Onde wɛ âkohɔ?

Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:

• Onde Akristo wa mɛtɛ kambaka la lokombo laki Nzambi oko ɛngɔ kawakokɛ lo dihindo?

Anto amɔtshi mbɔsaka dia ekɔ ɛngɔ kɛmɔtshi kakoka mbakokɛ lo yoho ya dihindo oma le ɛdiɛngɛ, koko ekambi waki Nzambi hawɔshi dia lokombo lande lekɔ ɛngɔ kâkokɛ lo dihindo. Vɔ wekɔ la mbetawɔ le Jehowa, salaka lolango lande ndo nyangaka eshamelo lo lokombo lande. (Zef. 3:12, 13)—1/15, lɛkɛ 5-6.

• Lande na kakatone Jehowa nkumekanga Saulo?

Nkumekanga Saulo akahombe nkonga edja ndo Samuɛlɛ amboya ko nde ndjolambola olambo, koko nde kombokonga ndo akalambola olambo ndamɛ. Ndo nto, nde kokitanyiya didjango dia nshila ase Amalɛka oshiki.—2/15, lɛkɛ 22-23.

• Ngande wakokaso mɛnya dia sho petshaka akambo wa kɔlɔ?

Sho pombaka nkitsha wanu lo dihole diawɔ, mbewɔ awui w’ɛdiɛngɛ ndo nkitanyiya ɔhɛmwɛlɔ waki Yeso wendana l’awui wa mindo. Ɛnyɛlɔ, sho pombaka mbewɔ dia menda esato wɛnyawɔ anto etakataka ndo ntshika mbakanyiya. (Mat. 5:27, 28) Ndo nto, hatohombe mbekesanɛ l’anto wakatshanyema oma l’etshumanelo.—2/15, lɛkɛ 29-32.

• Ngande waki Jeremiya oko “utamba wakawune l’umamu w’ashi, watotolaka ediu awo utsha l’okedi”? (Jer. 17:7, 8)

Jeremiya kompekɔ ntɔ elowa ndo nde kombetawɔ dia asɔkanyi monga la shɛngiya le nde nɛ dia nde akamamema Ɔnɛ lashana ashi wa lɔsɛnɔ lo woho wakandɔshi la nɛmɔ kɛnɛ kakawotɛ Nzambi.—3/15, lɛkɛ 14.

• Naa “diango di’ushinga a wulu” diatshumanyema oma lo wedja tshɛ? (Hang. 2:7)

Diɔ diele anto watɛmɔla Jehowa l’ɔtɛ wa ngandji kawokawɔ kânga mbewɔ anto wele kema kokele. (Tuk. 27:11) Vɔ wekɔ “diango di’ushinga a wulu” diotombola ndo nde mbɔsaka la nɛmɔ woho wawomamemawɔ l’otema ɔtɔi ndo wawokambɛwɔ olimu l’ohetoheto.—4/1, lɛkɛ 11.

• Lande na kakɔsaka Jehowa Danyɛlɛ oko “untu lalangema efula”? (Dan. 10:11, 19)

Danyɛlɛ aki ombeki w’etete w’Afundelo. (Dan. 9:2) Nde akayashaka lo dɔmbɛlɔ. (Dan. 2:17, 18) Nde kokombolaka dia lokombo laki Jehowa mbishama sɔnyi. (Dan. 2:20, 28; 9:19)—4/1, lɛkɛ 12-13.

• Ngande wakoka ambutshi nkimanyiya anawɔ dia vɔ mbɔsa tɛdikɔ t’amɛna l’awui wa dieyanelo?

Ambutshi pombaka nembetshiya anawɔ dikambo sɔ dimɛna dimɛna. Vɔ pombaka mbatɛ akambo hwe hwe lo kɛnɛ kendana l’awui wa dieyanelo. Vɔ pombaka nto mbakimanyiya dia vɔ mbeya kɛnɛ kayowakomɛ naka vɔ nsekola ɛlɛmbɛ waki Jehowa wendana l’awui wa dieyanelo.—4/1, lɛkɛ 19-20.

• Naa atɔndɔ amɔtshi wa lo Bible watokimanyiya dia sho mbeya lolango laki Jehowa lo kɛnɛ kendana la tɔkɛnyɔ? (Ef. 5:17)

Lo washo waki Nzambi, mpawo ekɔ woho ɔmɔtshi w’ɔtɛmwɛlɔ wa dikishi. (Isa. 65:11) Jehowa mbewolaka atɛmɔdi ande diaha vɔ monga l’ɔkɔmiya. (Etum. 20:17; Romo 7:7) Ekambi waki Nzambi kondjaka falanga lo yoho ya dimɛna. (Ef. 4:28; 2 Tes. 3:10, 12)—4/1, lɛkɛ 22-23.

• Ngande wele ɔprɔfɛta Samuɛlɛ “akatshaka akambu w’ololo”? (Heb. 11:32, 33)

Samuɛlɛ akasha lonya di’anto ntatɛ nsala kɛnɛ kaki ɔlɔlɔ ndo osembɔki lo washo waki Nzambi. Nde akatshikala la kɔlamelo nɛ dia nde akakongɛka Jehowa la solo dia lotutsha ndo akôkambɛka olimu la kɔlamelo tshɛ kânga mbakandahomanaka l’ehemba.—4/1, lɛkɛ 27.

• Wetshelo akɔna wakokaso nkondja oma l’ɛtɛkɛta wa Jɔbɔ wele lo Jobo 14:13-15 lo kɛnɛ kendana la Jehowa?

Jehowa mamemaka lo yoho ya lânde wanɛ wele l’anya ande lo woho wetawɔwɔ dia nde mbakenga dia vɔ monga anto w’ɛlɔlɔ lo washo ande. (Is. 64:8)—4/1, lɛkɛ 31.