Tokambe l’Ɛtɛrnɛtɛ dimɛna

NTAMBE efula oma ko etena kakatondjama mashinyi watondjawɔ ekanda, anto wambotshikitanya woho wasawolawɔ. Otondjelo w’Ɛtɛrnɛtɛ lo nshi yaso nyɛ mbɛdikamaka la dui sɔ. Anto wekɔ la shadiya dia mbelɛ Ɛtɛrnɛtɛ ɔnɛ ehomɔ kawakimanyiya dia nsawola oyadi dihole diakɔna diewɔ. Naka wɛ ndjihola Ɛtɛrnɛtɛ, kete wɛ kokaka mbishola awui, toshifidi ndo tokanyi tele l’anto lo kɛnɛ kendana la lokema l’awui amɔtshi.

Dikoka dia nsawola diekɔ woshasha wa nɛmɔ efula w’oma le Otungi aso. Diɔ tokimanyiyaka dia sho mbishana tokanyi kana tomanɛ awui amɔtshi l’anto akina. Jehowa mbaki Onto la ntondo la nsawola la nkumbo kande k’ana w’anto lo mbatɛ awui wokɛma hwe lo woho wakawahombe monga la lɔsɛnɔ l’oshika. (Etat. 1:28-30) Oko wɛnyamidiɔ hwe lo kɛnɛ kakatombe l’etatelo k’ɔkɔndɔ w’ana w’anto, dikoka dia nsawola kokaka kambema lo yoho ya kɔlɔ. Satana akatɛ Eva awui wa kashi wa mamba. Nde aketawɔ kanyi yakawotɛ Satana ndo akatetawoya omɛnde kanyi yakɔ ko dui sɔ diakakonya andja w’otondo lo fɔnu.—Etat. 3:1-6; Romo 5:12.

Kakɔna kakokaso mbuta lo kɛnɛ kendana l’okambelo wa l’Ɛtɛrnɛtɛ? Kânga mbakoka Ɛtɛrnɛtɛ tewoya awui w’amɛna, tokimanyiya diaha nshisha wenya ndo tokimanyiya lo toho tokina, vɔ kokaka tewoya awui wa kashi, toshishɛ wenya aso ndo ndanya lɔkɛwɔ laso. Nyɛsɔ tɔsɛdingole woho wakokaso nkamba l’ehomɔ kɛsɔ lo wahɔ aso.

Awui wa lɔkɔ wekɔ mɛtɛ kana kashi?

Tatɔfɔnyake pondjo dia awui wele l’Ɛtɛrnɛtɛ tshɛ wekɔ mɛtɛ ndo sho kokaka nkondja wahɔ oma lɔkɔ. Dihomɔ di’eyangelo dia l’Ɛtɛrnɛtɛ kokaka mbɛdikama l’olui w’anto waka weho tshɛ w’efu w’amɛna ndo wa lɔlɛngɔ ko mbadja lo dihole ɔtɔi l’oyango wa mbalɛ. Onde wɛ ayotatɛ ndɛ efu ɛsɔ aha la mbasɔnɔla la yewo tshɛ? Atonga na! Dihomɔ di’eyangelo dia l’Ɛtɛrnɛtɛ diekɔ lo nkamba la waa ɔrdinatɛrɛ efula dia ntshumanya lokema l’awui wa mɛtɛ ndo wa kashi. Sho pombaka monga la shɛnɔdi dia nkakitola eponga la fufudi diaha sho mbidja wɛɔngɔ aso mindo l’awui w’anyanya.

