Onde wɛ âkohɔ?
Onde wɛ âkohɔ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:
• Naa akambo asato wakoka tokimanyiya diaha sho monga la lokeso?
Akambo akɔ vɔanɛ: 1) Monga la wɔma wa Nzambi. (1 Pet. 3:12) 2) Monga la nkum’otema kambekiyama l’awui wa lo Bible. 3) Nsala la wolo dia ngɛnangɛna la kɛnɛ kele la so.—4/15, lɛkɛ 6-7.
• Kakɔna kɛnya dia kambɛ Nzambi la kɛnɛmɔ tshɛ halembetshiya dia sho pombaka monga awui wolo wonya tshɛ kana ntona dia nkɔkɔla demba?
Sho mbokoyaka ɛnyɛlɔ kaki Yeso. Nde akalɛka kâmɛ l’anto l’ɔngɛnɔngɛnɔ tshɛ. Sho mbeyaka dia nde komonga awui wolo lo yoho ya tshambandeko. Anto akina, mbidja ndo ana w’akɛnda, wakawɔtɔka lo demba ndo wakɔ̂ngɛnangɛnaka.—4/15, lɛkɛ 10.
• Jobo 33:24 tɛkɛtaka dikambo dia ‘tshungo’ kakɔna ndo ngande wakakondja Jɔbɔ wahɔ oma lo tshungo kakɔ?
Tshɛkɛta tshungo lo divɛsa nɛ nembetshiyaka “nkomba.” Lo kɛnɛ kendana la Jɔbɔ, tshungo akakoke monga olambo wa nyama wakahombe Nzambi mbetawɔ dia nkomba munga ya Jɔbɔ. Mɛnamaka dia Jehowa aketawɔ tshungo lo wahɔ wa Jɔbɔ dia tɔ nkomba munga yande ndo ndjiholɛ Nzambi mboka dia nde mbɔkɔnɔla ndo mbofuta. (Jobo 1:5; 42:17)—7/1, lɛkɛ 11.
• Kakɔna kalembetshiya otamba w’owele watɛkɛtama lo Romo tshapita 11?
Otamba w’owele ɔsɔ nembetshiyaka etenyi ka hende ka kanula y’Abarahama, mbuta ate Isariyɛlɛ wa lo nyuma. Jehowa mbɛdikamaka l’edio w’otamba w’owele wa didjidji ɔsɔ ndo Yeso mbɛdikamaka l’okendeka awɔ. Etena kakatone ase Juda efula wa lôtɔ Yeso, ase Wedja wakakome ambetawudi wakakoke kakatanyema l’otamba w’owele wa didjidji dia vɔ ntondja lofulo la wanɛ wakahombe nkenga etenyi ka hende ka kanula y’Abarahama.—5/15, lɛkɛ 22-25.
• Ngande weyaso dia Ngɛhɛna kema dihole dia dja diasoyama anto?
Jehowa mbɔsaka tshelo ya ntshumba anto lo dja oko dui dia kɔlɔ efula. (Jer. 7:31) Koko wetshelo w’ɔnɛ Nzambi soyaka anto wambovɔ hɔtɔnɛ la lonto lande la ngandji ndo la wetshelo wokɛma hwe wa lo Bible wata ɔnɛ “wavo haweyi nduku dikambu.” (Und. 9:5, 10)—7/1 lɛkɛ 15.
• Ngande wakadimola Jehowa alɔmbɛlɔ wa wanɛ wele la “etema wambate” ndo wele la “etema wa ndjakitshakitsha”? (Osam. 34:18)
Oko ombutshi wa ngandji wakeketsha ɔna lele l’ɔkɛi, Jehowa ekɔ suke l’atɛmɔdi ande wele l’ohomba w’ekimanyielo. Nde ekɔ suke dia mbakeketsha ndo mbɔladia wanɛ wele l’etema wambatɛ ndo wa ndjakitshakitsha. Nde kokaka mbasha lomba ndo wolo wele la wɔ ohomba dia ndɔshana l’ehemba tshɛ wahomana la wɔ. (2 Kor. 4:7; Jak. 1:5)—7/1 lɛkɛ 23.
• Onde tokanula takakoke Yeso onto la kokele mbota takakoke monga etenyi kɛmɔtshi ka tshungo?
Ndooko. Kânga mbele Yeso akakoke mbota miliyara ya tokanula ta kokele, tokanula tɔsɔ takatakoke monga etenyi kɛmɔtshi ka tshungo. Lɔsɛnɔ laki Yeso la kokele loto lakɛdima la lɔsɛnɔ la kokele lakashisha Adama. (1 Tim. 2:6)—6/15, lɛkɛ 13.
• Ngande wakoka Akristo mɛnya dia vɔ kambaka l’ɔhɛmwɛlɔ wendana l’embetsha wa kashi wele lo Etsha 20:29, 30?
Vɔ hawohombe nongola embetsha wa kashi lo mvudu yawɔ kana mbasha mɔyɔ. (Romo 16:17; 2 Joa. 9-11) Akristo pombaka mbewɔ dia mbadia ekanda wa waa apɔsta kana emisiɔ wa televiziɔ wasukɛ wetshelo awɔ ndo waa sitɛ y’Ɛtɛrnɛtɛ yatanema wetshelo awɔ.—7/15, lɛkɛ 15-16.
• Oko wɛnyamidiɔ l’ɔkɔndɔ wele lo Luka 10:40-42, naa ɔkɔkɔ wa ntondo wasanganaso kâmɛ l’asekaso ambetawudi?
Sho sanganaka kâmɛ l’asekaso ambetawudi ntondotondo aha dia ndjowasha kana ndjolongola mbo ya ndɛ ya kawotake, koko ndjokeketshana ndo ndjoshana weshasha wa lo nyuma. (Romo 1:11, 12) Kânga mbo ya ndɛ ya tshitshɛ kokaka nkeketsha asekaso ambetawudi etena kasanganaso kâmɛ la wɔ.—7/1, lɛkɛ 29, 30.
