‘Nyolamake ɛkɔkɔ wa Nzambi wakandanyosha’
‘Nyolamake ɛkɔkɔ wa Nzambi wakandanyosha’
‘Nyolamake ɛkɔkɔ wa Nzambi wakandanyosha, aha la nkudu, koko l’ɔngɛnɔngɛnɔ.’—1 PET. 5:2.
1. Naa akambo wakahomana l’Akristo wa la Rɔma l’etena kakafunde Petero mukanda ande wa ntondo?
ƆPƆSTƆLƆ PETERO akafunde mukanda ande wa ntondo yema tshitshɛ la ntondo ka nkumekanga Nɛrɔ ntatɛ nsoya Akristo wa la Rɔma. Nde akakombola nkeketsha asekande ambetawudi nɛ dia Diabolo ‘aketetaka’ ayanga dia mbalɛ. Dia vɔ nshika tanga la ntondo kande, vɔ wakahombe ‘nsungukala’ ndo ‘ndjakitshakitsha l’ɛsɛ ka lonya la wolo la Nzambi.’ (1 Pet. 5:6, 8) Vɔ wakahombe nto monga kâmɛ. Vɔ takawahombe ‘numatana ndo ndɛna’ nɛ dia dui sɔ diakakoke mbakonya dia vɔ ‘shilana oshiki lam’asawɔ.’—Ngal. 5:15.
2, 3. Ele ɔndɔshi aso, ndo kakɔna kayangaso nsɛdingola l’asawo anɛ?
2 Ndo sho mbahomana l’akambo wa woho akɔ wâmɛ ɛlɔ kɛnɛ. Diabolo nyangaka waaso wa tɔlɛ. (Eny. 12:12) Sho tshɛ tekɔ lo kongɛ “fono ka [woke] . . . , wuhu wahatayala uma k’etatelu k’andja.” (Mat. 24:21) Sho pombaka mbewɔ ewanu woho wakewɔka Akristo wa lo ntambe ka ntondo. Dia sho nsala dui sɔ, tena dimɔtshi sho mongaka l’ohomba w’ekimanyielo ka dikumanyi diambotshunda.
3 Tayanga nsɛdingola woho wakoka dikumanyi mpamia lowando lawɔ lo diɛsɛ diele la wɔ dia ‘namaka ɛkɔkɔ wa Nzambi wakandawasha.’ (1 Pet. 5:2) Oma lâsɔ, tayɔsɛdingola yoho yoleki dimɛna yakoka dikumanyi nkamba olimu awɔ w’alami w’ɛkɔkɔ. Lo sawo dia yela, tayɔsɛdingola woho wakoka etshumanelo ‘monga la dilɛmiɛlɔ otsha le wanɛ wakamba olimu efula ndo walɔmbɔla’ ɛkɔkɔ. (1 Tes. 5:12) Ɔsɛdingwelo w’awui asɔ wayotokimanyiya dia sho nshika tanga la ntondo ka Satana otunyi aso wa woke, teya dia nde mbele ɔndɔshi aso.—Ef. 6:12.
Nyolamake ɛkɔkɔ wa Nzambi
4, 5. Ngande wahomba dikumanyi mbɔsa ɛkɔkɔ? Lembetshiya.
4 Petero akakeketsha dikumanyi dia la Rɔma dia lo ntambe ka ntondo dia vɔ mbɔsa ɛkɔkɔ wakawasha Nzambi woho wawaɔsande. (Adia 1 Petero 5:1, 2.) Kânga mbakandɔsamaka oko ɛkɔhɔ lo tshumanelo dia lo ntambe ka ntondo, Petero kofundɛka dikumanyi. Koko nde akâlakaka oko wanyande dikumanyi. (Ngal. 2:9) L’ɛnyɛlɔ ka Petero, dikumanyi dia l’Olui-walɔmbɔla keketshaka dikumanyi dia lo tshumanelo dia vɔ mbidja welo dia mɛmba ɔkɛndɛ wa woke wa namaka ɛkɔkɔ wa Nzambi.
