Onde tayohokamɛka ɛhɛmwɛlɔ watosha Jehowa?
Onde tayohokamɛka ɛhɛmwɛlɔ watosha Jehowa?
“Mbuka keku, nyokendekende loko! nyokendekende loko!”—IS. 30:21.
1, 2. Kakɔna kamboyashikikɛ Satana dia nsala, ndo ngande watokimanyiya Ɔtɛkɛta wa Nzambi?
DJEMBETELO yɛnya mboka ka kɔlɔ hayonganyiya tsho onto, koko yɔ kokaka mbokonya lo wâle. Ohɔsa di’ɔngɛnyi ayɛ ɔmɔtshi ambokewola di’onto ɔmɔtshi l’otema mindo akengodi l’okonda tshɛ djembetelo yele lo mboka dia minganyiya ambetshetshi wele kema la yewo. Shi wɛ ayohokamɛ ɔhɛmwɛlɔ ɔsɔ?
2 Lo mɛtɛ, Satana ekɔ otunyi wamboyashikikɛ dia tonganyiya. (Eny. 12:9) Tɔsɛngiya tshɛ ta kɔlɔ takatasɛdingola lo sawo dietshi ndja oma le nde ndo tekɔ l’oyango wa tɛtɔya oma lo mboka katɔla otsha lo lɔsɛnɔ la pondjo. (Mat. 7:13, 14) Diɛsɛ ko, Nzambi kaso koludi la ngandji tɔhɛmɔlaka diaha sho ndjela tolembetelo tadja Satana lo mboka l’oyango wa tonganyiya. Tayanga nsɛdingola tɔsɛngiya tokina tosato ta kɔlɔ takamba la Satana. Etena katatasɛdingola woho wakoka Ɔtɛkɛta wa Nzambi tokimanyiya dia sho mbewɔ minganyiyama, tɔshi dia Jehowa ekɔ lo ndjakɛndakɛnda l’ɔkɔngɔ aso ndo ekɔ lo ndjatɛnya mboka ka dimɛna lo totɛ ɔnɛ: “Mbuka keku, nyokendekende loko! nyokendekende loko!” (Is. 30:21) Naka sho nkana yimba l’ɛhɛmwɛlɔ waki Jehowa, kete tayokeketsha yɛdikɔ yaso ya mbayela.
Tatoyelake “embetsha wa kashi”
3, 4. a) Lande na kɛdikama embetsha wa kashi la safu diele bu kânga la dipɔpɔ di’ashi? b) Oma lende aya embetsha wa kashi, ndo naa oyango wele la wɔ?
3 Ohokanyiya dia wɛ ekɔ lo tande lɔkɛndɔ l’atei w’oswe wa shɛnga. Wɛ ambɛna esafu oma l’etale, ko ambotshɔ otsha lɛkɔ l’elongamelo ka tokondja ashi dia nshidiya mposa kele la yɛ. Wɛ akoma tsho, ende ko ndoko kânga dipɔpɔ dia wɛ nnɔ. Ande woho wayoyɔkɔmɔ demba lee! Embetsha wa kashi wekɔ oko safu diele bu kânga la dipɔpɔ di’ashi. Anto tshɛ waya ndjoyanga ashi w’akambo wa mɛtɛ le wɔ kɔmɔka demba. Lo tshimbo y’ɔpɔstɔlɔ Paulo nde la Petero, Jehowa toshaka ɛhɛmwɛlɔ lo kɛnɛ kendana l’embetsha wa kashi. (Adia Etsha 20:29, 30; 2 Petero 2:1-3.) Waa na wele embetsha ɛsɔ? Ɛtɛkɛta waki apɔstɔlɔ asɔ ahende wakasambiyama tokimanyiyaka dia sho mbeya oma lende aya embetsha wa kashi ndo woho wakesawɔ anto.
