Onde akɛnda kokaka batizama?

CARLOS * lele ombutshi wa pami w’Okristo wodjashi lo wodja wa Philippines mbutaka ate: “Lekɔ l’ɔngɛnɔngɛnɔ efula nɛ dia ɔnami la womoto aya okambi wa Jehowa ndo dimi mbeyaka dia nde lawɔ ekɔ l’ɔngɛnɔngɛnɔ.” Ombutshi okina wa pami wodjashi lo wodja wa Grèce akafunde ate: “Dimi la wadɛmi tekɔ l’ɔngɛnɔngɛnɔ nɛ dia anaso asato wakabatizama dia nkoma Ɛmɛnyi wa Jehowa lam’akiwɔ l’ɛnɔnyi dikumi l’ɛmɔtshi. Vɔ wekɔ lo tahame lo nyuma ndo wekɔ l’ɔngɛnɔngɛnɔ dia kambɛ Jehowa.”

Ambutshi w’Akristo wekɔ l’ɔkɔkɔ wa monga l’ɔngɛnɔngɛnɔ w’efula etena kalongola anawɔ batismu, Koko tena dimɔtshi ɔngɛnɔngɛnɔ ɔsɔ ndjelanaka la lonyangu. Mama kɛmɔtshi mbutaka ate: “Laki l’ɔngɛnɔngɛnɔ ndo la lonyangu l’efula. Lande na kakinde l’ɔngɛnɔngɛnɔ ndo la lonyangu? Lakashihodia di’ɔnami la pami ayoyokoya la Jehowa.”

Kambɛ Jehowa oko ɔmɔtshi wa l’atei w’Ɛmɛnyi ande wambobatizama ekɔ oyango wahomba akɛnda tshɛ ndjadjɛ. Koko, ambutshi woka Nzambi wɔma mbeyaka ndjambola ɔnɛ: ‘Dimi mbeyaka nte ɔnami ekɔ lo tahame dimɛna, ko onde nde ayoshika tanga la wolo tshɛ la ntondo ka tɔsɛngiya t’awui wa mindo ndo ntshikala pudipudi la ntondo ka Jehowa?’ Akina kokaka ndjambola ɔnɛ: ‘Onde ɔnami ayotetemala kambɛ Nzambi l’ɔngɛnɔngɛnɔ ndo l’ohetoheto naka nde pembama dia monga la nsaki ka lomombo la l’emunyi?’ Ngande wakoka, atɔndɔ wa lo Bible nkimanyiya ambutshi dia vɔ nshikikɛ dia kana ana awɔ wambokoka nongola batismu?

Di’onto nongola batismu, paka nde tongi ombeki waki Kristo

Lo dihole dia nshikikɛ ɛnɔnyi shikaa wahomba onto batizama, Ɔtɛkɛta waki Nzambi shilaka akambo wa lo nyuma wahomba nkotsha wanɛ walanga ntakola nna sɔ. Yeso akatɛ ambiki ande ate: ‘Nyetɛ wedja tshɛ ambeki, nyâbatize.’ (Mat. 28:19) Oma lɔkɔ mbele, paka wanɛ wambôkomaka ambeki waki Kristo mbahomba batizama.

Tshɛkɛta ombeki kɛdikɛdi na? Étude perspicace des Écritures mbutaka ɔnɛ: “Tshɛkɛta nyɛ hendana tsho la wanɛ wetawɔ wetshelo waki Kristo, koko mendanaka ndo la wanɛ wôyela tshɛ lo tshɛ.” Onde akɛnda kokaka nkoma ambeki waki Kristo wa mɛtɛ mɛtɛ? Kadiyɛso kɛmɔtshi kakakambe oko misiɔnɛrɛ l’Amérique Latine l’edja kolekanyi ɛnɔnyi 40 akafunde lo dikambo diande ndo di’akadiyɛnde ahende ate: “Aki taya tohanda mbakatonge la nsaki ka kambɛ Jehowa dia  ndjɔsɛna lo Paradiso. Ndjakimɔ kaso akatokimanyiya dia sho nshika tanga la ntondo k’ehemba wahomana l’akɛnda. Sho komonga kânga la yema ya lonyangu tshitshɛ l’ɔtɛ wakatayakimɔ le Nzambi oma ko akɛnda aso.”

Ngande wayoyeya dia kana ɔnayɛ ambokoka nkoma ombeki waki Kristo? Bible mbutaka ɔnɛ: “Ndu ona ateyamaka uma l’etsha andi, kana lokewo landi layuluwana ndu layusimbo.” (Tuk. 20:11) Tayanga nsɛdingola akambo amɔtshi wahomba akɛnda nsala ‘ohamelo awɔ wekɔ lo mɛnama le anto tshɛ’ oko ambeki waki Kristo.—1 Tim. 4:15.

Tolembetelo tɛnya di’ɔnayɛ ekɔ ombeki waki Kristo

Onde ɔnayɛ kokitanyiyaka? (Kol. 3:20) Onde nde kambaka elimu wawoshayɛ la ngelo? Bible mbutaka lo dikambo dia Yeso etena kakinde l’ɛnɔnyi 12 ɔnɛ: “Ndi akakitanyiyaka aui [w’ambutshi ande].” (Luka 2:51) Lo mɛtɛ, nshi yaso nyɛ ndoko ɔna lakitanyiya ambutshi ande tshɛ lo tshɛ. Koko Akristo wa mɛtɛ pombaka ‘ndjela wanya wa Yeso dimɛna dimɛna.’ Ɔnkɔnɛ, ana wakombola batizama pombaka mbeyama oma l’okitanyiya wele la wɔ otsha le ambutshi awɔ.—1 Pet. 2:21.

Yaoka ambola wayela anɛ: Onde ɔnayɛ ‘mbetshaka Diolelo lo dihole dia ntondo’ lo ndjasha l’olimu w’esambishelo? (Mat. 6:33) Onde nde ekɔ suke dia nsambisha anto akina lokumu l’ɔlɔlɔ kana nde salaka dikambo sɔ paka wɛ ambôtshutshuya ndo ambowotɛ dia nde pombaka tosambisha lo luudu la luudu? Onde nde ekɔ l’okakatanu dia nkotsha ɔkɛndɛ ande w’opandjudi wahatabatizama? Onde nde ekɔ la nsaki ka ntshɔ dia tosala wendelo w’eyoyo le anto wakɛnya nsaki l’ɛtshi kande ka nkɛtɛ? Onde nde ndjaeyanyaka le asekande wa la kalasa kana le embetsha ande oko Ɔmɛnyi wa Jehowa?

Onde nde mɛnaka dia wɔtwɛlɔ wa lo nsanganya ya l’etshumanelo wekɔ ohomba le nde? (Osam. 122:1) Onde nde mongaka l’ɔngɛnɔngɛnɔ dia mbisha kɔmatɛrɛ lo Wekelo wa Tshoto y’Etangelo ndo lo Wekelo wa Bible wa l’etshumanelo? Onde nde mangasanaka dia mbisha asawo walongolande lo Kalasa k’olimu wa teokrasi?—Heb. 10:24, 25.

Onde ɔnayɛ salaka la wolo dia ntshikala la lɔkɛwɔ la pudipudi lo ntona dia mbɔtɔnɛ l’angɛnyi wa kɔlɔ la kalasa kana oseka dihole diakɔna tshɛ? (Tuk. 13:20) Naa mishiki, filmɛ, emisiɔ wa lo televiziɔ, tɔkɛnyɔ ta lo vidɛo ndo okambelo wa l’Ɛtɛrnɛtɛ watondolekaka nanga? Onde ɛtɛkɛta ndo etsha ande mɛnyaka dia nde nangaka nsɛna lo yoho yɔtɔnɛ l’atɔndɔ wa lo Bible?

Polo lo yɛdikɔ yakɔna yeya ɔnayɛ akambo wa lo Bible? Onde nde koka mbuta awui wambondeka l’ɛtɛkɛta ande hita etena kasalema Ɔtɛmwɛlɔ wa lo nkumbo wa la dikɔlɔ? Onde nde kokaka nembetshiya anto akina wetshelo w’etatelo w’akambo wa mɛtɛ wa lo Bible? (Tuk. 2:6-9) Onde nde ndjashaka lo wadielo wa Bible ndo mbekaka ekanda wakilembetshiya watondja ɔhɔmbɔ wa kɔlamelo ndo wa kɛsɔ? (Mat. 24:45) Onde nde mbokaka ambola lo kɛnɛ kendana la wetshelo wa lo Bible ndo avɛsa wa lɔkɔ?

Ambola asɔ wayokokimanyiya dia wɛ mbɛdika lonyuma l’ɔnayɛ. L’ɔkɔngɔ wa wɛ mbasɛdingola,  wɛ kokaka nshikikɛ dia kana nde âkahombe nkotsha akambo amɔtshi dia nde nongola batismu. Koko naka ɔnayɛ mɛnyaka lo lɔsɛnɔ lande dia nde ekɔ ombeki waki Kristo ndo amboyakimɔka le Nzambi, kete wɛ koka mbetawɔ dia nde batizama.

Kânga akɛnda kokaka ntombola Jehowa

Ekambi wa Nzambi efula wakɛnya mbetawɔ ndo olowanyi awɔ ntatɛ lam’akiwɔ l’ɛnɔnyi dikumi l’ɛmɔtshi. Ohokana yimba lo dikambo dia Yɔsɛfu, Samuɛlɛ, Jɔsiya ndo Yeso. (Etat. 37:2; 39:1-3; 1 Sam. 1:24-28; 2:18-20; 2 Ek. 34:1-3; Luka 2:42-49) Ana anɛi wa wamato waki Filipɛ wakataka akambo wahataye waketshama dimɛna oma ko tɔkɛndakɛnda tawɔ weho akɔ tshɛ.—Etsha 21:8, 9.