5 Ɔpɔstɔlɔ Petero akafunde dia dikumanyi wakahombe ‘namaka ɛkɔkɔ wa Nzambi wakandawasha.’ Aki ohomba efula vɔ mbeya dia Jehowa nde la Yeso Kristo mbakanga ɛkɔkɔ. Dikumanyi sɔ wakahombe ndjokoya la Nzambi lo kɛnɛ kendana la woho walamawɔ ɛkɔkɔ wa Nzambi. Ohɔsa dia ɔngɛnyi ayɛ w’oshika walanga munda lɔkɛndɔ ambokɔlɔmba dia wɛ namaka anande. Shi wɛ ayowakokɛka ndo ayowaleshaka? Naka ɔna ɔmɔtshi ambotata, shi wɛ ayotshɔ la nde lo lopitadi dia nde tosakemɛ? Woho akɔ wamɛ mbele, dikumanyi dia l’etshumanelo pombaka ‘namaka etshumanelo ka Nzambi kakandasombe la dikila di’Ɔnande.’ (Etsha 20:28) Vɔ mbohɔka ɔnɛ ɛkɔkɔ tshɛ wakasombama la dikila dia Kristo Yeso di’oshinga wolo. Lam’ele vɔ wayokoya la Nzambi, dikumanyi wekɔ l’ɔkɛndɛ wa ndesha, nama ndo nkokɛ ɛkɔkɔ.
6. Naa ɔkɛndɛ waki l’alami w’ɛkɔkɔ wa lo nshi y’edjedja?
6 Alami w’ɛkɔkɔ wa mɛtɛ mɛtɛ waki lo nshi yakafundamaka Bible waki l’ɛkɛndɛ efula. Vɔ wakakikɛka yanyi ndo tshitshi l’oyango wa nkokɛ ɛkɔkɔ. (Etat. 31:40) Vɔ wakadjaka kânga nsɛnɔ yawɔ lo wâle l’ɔtɛ w’ɛkɔkɔ. Davidi aki olami w’ɛkɔkɔ etena kakinde dikɛnda. Mbala kɛmɔ, nde akakokɛ ɛkɔkɔ ande oma le tambwɛ ndo lawondo. Etena kakaye nyama ya ngala shɔ dia ndjonda ɛkɔkɔ, Davidi ‘akayikimɛ lo kingo, akayihine ndo akayidiake.’ (1 Sam. 17:34, 35) Ande dihonga diaki la nde lee! Nde mɛtɛ akayadje lo wâle! Koko nde akasale kɛnɛ tshɛ kakandakoke nsala dia nshimbɛ ɛkɔkɔ ande.
7. Ngande wakoka dikumanyi nkakitola ɛkɔkɔ oma lo manga yaki Satana lo yoho ya didjidji?
7 Ɛlɔ kɛnɛ, dikumanyi pombaka nsala la wolo diaha Diabolo lɛdikama la tambwɛ ndɛ ɛkɔkɔ. Dui sɔ nɔmbaka dia vɔ monga la dihonga diakoka mbakimanyiya dia tokakitola ɛkɔkɔ oma lo manga ya Diabolo lo yoho ya didjidji. Naka dikumanyi nshika tanga la ntondo ka nyama ka ngala kɛsɔ, kete vɔ kokaka nshimbɛ ɛkɔkɔ. Vɔ kokaka nkana yimba l’ɔnangɛso loyanga ntala lo djonga yaki Satana. (Adia Jude 22, 23.) Lo mɛtɛ, dikumanyi hawokoke nsala dui sɔ naka Jehowa hawakimanyiyisha. Vɔ ndɛtshalɛtshaka ɛkɔkɔ wambɔkɔ lo mbakɔtsha wônga ndo mbashinola esɔ kakitshakitsha kandji, mbuta ate Ɔtɛkɛta wa Nzambi.
