Alako wendana l’Ɔtɛmwɛlɔ wa lo nkumbo ndo wekelo w’onto ndamɛ

L’ETATELO ka 2009, tshumanelo di’Ɛmɛnyi wa Jehowa dia l’andja w’otondo diakatshikitanya dikongelo diawɔ dia nsanganya. Nsanganya hiende ya l’atei wa lomingu yakasanganyema ndo anto tshɛ wakakeketshama dia kambaka la dikɔlɔ diakasalemaka Wekelo wa dibuku dia salaka Ɔtɛmwɛlɔ wa lo nkumbo kana wekelo w’onto ndamɛ. Onde wɛ ambokondja wahɔ lo ekongelo k’oyoyo kɛsɔ? Onde wɛ kambaka la diaaso sɔ dimɛna?

Anto amɔtshi ndjambolaka dia mbeya ekanda wahombawɔ sɛdingolaka l’Ɔtɛmwɛlɔ wa lo nkumbo. Olui-walɔmbɔla hawokombola nshikikɛ okanda ɔmɔtshi shikaa wahomba nkumbo tshɛ sɛdingolaka. Lam’ele akambo wele l’anto ntshikitana, ayoleka dimɛna Papa ka nkumbo tshɛ kana onto l’onto nsɛdingola yoho yayondokoka nkamba dimɛna la diaaso diele la nde l’atei wa lomingu sɔ.

Anto amɔtshi nɔngɔsɔlaka nsanganya ya l’etshumanelo, koko Ɔtɛmwɛlɔ wa lo nkumbo hawohombe komɛ lâsɔ ato. Anto akina salaka wadielo wa Bible, kɛtshanyaka ndo salaka tɔkɛnyɔ tɔmɔtshi t’awui wa l’Afundelo, djekoleko dia wahɔ w’ana w’akɛnda. Mbeyaka monga ko aha mbala tshɛ mbayondongaka ohomba kana dimɛna dia salaka Ɔtɛmwɛlɔ wa lo nkumbo oko ɔkɛtshanyelo wa ambola la ekadimwelo oko wasalemadiɔ lo nsanganya yaso ya l’etshumanelo. Nkamba la toho totshikitanyi mongaka mbala efula dimɛna dia mbetɛ ɔkɛtshanyelo dimɛna ndo dui sɔ kimanyiyaka dia mbishana tokanyi. Toho tɔsɔ tshutshuyaka anto tshɛ dia vɔ nkana yimba efula ndo nkakatshiya akambo amɔtshi wahawohɛki lo yimba.

Papa kɛmɔtshi kele l’ana asato akafunde ate: “Akambo wakatasalaka wakalekaka mbɔsama oma lo wadielo wa Bible. Sho tshɛ onto l’onto akadiaka totshapita takatahombe ndjâdia kâmɛ la ntondo ka wonya wakatasalaka wekelo, ana wakasɔnaka tokanyi t’awui wayotoyosawola dia vɔ tosala eyangelo ko l’ɔkɔngɔ diko vɔ ndjota akambo wakawatanyi l’eyangelo awɔ. Michael lele l’ɛnɔnyi esambele akasangaka mbala efula kana akafundaka odingɔ ɔmɔtshi. Ondo David lele l’ɛnɔnyi 13 nde la Kaitlyn lele l’ɛnɔnyi 15 wakafunde ɔkɔndɔ ɔmɔtshi wa lo Bible oko anto wakendaka woho waketaka akambo. Ɛnyɛlɔ, etena kakatadiaka ɔkɔndɔ wendana la woho wakɔmbɔla Yɔsɛfu alɔ wakɛnyi kapita k’akatshi wa mma la kapita k’amangudi a wanu ka Farawɔ, Kaitlyn akafunde ɔkɔndɔ ɔsɔ oko ndo nde mbaki ose lokanu lakendaka woho waketaka akambo.”—Etat. tshap. 40.

Mbala efula, akambo tshikitanaka. Mbeyaka monga ko yoho yele l’etombelo w’amɛna le onto ɔmɔtshi kana le nkumbo kɛmɔtshi hatonga dimɛna le onto kana nkumbo kekina. Kiombo yayela yekɔ la tokanyi efula takoka nkamba la nyu l’Ɔtɛmwɛlɔ wa lo nkumbo kana lo wekelo w’onto ndamɛ. Ondo wɛ kokaka nkana yimba dia ntana toho tokina efula.

 [Kiombo/​Osato wa lo lɛkɛ 7]

Nkumbo yele l’ana wele l’ɛnɔnyi dikumi l’ɛmɔtshi:

• Nyadia ndo nyɔkɛtshanya awui wele lo dibuku Les jeunes s’interrongent — Réponses pratiques.

• Nyɔshi oko ndo nyu mbakasɛnaka lo nshi yakafundamaka Bible (Enda Tshoto y’Etangelo ya Ngɔndɔ ka samalo 1, 1996, lɛkɛ 13, odingɔ 17-18.)

• Nyɔkɛtshanya dikambo dia eyango wakokanyu ndjadjɛ nshi nyɛ ndo lo nshi yayaye.

• Kanyendake ndo kanyɔkɛtshanyake awui wa lo Bible wele lo DVD mbala la mbala.

• Kanyɔsɛdingolake sawo diele lo Tshoto y’Etangelo diele l’ɔtɛ wa dui ɔnɛ: “Dikambo dia ɛlɔngɔlɔngɔ la esekaseka aso.”

Atshukanyi wele bu l’ana:

• Nyɔkɛtshanya awui wele lo tshapita 1, 3, 11-16 ya dibuku Sheke y’ɔngɛnɔngɛnɔ wa lo nkumbo.

• Nyotanɛke akambo amɔtshi w’ohomba wakanyatane oma l’eyangelo wakanyasale lo wadielo anyu wa Bible.

• Kanyɔlɔngɔsɔlake Wekelo wa Bible wa l’etshumanelo kana Wekelo wa Tshoto y’Etangelo.

• Nyɔkɛtshanyake toho takokanyu pamia olimu anyu w’esambishelo oko atshukanyi.

Anangɛso l’akadiyɛso w’enyemba kana wanɛ wele lo nkumbo yatɔnyi l’awui w’ɔtɛmwɛlɔ:

• Kanyekake ekanda w’eyoyo walongolaso lo nsanganya ya distrikɛ.

• Kanyadiake Annuaire weke katomba kana wakatombe l’ɛnɔnyi wetshi.

• Kanyosalake eyangelo wendana la ambola waleka anto wa l’ɛtshi kanyu ka nkɛtɛ mumbola.

• Kanyɔlɔngɔsɔlake mbɔtwɛlɔ yakoka tokamba la nyu l’olimu w’esambishelo.

Nkumbo yele l’ana w’akɛnda:

• Nyosalake tɔkɛnyɔ t’akambo wa lo Bible.

• Nyɔkɛnyake tɔkɛnyɔ t’awui wakanyakimɛ lo yimba, oko tɔnɛ tele lo Réveillez–vous ! lo lɛkɛ 30 ndo 31.

• Lo waaso amɔtshi, nyosalake awui amɔtshi wahanyatasalaka. (Enda sawo diele l’ɔtɛ a dui ɔnɛ: “Wekelo wa Bible lo dihole dialongawɔ waa nyama” diatanema lo Réveillez-vous ! wa Ngɔndɔ ka sato 8, 1996, lɛkɛ 16-19.)

• Nyɔsɛdingolake sawo diatomba lo Tshoto y’Etangelo diele l’ɔtɛ a dui ɔnɛ: “Nyetsha ananyu.”