Ambola w’oma le ambadi

Ngande wakokaso nshihodia toshifidi tele lo alapɔlɔ w’olimu w’ɔnɔnyi?

Ɔnɔnyi tshɛ, sho kongaka l’asolo walomɔlomɔ alapɔlɔ w’olimu watondjama lo Annuaire. Ekɔ dui di’ɔngɛnɔngɛnɔ dia mɛna kɛnɛ kakasale ekambi waki Jehowa lo tshɛ kawɔ l’andja w’otondo l’esambishelo ka Diolelo ndo l’olimu wa wetshelo. Koko dia sho ndeka nkondja wahɔ oma lo alapɔlɔ ɔsɔ, sho pombaka nshihodia kɛnɛ kofundami dimɛna, mbidja ndo toshifidi. Tende bɛnyɛlɔ dimɔtshi:

Ɔnɔnyi w’olimu. Tatɛka mbadiema oma lo Ngɔndɔ ka divwa k’ɔnɔnyi ɔmɔtshi polo lo Ngɔndɔ k’enanɛi k’ɔnɔnyi okina. Lo Annuaire mbatanema alapɔlɔ w’esambishelo w’ɔnɔnyi weke kambeta. Ɔnkɔnɛ, lo Annuaire 2011 mbatanema alapɔlɔ w’ɔnɔnyi w’olimu 2010, wakamɛ mbadiema lo Ngɔndɔ ka divwa 1, 2009 polo Ngɔndɔ k’enanɛi 31, 2010.

Lofulo l’apandjudi tshɛ ndo lofulo la l’atei atei. Tshɛkɛta “apandjudi” nembetshiyaka Ɛmɛnyi wa Jehowa tshɛ wambobatizama mbidja ndo wanɛ wahatabatizama wakotsha kɛnɛ kalɔmbama dia monga esambisha wa Diolelo. Etelo k’ɔnɛ “lofulo l’apandjudi tshɛ” nembetshiyaka shifidi ya woke y’alapɔlɔ w’oseka ngɔndɔ tshɛ k’ɔnɔnyi w’olimu ndo shifidi shɔ mbeyaka monga ndo l’alapɔlɔ wakimwama l’ɔkɔngɔ waki kombidjama l’alapɔlɔ wa ngɔndɔ ketshi. Lo yoho shɔ apandjudi amɔtshi mbeyaka mbadiema mbala hiende. Koko, hatodje alapɔlɔ w’apandjudi wakasambisha ko wakohɛ nkimɔ alapɔlɔ awɔ lo shifidi y’alapɔlɔ y’apandjudi tshɛ. Kɛsɔ mɛnyaka ohomba w’opandjudi tshɛ kimɔka alapɔlɔ ande la wonya ngɔndɔ tshɛ. Etelo k’ɔnɛ “lofulo la l’atei atei l’apandjudi” ekɔ shifidi mɔtshi ya wenya wotshikitanyi wakimɔ apandjudi ngɔndɔ tshɛ.

Lofulo la wenya tshɛ. Lo ndjela Annuaire 2011, Ɛmɛnyi wa Jehowa waketsha wenya ndekana 16 000 000 l’olimu w’esambishelo. Koko, lofulo la wenya lɔsɔ bu lofulo la wenya lakatetsha l’ɔtɛmwɛlɔ aso, nɛ dia wenya wetshaso mbala la mbala l’elimu wele oko wembwelo w’ɛkɔkɔ, wɔtwɛlɔ wa lo nsanganya kana wekelo wa Bible w’onto ndamɛ ndo ekanelo ka yimba l’akambo wekaso hawodjama lo lofulo la wenya lakimɔma lɔsɔ.

Falanga yakakambe la so. L’ɔnɔnyi w’olimu 2010, Ɛmɛnyi wa Jehowa wakatondja miliyɔ 155 ya dɔlara dia nkimanyiya ambatshi mboka wa lânde, waa misiɔnɛrɛ ndo emendji weteta dia vɔ nkotsha olimu awɔ w’esambishelo dimɛna. Koko, falanga yakamba la so dia ntondja ekanda walembetshiya Bible ndo dia nkimanyiya ase nkumbo ka Bɛtɛlɛ ndekana 20 000 wakamba lo Bɛtɛlɛ tshɛ ya l’andja w’otondo hayadiema lo shifidi ya falanga ya l’ɔnɔnyi shɔ.

Wanɛ walɛ mapa ndo wanɔ vinyɔ. Ɔsɔ ekɔ lofulo l’Ɛmɛnyi wa Jehowa walɛ mapa ndo wanɔ vinyɔ lo Eohwelo kasalema l’andja w’otondo. Onde lofulo lɔsɔ mbele lofulo l’akitami weke lanɛ la nkɛtɛ? Ndooko. Akambo efula wele oko mbekelo ya l’ɛtɛmwɛlɔ waki onto ntondo kana pâ ka l’ɔtɛ kokaka nkonya anto amɔtshi dia ndjɔfɔnya ɔnɛ wambolongola leeta la l’olongo. Sho bu la woho wakokaso mbeya lofulo shikaa l’akitami weke la nkɛtɛ ndo sho bu l’ohomba wa mbeya dui sɔ. Olui-walɔmbɔla kema la listɛ la nkombo ya wanɛ walɛ mapa ndo wanɔ vinyɔ lo Eohwelo. *

Kɛnɛ keyaso ele ɔnɛ “ekambi a [Nzambi k]asu” ɛmɔtshi w’akitami wayonga lanɛ la nkɛtɛ etena kayokimɔma mpɛpɛ y’elanyelo ya fɔnu ka woke. (Eny. 7:1-3) Polo ndo l’etena kɛsɔ, akitami wayotetemala nɔmbɔla olimu wafundama lo alapɔlɔ aso w’ɔnɔnyi w’olimu, mbuta ate olimu w’esambishelo ndo wa wetshelo wahatasalemaka l’ɔkɔndɔ w’ana w’anto.

[Nɔte ka l’ɛse ka dikatshi]