4 Paulo akatɛ dikumanyi dia l’etshumanelo ka l’Ɛfɛsɔ ɔnɛ: “Antu wayunela uma l’atei anyu nyame, wayutela antu akambu waha mete.” Petero akafundɛ wanyande Akristo ɔnɛ: “Embetsha wa kashi wukuyala l’atei anyu.” Ko oma lende atomba embetsha wa kashi? Vɔ kokaka ndja oma l’etshumanelo. Amɔtshi l’atei awɔ wekɔ waa apɔsta. * Naa oyango wele la wɔ? Vɔ hawokombola tsho ntomba oma l’atei w’okongamelo wakawangɛnangɛnaka ntondo. Paulo akate di’oyango awɔ ekɔ wa “nkutula ambeki l’okongo awo.” Lo dihole dia vɔ nyanga ambeki awɔ hita, waa apɔsta nyangaka dia nkotola ambeki wa Kristo lo wedi awɔ. L’ɛnyɛlɔ ka “ndjaundu ya pangu,” embetsha wa kashi ndɛka ase etshumanelo wele la kɔlamelo lo mbashishɛ mbetawɔ kawɔ ndo lo mbaɛtɔya oma lo mboka ka mɛtɛ.—Mat. 7:15; 2 Tim. 2:18.
5. Naa toho takamba l’embetsha wa kashi dia kesana?
5 Ngande wakesa embetsha wa kashi anto? Toho takamba la wɔ kɛnɛmɔlaka yimba ya lokeso. Waa apɔsta ‘mbɔtshiyaka la mayɛlɛ tshɛ’ tokanyi ta kashi l’etshumanelo. L’ɛnyɛlɔ k’akanga a lokeso wasala akambo awɔ l’edimidimi, waa apɔsta mbɔtshiyaka tokanyi ta kashi l’etshumanelo lo yoho ya mayɛlɛ. Oko watokambaka akanga wa lokeso la mikanda wa kashi dia nkotsha oyango awɔ, waa apɔsta kambaka la ‘awui wa lodimbiya’ kana kolonganyaka awui wa kashi dia vɔ mɛnama oko wekɔ mɛtɛ. Vɔ watodianganyaka ‘wetshelo wa kashi’ ndo “watingisulaka . . . afundelu” dia mbaɔtɔnganyiya la tokanyi tawɔ. (2 Pet. 2:1, 3, 13; 3:16) Mbokɛmaka hwe dia waa apɔsta hawoyakiyanya dikambo diaso. Naka sho mbâyela, kete tayɛtɔla oma lo mboka katɔla otsha lo lɔsɛnɔ la pondjo.
6. Naa dako diokɛma hwe diatosha Bible lo kɛnɛ kendana l’embetsha wa kashi?
6 Ngande wakokaso ndjakokɛ oma le embetsha wa kashi? Alako wa lo Bible wendana la woho wahombaso ndjakokɛ mbokɛmaka hwe. (Adia Romo 16:17; 2 Joani 9-11.) Ɔtɛkɛta wa Nzambi mbutaka ɔnɛ: “Nyangani uma le wo.” Dikadimwelo dikina dia Bible kadimolaka ɛtɛkɛta ɛsɔ ɔnɛ “nyokakitɔne la wɔ,” “nyoyalame oma le wɔ” ndo “nyaangane nsuke lawɔ!” Alako wakasambiyama asɔ tshɛ mbokɛmaka hwe. Ohɔsa dia dɔkɔtɛlɛ diayɛ akakotɛ dia wɛ mbewɔ losambi l’onto ɔmɔtshi lele la hemɔ kasambiyama kakoka ndjaka onto. Wɛ pombaka mbeya kɛnɛ kalanga dɔkɔtɛlɛ ndo ndjela ɔhɛmwɛlɔ ande tshɛ lo tshɛ. Lo mɛtɛ, waa apɔsta wekɔ la ‘hemɔ ya l’ɛtɛ’ ndo vɔ nyangaka dia nkotola anto akina la wetshelo awɔ wa kashi. (1 Tim. 6:3, 4) Jehowa lele Onganga woleki Woke, totɛka dia sho mbewɔ dia monga la diɔtɔnganelo la wɔ. Sho mbeyaka kɛnɛ kalangande mbuta, ko onde tamboyashikikɛ dia ndjela ɔhɛmwɛlɔ ande l’akambo tshɛ wa lo lɔsɛnɔ laso?