Lo 1993, jurnalɛ mɔtshi yakɛnya esato ɛmɔtshi wa mfɔ hiende yakɛndakɛnda la ntondo k’ɔrdinatɛrɛ. Mfɔ kɛmɔtshi akatɛ mfɔ kekina ate: “L’Ɛtɛrnɛtɛ, ndoko onto lakoka mbeya dia wɛ ekɔ mfɔ.” Ambeta edja efula, Satana akakambe l’olui ko akatatɛ nsawola l’Eva ndo akawotɛ ate wɛ kokaka nkoma oko Nzambi. Ɛlɔ kɛnɛ, onto tshɛ latshɔ l’Ɛtɛrnɛtɛ kokaka mbɔsama oko manyi lo dikambo dimɔtshi aha la nde mbuta lokombo lande. Ndo ndoko ɔlɛmbɛ shikaa wɛnya waa na wakoka ntondja ekanda,  tomanɛ awui ndo esato ɛmɔtshi ndo tokanyi tɛnya woho wa nsala dui dimɔtshi.

Etena kakambaso l’Ɛtɛrnɛtɛ, tatongake tetawɔ etawɔ oko waki Eva. Sho pombaka monga la shɛnɔdi ndo la yewo l’awui walongolaso l’Ɛtɛrnɛtɛ. La ntondo ka sho mbetawɔ awui amɔtshi, toyambole ɔnɛ: 1) Akafunde awui anɛ? Diewo diakɔna diele l’onto lakâfunde? 2) Lande na kakandâfunde? Kakɔna kakôtshutshuya dia nde mbafunda? Onde kanyi ya kɔngɔdi tombaka lɔkɔ? 3) Oma lende akandakondja awui wakandafunde? Onde ekɔ dihole dimɔtshi diakokaso nyanga ko mɛna oma lɛnɛ akandɔshi awui akɔ? 4) Onde awui akɔ mbɔtɔnɛka l’akambo weta nshi nyɛ? Lo ntambe ka ntondo, ɔpɔstɔlɔ Paulo akasha Timɔtɛ dako diakoka nkamba la so polo ndo ɛlɔ kɛnɛ. Nde akafunde ate: “Ulamaki dikambu diakawakutela, oseke eteketateketa wa kolo la aui wa tamu uma le antu waha la yimba ya mete.”—1 Tim. 6:20.

Onde Ɛtɛrnɛtɛ tɔsɛka wenya kana bu?

Naka sho nkamba l’Ɛtɛrnɛtɛ la lomba, kete aha la tâmu hatotoshisha wenya aso, wolo aso ndo falanga yaso. Sho koka nsomba ɛngɔ kɛmɔtshi esadi eto aha la mumɔ oma la ngelo. Mbɛdika eshinga la ntondo ka nsomba ɛngɔ tokimanyiyaka diaha nshisha falanga yaso oshishashisha. Olamelo wa falanga lo bankɛ l’ekimanyielo k’Ɛtɛrnɛtɛ ambokimanyiya anto efula dia monga la lɔsɛnɔ la dimɛna. L’ekimanyielo k’Ɛtɛrnɛtɛ, awui wendana l’ekondjelo kokaka kandɔma wonya akɔna tshɛ oma la ngelo aha l’okakatanu. Ɛtɛrnɛtɛ wekɔ la dihomɔ diakoka tokimanyiya dia sho ntana aviyɔ wakokaso munda lɔkɛndɔ l’oshinga wɔdu ndo tâlami dihole la ntondo. Aha la mbidja welo efula, sho kokaka nyanga numɛlɔ ya telefɔnɛ, lɛnɛ odjashi onto ndo toho tokina efula takoka anto nkoma otsha lɛnɛ atawatshu. L’andja w’otondo, Bɛtɛlɛ y’Ɛmɛnyi wa Jehowa kambaka la toho tɔsɔ diaha nshisha wenya, falanga ndo ase nkumbo ka Bɛtɛlɛ.

