Onde wɛ mɛtɛ ngɛnangɛnaka mbadia Ɔtɛkɛta waki Nzambi?

LORRAINE mbutaka ate: “Etena kakamatatɛ mbadia Bible, lakɔsaka dui sɔ oko ɔkɛndɛ koko aha oko dui di’ɔngɛnɔngɛnɔ. Lam’ele dimi kondjashaka lo kɛnɛ kakamadiaka, lakanyingɔnyingɔka la djɔ mbala efula.”

Anto akina suyaka ɔnɛ etena kakawatatɛ mbadia Bible, vɔ komonga l’ɔngɛngɔngɛnɔ. Koko, vɔ wakatetemala nɛ dia wakeyaka ɔnɛ ekɔ dimɛna mbadia Afundelo w’ekila. Marc mbutaka ate: “Onto koka mbekola yimba esadi eto l’awui akina etena kadiande Bible kana kasalande wekelo w’onto ndamɛ. Koko dia dimi ndjonga la mbekelo ka mbadiaka Bible lushi la lushi, lakahombe ndjasha l’alɔmbɛlɔ ndo mbidja welo.”

Kakɔna kahombayɛ nsala dia mɛnya lowando l’efula lele la yɛ l’Ɔtɛkɛta waki Nzambi, Bible? Ngande wakokayɛ monga l’ɔngɛnɔngɛnɔ lo kiadiaka? Ɛsɔ tɔsɛdingole alako wayela anɛ:

Eyango ndo toho ta mbadia Ɔtɛkɛta waki Nzambi

La ntondo ka wɛ ntatɛ mbadia Bible, talɔmbi Jehowa diaha yimba yayɛ mbekɔ l’awui akina. Lɔmba Jehowa dia nde kokimanyiya dia wɛ mfudia nsaki ka mbeka Ɔtɛkɛta ande. Sɛngasɛngande dia nde ndjihola otema ayɛ dia wɛ nshihodia lomba lele l’Ɔtɛkɛta ande dimɛna dimɛna. (Osam. 119:34) Naka wɛ hasadi ngasɔ, kete wɛ mbeyaka ndjotatɛ mbadia Bible lo yoho ya lahahɛ ndo ndjoshisha nsaki ka ntetemala. Lynn mbutaka ate: “Tena dimɔtshi, lakadiaka esadi esadi ndo dimi koshihodiaka awui w’ohomba wakamadiaka. Mbala efula, dimi koshihodiaka lokanyi l’oshika la kɛnɛ kakamadiaka. Lakalɔmbɛ Jehowa dia dimi monga la ndjakimɛ ndo dui sɔ diakakimanyiya dia wɔɔngɔ ami nshikimala.”

Ɔsa kɛnɛ kekayɛ la nɛmɔ. Ohɔ dia wɛ pombaka nshihodia ndo nkitanyiya akambo wa mɛtɛ wa lo Bible dia wɛ ndjokondja lɔsɛnɔ la pondjo. Ɔnkɔnɛ, dja welo wa l’otema ɔtɔi dia ntana tokanyi t’eshika ndo nkamba la tɔ. Chris mbutaka ate: “Dimi nangaka mbeya akambo wakoka kimanyiyami dia mbishola tokanyi ta kɔlɔ ndo eyango wele la mi. Lekɔ l’ɔngɛnɔngɛnɔ dia mɛna dia Bible ndo ekanda wakilembetshiya wekɔ l’awui wakondjami wahɔ kânga mbele ndoko lushi lakamɛnyi afundji atɔ.”

Yadjɛ eyango wakokayɛ nkotsha. Hemba dia mbeka dui dimɔtshi di’oyoyo lo kɛnɛ kendana l’anto watɛkɛtama lo Bible. Wɛ kokaka ntana awui amɔtshi w’ohomba efula wendana la wɔ lo mbadia Étude perspicace des Écritures kana Index des publications. Etena kayoyeya di’apami ndo wamato watɛkɛtama lo Bible waki anto wa mɛtɛ mɛtɛ wele la waonga ndo la nsaki, ɛkɔndɔ w’anto asɔ wayongaka nshi tshɛ lo yimba yayɛ.

Yanga toho t’eyoyo ta nkana l’anto yimba oma l’Afundelo. (Etsha 17:2, 3) Sophia mbekaka Bible la kanyi shɔ lo yimba. Nde mbutaka ate: “Nsaki kami ele ka mbeka toho t’eyoyo ta nkana l’anto yimba l’esambishelo ndo lo tena dikina dia dimi monga l’akoka wa nembetshiya akambo wa mɛtɛ wa lo Bible dimɛna dimɛna. Tshoto y’Etangelo ekɔ ehomɔ ka dimɛna efula dia nkotsha oyango ɔsɔ.”—2 Tim. 2:15.

Onga oko onto lɛna woho waketaka ɛkɔndɔ wa lo Bible. Heberu 4:12 mbutaka ɔnɛ: “Diui dia [Nzambi] dieko la lumu.” Etena kadiayɛ Afundelo, etawɔ dia losango laki Nzambi monga la shɛngiya lo yimba yayɛ lo nkanyiya kɛnɛ kakɛnaka anto watɛkɛtama lo Bible. Hemba dia mboka kɛnɛ kakawokaka ndo yaoka woho wakawayaokaka. Ɔtɔnganyiya akambo  wakahomana la wɔ la lɔsɛnɔ layɛ. Kondja wetshelo oma lo woho wakawakandolaka ekakatanu. Kɛsɔ ayokokimanyiya dia wɛ mfudia eokelo kayɛ ndo monga l’akoka wa nkimɛ ɛkɔndɔ wa lo Bible.

Ɔsa wenya efula dia mbeka avɛsa wa wolo ndo elembetshiyelo awɔ dia wɛ mbashihodia dimɛna. Ɔsa wenya efula lo wekelo tshɛ. Wɛ kokaka ndjokoma lo ambola amɔtshi w’ohomba wahombayɛ nsala eyangelo w’efula. Yanga tɔtɛkɛta ta wolo, enda nɔtɛ ya l’ɛse ka dikatshi ndo naka wɛ ekɔ la Bible kele la waa rɛferansɛ wofundjiwɔ l’atei atei, we mbeyaka nkamba la wɔ. Etena katayaleke nshihodia ndo nkamba l’awui wadiɛyɛ mbayoyotalekaka ngɛnangɛna Ɔtɛkɛta waki Nzambi. Wɛ ayokoka mbuta oko omembi w’esambo lakate ɔnɛ: “Lakose aui aye uku sangu dia pundju, ne dia vo watuyalaka ongenongeno w’utema ami.”—Osam. 119:111.

Ewɔ dia nsala wadielo w’esadi esadi. Onga l’ekanelo k’ɔlɔlɔ lo kɛnɛ kendana la yɛdikɔ ya wenya wetshayɛ lo wekelo ayɛ w’onto ndamɛ. Onga la wɛdimo lam’asa wenya wetshayɛ lo wadielo wa Bible ndo l’ɔlɔngɔswɛlɔ wa nsanganya ya l’etshumanelo. Raquel mbutaka ate: “Dimi mongaka l’ɔlɛmbɛlɔ mbala efula etena kadiami Bible ndo dui sɔ shimbakami dia dimi ndjasha tshɛ lo wadielo. Lambɛna dia wekelo wa lo tshenyi ya wonya wekɔ la wahɔ efula. Vɔ kimanyiyakami dia dimi nkondja wahɔ w’efula oma lo wekelo ami.” Chris suyaka ate: “Etena kekami lowango lowango, nkum’otema kami manyakami nɛ dia halokimɛ awui efula. Awui wekami hawoleke munanda otema ami.” Ɔnkɔnɛ, ɔsa wenya efula dia mbekaka Bible.

Langa Ɔtɛkɛta waki Nzambi efula. Ɔpɔstɔlɔ Petero akate ate: “Nyuyali uku ana wutshiwo kakiane. Nyulangi awele wa diui di’ololo diaha la lukesu, dia nyu mbula lu diui ne edja ndu nyayutana panda.” (1 Pet. 2:2) Ana w’ashashi hawosale la wolo dia nanga awɛlɛ nɛ dia vɔ mbotɔka la nsaki kɛsɔ. Koko Afundelo mbutaka ɔnɛ sho pombaka nanga Ɔtɛkɛta waki Nzambi lo yoho ya ngasɔ. Naka wɛ mbadiaka kânga lɛkɛ ɔtɔi la Bible lushi tshɛ, kete wɛ ayolanga Afundelo esadi eto. Kɛnɛ kakayɛnaka wolo ntondo kayonga wɔdu esadi eto ndo kayokɔngɛnyangɛnya.

Kana yimba l’avɛsa wa l’Afundelo. Onto kondjaka wahɔ w’efula etena kakanande yimba la kɛnɛ kadiande. Dui sɔ diayokokimanyiya dia wɛ mbɔtɔnganyiya ɛtɛ w’awui wamboyoshila mbadia. Naka wɛ nsala ngasɔ, kete l’ɔkɔngɔ wa nshi ngana tsho wɛ ayeya akambo wa lo nyuma efula.—Osam. 19:14; Tuk. 3:3.

