Otombelo wa Tshoto y’Etangelo lo Angɛlɛ wa wɔdu

TEKƆ l’ɔngɛnɔngɛnɔ dia nyewoya dia oma lo numɛlɔ kɛnɛ ndo l’edja k’ɔnɔnyi ɔtɔi, tayanga mpemba tondjaka Tshoto y’Etangelo lo Angɛlɛ wa wɔdu mbala kakɔ ɔtɔi la nyɛ yokotondjamaka ngɔndɔ tshɛ. Tshoto y’Etangelo shɔ yayongaka l’asawo wa wekelo ndo l’asawo akina angana naka dihole diekekɔ. Tekɔ l’elongamelo dia otshikitanu ɔsɔ wayokotsha ehomba wa lo nyuma w’Ɛmɛnyi wa Jehowa efula. Lande na kataso ngasɔ?

Angɛlɛ ekɔ ɔtɛkɛta watɛkɛta anangɛso l’akadiyɛso wa lo wedja wele oko Fidji, Ghana, Îles Salomon, Kenya, Libéria, Nigéria ndo Papouasie-Nouvelle-Guinée. Kânga mbakoka anangɛso l’akadiyɛso wa lo wedja ɛsɔ ntɛkɛta ɛtɛkɛta wa l’ɛtshi kawɔ ka nkɛtɛ kana wa lôtɔ, mbala efula Angɛlɛ mbele ɔtɛkɛta walekawɔ ntɛkɛta lo nsangaya ya l’etshumanelo kana l’olimu w’esambishelo. Koko, Angɛlɛ watɛkɛtawɔ ndeka wɔnɛ wa l’ekanda aso wɔdu. Ndo nto, Ɛmɛnyi wa Jehowa efula wakonɔ lo wedja wele vɔ pombaka ntɛkɛta lo Angɛlɛ dia nsawola l’anto kânga mbahaweye ɔtɛkɛta akɔ dimɛna. Lâdiko dia lâsɔ, ndoko etshumanelo kasala nsanganya l’ɔtɛkɛta awɔ wa lôtɔ lo wedja ɛsɔ.

Asawo wasɛdingolaso lo Wekelo wa Tshoto y’Etangelo wa lomingu la lomingu mbele dihomɔ dia ntondo diakamba l’ɔhɔmbɔ dia tosha mbo ya ndɛ ya lo nyuma tshavutshavu. Ɔnkɔnɛ, dia nkimanyiya ampokami tshɛ dia vɔ ndeka nkondja wahɔ oma lo Wekelo wa Tshoto y’Etangelo, tambɔsa yɛdikɔ ya ntatɛ ndjitondja lo Angɛlɛ wele la gramatika ndo tɔtɛkɛta ta wɔdu. Lohoso layɔ layotshikitana la la nyɛ yokotombaka. Ɛtɛ w’awui wahɔnyi, edingɔ, ambola w’ovuswelo ndo esato wele l’asawo wa wekelo wa lo numɛlɔ ka wɔdu wayɔtɔnɛka la wɛnɛ wele lo numɛlɔ kokotondjamaka mbala la mbala. Tambodja lanɛ l’ɛse lo Angɛlɛ ditelo dingana diɔsami oma l’odingɔ 2 wa sawo dia wekelo dia ntondo dia Tshoto y’Etangelo nyɛ dia sho mɛnya otshikitanu wele lam’asa numɛlɔ yakɔ hiende ya lo Angɛlɛ.

Tekɔ l’elongamelo dia lo tshimbo ya Tshoto y’Etangelo y’oyoyo nyɛ Jehowa ayokadimola alɔmbɛlɔ w’anto efula wa lo wedja ɛsɔ wakawotɛ ɔnɛ: “Umbisha yimba ya dimi mbeka elembe aye.” (Osam. 119:73) Tekɔ l’eshikikelo k’ɔnɛ anto waheye Angɛlɛ dimɛna wa lo wedja ɛsɔ, mbidja ndo ana w’akɛnda amɔtshi watɛkɛta Angɛlɛ, wayonga l’akoka wa nɔngɔsɔlaka Wekelo wa Tshoto y’Etangelo wa lomingu la lomingu dimɛna. Tambokaloya Jehowa losaka la mamba nɛ dia nde ekɔ lo nkamba la ‘ɔhɔmbɔ wa kɔlamelo ndo wa kɛsɔ’ dia tosha mbo ya ndɛ ya lo nyuma tshavutshavu l’ɔtɛ wa ‘ngandji kokande nkumbo kaso k’onto l’ɔnango ka l’andja w’otondo.’—1 Pet. 2:17; Mat. 24:45.

Olui-walɔmbɔla w’Ɛmɛnyi wa Jehowa