Koko tatohɛke dia okambelo wa l’Ɛtɛrnɛtɛ wekɔ ndo l’etombelo wa kɔlɔ. Vɔ mendanaka la lofulo la wenya lakokawɔ tɔsɛ. Lo dihole dia mbɔsa Ɛtɛrnɛtɛ oko ehomɔ kakoka mbakimanyiya, anto amɔtshi wokiɔsa oko ɛngɔ ka tɔkɛnyɔ. Vɔ mbetshaka wenya efula lo nkɛnya, lo nsomba diangɔ, lo nsawola, lo fundanɛ mesajɛ ndo lo nsala eyangelo wele kema ohomba. L’edjedja ka wonya, vɔ mbeyaka ndjokoma lo minya yimba l’akambo woleki ohomba wendana la nkumbo, angɛnyi ndo awui wa l’etshumanelo. Vɔ kokaka ndjokoma mfumbe y’Ɛtɛrnɛtɛ. Ɛnyɛlɔ, jurnalɛ mɔtshi mɛnyaka dia lo 2010 pursa 18,4 y’ɛlɔngɔlɔngɔ l’esekaseka wa lo wodja wa Corée wakayokoma mfumbe y’Ɛtɛrnɛtɛ. Anyangiyangi w’ase Allemagne wakate dia “nyemba nyemba ya wamato wekɔ lo ndjakiyanya lo woho wambokoma elonganyi awɔ mfumbe y’Ɛtɛrnɛtɛ.” Womoto ɔmɔtshi akakiyanaka dia woho wakayokoma omɛnde mfumbe k’Ɛtɛrnɛtɛ mbakatshikitanya lɔkɛwɔ lande lo yɛdikɔ y’efula ndo mbambosala dia diwala diaso mpandjɔ.

Bɛtɛlɛ kɛmɔtshi k’Ɛmɛnyi wa Jehowa kakalongola mukanda oma le ɔnangɛso ɔmɔtshi lakayaɔlɛ ndamɛ mfumbe k’Ɛtɛrnɛtɛ. Mbala mɔtshi, nde aketshaka wenya wa tango dikumi lo lushi la ntondo k’Ɛtɛrnɛtɛ. L’ɔkɔngɔ wa nde nshihodia dia “akambo wakatatɛ dimɛna,” nde akayokotsha ɔnɛ: “L’edjedja ka wonya, wɔtwɛlɔ ami lo nsanganya wakakitakita ndo lakayotshika nsala dɔmbɛlɔ.” Nde akatshɔka lo nsanganya aha la ndjalɔngɔsɔla ndo etena kakinde lo nsanganya yakɔ yimba yande yaki paka la ngelo l’Ɛtɛrnɛtɛ. Diɛsɛ ko, nde akeye dia nde ekɔ lo  ndjadja lo wâle ndo akasale kɛnɛ kahombama dia ntshikitanya dionga diande. Tatokambake pondjo l’Ɛtɛrnɛtɛ polo lo yɛdikɔ ya sho ndjokoma mfumbe kawɔ.

Onde awui wɛnyawɔ lɔkɔ mbetawɔmaka lo washo wa Nzambi kana bu?

Lo 1 Tesalonika 5:21, 22, sho mbadiaka ɔnɛ: “Nyedikaki akambu tshe: nyukimeli weli ololo; nyukimo wehu tshe w’akambu wa kolo.” Sho pombaka ndjashikikɛ dia kana awui wɛnyawɔ l’Ɛtɛrnɛtɛ mbetawɔmaka lo washo wa Nzambi ndo mbɔtɔnɛka l’atɔndɔ ande wa lâdiko. Vɔ pombaka mbɔtɔnɛ l’ɛlɛmbɛ wendana la lɔkɛwɔ l’Okristo ndo nsungana la wɔ. Esato wɛnyawɔ anto wele l’Ɛtɛrnɛtɛ wambokokanɛ l’andja w’otondo ndo naka sho kema la yewo, kete sho koka ntala esadi eto lo djonga shɔ.