7, 8. a) Kakɔna kalembetshiya mbewɔ embetsha wa kashi? b) Lande na kahombaso mbɔsɛ embetsha wa kashi yɛdikɔ ya wolo?
7 Kakɔna kalembetshiya mbewɔ embetsha wa kashi? Hatohombe mbalongola lo mvudu yaso kana mbasha mɔyɔ. Sho pombaka nto ntona dia mbadia ekanda awɔ, menda emisiɔ wa lo televiziɔ ndo fundanɛ la wɔ mesajɛ l’Ɛtɛrnɛtɛ. Lande na kahombaso mbɔsa yɛdikɔ ya wolo shɔ? L’ɔtɛ wa ngandji. Sho mbokaka ‘Nzambi ka mɛtɛ’ ngandji, diakɔ diahatayasha lo wetshelo wa kashi wanya Ɔtɛkɛta ande wa mɛtɛ. (Osam. 31:5; Joa. 17:17) Ndo nto, sho nangaka okongamelo waki Jehowa, lɛnɛ etshamaso akambo wa mɛtɛ watosha ekeketshelo wele oko lokombo laki Jehowa ndo kitshimudi ya lɔ, sangwelo diande lo dikambo dia nkɛtɛ, eongelo ka wanɛ wavɔ ndo elongamelo ka eolwelo. Onde wɛ kokaka mbohɔ woho wakayayaoke mbala ka ntondo kakayeke awui asɔ ndo akambo akina wa mɛtɛ wa diambo? Onde wɛ ayetawɔ nkesama oma le onto lɔnyɔla okongamelo waki Nzambi lɛnɛ etshamayɛ akambo wa mɛtɛ asɔ?—Joa. 6:66-69.
8 Oyadi kɛnɛ tshɛ kayota embetsha wa kashi, hatohombe mbayela. Lande na kahombaso ntshɔ otsha le anto wɛdikama la safu diamboma bwa paka dia tokesama ndo tɔkɔmɔ alemba? Lo dihole dia nsala ngasɔ, nyɛsɔ toyashikikɛ dia nama kɔlamelo yaso otsha le Jehowa ndo l’okongamelo watotoshaka ashi wa pudipudi ndo wa tshitshi w’akambo wa mɛtɛ wɔsami oma l’Ɔtɛkɛta waki Nzambi wakasambiyama.—Is. 55:1-3; Mat. 24:45-47.
Tatoyelake ‘ɛkɔndɔ wa kashi’
9, 10. Ɔhɛmwɛlɔ akɔna wakasha Paulo Timɔtɛ lo kɛnɛ kendana la ‘ɛkɔndɔ wa kashi,’ ndo kakɔna kakohɔka Paulo? (Enda ndo nɔtɛ ka l’ɛse ka dikatshi.)
9 Lo tena dimɔtshi, mbeyaka monga dui dia wɔdu nshihodia djembetelo yakadjama lo mboka dia minganyiya anto. Koko lo tena dikina, mbeyaka monga dui dia wolo dia mbishola djembetelo shɔ. Ngasɔ mbediɔ lo kɛnɛ kendana la tɔsɛngiya ta kɔlɔ taki Satana. Tɔmɔtshi mɛnamaka, koko tokina hatɛnama. Ɔpɔstɔlɔ Paulo tewolaka lo kɛnɛ kendana la yoho mɔtshi ya lo woshɛshɛ yakamba la Satana dia minganyiya anto, mbuta ate ‘ɛkɔndɔ wa kashi.’ (Adia 1 Timote 1:3, 4.) Diaha sho minganyiyama oma lo mboka katɔla otsha lo lɔsɛnɔ la pondjo, sho pombaka mbeya kɛnɛ kalembetshiya ɛkɔndɔ wa kashi ɛsɔ ndo woho wakokaso mbewɔ dia mbahokamɛ.