8. Otsha lende alɔmbɔla dikumanyi ɛkɔkɔ, ndo lo yoho yakɔna yasalawɔ dui sɔ?
8 Alami w’ɛkɔkɔ wa mɛtɛ mɛtɛ wa lo nshi y’edjedja wakahombaka nɔmbɔla ɛkɔkɔ awɔ l’ahole waki adiyo w’ɛmɔngɛla ndo ashi wa nnɔ. Woho akɔ wâmɛ mbele, dikumanyi nɔmbɔlaka ɛkɔkɔ otsha l’etshumanelo ndo vɔ mbakeketshaka dia vɔ mbɔtɔka nsanganya mbala la mbala dia ɛkɔkɔ ndeshama dimɛna ndo nkondja mbo ya ndɛ “mbu ya nde yawo lu tena diayo.” (Mat. 24:45) Lâdiko dia wenya wetshawɔ l’awui awɔ hita, dikumanyi pombaka mbɔsa etena ka nkimanyiya wanɛ wele la hemɔ ya lo nyuma dia vɔ mbetawɔ ndɛ mma di’oma l’Ɔtɛkɛta wa Nzambi. Lo nsala ngasɔ, vɔ kokaka nkimanyiya ɔkɔkɔ wambonganɛ dia nkalola oya lo lokoto. Lo dihole dia vɔ mbotsha ɛkɔkɔ wɔma, dikumanyi pombaka mbalembetshiya atɔndɔ w’oma l’Afundelo la ngandji tshɛ lo mbaɛnya woho wakokawɔ nkamba la wɔ lo nsɛnɔ yawɔ.
9, 10. Ngande wakoka dikumanyi nkimanyiya ɛkɔkɔ wele la hemɔ ya lo nyuma?
9 Etena katoyondamaka la hemɔ, dɔkɔtɛlɛ dia ngande diatoyokombolaka dia nde kosakɛ? Onde dɔkɔtɛlɛ diatokohokamɛka paka lo tshenyi ya wonya ko kofundɛ ekanga dia nde nkondja diaaso dia nongola ɛkɔnyi ekina? Kana wɛ ayolanga paka dɔkɔtɛlɛ diakohokamɛ la yambalo tshɛ etena kawolembetshiyayɛ woho wokayɛ ndo diasala la wolo dia kosakɛ ndo diakɛnya weho w’esakelo wakokayɛ nsɔna?
10 Dikumanyi vɔ lawɔ pombaka mpokamɛ ɛkɔkɔ wele la hemɔ lo nyuma ndo mbakimanyiya dia mpota yawɔ nkɔnɔ lo mbashinola “iso lu lukumbu la Khumadiondjo” lo yoho ya didjidji. (Adia Jakoba 5:14, 15.) L’ɛnyɛlɔ ka diɔmbɔ dia la Ngiliyadɛ, Ɔtɛkɛta wa Nzambi kokaka nkitshakitsha kandji kôka ɔkɔkɔ wele la hemɔ. (Jer. 8:22; Ezek. 34:16) Naka ɛkɔkɔ nkamba l’atɔndɔ wa lo Bible, kete dui sɔ diayowakimanyiya dia vɔ nyomonga la lonyuma la dimɛna. Naka dikumanyi nɔmba kâmɛ l’ɔkɔkɔ l’ɔkɔngɔ wa vɔ mbohokamɛ etena kawatɛnde ekiyanu wele la nde, kete dui sɔ diayonga l’etombelo w’amɛna efula.