Ayonga dikambo dia lomba naka sho ndjambola ɔnɛ: ‘Onde dimi layoshɛ kɛnɛ kendami l’Ɛtɛrnɛtɛ esadi esadi naka olonganyi ami, ambutshi ami kana ɔnalengo l’Okristo ekɔ lo ndjɔtɔ lo luudu lami?’ Naka okadimwelo wekɔ eelo, ayoleka ɔlɔlɔ sho kambaka l’Ɛtɛrnɛtɛ paka etena kele anto akina laawɔ. Lo mɛtɛ, Ɛtɛrnɛtɛ ambotshikitanya woho wasawolaso l’anto ndo woho wasombaso diangɔ. Lâdiko dia lâsɔ, Ɛtɛrnɛtɛ aya la yoho y’oyoyo yakonya anto dia ‘nsala monanyi l’etema awɔ.’—Mat. 5:27, 28.

Mesajɛ wakokaso tomɛ anto l’Ɛtɛrnɛtɛ

Etena kakamba anto l’Ɛtɛrnɛtɛ, vɔ nongolaka ndo tomanɛka mesajɛ. Kânga mbeso la lotshungɔ la nongola kana tomɛ anto nsango, tatohɛke dia tekɔ nto l’ɔkɛndɛ wa ndjashikikɛ dia nsango yakɔ yekɔ mɛtɛ ndo mbetawɔmaka. Onde tekɔ l’akoka wa nembetshiya dia kana kɛnɛ kafundaso kana katomɛso anto akina kekɔ mɛtɛ? Onde tekɔ la lotshungɔ la mbewoya anto akina akambo amɔtshi l’Ɛtɛrnɛtɛ? * Onde akambo akɔ mbetawɔmaka ndo wayokeketsha anto akina? Kakɔna katotshutshuya dia mbewoya anto akina akambo akɔ? Onde sho nangaka nsala ngasɔ paka dia mambiya anto akina?

Naka sho nkamba la otomelo wa mesajɛ dimɛna, kete ayonga tshondo y’ɔtshɔkɔ. Ɛtɛrnɛtɛ kokaka tosha nsango efula. Onde sho tomɛka anto akina lokema la mesajɛ wendana la nsango y’eyoyo yatama lo tita nsango kana akambo amɔtshi weyaso paka dia mbaɔsɛ wenya awɔ wɔsɔsɛ? Shi sho pombaka nsɛdingola eyango wele la so la ntondo ka tomɛ anto akina mesajɛ? Kakɔna kalangaso mɛtɛ nsala? Anto wekɔ la mbekelo ka mfunda mikanda dia mbutɛ ase nkumbo ndo angɛnyi awɔ akambo weyawɔ ndo dia mbaewoya woho wewɔ. Shi ɔsɔ mbahomba monga oyango aso etena kafundaso mesajɛ? Lande na kahombaso tomɛ anto akina nsango yeso kema l’eshikikelo?

Kakɔna kahombaso nsala lo kɛnɛ kendana l’Ɛtɛrnɛtɛ? Tewɔ diaha monga mfumbe k’Ɛtɛrnɛtɛ. Dikambo sɔ mbeyaka ndjala ohomba tena dimɔtshi. Ɔnangɛso laki mfumbe k’Ɛtɛrnɛtɛ lakatatɛkɛtshi dikambo diande akasale dui sɔ dia nde ntshika monga mfumbe k’Ɛtɛrnɛtɛ. Lo wedi okina, nkamba l’Ɛtɛrnɛtɛ kokaka tokondjɛ wahɔ naka sho mbetawɔ dia ‘dikoka diaso di’ekanelo ka yimba tokokɛ ndo dia shɛnɔdi tolama.’—Tuk. 2:10, 11.

[Nɔte ka l’ɛse ka dikatshi]

[Osato wa lo lɛkɛ 4]

Ngande wakokaso mbewɔ kesama la nsango ya kashi?

[Osato wa lo lɛkɛ 5]

Kakɔna kahombayɛ nsala la ntondo ka tomɛ anto akina mesajɛ?