Ɔmɛnyi wa Jehowa ɔmɔtshi wa lo wodja wa Grèce mbutaka ɔnɛ: “Lakalongola batismu lam’akimi l’ɛnɔnyi 12. Dimi konyanga ndoko yema lo yɛdikɔ yakamɔshi. Oma ko etena kɛsɔ, lambokambɛ Nzambi l’edja k’ɛnɔnyi 24 ndo lambetsha ɛnɔnyi 23 l’olimu wa lo tena tshɛ. Ngandji kokami Jehowa mbala tshɛ kimanyiyakami dia ntondoya ekakatanu wahomana l’akɛnda. Lam’akimi l’ɛnɔnyi 12, dimi komonga l’ewo ka l’Afundelo kele la mi kakianɛ. Koko dimi lakeyaka nte dimi pombaka kambɛ Jehowa pondjo pondjo l’ɔtɛ wa ngandji kawokami. Lekɔ l’ɔlɔ nɛ dia nde akakimanyiya dia dimi ntetemala mbokambɛ.”

Oyadi dikɛnda kana opalanga mbende, onto tshɛ lakotsha kɛnɛ kalɔmbama dia monga ombeki wa mɛtɛ waki Kristo kokaka batizama. Ɔpɔstɔlɔ Paulo akafunde ate: “Ne dia untu letawo l’utema andi, atuyindjamaka; la one lashula l’unyo andi, atushimbamelaka.” (Romo 10:10) Etena katakola ombeki wa dikɛnda waki Kristo nna dioleki ohomba dia batismu, nde l’ambutshi ande mongaka l’ɔlɔ w’efula. Tetawɔke wɛ l’anayɛ dia dui dimɔtshi nyoshimba dia nyu monga l’ɔlɔ wanyokongɛ.

[Nɔte ka l’ɛse ka dikatshi]

[Kiombo ya lo lɛkɛ 5]

Nyonge la kanyi y’ɔlɔlɔ lo dikambo dia batismu

Ambutshi amɔtshi mbɔsaka batismu k’anawɔ oko nna dia dimɛna diele ndo la wâle, mbuta ate vɔ waya oko toshufɛlɛ tambolongola mikanda wawasha lotshungɔ la ntatɛ nkɛndjakɛndja mituka. Ko onde Bible mɛnyaka dia naka dikɛnda ambobatizama ndo ambotatɛ kambɛ Nzambi olimu w’ekila, kete nde ambodja lɔsɛnɔ lande la lo nshi yayaye lo wâle? Kema. Tukedi 10:22 mbutaka ɔnɛ: “Otshoko wa [Jehowa] mbatongonyaka. Ndi hataheka lunyangu ladiku diawo.” Ndo Paulo akafundɛ ɔlɔngɔlɔngɔ Timɔtɛ ate: “Keli olemielo a [Nzambi] la ongenongeno weko waho a wuki.”—1 Tim. 6:6.

Ekɔ mɛtɛ dia, kambɛ Jehowa olimu bu dui dia wɔdu. Jeremiya akahomana l’ekakatanu efula l’olimu ande w’ɔprɔfɛta wa Nzambi. Koko, nde akafunde lo kɛnɛ kendana l’ɔtɛmwɛlɔ wa Nzambi ka mɛtɛ ate: Ɔtɛkɛta ayɛ “wakayala ongenongeno le mi, wakangenyangenya utema ami, ne dia watumbetaka lukumbu laye, we [Jehowa, Nzambi] Kanga lulimbilimbi.” (Jer. 15:16) Jeremiya akeyaka ɔnɛ olimu wa Nzambi mbaki kiɔkɔ y’ɔngɛnɔngɛnɔ ande. Andja waki Satana wekɔ kiɔkɔ y’ekakatanu. Ambutshi pombaka nkimanyiya anawɔ dia vɔ mbeya otshikitanu ɔsɔ.—Jer. 1:19.

 [Kiombo/Osato wa lo lɛkɛ 6]

Onde dimi pombaka ntshindjatshindja batismu k’ɔnami?

Mbala mɔtshi, ambutshi mbeyaka ntshindjatshindja batismu k’anawɔ kânga naka vɔ kotshaka kɛnɛ kalɔmbama. Ɛkɔkɔ akɔna wakoka monga la wɔ?

