Losanganya lahohamamɛki pondjo

“LAM’AYOSHILA losanganya lɔnɛ, nyayota nyate: ‘Ɔnɛ mɛtɛ ekɔ losanganya la teokrasi la l’ɔnɔnyi lahohamamɛki pondjo!’” Ɛtɛkɛta ɛsɔ mbakate ɔnangɛso Stephen Lett la l’Olui-walɔmbɔla w’Ɛmɛnyi wa Jehowa dia nkotola yambalo ya lemba l’anto waki lo losanganya lɔsɔ. Vɔ wakatshumana lo losanganya la l’ɔnɔnyi la 126 la Watch Tower Bible and Tract Society of Pennsylvania lakasalema lo Ngɔndɔ ka dikumi 2, 2010 lo mbalasa ka nsanganya ya weke k’Ɛmɛnyi wa Jehowa la Jersey City, l’osomba wa New Jersey, l’États-Unis. Naa akambo amɔtshi wakatɛkɛtama lo losanganya lahohamamɛki lɔsɔ?

Lo sawo dia mbɔtwɛlɔ diakasha ɔnangɛso Lett la wangasanu tshɛ, nde akatɛkɛta dia pusupusu ka l’olongo ka Jehowa kɔtɛkɛtami lo dibuku dia lo Bible dia Ezekiyele. Nde akɛnya dia Jehowa mbatalɔmbɔla pusupusu ka woke kɛsɔ, mbuta ate okongamelo ande. Etenyi ka l’olongo k’okongamelo kokengami la ditongami dia lo nyuma kekɔ lo tatshu otsha la ntondo la lowango la mamba, mbuta ate lowango la tokanyi taki Jehowa ndamɛ. Etenyi ka la nkɛtɛ k’okongamelo waki Jehowa Nzambi ndo tɔ lawɔ kekɔ lo talawɔ lowango lakɔ lâmɛ. Ɔnangɛso Lett akatɛkɛta dia awui amɔtshi w’amɛna wambosalema l’etenyi ka la nkɛtɛ k’okongamelo waki Nzambi l’ɛnɔnyi weke kambeta.

Ɛnyɛlɔ lam’ele Bɛtɛlɛ mɔtshi yakasanganyema ndo yakanunyama. Dui sɔ diambokimanyiya anto efula wambokambaka lo Bɛtɛlɛ yambowodiha shɔ ndeka ndjasha l’olimu w’esambishelo. Ɔnangɛso Lett akakeketsha ampokami dia vɔ ntetemala nsala alɔmbɛlɔ lo dikambo di’Olui-walɔmbɔla lele onyimpala w’olui w’ɔhɔmbɔ dia vɔ ntetemala monga la kɔlamelo, la lomba ndo la kɛsɔ.—Mat. 24:45-47.

Alapɔlɔ wakeketsha ndo ɛkɔnya wananda otema

Tab Honsberger lele ose Kɔmite ka filialɛ ka lo wodja wa Haïti akasha alapɔlɔ w’ɔkɛi wendana la didimu dia nkɛtɛ diakasalema lo Ngɔndɔ ka ntondo 12, 2010 diakadiake anto oko 300 000 lo wodja ɔsɔ. Nde akɛnya dia ewandji w’ɛtɛmwɛlɔ wakatɛka anto dia Nzambi mbakasha anto wakavu asɔ dilanya l’ɔtɛ wewɔ kema la kɔlamelo, koko nde akakokɛ anto w’ɛlɔlɔ. Dui dia diambo ko, nunu dia dengalenga wakatshungɔ oma lo lokanu etena kakanyukola didimu dia nkɛtɛ mpele dia lokanu. Ase Haïti efula w’etema ɛlɔlɔ wakakeketshama etena kakaweke akambo wa mɛtɛ wɛnya lande na kele nshi yaso nyɛ yamboleka ofukutanu. Ɔnangɛso Honsberger akate ɛtɛkɛta w’ɔnangɛso ɔmɔtshi la kɔlamelo la lo wodja wa Haïti lakavusha wadɛnde lo didimu dia nkɛtɛ wata ɔnɛ: “Lâkakɛdia asɔi polo ndo ɛlɔ ndo haleye edja ka ngande kayomotetemala la ndela, koko lekɔ l’ɔngɛnɔngɛnɔ l’ɔtɛ wa ngandji kamboka okongamelo waki Jehowa. Lekɔ l’elongamelo ndo lamboyashikikɛ dia nkimanyiya anto akina dia vɔ lawɔ monga la tɔ.”

