Onde wɛ ambɔtɔka lo momuya kaki Nzambi?
Onde wɛ ambɔtɔka lo momuya kaki Nzambi?
‘Ɔtɛkɛta wa Nzambi wekɔ la lɔsɛnɔ ndo la wolo.’—HEB. 4:12.
1. Naa yoho mɔtshi yakokaso mbɔtɔ lo momuya kaki Nzambi ɛlɔ kɛnɛ, ndo welo akɔna wahombaso mbidja?
LO SAWO diakete, takɛnyi dia sho kokaka mbɔtɔ lo momuya kaki Nzambi lo nsala akambo lo yoho yɔtɔnɛ la sangwelo diande l’okitanyiya tshɛ. Koko, sho pombaka mbidja welo dia sho nsala dui sɔ. Etena kekaso dia Jehowa hetawɔ dikambo dimɔtshi diangɛnangɛnaso, kanyi ya ntondo yatoyɛ mbeyaka monga ondo ya ntona nkitanyiya. Dui sɔ mɛnyaka dia tekɔ l’ohomba wa nyomoyalowanya dia monga ‘suke dia nkitanyiya.’ (Jak. 3:17) Lo sawo nɛ, tayovusola waaso amɔtshi angana wele kokaka monga tshondo y’okakatanu dia sho nsala akambo l’okitanyiya tshɛ lo yoho yɔtɔnɛ la sangwelo diaki Nzambi.
2, 3. Welo akɔna wahombaso ntetemala mbidja dia sho ntshikala diangɔ dia nɛmɔ lo washo waki Jehowa?
2 Naa welo wadjayɛ dia nkitanyiya alako w’oma lo Bible? Afundelo totɛka dia Nzambi nangaka dia “diango di’ushinga a wulu dia wedja tshe” tshumanyema. (Hang. 2:7) Lo mɛtɛ, efula ka l’atei aso kɔmbɔsamaka oko diangɔ dia nɛmɔ etena kakateke akambo wa mɛtɛ wa lo Bible mbala ka ntondo. Koko, ngandji kokaso Nzambi ndo Ɔnande la ngandji totshutshuyaka dia sho nsala etshikitanu wa weke lo waonga ndo lo ditshelo diaso dia sho ngɛnyangɛnya Nzambi tshɛ lo tshɛ. L’ekomelo, l’ɔkɔngɔ wa sho nsala alɔmbɛlɔ w’efula ndo mbidja welo, lushi la lânde lakakome etena kakatabatizama oko Akristo.—Adia Kolosai 1:9, 10.
3 Ta dialɔso la lonto laso lele kema kokele hakomɛ lo batismu. Diɔ tetemalaka ndo diayotetemala edja tshɛ keso tatonge kokele. Koko, tekɔ l’eshikikelo dia naka sho ntetemala ndɔsha ndo ndjashikikɛ dia nkoma diangɔ dia nɛmɔ lo washo wa Jehowa, kete nde ayɔtshɔkɔla welo aso.
Etena keso l’ohomba wa dako
4. Naa toho tosato takokaso nongola alako w’oma l’Afundelo?
4 La ntondo ka sho ndɔshana la wɛɔdu aso, sho pombaka tawaeyi dimɛna. Sawo dioshami l’otema ɔtɔi lo Mbalasa ka Diolelo kana sawo dimɔtshi diele lo ekanda aso mbeyaka ntɛkɛta dia munga kɛmɔtshi ka woke kakokaso monga la tɔ. Lo wedi okina, naka hatoshihodisha lokanyi lakɔmbwama lo sawo dimɔtshi kana hatokambi l’alako wofundami l’ekanda aso ɛmɔtshi, Jehowa mbeyaka ntshutshuya osekaso Okristo dia nde ndjokotola yambalo yaso lo munga kɛmɔtshi kele la so.—Adia Ngalatiya 6:1.
5. Shila awui wa kɔlɔ wakokaso nsala naka wambotosha dako, ndo lembetshiya lande na kele alami w’Akristo pombaka ntetemala mbidja welo dia tokimanyiya.
5 Kema dui dia wɔdu dia mbetawɔ alako woye oma le onto lele kema kokele, kânga naka nde ayotoshawɔ l’ɔkɔmi kana la ngandji. Oko wadiɛnya Ngalatiya 6:1, Jehowa mbidjangɛka wanɛ wele l’akoka wa lo nyuma dia vɔ ‘mpemba’ dia tongola “l’etema wa memakana.” Naka sho mbetawɔ nkamba l’alako wayowotosha, kete tayoleka monga diangɔ dia nɛmɔ lo washo wa Nzambi. Dui dia diambo ko, etena kalɔmbaso sho mbetawɔka l’otema ɔtɔi dia tekɔ anto wele kema kokele. Koko, etena kakotola onto ɔmɔtshi yambalo yaso dia tɛnya dia dikambo dimɔtshi diasalaso diekɔ kɔlɔ, mbala efula sho pembaka dia mbisha tɛkɛ nɛndɛ, mɛnya diele oko hatotshe kɔlɔ lo mbɔsa dia ɔnɛ lakaye ndjotosha dako haye l’oyango wa dimɛna kana mɛnya dia nde hatosha dako diakɔ lo yoho ya dimɛna. (1 Khum. 5:11) Ndo naka dako diakɔ diekɔ lo mendana la dui dimɔtshi diasala ose nkumbo kaso ɔmɔtshi, ɔlɔtɔ aso, ɔlɔngɔswɛlɔ aso wa divo, pudipudi kaso kana yoho mɔtshi ya tɔkɛnyɔ yatɔngɛnyangɛnya koko hayɔngɛnyangɛnya Jehowa, kanyi ya ntondo yakoka toyɛ ele ya ntona dako dia ngasɔ. Koko, l’ɔkɔngɔ wa sho nkana yimba, mbala efula sho ndjɛnaka dia dako diakɔ diaki dimɛna.
6. Lo woho akɔna wele ɔtɛkɛta wa Nzambi wekɔ la dikoka dia nembetɛ ‘tokanyi la nsaki ya l’otema’?
6 Divɛsa diɔsami ɔtɛ a dui wa sawo nɛ toholaka dia ɔtɛkɛta wa Nzambi ‘wekɔ la wolo.’ Lo mɛtɛ, ɔtɛkɛta wa Nzambi wekɔ la wolo wa ntshikitanya nsɛnɔ. Vɔ tokimanyiyaka dia sho nsala etshikitanu wahombama l’ɔkɔngɔ wa sho batizama oko woho wakawatokimanyiya etena kakatamɛ nsala dikambo sɔ. Lo mukanda wakandafundɛ ase Hɛbɛru, Paulo akafunde nto di’ɔtɛkɛta wa Nzambi ‘nyɔngɔmɛka polo ndo lo vɔ nkakitola anima la yimba, asɔnga la ehihɔ awɔ, ndo vɔ koka nembetɛ tokanyi la nsaki ya l’otema.’ (Heb. 4:12) Lo wedi okina, etena kashihodiaso sangwelo diaki Nzambi diendana la so dimɛna, yoho yasalaso akambo yayɛnya kɛnɛ kele l’etei k’otema aso. Onde tena dimɔtshi otshikitanu wekɔ lam’asa woho wɛnamaso la ntondo k’anto (‘anima’) ndo woho w’onto weso mɛtɛ (‘yimba’)? (Adia Mateu 23:27, 28.) Tɔsɛdingole woho wakokaso nsala akambo lo waaso wayela anɛ.
Totetemale nkɛndakɛnda kâmɛ l’okongamelo waki Jehowa
7, 8. a) Kakɔna ondo kakatshutshuya Akristo w’ase Juda dia vɔ ntetemala nkitanyiya awui amɔtshi wa l’Ɛlɛmbɛ wa Mɔsɛ? b) Naa otshikitanu waki lam’asa etsha awɔ la sangwelo dia Jehowa diatatshu otsha la ntondo?
7 Efula ka l’atei aso kokaka nshila ɛtɛkɛta wa lo Tukedi 4:18 oma lo yimba wata ɔnɛ: “Mbuka k’untu ololo keli uku usasi w’ehutwelu k’unya, watufulanelaka edja ndu w’unya l’atei ote.” Dui sɔ nangaka nembetshiya dia lɔkɛwɔ ndo eokelo kaso ka sangwelo diaki Nzambi kayotalowanyemaka l’edjedja ka wonya.
8 Oko wakatadiɛnyi lo sawo dietshi, l’ɔkɔngɔ wa nyɔi ka Yeso aki tshondo y’okakatanu le Akristo w’ase Juda efula dia vɔ ntshika nkitanyiya Ɛlɛmbɛ wa Mɔsɛ. (Etsha 21:20) Kânga mbakewola Paulo Akristo l’ɔkɔmi tshɛ dia vɔ waya bu l’ɛse k’Ɛlɛmbɛ wa Mɔsɛ, amɔtshi wa l’atei awɔ wakatone dako diande diakasambiyama sɔ. (Kol. 2:13-15) Ondo vɔ wakafɔnyaka dia naka vɔ ntetemala nkitanyiya akambo amɔtshi wendana l’Ɛlɛmbɛ akɔ, kete wayewɔ ɛhɛnyɔhɛnyɔ. Lo weho akɔ tshɛ, Paulo akafundɛ Akristo w’ase Hɛbɛru ndo akawatɛ hwe dia vɔ hawotɔtɔ lo momuya kaki Nzambi edja tshɛ katonawɔ nsala akambo lo yoho yɔtɔnganɛ la sangwelo diande. * (Heb. 4:1, 2, 6; adia Heberu 4:11.) Dia mbetawɔma oma le Jehowa, vɔ wakahombe mbetawɔ dia nde ɔlɔmbɔla ekambi ande lo yoho yotshikitanyi.
9. Dionga diakɔna diahomba monga la so etena kasalema etshikitanu ɛmɔtshi lo eokelo kaso k’Afundelo?
9 Lo nshi yaso nyɛ, etshikitanu efula wambosalema lo eokelo kaso ka wetshelo ɛmɔtshi wa lo Bible. Dui sɔ hahombe totshindja wɛɔngɔ, koko diɔ pombaka totshutshuya dia sho ntetemala ndjaɛkɛ le olui w’ɔhɔmbɔ wa kɔlamelo ndo wa kɛsɔ. Etena kɛna enyimpala wa “ɔhɔmbɔ” dia ekɔ ohomba nyomolembetshiya kana nɔngɔsɔla eokelo kaso lo kɛnɛ kendana la wetshelo aso ɔmɔtshi w’akambo wa mɛtɛ, vɔ salaka dui sɔ aha la ntshimbatshimba. Olui w’ɔhɔmbɔ ndjakiyanyaka efula dia nkamba kâmɛ la sangwelo diaki Nzambi diatakotshama lo dihole dia mbidja yimba lo woho wɔnyɔla anto akina etshikitanu wasalawɔ lo eokelo k’akambo wa mɛtɛ. Kakɔna katototshaka etena katewoyawɔ etshikitanu ɛmɔtshi wambosalema lo eokelo kaso k’Afundelo?—Adia Luka 5:39.
10, 11. Wetshelo akɔna wakokaso nkondja oma lo dionga diakoka Akristo amɔtshi monga la diɔ etena katɔlɔmbawɔ dia nkamba la toho tɔmɔtshi t‘eyoyo t’esambishelo ka lokumu l’ɔlɔlɔ?
10 Nyɛsɔ tɔsɛdingole ɛnyɛlɔ kekina. Otsha l’ekomelo ka ntambe 19 ndo oya l’etatelo ka ntambe 20, Ambeki wa Bible amɔtshi waki ambishi w’asawo wa lo sɛkɛ wa tomanamana wakɔsaka dia vɔ wakahombe nkotsha ɔkɛndɛ awɔ wa nsambisha lo nsala la wolo dia mbisha ampokami asawo wɔlɔngɔswami dimɛna. Vɔ wakangɛnangɛnaka mbisha asawo wa lo sɛkɛ ndo nongola ɛtɛkɛta wa lowando oma le ampokami awɔ. Koko l’ɔkɔngɔ diko, akayɛnamaka dia Jehowa akakombolaka dia anto ande ndjasha lo toho t’esambishelo efula, mbidja ndo esambishelo ka lo luudu la luudu. Atɛkɛtshi amɔtshi wa tomanamana wa l’atei awɔ wakashaka asawo wa lo sɛkɛ wakatone nsala akambo lo yoho yotshikitanyi. Lo mɛtɛ, vɔ wakɛnamaka oko apami waki la lonyuma la dimɛna ndo oko wanɛ wakayashaka tshɛ le Nkumadiɔndjɔ. Koko etena kakaweye sangwelo diaki Nzambi diendana l’esambishelo ka lokumu l’ɔlɔlɔ, tokanyi tawɔ ta mɛtɛ, eyango waki la wɔ ndo kɛnɛ kakawakombolaka kakɛnama hwe. Kakɔna kakâsalɛ Jehowa na? Nde kombatshɔkɔla ndo vɔ wakatombe oma l’okongamelo.—Mat. 10:1-6; Etsha 5:42; 20:20.
11 Kɛsɔ halembetshiya dia aki dui dia wɔdu le wanɛ wakatshikala la kɔlamelo l’okongamelo dia nsambisha lo sɛkɛ. Efula wakɛnyi di’olimu ɔsɔ waki tshondo y’okakatanu, djekoleko oma l’etatelo. Koko vɔ waki l’okitanyiya. L’edjedja ka wonya, vɔ wakatondoya okakatanu awɔ ndo Jehowa akâtshɔkɔla lo yɛdikɔ y’efula. Kakɔna kayoyosala naka wambokɔlɔmba dia nsambisha lo yoho yotshikitanyi la nyɛ yatonyosalaka l’ɛtshi kanyu ka nkɛtɛ? Onde wɛ tongaka suke dia mpemba yoho yakɔ y’oyoyo shɔ?
Etena katshika lakiso ɔmɔtshi la ngandji Jehowa
12, 13. a) Naa oyango wele la Jehowa etena katshanyema otshi wa pɛkato wahayatshumoya oma l’etshumanelo? b) Naa ohemba wahomana l’ambutshi amɔtshi w’Akristo, ndo kakɔna ketɛ ohemba akɔ wolo?
12 Aha la tâmu, sho tshɛ mbetawɔka tɔndɔ diata ɔnɛ sho pombaka monga pudipudi lo demba, lo yimba ndo lo nyuma dia sho ngɛnyangɛnya Nzambi. (Adia Tito 2:14.) Lo waaso amɔtshi, kɔlamelo yahombaso monga la yɔ lo tɔndɔ diendana la sangwelo diaki Nzambi sɔ kokaka mbidjama l’ohemba wa wolo. Tɔshi ɛnyɛlɔ kɛnɛ, ɔtɔi w’ɔna pami laki atshukanyi amɔtshi washa ɛnyɛlɔ ka dimɛna ambotshika akambo wa mɛtɛ. Etena kakombola ɔna ɔsɔ dia ‘monga l’ɔngɛnɔngɛnɔ wa tshanda w’oma lo pɛkato’ oleki diɔtɔnganelo diasande la Jehowa ndo l’ambutshi ande, nde mbitshanyemaka oma l’etshumanelo.—Heb. 11:25.
13 Ambutshi mongaka la pâ etena kasalema dikambo dia ngasɔ! Lo kɛnɛ kendana la wotshanyemelo vɔ mbeyaka dia Bible mbutaka ɔnɛ: ‘Tanyɔsɔhanake l’onto tshɛ lelamɛ ɔnangɛso naka nde ekɔ omonanyi, kanga ɔkɔmiya, koyanga ɔtɛmɔdi wa dikishi, koyanga ɔtɛnganyi, koyanga ombidjɔki a wanu, koyanga ɔpɔtwanyi kana ndɛ l’onto la ngasɔ.’ (1 Kor. 5: 11, 13) Vɔ mbeyaka nto dia tshɛkɛta ‘onto tshɛ’ yele lo divɛsa nɛ mendanaka ndo l’ase nkumbo yawɔ wahadjasɛ la wɔ dihole ɔtɔi. Koko vɔ mbokaka ɔnawɔ ngandji k’efula! Kandji ka wolo koka mbatshutshuya dia vɔ mbuta ɔnɛ: ‘Ngande wakokaso nkimanyiya ɔnaso dia nde kalolɛ Jehowa naka sho nkitshakitsha lo yɛdikɔ y’efula diɔtɔnganelo diasaso la nde? Onde hatotoleka mbokimanyiya naka sho ntetemala monga la diɔtɔnganelo dia mbala la mbala la nde?’ *
14, 15. Naa yɛdikɔ ya dimɛna yakoka mbɔsa ambutshi w’ana wakawatshanya oma l’etshumanelo?
14 Sho ndjakiyanyaka kâmɛ l’ambutshi wa ngasɔ. Ɔnawɔ akahombe nsala ɔsɔnwɛlɔ ndo nde akasɔnɛ ndjela yoho ya lɔsɛnɔ yele bu dimɛna le Akristo lo dihole dia nde ntetemala monga la diɔtɔnganelo dia dimɛna l’ambutshi ande ndo l’asekande ambetawudi akina. Lo wedi okina, ambutshi komonga la dui dia mbuta lo kɛnɛ kendana la dikambo sɔ. Aha la tâmu, vɔ ndjaokaka oko anto wele kema l’okimanyedi!
15 Ko kakɔna kahomba ambutshi wa ngandji asɔ nsala? Onde vɔ wayokitanyiya ɛlɔmbwɛlɔ kaki Jehowa kokɛma hwe? Kana onde vɔ kokaka mbɔsa dia kokaka ntetemala monga la diɔtɔnganelo dia mbala la mbala l’ɔnawɔ lakatshanyema l’etshumanelo lo mbuta ɔnɛ ɔnɛ ekɔ tsho diɔtanganelo di’akambo w’ohomba wa lo nkumbo kaso? Etena kahombawɔ mbɔsa tɛdikɔ vɔ hawohombe mbohɛ woho wayoyaoka Jehowa l’ɔtɛ wa kɛnɛ kasalawɔ. Oyango wele la nde ele wa nama okongamelo ande pudipudi ndo naka kokaka dia ntshutshuya atshi wa pɛkato dia nkalola oma lo mboka yawɔ. Ngande wakoka ambutshi w’Akristo sukɛ yɛdikɔ shɔ?
16, 17. Wetshelo akɔna wakokaso nkondja naka sho nkana yimba l’ɛnyɛlɔ kaki Arɔna?
16 Arɔna w’ɔnango Mɔsɛ akahomana l’okakatanu lo kɛnɛ kendana l’anande ahende. Ohokanyiya woho wakandahombe ndjaoka etena kakalambola anande ahende Nadaba l’Abihu Jehowa olambo wa kɔlɔ ndo woho wakâdiake Jehowa. Lo mɛtɛ, dui sɔ diakahembola diɔtɔnganelo tshɛ diakakoke anasɔ monga l’ambutshi awɔ. Koko aha lâsɔ ato. Jehowa akadjangɛ Arɔna nde l’anande wakatshikala la kɔlamelo ate: “Tanyunyaki divu, tanyatshatshaki ahondo anyu [la pindju], ne dia nyutukuvo. Ndu [Jehowa] atukuka ului w’antu tshe kele.” (Lew. 10:1-6) Losango lɔsɔ mbokɛmaka hwe. Ngandji kokaso Jehowa pombaka ndeka kɛnɛ kokaso ase nkumbo yaso wele bu la kɔlamelo.
17 Ɛlɔ kɛnɛ, Jehowa hayodiaka wanɛ wɔnyɔla ɛlɛmbɛ ande mbala kakɔ ɔtɔi. La ngandji tshɛ, nde mbashaka diaaso dia vɔ ndjatshumoya oma l’etsha awɔ wa kɔlɔ. Ngande wayoyaoka Jehowa naka ambutshi w’otshi wa pɛkato wahayatshumoya ntetemala mbodja l’ohemba lo monga la diɔtɔnganelo di’anyanya l’ɔnawɔ lakatshanyema oma l’etshumanelo?
18, 19. Ɛtshɔkɔ akɔna wakoka nkondja ase nkumbo wasala akambo lo yoho yɔtɔnganɛ l’atɔndɔ waki Jehowa etena katshanyema anto amɔtshi oma l’etshumanelo?
18 Efula ka wanɛ wakatshanyema wamboshihodia dia yoho yakakakitɔna angɛnyi ndo ase nkumbo yawɔ tshɛ lo tshɛ la wɔ akawakimanyiya dia vɔ ndjatshumoya oma l’etsha awɔ wa kɔlɔ. Etena kakafundanɛka dikumanyi mikanda dia vɔ nkaloya osekaseka ɔmɔtshi l’etshumanelo, dikumanyi wakafunde dia kadiyɛsɔ kɛsɔ akatshikitanya yoho yande ya lɔsɛnɔ “lo yɛdikɔ mɔtshi nɛ dia nondo diande di’apami wakalɛmiyaka tɛdikɔ tendana la wotshanyemelo.” Kadiyɛso kɛsɔ akate ate: “Yoho yakasukɛ nondo diami di’apami yɛdikɔ y’oma l’Afundelo shɔ la kɔlamelo tshɛ mbakakimanyiya dia dimi nkawola l’etshumanelo.”
19 Kayotota dia ndjihiya? Sho pombaka ndɔshana l’otema aso wele kema kokele watotshutshuya diaha mpokamɛ alako w’oma l’Afundelo. Sho pombaka monga l’eshikikelo ɔnɛ yoho yakandola Nzambi akambo aso mbele yoho yoleki dimɛna.