Lekɔ la wɔma dia naka ɔnami batizama, nde kokaka ndjosala pɛkato ka woke ko ndjotshanyema oma l’etshumanelo. Onde ekɔ dimɛna mbɔsa di’onto latshindjatshindja batismu kande hokoya la Nzambi l’ɔtɛ wa lɔkɛwɔ lande? Sɔlɔmɔna akatɛ akɛnda ate: “Eyi wati: Lu akambu [wasalayɛ tshɛ, Nzambi ka mɛtɛ] ayuketa lu elumbwelu.” (Und. 11:9) Ndo nto, Paulo akasha anto wa lo nɔnga tshɛ dako nɛ: “Okone shu tshe, untu l’untu, tayuyateketela le [Nzambi].”—Romo 14:12.

Ekambi waki Nzambi wambobatizama ndo wahatabatizama vɔ tshɛ wayokoya la nde. Tatohɛke dia Jehowa kokɛka ekambi ande nɛ dia nde ‘hatetawɔ dia vɔ pembama oleki kɛnɛ kakokawɔ mbikikɛ.’ (1 Kor. 10:13) Naka vɔ ‘nsungukala’ ndo nshika ekolo la ntondo k’ehemba, kete Nzambi ayowasukɛ. (1 Pet. 5:6-9) Mama ka nkumbo k’Akristo kɛmɔtshi akate ate: “Akɛnda wambobatizama mbaleka ntona dia ndjasha l’awui wa kɔlɔ wa l’andja ɔnɛ. Ɔnami la pami lakabatizama l’ɛnɔnyi 15 mbɔsaka dia batismu ekɔ tshondo y’ekokelo. Nde mbutaka ɔnɛ: ‘Onto lambobatizama bu l’etena ka nkanyiya dia nsala dui dimɔtshi diahɔtɔnɛ l’ɛlɛmbɛ waki Jehowa.’ Batismu kimanyiyaka akɛnda dia vɔ nsala awui w’ɛlɔlɔ.”

Naka wɛ mbetsha anayɛ l’ɛtɛkɛta ndo l’ɛnyɛlɔ dia vɔ nkitanyiya Jehowa, kete weho akɔ tshɛ vɔ wayotetemala nsala ngasɔ l’ɔkɔngɔ wa vɔ batizama. Tukedi 20:7 mbutaka ɔnɛ: “Untu ololo atokendakendaka l’uluwanyi w’utema andi. An’andi watongenangenaka l’okongo andi!”

Anami pombaka takotshisha eyango ɛmɔtshi. Akɛnda pombaka mbeka olimu ɔmɔtshi dia vɔ ndjonga l’akoka wa vɔ ndjasɛnya. Koko ambutshi wakeketsha anawɔ dia vɔ mbetsha wɔtwɛlɔ wa kalasa lo dihole dia ntondo dia vɔ ndjonga la lɔsɛnɔ la dimɛna mbadjaka lo wâle. Lo kɛnɛ kendana la “wuhu” kana dui dia Diolelo diahatombe Yeso akate ate: “One lakukama l’atei w’atende eli untu latukaka diui, ku tukanyi ta akambu wa la kete, la lukesu l’ekundji, atutshidiaka diui. Ku ndi ambuyala aha la tongo.” (Mat. 13:22) Akɛnda wetsha eyango wa l’andja ɔnɛ lo dihole dia ntondo ko akambo wa lo nyuma lo dihole dia hende ndjoshishaka nsaki ka kambɛ Nzambi.

Ekumanyi kɛmɔtshi kambokamba edja akate lo kɛnɛ kendana l’akɛnda wahalange ambutshi awɔ dia vɔ batizama kânga mbambowokotsha kɛnɛ kalɔmbama ate: “Naka ambutshi nshimba anawɔ w’akɛnda dia vɔ batizama, kete vɔ mbeyaka ntshika ndjasha l’akambo wa lo nyuma ndo nkɔmɔ.” Omendji weteta ɔmɔtshi akafunde ate: “Naka ambutshi nshimba anawɔ w’akɛnda dia vɔ batizama, kete vɔ mbeyaka ndjɔsa dia ana akina mbâleka lonyuma. Vɔ kokaka ndjasha l’akambo wa l’andja ɔnɛ dia vɔ mandɔma.”

[Osato]

Onde wɔtwɛlɔ wa kalasa y’adidi mbahomba mbeta lo dihole dia ntondo?

[Osato wa lo lɛkɛ 3]

Dikɛnda kokaka mɛnya dia nde ekɔ ombeki waki Kristo

[Esato wa lo lɛkɛ 3]

Ɔlɔngɔswɛlɔ wa nsanganya ndo woshelo wa kɔmatɛrɛ

[Osato wa lo lɛkɛ 4]

Nkitanyiya ambutshi

[Osato wa lo lɛkɛ 4]

Nsambisha

[Osato wa lo lɛkɛ 4]

Dɔmbɛlɔ di’onto ndamɛ