10 Ɛhɛmwɛlɔ waki Paulo lo kɛnɛ kendana l’ɛkɔndɔ wa kashi tanemaka lo mukanda wa ntondo wakandafundɛ Timɔtɛ laki omendji w’Okristo lakalongola ɔkɛndɛ wa mbidja pudipudi l’atei w’etshumanelo ndo nkimanyiya asekande ambetawudi dia vɔ ntshikala la kɔlamelo. (1 Tim. 1:18, 19) Paulo akakambe la tshɛkɛta ya lo Grɛkɛ yakoka nembetshiya awui wa kashi. Lo ndjela dibuku dimɔtshi dialembetshiya awui wa lo Bible (The International Standard Bible Encyclopaedia), tshɛkɛta shɔ mendanaka la “ɛkɔndɔ (w’ɛtɛmwɛlɔ) wele kema mɛtɛ.” Ondo Paulo akohɔka kashi ya l’ɛtɛmwɛlɔ yakɔndwama lo toshimu ta lokolonganya. * Ɛkɔndɔ wa ngasɔ “tshutshuyaka anto dia ndjaoka ambola” wâtoma dia nsala eyangelo w’osalasala. Satana ekɔ lo nkamba l’ɛkɔndɔ wa lokolonganya ɛsɔ ndo kashi y’ɛtɛmwɛlɔ dia nkonya anto dia vɔ mbohɛ akambo woleki ohomba. Dako diaki Paulo diekɔ hwe nɛ dia diɔ mbutaka ɔnɛ tatohokamɛke ɛkɔndɔ wa kashi.
11. Ngande wakamba Satana l’ɛtɛmwɛlɔ wa kashi lo yoho ya mayɛlɛ dia minganyiya anto, ndo ɛhɛmwɛlɔ akɔna wahombaso ndjela diaha sho minganyiyama?
11 Naa ɛkɔndɔ ɛmɔtshi wa kashi wakoka minganyiya wanɛ wele bu la yewo? Ntondontondo, etelo k’ɔnɛ ‘ɛkɔndɔ wa kashi’ kokaka mendana la kashi y’ɛtɛmwɛlɔ tshɛ yakoka tekola oma lo ‘akambo wa mɛtɛ.’ (2 Tim. 4:3, 4) Satana lasɛma dia nde ekɔ “ondjelo a yanyi” ekɔ lo nkamba lo yoho ya mayɛlɛ l’ɛtɛmwɛlɔ wa kashi dia minganyiya anto. (2 Kor. 11:14) Lo tshimbo ya Lokristo la kashi, embetsha wa lo lokristokristo wekɔ lo mbetsha wetshelo wa kashi wele oko Losato l’osanto, ifɛrnɔ ndo wetshelo w’ɔnɛ anima havu. Lokristokristo keketshaka nto afɛstɔ wele oko Nɔɛlɛ, Pasaka wɛnama oko bu kɔlɔ, ko tete le vɔ mbɔsama oma l’ɛkɔndɔ w’apanganu. Naka sho ndjela ɔhɛmwɛlɔ waki Nzambi watɔlɔmba dia mangana la “engo ka kolo” ndo diaha kinanda, kete hatotonganyiyama oma l’ɛkɔndɔ wa kashi.—2 Kor. 6:14-17.
12, 13. a) Naa kashi yambekola Satana, ndo kakɔna kele mɛtɛ lo kɛnɛ kendana la kashi shɔ tshɛ? b) Ngande wakokaso mbewɔ minganyiyama l’ɛkɔndɔ wa kashi waki Satana?
