Tosambake “antu tshe walela”
Tosambake “antu tshe walela”
“[Jehowa] akankiti iso dia dimi . . . nsamba antu tshe walela.”—IS. 61:1, 2.
1. Kakɔna kakasalɛ Yeso wanɛ wakalelaka, ndo lande na?
YESO KRISTO akate ate: “Ma diami, dieli ntsha lulangu la one lakantumi, la dia nshidiya ulimu andi.” (Joa. 4:34) Lo nkotsha ɔkɛndɛ wakawosha Nzambi ɔsɔ, Yeso akakɛnɛmɔla waonga w’amɛna waki She wele oko ngandji k’efula koka Jehowa ekambi ande. (1 Joa. 4:7-10) Ɔpɔstɔlɔ Paulo akatɛkɛta dia yoho mɔtshi yɛnama ngandji kɛsɔ etena kakandate dia Jehowa ekɔ ‘Nzambi k’esambelo tshɛ.’ (2 Kor. 1:3) Yeso akɛnya woho wa ngandji kɛsɔ etena kakandakotsha awui wakatama lo prɔfɛsiya k’Isaya. (Adia Isaya 61:1, 2.) Yeso akadia prɔfɛsiya kɛsɔ lo shinangɔnga ka la Nazarɛta ndo nde akɛnya di’ɛtɛkɛta wa lɔkɔ mendanaka la nde. (Luka 4:16-21) L’edja tshɛ k’olimu ande w’esambishelo, Yeso akasambaka anto walela la ngandji tshɛ. Dui sɔ diakawakeketshaka ndo diakawashaka ki ka lo yimba.
2, 3. Lande na kele ambeki wa Yeso pombaka mbôkoya lo nsamba anto akina?
2 Ambeki wa Yeso pombaka mbôkoya lo nsamba wanɛ walela. (1 Kor. 11:1) Paulo akate ate: “Ny[osambane], ndu nyudianya.” (1 Tes. 5:11) Nshi nyɛ mbahombaso ndeka nsamba anto akina nɛ dia anto tshɛ wekɔ lo nsɛna lo “tena dia wulu.” (2 Tim. 3:1) Anto amɔtshi wekɔ lo tondjɛ akanga w’etema w’ɛlