunya landi la wulu.” (Etum. 13:14) Akambo wakasalɛ Jehowa ase Isariyɛlɛ hawohamamɛki pondjo l’ɔkɔndɔ w’ana w’anto. Lo mɛtɛ, ambutshi efula wa l’Isariyɛlɛ wakakitanyiya dako dia Mɔsɛ. L’ɔkɔngɔ wa nɔnga efula, ose Isariyɛlɛ ɔmɔtshi akayɔlɔmbaka ate: “We [Nzambi], shu takuki l’atui asu, ee, washesu wakatutelaka akambu wakayatshaka lu nshi yawo y’edjedja.”—Osam. 44:1.

Ɛlɔ kɛnɛ, le ɛlɔngɔlɔngɔ l’esekaseka, ɔkɔndɔ w’Ɛmɛnyi wa Jehowa wamboviya ɛnɔnyi ndekana 100 kokaka mbɔsama oko awui wa “lu nshi . . . y’edjedja.” Ngande wakokanyu nsala di’ananyu mbɔsa di’akambo asɔ wekɔ mɛtɛ? Dia nsala dikambo sɔ, ambutshi amɔtshi kambaka la dibuku Les Témoins de Jéhovah : Prédicateurs du Royaume de Dieu, Annuaire, ɛkɔndɔ wa nsɛnɔ y’anto watondjama lo periodikɛ yaso ndo alapɔlɔ wendana l’ɔkɔndɔ wa teokrasi, mbidja ndo waa DVD yaso y’eyoyo yatɛkɛta dikambo di’ekambi waki Nzambi wa nshi nyɛ. Vidɛo yendana la woho wakahɛnyahɛnyama anangɛso l’ex-Union soviétique ndo oma le ase Nazi lo wodja w’Allemagne mbetshaka nkumbo dia vɔ ndjaɛkɛ tshɛ le Jehowa etena kahomanawɔ l’ehemba. Nyu mbeyaka nkamba l’akambo asɔ lo Ɔtɛmwɛlɔ wa lo nkumbo wa la dikɔlɔ. Dui sɔ diayoleka nkeketsha mbetawɔ k’ananyu dia vɔ ntshikala la kɔlamelo etena kahomanawɔ l’ekakatanu wendana la olowanyi awɔ.

Koko, wadielo w’ɛkɔndɔ kokaka nɛndja ana esadi eto. Ɔnkɔnɛ, nyosale tshɛ di’ananyu ndjasha lɔkɔ. Ɛnyɛlɔ, wɛ mbeyaka nɔmba ɔnayɛ dia nde nsɔna wodja ɔmɔtshi w’ɔngɛnyangɛnya, ko nde nsala eyangelo wendana l’ɔkɔndɔ wa  teokrasi wa lo wodja akɔ ndo nde ndjotɛ ase nkumbo wetshelo wayondokondja oma lɔkɔ. Lo etshumanelo kanyu, mbeyaka monga ko nyekɔ l’Akristo amɔtshi wambokambɛ Jehowa la kɔlamelo l’edja k’ɛnɔnyi efula wakokanyu mbelɛ dikɔlɔ dimɔtshi etena kasalanyu ɔtɛmwɛlɔ wa lo nkumbo. Ondo ananyu mbeyaka mambola awui amɔtshi wakahomana la wɔ. Kana, nyu kokaka nɔmba ananyu dia vɔ nyotɛ awui amɔtshi w’ohomba wa teokrasi, ɛnyɛlɔ oko wokelo wa Bɛtɛlɛ, woho wasalema nsanganya ya wedja efula kana woho wakawakambaka la awui wakawasangola lo fɔnɔ (phonographe) l’esambishelo ka lo luudu la luudu.

Teke woho ‘wakamba etenyi l’etenyi olimu atɔ’

Ɔpɔstɔlɔ Paulo akɛdika etshumanelo k’Akristo la demba lo mbuta ɔnɛ: “Dimba tshe diambusanganyema uma le ndi, ndu diambumamanyema kame la asonga tshe, uku atsha beke tshe leke la leke, dia mbudia dimba, dia dio mpikama lu ngandji.” (Ef. 4:16) Mbeya woho wakamba demba di’onto olimu ayofudia lowando ndo dilɛmiɛlɔ diele la so otsha le Otungi aso. Woho akɔ wâmɛ mbele, etena kasɛdingolaso woho wakɛndakɛnda etshumanelo ka l’andja w’otondo, sho mambaka ‘woke woke wa lomba laki Nzambi.’—Ef. 3:10.

Jehowa tolembetshiyaka woho wakɛndakɛnda okongamelo ande, mbidja ndo etenyi ka l’olongo. Ɛnyɛlɔ, nde totɛka dia nde akasha Yeso Kristo ɛnɛlɔ ka ntondo, ko Yeso “akakitumi le ondjelo andi dia nkienya ukambi andi Joani.” (Eny. 1:1, 2) Naka Nzambi tɛnyaka woho wakɛndakɛnda etenyi k’okongamelo ande kahɛnama, shi lâsɔ kete nde kombolaka dia sho nshihodia woho ‘wakamba etenyi l’etenyi olimu atɔ’ la nkɛtɛ?

Ɛnyɛlɔ, naka omendji w’otshimbedi ayanga membola etshumanelo kanyu, lande na kahanyasɛdingola lo nkumbo kayɛ ɛkɛndɛ w’emendji weteta ndo ɛtshɔkɔ wakondjawɔ oma l’olimu awɔ? Ngande watokimanyiyawɔ sho tshɛ onto l’onto? Ambola akina wakokanyu nsɛdingola vɔ anɛ: Lande na kele ekɔ ohomba kimɔka alapɔlɔ w’olimu w’esambishelo? Oma lende atomba falanga yakɛndjakɛndja okongamelo waki Nzambi? Ngande wokongɛmi Olui-walɔmbɔla, ndo ngande watoshawɔ mbo ya ndɛ ya lo nyuma?

Etena kashihodiaso woho wokongɛmi ekambi waki Jehowa, sho kondjaka wahɔ esato ɛnɛ: Lowando lele la so le wanɛ wakamba olimu wa wolo dia wahɔ aso pamaka. (1 Tes. 5:12, 13) Sho tshutshuyamaka dia nsukɛ tɛdikɔ ta teokrasi. (Etsha 16:4, 5) Ndo nto, wɛkamu wele la so le wanɛ walɔmbɔla keketshamaka etena kɛnaso dia tɛdikɔ tshɛ tɔsawɔ tombaka oma l’Afundelo ndo ɛlɔngɔswɛlɔ wasalema.—Heb. 13:7.

‘Toshishime mvudu yawɔ y’edjaselo’

Sho mbadiaka lo Bible ɔnɛ: “Nyokendekende lu Siona, nyutshimbi l’utshimba awo, nyali efula ka mvudu yawo y’etangelu. Nyendi ngeli yawo ololo, nyushishimi mvudu yawo ya diulelu, dia ndjusanyiya lolonga layayi.” (Osam. 48:12, 13) L’avɛsa anɛ, omembi w’esambo akakeketsha ase Isariyɛlɛ dia vɔ tɛna Jerusalɛma la washo awɔ. Onde wɛ kokaka nkanyiya akambo w’ohomba wakohɔka nkumbo y’ase Isariyɛlɛ etena kakawatshɔka l’osomba w’ekila l’afɛstɔ wakasalemaka ɔnɔnyi l’ɔnɔnyi ndo kakawɛnaka tɛmpɛlɔ katɔ ka lotombo la washo awɔ? Vɔ mɛtɛ wakatshutshuyamaka dia “ndjusanyiya lolonga layayi.”

Tokanyiya dikambo dia nkumekanga ka womoto ka la Shɛba, ɔnɛ laki kombetawɔ awui wakawawotɛ wendana la ɛlɔmbwɛlɔ ka lotombo kaki Sɔlɔmɔna ndo lomba laki la nde. Kakɔna kakayowetawoyaka ɔnɛ awui wakandoke waki mɛtɛ? Nde akate ate: “Dimi kumbetawo lukumu lako ntundu dimi latayi ndu latenyi la ashu ami.” (2 Ek. 9:6) Eelo, kɛnɛ kɛnaso la ‘washo aso’ kokaka monga la shɛngiya ya wolo le so.

Ngande wakokayɛ nkimanyiya anayɛ dia vɔ mɛna okongamelo wa diambo waki Jehowa la ‘washo awɔ’? Naka nyekɔ la Bɛtɛlɛ ka Ɛmɛnyi wa Jehowa suke la ngelo kanyu, kete nyosale la wolo dia tokiembola. Ɛnyɛlɔ, Mandy nde la Bethany wakole lo ngelo kakangana la Bɛtɛlɛ ka lo wodja awɔ kilɔmɛtɛlɛ 1 500. Koko, ambutshi awɔ wakakongɛ dia vɔ tshɔka dia tembola Bɛtɛlɛ, djekoleko etena kakawayolaka. Vɔ mbutaka ɔnɛ: “La ntondo ka sho tembola Bɛtɛlɛ, takakanyiyaka ɔnɛ paka epalanga w’anto ato mbele lɛkɔ.”  Koko, takatɛnaka ndo ɛlɔngɔlɔngɔ l’esekaseka wakakambɛka Jehowa la wolo awɔ ndo l’ɔngɛnɔngɛnɔ. Takashihodia di’okongamelo waki Jehowa wekɔ l’akambo efula lâdiko dia wanɛ wakasalemaka lo ngelo kaso. Ndo etena tshɛ kakatembolaka Bɛtɛlɛ, takalekaka ndjasukanya la Jehowa ndo takakeketshamaka dia ndeka ndjasha l’olimu ande. Woho wakɛnyi Mandy nde la Bethany Bɛtɛlɛ la washo awɔ akâtshutshuya dia vɔ ntatɛ nkamba olimu w’ombatshi mboka, ndo wakayelamɛka dia tokamba lo Bɛtɛlɛ oko anto wayakimɔ la lolango lo tshanda mɔtshi.

Tekɔ nto la yoho kina yakokaso ‘mɛna’ okongamelo waki Jehowa, yoho yaki ase Isariyɛlɛ w’edjedja komonga la yɔ. L’ɛnɔnyi weke kambeta ɛnɛ, ekambi waki Nzambi wakalongola waa vidɛo ndo DVD yatɛkɛta akambo wotshikitanyi w’okongamelo waki Nzambi, l’atei ayɔ mbele ndo: Les Témoins de Jéhovah : organisés pour prêcher la bonne nouvelle, Toute la communauté des frères, Jusqu’aux extrémités de la terre, ndo Unis grâce à l’enseignement divin. Etena kɛnayɛ wɛ la nkumbo kayɛ olimu wa wolo wakamba ase nkumbo ka Bɛtɛlɛ, wanɛ wakamba olimu wa nkimanyiya anto akina, waa misiɔnɛrɛ ndo anangɛso walɔngɔsɔla ndo wakongɛ nsanganya ya weke, lowando lele la nyu lo nkumbo kaso k’onto l’ɔnango ka l’andja w’otondo pamaka l’etema anyu.

Etshumanelo tshɛ k’ekambi waki Nzambi kekɔ l’ɔkɛndɛ w’ohomba efula wa nsambisha lokumu l’ɔlɔlɔ ndo nsukɛ Akristo wa l’ɛtshi kawɔ ka nkɛtɛ. Ɔnkɔnɛ, tshungolaka etena kâmɛ la nkumbo kayɛ dia mbohɔka ‘nkumbo k’otondo k’onto l’ɔnango ka l’andja w’otondo.’ Dikambo sɔ diayokokimanyiya dia wɛ l’anayɛ ntetemala monga la ‘mbetawɔ ka nge,’ nyeya dia tekɔ l’ɛkɔkɔ wa monga l’ɔngɛnɔngɛnɔ.—1 Pet. 5:9.

 [Kiombo/Osato wa lo lɛkɛ 18]

Okongamelo waki Nzambi—Asawo amɔtshi wasungana mbeka

Tekɔ la dihomɔ efula dia nkimanyiya anto tshɛ dia vɔ ndeka mbeka akambo wendana la ɔkɔndɔ ndo woho wakɛndakɛnda okongamelo waki Jehowa. Ambola wayela anɛ kokaka kokimanyiya dia wɛ ntatɛ nsala dikambo sɔ:

☞ Ngande wakatatɛ olimu w’emendji weteta lo nshi yaso nyɛ?—Tshoto y’Etangelo, Ngɔndɔ ka dikumi l’ahende 1, 1996, lɛkɛ 9-14.

☞ Kakɔna kakaleke ngɛnyangɛnya ampokami Lushi la lomingu lakawelɛ ɔnɛ “lushi l’ana” lo Losanganya la woke la wedja efula lakasalema lo 1941?—Tshoto y’Etangelo, Ngɔndɔ k’esambele 15, 2001, lɛkɛ 8, lo Falase.

☞ Ngande wɔsa Olui-walɔmbɔla tɛdikɔ?—‘Rends pleinement témoignage au sujet du Royaume de Dieu,’ lɛkɛ 108-114.