‘Ɔtɛkɛta wa Nzambi wekɔ la lɔsɛnɔ’
20. Lo toho takɔna tohende takokaso nembetshiya Heberu 4:12? (Enda ndo lo nɔtɛ ka l’ɛse ka dikatshi.)
20 Etena kakafunde Paulo dia ‘ɔtɛkɛta wa Nzambi wekɔ la lɔsɛnɔ,’ nde kɔtɛkɛtaka dikambo di’Ɔtɛkɛta wa Nzambi wakafundama, mbuta ate Bible. * Avɛsa wosukanyi la divɛsa sɔ mɛnyaka dia nde akatɛkɛtaka dikambo di’ɔtɛkɛta wa Nzambi wa daka. Paulo akalange mbuta dia Nzambi hakoke ndaka dia ntsha dikambo dimɔtshi, ko mbohɛ dikotsha. Jehowa akashikikɛ dikambo sɔ lo tshimbo y’ɔprɔfɛta Isaya lakate ate: ‘Ɔtɛkɛta watotombaka oma l’onyɔ ami hawotokalolaka le mi okalolakalola. Koko vɔ watokotshaka kɛnɛ kakamasangoya.’ (Is. 55:11) Ɔnkɔnɛ, kema ohomba sho ndjakiyanya efula etena kahakɛndakɛnda akambo esadi esadi oko wakombolaso. Jehovah ekɔ lo ‘ntetemala nkamba’ dia nkotsha sangwelo diande lo yoho ya dimɛna.—Joa. 5:17.
21. Ngande wakoka Heberu 4:12 nkeketsha esombe wele la kɔlamelo wa lo “ului a wuki w’antu”?
21 Esombe wele la kɔlamelo wa lo “ului a wuki w’antu” wambokambɛ Jehowa l’edja k’ɛnɔnyi akumi. (Eny. 7:9) Efula ka l’atei awɔ konongamɛka dia nkoma esombe lo dikongɛ nɛ di’akambo. Koko, vɔ hawoyakɔmɔla. (Osam. 92:14) Vɔ mbetawɔka dia ɔtɛkɛta wa Nzambi wa data wekɔ la lɔsɛnɔ ndo Jehowa ekɔ lo nkamba dia nkotsha kɛnɛ tshɛ kakandate lɔkɔ. Lam’ele Nzambi ndekaka ndjasha lo sangwelo diande, nde ayonga l’ɔngɛnɔngɛnɔ naka sho lawɔ diɔsa woho akɔ wâmɛ. Oma ko lushi l’esambele lɔsɔ, Jehowa ekɔ lo momuya l’eshikikelo k’ɔnɛ sangwelo diande diayokotshama ndo ekambi ande wekɔ lo nsukɛ sangwelo sɔ. Kayotota dikambo diayɛ? Onde wɛ ambɔtɔka lo momuya kaki Nzambi?
[Nɔte ya l’ɛse ka dikatshi]
^ od. 8 Ewandji efula w’ase Juda wakakitanyiyaka Ɛlɛmbɛ wa Mɔsɛ sso lo sso, nnu lo nnu, koko etena kakaye Mɛsiya vɔ kombêtawɔ. Vɔ kotetemala nkɛndakɛnda la sangwelo diaki Nzambi diatatshu otsha la ntondo.
^ od. 13 Enda dibuku ‘Nyotshikale lo ngandji ka Nzambi,’ lɛkɛ 207-209.
^ od. 20 Ɛlɔ kɛnɛ, Nzambi sawolaka la so lo tshimbo y’Ɔtɛkɛta ande wele la wolo wa ntshikitanya nsɛnɔ yaso. Ɔnkɔnɛ, lo yoho kina, ɛtɛkɛta waki Paulo wele lo Heberu 4:12 kokaka mendana nto la Bible.
Tatohɛke oyango
• Kakɔna kahombaso nsala dia sho mbɔtɔ lo momuya kaki Nzambi?
• Diɔtɔnganelo diakɔna diele lam’asa sangwelo diaki Nzambi la woho wakitanyiyaso alako w’oma l’Afundelo?
• Lo waaso akɔna wele ondo mbeyaka monga tshondo y’okakatanu dia nkitanyiya alako w’oma l’Afundelo, ndo lande na kele ekɔ ohomba sho monga l’okitanyiya?
• Lo toho takɔna tohende takokaso nembetshiya Heberu 4:12?
[Ambola wa wekelo]
[Osato wa lo lɛkɛ 31]
Ambutshi mongaka la pâ etena kasalema dikambo dia ngasɔ!