Aha la nkudu, koko l’ɔngɛnɔngɛnɔ
11. Kakɔna katshutshuya dikumanyi dia nama ɛkɔkɔ waki Nzambi l’ɔngɛnɔngɛnɔ?
11 Oma lâsɔ, Petero akohola dikumanyi kɛnɛ kakawahombaka nsala ndo kɛnɛ kakiwɔ kokoka nsala l’olimu awɔ w’alami w’ɛkɔkɔ. Dikumanyi pombaka namaka ɛkɔkɔ wa Nzambi ‘aha la nkudu, koko l’ɔngɛnɔngɛnɔ.’ Kakɔna katshutshuya dikumanyi dia vɔ kambɛ anangɛwɔ l’akadiyɛwɔ l’ɔngɛnɔngɛnɔ? Kakɔna kakatshutshuya Petero dia nde namaka ɛkɔkɔ wa Yeso ndo mbaleshaka? Dui dimɔtshi ele ngandji kakandokaka Nkumadiɔndjɔ. (Joa. 21:15-17) L’ɔtɛ wa ngandji kele la wɔ, dikumanyi bu la lɔsɛnɔ “dia dikambu diawo vame, keli dia one lakâvwela.” (2 Kor. 5:14, 15) Ngandji kɛsɔ, mbidja ndo ngandji kokawɔ Nzambi ndo anangɛwɔ l’akadiyɛwɔ, mbatshutshuya dia vɔ kambɛ ɛkɔkɔ la welo awɔ, la diangɔ diele la wɔ ndo la wenya awɔ. (Mat. 22:37-39) Vɔ salaka akambo asɔ l’ɔngɛnɔngɛnɔ.
12. Polo lo yɛdikɔ yakɔna yakayashaka ɔpɔstɔlɔ Paulo dia nkimanyiya ase Tɛsalɔnika?
12 Polo lo yɛdikɔ yakɔna yahomba dikumanyi nsala akambo asɔ? Lo nkokɛ ɛkɔkɔ, vɔ mbokoyaka ɔpɔstɔlɔ Paulo lakokoyaka Yeso. (1 Kor. 11:1) Lo menda ngandji k’efula kaki la nde otsha le anango l’akadiyɛnde wa la Tɛsalɔnika, Paulo nde l’asekande waki suke dia mbasha ‘aha tsho lokumu l’ɔlɔlɔ la Nzambi, koko ndo nyumu yawɔ.’ Lo nsala ngasɔ, vɔ wakɛnya dia waki la memakana “uku atûmbaka wali an’andi.” (1 Tes. 2:7, 8.) Paulo akeyaka woho wayasha waale wa womoto otsha le anande. Nde mbasalɛka oseka dikambo tshɛ, ɛnyɛlɔ oko memɔ la kati k’otsho dia mbasha mbo ya ndɛ.
13. Wɛdimo akɔna wahomba monga la dikumanyi?
13 Dikumanyi pombaka monga la wɛdimo lam’asa olimu awɔ wa nkokɛ ɛkɔkɔ ndo wa nkotsha ɛkɛndɛ awɔ wa lo nkumbo. (1 Tim. 5:8) Wenya wetsha dikumanyi dia membola ase etshumanelo ekɔ wenya wakokawɔ mbetshaka kâmɛ l’ase nkumbo yawɔ. Yoho mɔtshi yakokawɔ mɛnya wɛdimo ɔsɔ ele lo mbelɛka anangɛso l’akadiyɛso lawakawɔ lo diaaso dimɔtshi dia vɔ ndjɔtɔ l’Ɔtɛmwɛlɔ awɔ wa lo nkumbo wa la dikɔlɔ. L’edja k’ɛnɔnyi efula, ekumanyi ka lo wodja wa Japon kelewɔ Masanao akelɛka enyemba ndo ana wele ambutshi awɔ bu Ɛmɛnyi wa Jehowa dia vɔ ndjosala wekelo wa lo nkumbo kâmɛ. L’edjedja ka wonya, anangɛso amɔtshi wakawakimanyiya wakayokomaka dikumanyi vɔ lawɔ ndo wakayokoyaka ɛnyɛlɔ k’ɔlɔlɔ kaki Masanao.
Nyewɔ ekundji wa lokeso ndo nyolamake ɛkɔkɔ l’osalosalo
14, 15. Lande na kahomba dikumanyi mbewɔ dia monga la ‘ngandji k’ekundji wa lokeso,’ ndo ngande wakokawɔ mbokoya Paulo lo dikambo sɔ?
