Toyele Kristo Ɔnɔmbɔdi aso wa kokele

WANƐ wayela emboledi w’ana w’anto keswamaka mbala efula oma le wɔ. Koko, aha ngasɔ mbasalɛ Kristo wanɛ walɔmbɔlande. Yeso akate ate: “Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya. Nyembe lokoho lami, nyeki akambu uma le mi. Ne dia dimi la memakana la ndjakitshakitsha l’utema, ku nyu nyayutana mumuya l’etema anyu.” (Mat. 11:28, 29) Ɛlɔmbwɛlɔ kaki Yeso keketshaka. Nde ndjashaka tshɛ le wanɛ wele l’okitshakitsha ndo wele l’etema wambatɛ lo mbalɔmba dia vɔ mɛmba lɔkɔhɔ lande l’ɔlɔlɔ. Ko mbetawɔ dia nɔmbwama oma le Yeso kɛdikɛdi na?

Ɔpɔstɔlɔ Petero akafunde ate: “Kristu akanyusuwela, akanyutshikela djimbitelu, dia nyu mbuyela lu wanya andi.” (1 Pet. 2:21) Lande na kele ekɔ ohomba dia sho ndjela wanya wa Yeso? Ohɔsa dia ndo wɛ mbele l’atei w’anto watatenyanya ɛtshi ka nkɛtɛ kakawakundɛ waa bɔmbɛ, koko paka onto ɔtɔi la l’atei anyu mbeya woho wa ntenyanya aha la mbokala wâle. Shi wɛ ayoyela wanya ande dimɛna dimɛna? Woho akɔ wâmɛ mbele, dia sho ndjokondja lɔsɛnɔ la pondjo sho pombaka mbokoya ɛnyɛlɔ ka Yeso lo nsɛnɔ yaso. Dia sho nsala dui sɔ, sho pombaka mpokamɛ enyimpala wa Yeso, mbakitanyiya ndo nkamba kâmɛ la wɔ.

Tohokame Yeso ndo tôkitanyiya

Otsha l’ekomelo ka Dako diande dia lo dikona, Yeso akate ate: “Okone untu tshe latukaka aui ami ane, ndu latâtshaka, ayufana la kanga yimba, lakahiki luudu landi ladiku dia dive. Mvula yakalo, dula diakayi, pepe yakapepe, yakakomama lu luudu lako. Keli lo kunyuko, ne dia lo lakahikama ladiku dia dive.”—Mat. 7:24, 25.

Yeso akate dia onto lahokamɛ ɛtɛkɛta ande ndo lâkitanyiya ekɔ “kanga yimba.” Onde okitanyiya aso w’oma k’ɛse otema mɛnyaka dia sho nɛmiyaka Kristo ndo ndjelaka ɛnyɛlɔ kande? Ko kana tekɔ la mbekelo ka nkitanyiya paka wadjango amɔtshi waki Yeso wele bu wolo kana wangɛnangɛnaso? Yeso akate ate: “Dimi latutshaka akambu watongenyangenyaka [Nzambi] nshi tshe.” (Joa. 8:29) Nyɛsɔ tosale la wolo dia mbokoya ɛnyɛlɔ kɛsɔ.

Lo ntambe ka ntondo, apɔstɔlɔ wakasha anto akina ɛnyɛlɔ k’ɔlɔlɔ lo mbetawɔ dia nɛmbɛ ɛlɔmbwɛlɔ ka Kristo. Lo diaaso dimɔtshi, Petero akatɛ Yeso ate: “Enda, shu tambutshika tshe, tambukuyela.” (Mako 10:28) Lo mɛtɛ, apɔstɔlɔ waki Yeso wakɔsaka ɛlɔmbwɛlɔ kande la nɛmɔ di’efula woho ɔnɛ wele vɔ waki suke dia ntshika akambo awɔ tshɛ ko mboyela.—Mat. 4:18-22.