 Wenya wetshaso kema wenya wa wetshetsha

Sho pombaka mbidja welo dia monga la mbekelo y’ɛlɔlɔ ya wekelo nɛ dia ɛtshɔkɔ wakondjaso lɔkɔ wekɔ efula. Eokelo kayɛ k’Afundelo kayohama. (Heb. 5:12-14) Shɛnɔdi ndo lomba layoyokondja oma l’Afundelo wakasambiyama layokosha ɔngɛnɔngɛnɔ ndo wɔladi. Lomba latanema l’Ɔtɛkɛta waki Nzambi wakasambiyama ekɔ “utamba a lumu” le wanɛ weka ndo wakamba la kɛnɛ kekawɔ.—Tuk. 3:13-18.

Wekelo wa lotshimola w’Ɔtɛkɛta waki Nzambi kokaka munanda otema ayɛ. (Tuk. 15:14) Wekelo ɔsɔ wayokokimanyiya dia wɛ mbisha anto alako w’eshika wohikami tshɛ lo tshɛ lo Bible. Naka wɛ mbetawɔ dia tɛdikɔ tayɛ nɔmbwama la kɛnɛ kadiayɛ l’Afundelo ndo l’ekanda watondja ‘ɔhɔmbɔ wa kɔlamelo ndo wa kɛsɔ,’ kete wɛ ayonga l’ɔngɛnɔngɛnɔ ndo ayɔsɛngiyama l’Ɔtɛkɛta waki Jehowa wakasambiyama. (Mat. 24:45) Wɛ ayɛna akambo la sso di’ɔlɔlɔ, etsha ayɛ ndo ɛtɛkɛta ayɛ wayɛnya dia wɛ ekɔ lo nɔmbwama l’Ɔtɛkɛta waki Jehowa. Lâdiko dia lâsɔ, wɛ ayonga la diɔtɔnganelo dia dimɛna la Nzambi l’oseka dui tshɛ.—Osam. 1:2, 3.

Otema woludi la ngandji ka Nzambi ayokotshutshuya dia wɛ mɛnya mbetawɔ kayɛ. Dui sɔ nto diayonga la wahɔ w’efula le yɛ. Sophia lakatatɛkɛtshi dikambo diande la diko ekɔ lo nsala la wolo dia mbohɔka ndo kambaka l’avɛsa wotshikitanyi dia nkotola yambalo y’ampokami ande etena kende l’esambishelo. Nde mbutaka ate: “Mɛna woho wetawɔ anto losango la lo Bible mbishaka ɔngɛnɔngɛnɔ.”

Wahɔ woleki woke wakoka onto nkondja oma lo wadielo w’Ɔtɛkɛta waki Nzambi ele monga la diɔtɔnganelo dia ma ma la Jehowa. Wekelo wa Bible wayokokimanyiya dia wɛ mbeya atɔndɔ ande, monga la lowando lo ngandji, lokaho ndo losembwe lande. Ndoko oyango woleki ohomba ndo woleki mbela wahɔ oko wa wekelo. Ɔnkɔnɛ, yasha tshɛ lo wekelo w’Ɔtɛkɛta waki Nzambi. Wenya wetshaso dia nsala dui sɔ kema wenya wa wetshetsha.—Osam. 19:7-11.

[Kiombo/Esato wa lo lɛkɛ 5]

EYANGO NDO TOHO TA MBADIA ƆTƐKƐTA WAKI NZAMBI

▪ La ntondo ka wɛ ntatɛ mbadia Bible, talɔmbi Jehowa diaha yimba yayɛ mbekɔ l’awui akina.

▪ Ɔsa kɛnɛ kekayɛ la nɛmɔ.

▪ Yadjɛ eyango wakokayɛ nkotsha.

▪ Yanga toho t’eyoyo ta nkana l’anto yimba oma l’Afundelo.

▪ Onga oko onto lɛna woho waketaka ɛkɔndɔ wa lo Bible.

▪ Ɔsa wenya efula dia mbeka avɛsa wa wolo ndo elembetshiyelo awɔ dia wɛ mbashihodia dimɛna.

▪ Ewɔ dia nsala wadielo w’esadi esadi.

▪ Langa Ɔtɛkɛta waki Nzambi efula.

▪ Kana yimba l’avɛsa wa l’Afundelo.

[Osato wa lo lɛkɛ 4]

Etena kadiayɛ ɔkɔndɔ ɔmɔtshi wa lo Bible, yaɔsa oko kanga dikambo