14 Ndo nto, Petero akakeketsha dikumanyi dia vɔ namaka ɛkɔkɔ ‘aha la ngandji k’ekundji wa lokeso, koko l’osalosalo.’ Olimu wahomba nkamba dikumanyi mbɔsaka wenya efula, koko vɔ hawofutama ndoko ɛngɔ. Petero akɛnyi di’ekɔ ohomba mbewola asekande dikumanyi dia vɔ namaka ɛkɔkɔ aha la monga la ‘ngandji k’ekundji wa lokeso.’ Wâle ɔsɔ mɛnamaka hwe lo lɔsɛnɔ la tama lasɛna ewandji w’ɛtɛmwɛlɔ wa lo “Babilona ka wuki” kânga mbadiɛnɛ anto efula la lɔsɛnɔ la wola. (Eny. 18:2, 3) Mbokɛmaka lande na kahomba dikumanyi dia nshi nyɛ ndjalama diaha nsala akambo lo yoho shɔ.
15 Paulo akatshikɛ dikumanyi di’Akristo ɛnyɛlɔ k’ɔlɔlɔ. Kânga mbakinde ɔpɔstɔlɔ ndo mbakandakoke monga “wutshu” le Akristo wa la Tɛsalɔnika, nde “konde ma di’untu olele” nɛ dia nde “akakambaka ulimu wulu ndu la utshu ndu la yanyi.” (2 Tes. 3:8) Dikumanyi efula dia nshi nyɛ, mbindja ndo emendji weteta, mbishaka ɛkɔkɔ ɛnyɛlɔ k’ɔlɔlɔ lo dikambo sɔ. Kânga mbâlongola asekawɔ ambetawudi, vɔ hawonge “wutshu” le onto kânga ɔtɔi.—1 Tes. 2:9.
16. Nama ɛkɔkɔ ‘l’osalosalo’ kɛdikɛdi na?
16 Dikumanyi pombaka namaka ɛkɔkɔ ‘l’osalosalo.’ Osalosalo ɔsɔ mɛnamaka lo woho wakimanyiyawɔ ɛkɔkɔ la ngandji ka ndjahombia. Koko kɛsɔ halange nembetshiya dia vɔ tshutshuyaka ɛkɔkɔ dia kambɛ Jehowa olimu kana mbokambɛ la yimba ya shɛmanedi. (Ngal. 5:26) Dikumanyi mbeyaka dia ɛkɔkɔ ntshikitana. Vɔ nomɔlomɔka dia nkimanyiya anangɛwɔ l’akadiyɛwɔ dia kambɛ Jehowa l’ɔngɛnɔngɛnɔ.
Tanyahemɛke ɛkɔkɔ, koko nyowasha ɛnyɛlɔ kahombawɔ ndjela
17, 18. a) Lande na kele apɔstɔlɔ koshihodiaka wetshelo waki Yeso lo kɛnɛ kendana l’okitshakitsha mbala mɔtshi? b) Okakatanu akɔna wakahomana l’apɔstɔlɔ wakokaso mpomanaka la wɔ?
17 Oko wambotoshila diɛna, dikumanyi pombaka mbohɔka ɔnɛ ɛkɔkɔ walamawɔ wekɔ waki Nzambi, koko aha wawɔ. Vɔ salaka la wolo diaha ‘mbahemɛ wanɛ wele sango diaki Nzambi.’ (1 Pet. 5:3) Lo tena dimɔtshi, apɔstɔlɔ waki Yeso wakakɛnɛmɔla eyango wa lokaki. L’ɛnyɛlɔ ka wanɛ wakolɛka anto akina, vɔ lawɔ wakakombola monga anto wa weke.—Adia Mako 10:42-45.