 Mark Sanderson laya ose nkumbo ka Bɛtɛlɛ ka la Brooklyn akasha alapɔlɔ wendana la wodja wa Philippines. Ɔnangɛso ɔmɔtshi lambokamba edja lo Kɔmite ka filialɛ ka lɛkɔ aki l’ɔngɛnɔngɛnɔ dia mbuta woho wambofula lofulo l’apandjudi wa Diolelo mbala 32 ndo woho wele lofulo l’ambeki wa Bible ndeka lofulo l’apandjudi etale. Nde akatɛkɛta dikambo di’okana w’ɔnangɛso Miguel wakadiakema. Miguel akadje welo efula dia nde tofunda ondjakanyi ɔsɔ laka lɛɛta ndo dia vɔ mbodja lo lokanu. L’ɔkɔngɔ diko, etena kakawatshu tosambisha ase lokanu, Miguel akatohomana l’ondjakanyi ɔsɔ. Kânga mbakinde la yɛnyi, Miguel akasawola la nde la lotutsha tshɛ oko onto mbasawola l’ɔngɛnyi ande. L’edjedja ka wonya, nde akayekaka la pami kɛsɔ, ndo nde aketawɔ mbeka ndo akayotatɛ mboka Jehowa ngandji. Kakianɛ, nde aya Ɔmɛnyi wa Jehowa wambobatizama. Miguel mbaya ɔngɛnyi ande wa ma ma ndo nde ekɔ lo nsala tshɛ dia nkimanyiya ɔnango l’oyoyo leke kabatizama ndo leke katomba oma lo lokanu. *

Oma lâsɔ, ɔnangɛso Mark Noumair lele ombetsha lo departɛma diendana la Kalasa ya teokrasi akakɔnya anangɛso asato la wadiɛwɔ: Alex nde la Sarah Reinmueller, David nde la Krista Schafer ndo Robert nde la Ketra Ciranko. Alex Reinmueller, lele okimanyedi lo Kɔmite ka otondjelo w’ekanda akate woho wakandalange akambo wa mɛtɛ etena kakandakambaka olimu w’ombatshi mboka tena efula ndamɛ la Canada lam’akinde eke l’ɛnɔnyi 15. Etena kakawawombola onto lakaleke monga la shɛngiya le nde lo Bɛtɛlɛ, ɔnangɛso Reinmueller akashile nkombo y’anangɛso wa kɔlamelo asato ndo nde akɛnya woho wakôkimanyiya ɔmɔmɔ la l’atei awɔ dia nde mpama lo nyuma. Wadɛnde Sarah akakɔndɔla dikambo dia lɔngɛnyi laki lam’asande la kadiyɛso kɛmɔtshi kakakikɛ yɛdikɔ y’ɛnɔnyi akumi lo lokanu la la Chine l’ɔtɛ wa mbetawɔ kande. Sarah akate ɔnɛ nde akayaekiya dia ndjaɛkɛka le Jehowa l’ekimanyielo ka dɔmbɛlɔ di’onto ndamɛ.

David Schafer, okimanyedi wa lo Kɔmite ka wetshelo akandola mama kande l’ɔtɛ wa mbetawɔ kande ka wolo ndo akatɛkɛta dikambo di’anangɛso wakakambaka olimu wa nkɔta etamba ndo wakokimanyiya dia nde nkamba olimu w’ombatshi mboka wa tshanda l’etena kakinde dikɛnda. Krista ka wadɛnde akate dia nde akasɛngiyama oma le dikumanyi dia lo nkumbo ka Bɛtɛlɛ diaki la “kolamelu lu diango diuleki tshitshe” oko wakatodjangɛ Yeso.—Luka 16:10.

