Ambola w’oma le ambadi

Kakɔna kahombami nsala naka lekɔ la dimbola lo dui dimɔtshi diakamadia lo Bible kana etena kemi l’ohomba wa dako lo kɛnɛ kendana l’okakatanu ami hita?

Tukedi 2:1-5 nɔmbaka ɔmɔmɔ la l’atei aso dia ‘ntetemala nyanga’ yimba ndo shɛnɔdi oko “eumbelu kushami.” Kɛsɔ nɔmbaka dia sho mbidja welo dia ntana ekadimwelo wa ambola wa lo Bible ndo nkandola ekakatanu aso hita. Ngande wakokaso nsala dui sɔ?

Dibuku Kondja Wahɔ oma lo Kalasa k’Olimu wa Teokrasi, lɛkɛ 33 polo 38 mɛnyaka “Woho wa sala eyangelo” l’ekimanyielo ka dihomɔ diambotondja ‘ɔhɔmbɔ wa kɔlamelo ndo wa kɛsɔ.’ (Mat. 24:45) Lɛkɛ 36 nembetshiyaka woho wa nkamba la Index des publications Watch Tower. Dibuku sɔ diekɔ l’ɛndɛksɛ w’ɛtɛ w’awui ndo l’ɛndɛksɛ w’avɛsa. Dui sɔ kimanyiyaka onto dia nyanga tɔtɛkɛta t’ohomba kana avɛsa wa lo Bible esadi esadi. Wɛ ayotana listɛ la rɛferansɛ wa mbadia. Onga la solo dia lotutsha etena kayangayɛ okadimwelo kana dako dieyɛ l’ohomba. Ohɔ dia wɛ ekɔ lo nyanga “eumbelu kushami” kakoka kɔsɛ wenya efula ndo kɔlɔmba dia mbidja welo.

Lo mɛtɛ, ekɔ awui amɔtshi ndo avɛsa amɔtshi wahatalembetshiyamaka l’ekanda aso. Mbeyaka monga ko kânga mbakatalembetshiya divɛsa dimɔtshi dia lo Bible ko tatakadimola dimbola diakoyɛ lo yimba. Ndo nto, anto ndjaokaka ambola lo kɛnɛ kendana l’ɛkɔndɔ ɛmɔtshi wa lo Bible dikambo Bible hate awui tshɛ wendana l’ɔkɔndɔ akɔ. Ɔnkɔnɛ, hatototana ekadimwelo walangaso l’oseka dimbola tshɛ diayaokaso. Lâsɔ, bu dimɛna ndjaoka ambola wahakoke kadimwama diaha sho ndjodjana tâmu ‘tayototshutshuya dia nsala eyangelo lo dihole dia sho ndjasha lo dui dimɔtshi diakoka mbodia mbetawɔ kaso.’ (1 Tim. 1:4; 2 Tim. 2:23; Tito 3:9) Bɛtɛlɛ ka lo wodja aso kana ka l’États-Unis bu l’akoka wa nsɛdingola kana nkadimola ambola wa ngasɔ tshɛ wahatakadimɔmaka l’ekanda aso. Tonge l’ɔngɛnɔngɛnɔ lo woho watosha Bible alako weso l’ohomba dia tɔlɔmbɔla l’andja w’oyoyo, koko tatonyangake l’ɔtɛ wahakɔndɔla Bible awui amɔtshi weso l’ohomba. Dui sɔ tɔlɔmbaka dia monga la mbetawɔ ka wolo le Nzambi lele Kiɔkɔ ya tɔ.—Enda dibuku Yasukanya la Jehowa, lɛkɛ 185 polo 187.

Kakɔna kayoyosala naka wɛ ambosala eyangelo wendana la dui dimɔtshi diakokiyanya, koko okadimwelo hawotanema tsho? Tengengake dia mumbola Okristo ɔmɔtshi wambotshunda kanyi, ɛnyɛlɔ ekumanyi kɛmɔtshi ka l’etshumanelo kanyu. Vɔ wekɔ l’ewo k’efula ka Bible ndo mbeyaka atɔndɔ efula wendana la lɔsɛnɔ l’Okristo. Alako awɔ wele la wɛdimo wayokokimanyiya djekoleko naka wɛ ekɔ l’okakatanu kana ekɔ lo nanga mbɔsa yɛdikɔ mɔtshi nɛ dia vɔ keyaka ndo mbeyaka ekakatanu wele la yɛ. L’ekomelo, tohɛke dia mbutɛ Jehowa ekiyanu ayɛ lo dɔmbɛlɔ ndo mbɔlɔmba dia nde kɔlɔmbɔla l’ekimanyielo ka nyuma kande k’ekila ‘nɛ dia Jehowa mbishanaka lomba ndo shɛnɔdi.’—Tuk. 2:6; Luka 11:13.