18 Ɛlɔ kɛnɛ, anangɛso wakombola nkamba “ulimu w’umendji wa lu ekelizia” pombaka ndjambola lande na kakombolawɔ olimu ɔsɔ. (1 Tim. 3:1) Wanɛ wele dikumanyi ɛlɔ kɛnɛ pombaka ndjambola kana vɔ wekɔ la nsaki ka lowandji kana ka monga anto wa weke oko wakakombolaka apɔstɔlɔ waki Yeso. Lam’ele apɔstɔlɔ waki la nsaki kɛsɔ, dikumanyi pombaka nsala la wolo diaha monga la nsaki kele l’anto wa l’andja ɔnɛ ka mbahemɛ anto akina.
19. Kakɔna kahomba dikumanyi mbohɔka etena kakokɛwɔ ɛkɔkɔ?
19 Lo mɛtɛ, dikumanyi nɔmbamaka diaha monga djɔmɔ tɛwɛ tena dimɔtshi, ɛnyɛlɔ etena kakokɛwɔ ɛkɔkɔ oma le “ndjaundu ya pangu.” (Etsha 20:28-30) Paulo akatɛ Tito ɔnɛ: “Utelaki antu akambu ane: âkokomiyaki, âhunwelaki la wulu tshe.” (Tito 2:15) Koko kânga etena kahombawɔ nsala ngasɔ, dikumanyi pombaka nɛmiya wanɛ wendana la dui sɔ. Vɔ mbeyaka dia lo dihole dia vɔ mɔnyɔla ɛkɔkɔ, mbala efula yoho yoleki dimɛna ya munanda etema awɔ ndo mbatshutshuya dia vɔ nsala akambo w’ɛlɔlɔ ele mbaetawoyawɔ la dilɛmiɛlɔ tshɛ.
20. Ngande wakoka dikumanyi mbokoya Yeso lo mbisha ɛnyɛlɔ k’ɔlɔlɔ?
20 Ɛnyɛlɔ k’ɔlɔlɔ ka Kristo tshutshuyaka dikumanyi dia mboka ɛkɔkɔ ngandji. (Joa. 13:12-15) Etena kadiaso Bible, etema aso munandemaka lo mboka kɛnɛ kakandatɛ ambeki ande lo kɛnɛ kendana l’olimu w’esambishelo ndo wa mbetɛ anto ambeki. Ɛnyɛlɔ kande k’okitshakitsha kakananda etema w’ambeki ande ndo kakâtshutshuya dia vɔ monga la ‘okitshakitsha lo mbɔsa di’anto akina mbâleka.’ (Fil. 2:3) Ɛlɔ kɛnɛ, dikumanyi vɔ lawɔ pombaka mbokoya ɛnyɔlɔ ka Yeso ndo ‘mbisha ɛkɔkɔ ɛnyɛlɔ ka vɔ ndjela.’
21. Naa difuto diakongɛ dikumanyi?
21 Petero akakomiya mukanda ande lo mbohola dikumanyi daka dimɔtshi diendana la nshi yayaye. (Adia 1 Petero 5:4.) Emendji w’akitami “[wa]yulungula dembo dia kusu dia lutumbu” kâmɛ la Kristo l’olongo. Emendji w’oma lo “ekoko ekina” wayonga la diɛsɛ dia namaka ɛkɔkɔ wa Nzambi l’ɛse k’ɛlɔmbwɛlɔ ka “Ulami a wuki.” (Joa. 10:16) Lo sawo diayela, tayɔsɛdingola toho takoka ase etshumanelo nsukɛ wanɛ wakasɔnama dia nɔmbɔla.
Ovuswelo
• Lande na kakalake Petero asekande dikumanyi dia vɔ namaka ɛkɔkɔ wa Nzambi wakandawasha?
• Lande na kahomba dikumanyi namaka ɛkɔkɔ wele la hemɔ ya lo nyuma?
• Kakɔna katshutshuya dikumanyi dia namaka ɛkɔkɔ wa Nzambi wakandawasha?
[Ambola wa wekelo]
[Osato wa lo lɛkɛ 21]
Oko alami w’ɛkɔkɔ wa lo nshi y’edjedja, ɛlɔ kɛnɛ dikumanyi pombaka nkokɛ ɛkɔkɔ wakawawasha