Robert Ciranko, okimanyedi wa lo Kɔmite k’ofundelo akohɔ watshɛnde anɛi wakaye oma lo wodja wa Hongrie ndo waki Akristo w’akitami. Etena kakinde eke dikɛnda, nde akambe etena kakandɔtɔ lo nsanganya ya weke lo ɛnɔnyi 1950 ndo nde akɛnyi di’okongamelo wa Jehowa ndeka etshumanelo kande woke la fwa. Ketra ka wadɛnde akate woho wakandeke dia monga la kɔlamelo etena kakandakambaka oko ombatshi  mboka l’etshumanelo kɛmɔtshi kakalole l’apɔstazi ndo akambo akina. Nde akatetemala mbikikɛ ko l’ɔkɔngɔ wakayotomaka dia tokamba oko ombatshi mboka wa lânde l’etshumanelo kɛmɔtshi lɛnɛ akandatɔngɛnangɛna kâmɛ kaki l’etshumanelo kɛsɔ.

Oma lâsɔ, Manfred Tonak akayosha alapɔlɔ wendana la wodja wa Éthiopie. Wodja ɔsɔ wakikɔ lo nshi yakafundamaka Bible ndo nshi nyɛ wekɔ la diɛsɛ dia monga l’apandjudi wa lokumu l’ɔlɔlɔ 9 000. Efula ka l’atei awɔ wekɔ lo mbidjasɛ lo kapitalɛ kelɛwɔ Addis-Abeba kana suke la tɔ. Bɛtshi dia nkɛtɛ dia l’etale dia lo wodja ɔsɔ diekɔ l’ohomba w’apandjudi wa Diolelo efula. Dia nkotsha ohomba ɔsɔ, Ɛmɛnyi wa Jehowa w’ase Éthiopie wadjasɛ lo wedja ekina wakelamɛ dia tosambisha lɛkɔ. Efula wakaye ndo wakayokeketsha Ɛmɛnyi wa Jehowa wa lo wodja akɔ ndo wakatane anto waketawɔ losango lawɔ.

Sawo dia tenyi tenyi diendana l’Ɛmɛnyi wa Jehowa wa la Russie ndo woho wakawasambaka lo tuminadi aki etenyi kɛmɔtshi k’ohomba ka lo losanganya lɔsɔ. Aulis Bergdahl la lo Kɔmite ka filialɛ ka la Russie akakɔndɔla ɔkɔndɔ w’ɛhɛnyɔhɛnyɔ w’Ɛmɛnyi wa Jehowa wa la Russie, djekoleko wa l’osomba wa Moscou. Philip Brumley lakamba lo departɛma diendana l’awui wa dombo dia lo Bɛtɛlɛ ka l’États-Unis akatɛkɛta di’awui wakeketsha wakasalema lo ngɔndɔ yeke kambeta etena kakahembola Tuminadi ta l’Erɔpɛ tendana la lotshungɔ lele l’onto enongo divwa w’awui wakawamamatanyɛ Ɛmɛnyi wa Jehowa. Tuminadi tɔsɔ takɛnya dia akambo akɔ divwa wakawasɔngwɛ Ɛmɛnyi wa Jehowa waki kashi ndo lo waaso amɔtshi tuminadi tɔsɔ takadjaka welo dia nembetshiya lande na kele akambo wakataka atunyi w’Ɛmɛnyi wa Jehowa waki kashi. Etena kakongawɔ dia mɛna woho wayeta akambo, ɔnangɛso Brumley akɛnya shɛngiya yayonga la tɛdikɔ tayɔsa tuminadi tɔsɔ lo wedja ekina.