12 Satana ekɔ la kashi nkina yakamba la nde dia tonganyiya naka sho bu la yewo. Tɔsɛdingole kashi mɔtshi. Kashi ka ntondo: Wɛ kokaka nsala kɛnɛ tshɛ kalangayɛ nsala; wɛmɛ mbashikikɛ kɛnɛ kele ɔlɔlɔ kana kele kɔlɔ. Tita nsango ndo awui wa tɔkɛnyɔ keketshaka kanyi shɔ. Kanyi yengesola atɔndɔ waki Nzambi shɔ totshutshuyaka diaha sho nkitanyiya atɔndɔ wendana la lɔkɛwɔ. Kɛnɛ kele mɛtɛ ele, paka Nzambi oto mbakoka totɛ kɛnɛ kele ɔlɔlɔ kana kɛnɛ kele kɔlɔ. (Jer. 10:23) Kashi ka hende: Nzambi hekɛki lonya pondjo l’akambo wa la nkɛtɛ. Naka sho mbetawɔ kanyi yakeketsha anto dia tatɛtshi edika kam’ekewɔ la wanyu shɔ, kete tayoyokoma “tusuasua kana uku antu wahato elua.” (2 Pet. 1:8) Kɛnɛ kele mɛtɛ ele, lushi la Jehowa lamboleka nsukana ndo sho pombaka ntetemala likongɛ. (Mat. 24:44) Kashi ka sato: Nzambi hayakiyanya dikambo di’onto l’onto. Naka sho mbetawɔ kashi kaki Satana kɛsɔ, kete sho kokaka ndjɔkɔmɔ lo mbɔsa ɔnɛ sho kema la nɛmɔ lo washo waki Nzambi ka ngandji. Kɛnɛ kele mɛtɛ ele, Jehowa tokaka ngandji ndo mbɔsaka oseka okambi ande tshɛ la nɛmɔ l’onto ndo l’onto.—Mat. 10:29-31.
13 Sho pombaka ndjalama diaha monga la tokanyi ndo la waonga wa l’andja ɔnɛ waki Satana wɛnama oko dimɛna lo washo. Tohɔ dia Satana ekɔ she kashi. Paka naka sho mpokamɛ alako ndo waohwelo wele l’Ɔtɛkɛta waki Nzambi mbayotokoka mbewɔ minganyiyama la ‘ɛkɔndɔ wa lokolonganya la mayɛlɛ tshɛ.’—2 Pet. 1:16
Tatɛtɔlake “utsha le Satana”
14. Naa ɔhɛmwɛlɔ wakasha Paulo esekaseka ɛmɔtshi waki wadi waki edo, ndo lande na kele sho tshɛ mendanaka l’ɛtɛkɛta ande ɛsɔ?
14 Ohɔsa dia wɛ ambɛna djembetelo nyɛ lo mboka: “Mboka kɛnɛ tɔlaka otsha le Satana.” Onto akɔna la l’atei aso lakoka mbeta lo mboka kɛsɔ? Koko, Paulo tewolaka lo kɛnɛ kendana la toho efula takoka Akristo wamboyakimɔ mbɛtɔla “utsha le Satana.” (Adia 1 Timote 5:11-15.) Ɛtɛkɛta waki Paulo mendanaka ntondotondo la “esekaseka [ɛmɔtshi] weli wadi waki edu,” koko atɔndɔ wele lɔkɔ mendanaka ndo la so sho tshɛ. Wamato w’Akristo wa lo ntambe ka ntondo asɔ kɔfɔnyaka dia wakayelaka Satana, koko kɛnɛ kakawasalaka akɛnyaka dia wakôyelaka. Ngande wakokaso mbewɔ dia ndjela Satana kânga lo yoho yahatashihodia? Nyɛsɔ tɔsɛdingole ɔhɛmwɛlɔ wa Paulo wendana la lɔtɛndɔ.
15. Oyango akɔna wele la Satana, ndo ngande wakashola Paulo toho takamba la Satana dia minganyiya anto?
15 Oyango waki Satana ele wa toshimba dia sho nsambisha lokumu l’ɔlɔlɔ la Diolelo. (Eny. 12:17) Dia nde nsala dui sɔ, nde pembaka dia tɔsɛngiya dia sho mbesa awui wahomba tɔsɛ wenya kana wahomba mbidja diatɔnelo lam’asaso. Tende woho wakashola Paulo toho takamba la Satana dia tonganyiya. “Tusuasua, wayukindula lu luudu la luudu.” Lo nshi yamboleka tshulatshula ntomba nyɛ, aya dui dia wɔdu dia nshisha wenya aso ndo w’anto akina, ɛnyɛlɔ oko lo nongola kana lo tomanɛ mesajɛ l’Ɛtɛrnɛtɛ. ‘Atɛndanyi.’ Lɔtɛndɔ kokaka nkonya onto dia nde mamatanyɛ onto akambo wa kashi watokonyaka anto mbala efula lo ta. (Tuk. 26:20) Oyadi vɔ nshihodia dui sɔ kana bu, amamanyishi mbokoyaka Satana Diabolo. * ‘Akanga w’esaku.’ Sho kema la lotshungɔ la mbutɛ anto akina tɛdikɔ tahombawɔ mbɔsa l’akambo awɔ hita. Nkɛwɔ ya ngasɔ kokaka mbekola yimba yaso oma l’ɔkɛndɛ wakatosha Nzambi wa nsambisha lokumu l’ɔlɔlɔ la Diolelo. Naka sho ntshika dia nsukɛ olimu waki Jehowa l’ohetoheto, kete l’etena kɛsɔ tayoyela Satana. Hatokoke monga kɛlɛngɛnyi, etenyi nyama, etenyi lose.—Mat. 12:30.
16. Naa dako diahombaso mpokamɛ diaha sho ‘ndjela Satana’?
16 Mpokamɛ dako dia lo Bible sɔ koka tokimanyiya dia sho mbewɔ minganyiyama dia ‘ndjela Satana.’ Tɔsɛdingole alako amɔtshi wa lomba waki Paulo. “[T]utamanya ntsha ulimu wa Khumadiondjo.” (1 Kor. 15:58) Monga l’akambo efula wa nsala l’elimu wa Diolelo tokokɛka oma lo wâle wa ntshɛlɛwa tshanana ndo mbetsha wenya aso wetshetsha. (Mat. 6:33) Nyotake “aui w’ololo, weya mbudia antu.” (Ef. 4:29) Tɔshi yɛdikɔ yaha mpokamɛ ntɛndɔ ndo yaha tɛndana. * Toyaɛkɛ le asekaso ambetawudi ndo tonge la dilɛmiɛlɔ otsha le wɔ. Dui sɔ diayototshutshuya dia sho tondjaka ɛtɛkɛta weya mbodia anto lo dihole dia mbatondjɛ ɛtɛkɛta wakoka mbakɔmɔla. Toyadje oyango waha ‘ndjatambiya l’akambo wakana.’ (1 Tes. 4:11) Tɛnya dia sho ndjashaka le anto akina ndo tatoyatambiyake l’akambo awɔ hita, koko towaɔsake la nɛmɔ. Tohɔ dia hatohombe mbafundɛ akambo etena kɔsawɔ tɛdikɔ tendana l’akambo awɔ hita.—Ngal. 6:5.
17. a) Lande na katɔhɛmɔla Jehowa lo kɛnɛ kahatahombe ndjela? b) Yɛdikɔ yakɔna yamboyɔsa lo kɛnɛ kendana la mboka kakombola Jehowa dia sho mbeta?
17 Ande lowando lele la so le Jehowa lo woho watotɛnde hwe hwe kɛnɛ kahatahombe ndjela! Aha la tâmu, ɛhɛmwɛlɔ watosha Jehowa wambotɔsɛdingola lo sawo nɛ ndo lo sawo dietshi tshutshuyama lo ngandji ka mamba katokande. Nde hakombola dia sho minganyiyama kana soyama lo ndjela tolembetelo tadja Satana lo mboka dia tonganyiya. Mbeyaka monga dui dia wolo dia ndjela mboka kakombola Jehowa dia sho ndjela, koko tɔ tɔlaka otsha lo dihole dioleki dimɛna, mbuta ate otsha lo lɔsɛnɔ la pondjo. (Mat. 7:14) Tatotshikitanyake pondjo yɛdikɔ yaso ya mpokamɛ ɔhɛmwɛlɔ wa Jehowa wata ɔnɛ: “Mbuka keku, nyokendekende loko! nyokendekende loko!”—Is. 30:21.
[Nɔte ya l’ɛse ka dikatshi]
^ od. 4 “Apɔstazi” kɛdikɛdi mangana la ɔtɛmwɛlɔ wa mɛtɛ, mbowoka ɔkɔngɔ, ndjanya oma lɔkɔ, ntɔmbɔkɔ kana mbotshika.
^ od. 10 Ɛnyɛlɔ, dibuku diaki kosambiyama dielɛwɔ Tobie (Tobit) diakafundama oya lo ntambe ka sato N.T.D. diaki oma ko nshi ya Paulo ndola tɔɔ l’awui wa dikanyiyakanyiya, l’ɛkɔndɔ wa maji ndo w’alɔka wɔsama oko awui wa mɛtɛ.—Enda dibuku Étude perspicace des Écritures, vɔlimɛ 1, lɛkɛ 135.
^ od. 15 Tshɛkɛta ya lo Grɛkɛ di·aʹbo·los yokadimɔmi ɔnɛ “diabolo”nembetshiyaka “omamanyishi.” Tshɛkɛta shɔ kambemaka oko titrɛ kekina kaki Satana, omamanyishi woleki woke.—Joa. 8:44; Eny. 12:9, 10.
^ od. 16 Enda kiombo yele l’ɔtɛ a dui wata ɔnɛ: “Mbokɛ nsala lo lɔpɛpɛ.”
Ngande wayoyokadimola?
Ngande wakokaso nkamba l’ɛhɛmwɛlɔ wele l’avɛsa wayela anɛ?
[Ambola wa wekelo]
[Kiombo/Esato wa lo lɛkɛ 19]
Mbokɛ nsala lo lɔpɛpɛ
Shimu mɔtshi y’ase Juda w’edjedja mɛnyaka etombelo wa kɔlɔ wakoka monga la lɔtɛndɔ. Kânga mbatamayɔ lo toho efula, losango loleki ohomba la lo shimu yakɔ lɔ lɔnɛ:
Pami kɛmɔtshi akasanya akambo wa kashi l’osomba ɔmɔtshi lo lokombo la pami kekina ka lomba. L’ɔkɔngɔ diko, pami ka kanga lɔtɛndɔ amboyoshola dia kɛnɛ kakandate kaki kashi ko amboyotshɔ otsha le pami ka lomba dia tɔlɔmba edimanyielo lo mbotɛ dia nde ayonga suke dia nsala kɛnɛ tshɛ kayondɔlɔmba dia nde mbodimanyiya. Pami ka lomba akɔlɔmbɛ dikambo ɔtɔi nɛ: Tshɔka tɔshi olui wa nsala, kele okɛyɔ lo lɔpɛpɛ. Kânga mbakinde l’okandokando lo kɛnɛ kakandawotɛ dia tosala, ɔtɛndanyi akasale kɛnɛ kakandɔlɔmbɛ dia ntsha. Oma lâsɔ, nde akakalola otsha le pami ka lomba.
Nde akawombola ate: “Onde wɛ ambodimanyiya?”
Pami ka lomba akôkadimola ate: “Ntondotondo, tokotshɔ totshumanya nsala yakayoke lo lɔpɛpɛ ndjo tshɛ.”
Ɔtɛndanyi akokadimola ate: “Ko ngande akokami ntsha dui sɔ lam’ele nsala yakashidi pandjɔnɛ la lɔpɛpɛ?”
“Ekɔ dui dia wolo dia sho nɔngɔsɔla kɔlɔ kɛmɔtshi kosaleso onto oma l’ɛtɛkɛta wakatotondje oko wediɔ wolo dia ntshumanya nsala l’ɔkɔngɔ wa ndjokɛ lo lɔpɛpɛ.”
Wetshelo wakondjaso vɔ ɔnɛ: Ekɔ dui dia wolo dia nkaloya tohaso tatondjɛso anto ndo kokaka monga dui dia wolo dia nɔngɔsɔla pâ kambotosha onto. La ntondo ka sho nsanya dui dimɔtshi, ayonga dui dia lomba naka sho mbohɔ dia tekɔ lo nanga mbokɛ nsala lo lɔpɛpɛ.
[Osato wa lo lɛkɛ 16]
Ngande wakoka Akristo amɔtshi mbelɛ waa apɔsta lo mvudu yawɔ?