Tokambe kâmɛ l’enyimpala wa Kristo

Yema tshitshɛ l’ɔkɔngɔ wa nyɔi kande, Yeso akɛnya ambeki ande yoho kina yakawakoke ndjela ɛlɔmbwɛlɔ kande. Nde akate ate: “Lanungula, ambulungula one lakantumi.” (Joa. 13:20) Ekɔ mɛtɛ dia Yeso akɔsaka enyimpala ande w’akitami oko ‘anango.’ (Mat. 25:40) L’ɔkɔngɔ w’eolwelo ndo wa wodelo wa Yeso l’olongo, nde akasha ‘anango’ ɔkɛndɛ wa vɔ monga “akendji wa Kristu” dia mbisha anto akina leeta la vɔ ndjaokanya la Jehowa Nzambi. (2 Kor. 5:18-20) Dia sho mɛnya ɔnɛ sho mbetawɔka ɛlɔmbwɛlɔ ka Kristo, sho pombaka nɛmbɛ ‘anango.’

Ayonga dimɛna sho menda kana sho kitanyiyaka alako w’oma l’Afundelo watondjama  la wonya l’ekanda aso walembetshiya Bible. Etena kekaso Afundelo ndo kɔtɔso lo nsanganya, vɔ tôholaka kɛnɛ kakate Kristo. (2 Pet. 3:1, 2) Sho mɛnyaka lowando laso l’oma k’ɛse otema etena ketawɔso dia ndɛ mbo ya ndɛ ya lo nyuma shɔ mbala la mbala. Ko ahombaso nsala naka wambokalolɛ dako dimɔtshi mbala efula? Ɛnyɛlɔ Ɔtɛkɛta waki Nzambi ndakaka Akristo dia ntshukana “paka lu lulangu la Khumadiondjo.” (1 Kor. 7:39) L’edja k’ɛnɔnyi lokama Tshoto y’Etangelo yambokalolɛ dako sɔ mbala efula. Anango Kristo mɛnyaka mɛtɛ dia vɔ ndjakiyanyaka la ngandji tshɛ dia lonyuma laso lo totondjɛ asawo wendana la dako sɔ ndo l’alako akina wakasambiyama. Yoho mɔtshi yakokaso mɛnya ɔnɛ sho ndjelaka Ɔnɔmbɔdi aso wa kokele Yeso Kristo ele lo mbidja yimba lo waohwelo asɔ.

Tukedi 4:18 mbuta ɔnɛ: “Keli mbuka k’untu ololo keli uku usasi w’ehutwelu k’unya, watufulanelaka edja ndu w’unya l’atei ote.” Eelo, ɛlɔmbwɛlɔ ka Yeso kekɔ lo tatshu otsha la ntondo. Yoho kina yakokaso mɛnya ɔnɛ sho kambaka kâmɛ ‘l’anango’ Kristo ele lo mbetawɔ etshikitanu tshɛ wasalema lo wetshelo w’akambo wa mɛtɛ watondjama oma le ‘ɔhɔmbɔ wa kɔlamelo ndo wa kɛsɔ.’—Mat. 24:45.

Lâdiko dia lâsɔ, sho mɛnyaka ɔnɛ tekɔ lo nɛmbɛ ‘anango’ Kristo lo nkamba kâmɛ l’emendji wakasɔnama lo tshumanelo di’Akristo. Ɔpɔstɔlɔ Paulo akate ate: “Nyukitanyia aui w’elombodi anyu, nyuyali l’okongo awo, ne dia vo watosenaka dia etema anyu.” (Heb. 13:17) Ɛnyɛlɔ, ekumanyi kɛmɔtshi mbeyaka tokeketsha lo tɛnya ohomba wa salaka Ɔtɛmwɛlɔ wa lo nkumbo wa la dikɔlɔ mbala la mbala kana tosha alako amɔtshi wendana l’olimu aso w’esambishelo. Omendji w’otshimbedi mbeyaka tosha alako w’amɛna w’oma l’Afundelo lo dui dimɔtshi diendana la lɔsɛnɔ laso l’Okristo. Naka sho mbetawɔ dia nkamba l’alako asɔ, kete tayɛnya dia sho ndjelaka Yeso lele Ɔnɔmbɔdi aso.

Lonyangu ko, ewandji wa l’andja ɔnɛ haweye nɔmbɔla. Ande ekeketshelo kakondjaso dia sho ndjela ɛlɔmbwɛlɔ ka la ngandji kaki Kristo lee! Ɔnkɔnɛ, nyɛsɔ tokitanyiya Ɔnɔmbɔdi aso ndo tokambe kâmɛ l’enyimpala ande wa nshi nyɛ.

[Esato wa lo lɛkɛ 27]

Onde wɛ mbetawɔka alako w’oma l’Afundelo watɔlɔmba diaha monga la losambi l’onto lele kema ombetawodi?