L’ɔkɔngɔ wa diewoyelo dia dimɛna sɔ, ɔnangɛso Lett akewoya dia Tuminadi ta l’Erɔpɛ tendana la lotshungɔ lele l’onto tambetawɔ dia nombosha kilombo kendana la taksɛ kele lam’asa wodja wa France l’Ɛmɛnyi wa Jehowa. Tuminadi talɛmiyama efula tɔsɔ mbetawɔka dombo dingana to diawaelawɔ. Edja ndo kakianɛ, Tuminadi ta l’Erɔpɛ tendana la lotshungɔ lele l’onto tambohembola dombo 39 diendana l’Ɛmɛnyi wa Jehowa ndo takayinge lo dombo 37. Ɔnangɛso Lett akakeketsha ekambi waki Nzambi tshɛ dia vɔ ntetemala mbidja kilombo kele la wɔ nshi nyɛ l’alɔmbɛlɔ walɔmbawɔ Jehowa Nzambi.

Ɔnangɛso Richard Morlan lele ombetsha lo Kalasa ka dikumanyi dia lo tshumanelo akasha alapɔlɔ w’ekomelo. Nde akatɛkɛta la waasaso lo kɛnɛ kendana la Kalasa ndo dia lowando lakɛnya dikumanyi diakɔtɔ lo kalasa shɔ.

 Asawo akina wakashama oma le ase Olui-walɔmbɔla

Guy Pierce la l’Olui-walɔmbɔla akasha sawo dia lɔɔka diakake epole ɔsɛkɛ lo divɛsa dia l’ɔnɔnyi 2011 diata ɔnɛ: ‘Toyange eshamelo lo lokombo la Jehowa.’ (Zef. 3:12) Nde akate ate kânga mbele etena kɛnɛ kekɔ etena k’ɔngɛnɔngɛnɔ le Ɛmɛnyi wa Jehowa lo toho efula, tɔ kekɔ etena ka kɔlɔ le anto efula. Lushi la woke la Jehowa laya suke, koko anto wekɔ lo ntetemala nyanga eshamelo lo ɛtɛmwɛlɔ wa kashi, le ewandji wa pɔlitikɛ, lo diangɔ dia l’emunyi ndo l’akambo akina. Dia ntana eshamelo k’ɔlɔlɔ, sho pombaka ntɛndɛ lokombo la Jehowa. Dui sɔ nembetshiyaka lieya, liɔsa la nɛmɔ ndo ndjaɛkɛ le onto lakanga lokombo lakɔ, mbôka ngandji la diangɔ tshɛ diele la so.

David Splane la l’Olui-walɔmbɔla akasha sawo dimɔtshi diakakotola yambalo y’anto diele l’ɔtɛ a dui ɔnɛ: “Onde wɛ ambɔtɔka lo momuya kaki Nzambi?” Nde akɛnya dia momuya kaki Nzambi halange nembetshiya dia ndoko lotumu lakambema l’etena kɛsɔ lam’ele Jehowa nde l’Ɔnande ‘wekɔ lo ntetemala nkamba’ lo lushi la momuya la didjidji lɔsɔ dia nkonya sangwelo diaki Nzambi diendana la diangɔ diakandatonge dia la nkɛtɛ otsha l’ekomelo ka diambo. (Joa. 5:17) Ko ngande wakokaso mbɔtɔ lo momuya kaki Nzambi? Mbewɔ nsala pɛkato kana akambo amɔtshi la kanyi ya mɛnama onto ɔlɔlɔ la ntondo k’anto ekɔ etenyi kɛmɔtshi k’okadimwelo. Sho pombaka monga la mbetawɔ ndo nama sangwelo diaki Nzambi lo yimba ndo nsala kɛnɛ tshɛ kakokaso nsala dia nsukɛ sangwelo sɔ. Lo tena dimɔtshi, dui sɔ mbeyaka monga tshondo y’okakatanu dia nsala, koko sho pombaka mbetawɔ alako ndo nsala akambo lo ndjela ɛlɔmbwɛlɔ kalongolaso oma l’okongamelo waki Jehowa. Ɔnangɛso Splane akakeketsha anto waki lo losanganya lɔsɔ dia vɔ nsala kɛnɛ tshɛ kakokawɔ nsala dia mbɔtɔ lo momuya kaki Nzambi.

Ɔnangɛso Anthony Morris la l’Olui-wa lɔmbɔla akasha sawo dia komelo diaki l’ɔtɛ wa dui ɔnɛ: “Kakɔna keso lo kongɛ?” Oko ombutshi wa ngandji, ɔnangɛso Morris akohola ampokami ande losango la wanyandja lendana la prɔfɛsiya yahatakotshama yele la ntondo kaso yakongɛ anto tshɛ wele la kɔlamelo l’asolo walomɔlomɔ. L’atei wa prɔfɛsiya shɔ mbatanema ndo prɔfɛsiya kendana l’etena kayota anto ɔnɛ “ki la lutui tshitshi” ndo prɔfɛsiya kendana l’elanyelo k’ɛtɛmwɛlɔ wa kashi. (1 Tes. 5:2, 3; Eny. 17:15-17) Ɔnangɛso Morris akahɛmɔla ampokami ande oma lo wâle wa mbuta ɔnɛ: “Ɔnɛ ekɔ paka Aramangɛdɔna mbamboya,” etena kalongolaso nsango mɔtshi yendana l’akambo amɔtshi wosalemi wahakotsha prɔfɛsiya shɔ. Nde akakeketsha ampokami ande dia vɔ ntetemala ngɛnangɛna, monga la solo dia lotutsha ndo ntetemala kongɛ oko wɛnyamidiɔ lo Mika 7:7. L’etena kakɔ kâmɛ, nde akakeketsha anto tshɛ dia vɔ mamema Olui-walɔmbɔla ndo monga kâmɛ oko asɔlayi otsha lo ta. Nde akawatɛ ate: “Etema anyu wayali la dihunga, nyu tshe watulungamelaka [Jehowa.]”—Osam. 31:24.

L’ekomelo a shimu, waewoyelo amɔtshi wahohamamɛki wakashama. Geoffrey Jackson la l’Olui-walɔmbɔla akewoya dia kem’edja wayotondjaka Tshoto y’Etangelo ya lo Angɛlɛ wa wɔdu dia nkimanyiya anto wele bu la diewo d’efula l’Angɛlɛ. Oma lâsɔ, Stephen Lett akewoya dia Olui-walɔmbɔla ayɔsa yɛdikɔ dia wembwelo w’ɛkɔkɔ salema dikambo di’emendji wa distrikɛ la wadiɛwɔ l’États-Unis. Nde akewoya nto dia Kalasa k’olowanyelo w’ekambi kayotatɛ mbelamɛ ɔnɛ Kalasa ka Bible k’anangɛso w’enyemba. Kem’edja tɔ kayoyelana la Kalasa ka Bible k’atshukanyi. Kalasa kɛsɔ kayoleka ndowanya atshukanyi dia okongamelo waki Jehowa nkamba la wɔ. Ɔnangɛso Lett akewoya nto dia Kalasa k’emendji weteta la wadiɛwɔ ndo Kalasa k’ase kɔmite ya filialɛ la wadiɛwɔ wayosalaka kalasa hiende ɔnɔnyi tshɛ la Patterson ndo ekongelo kayosalema dia wanɛ wambɔtɔka kalasa shɔ ntondo nyomoyɔtɔ nto.

L’ekomelo ɔnangɛso John Barr laya l’ɛnɔnyi 97 ndo lambokamba edja l’Olui-walɔmbɔla akasale dɔmbɛlɔ dia l’okitshakitsha ndo di’oma k’ɛsɛ otema. * L’ekomelo ka losanganya, anto tshɛ wakate dia ɔsɔ mɛtɛ aki lushi lahohamamɛki.

[Nɔte ya l’ɛse ka dikatshi]

[Efundelo wa l’etei w’odingɔ wa lo lɛkɛ 19]

Ɛkɔnya wakasalema wakangɛnyangɛnya ampokami tshɛ waki lo losanganya

[Efundelo wa l’etei w’odingɔ wa lo lɛkɛ 20]

Jehowa ambɔtshɔkɔla olimu w’esambishelo lo wodja w’Éthiopie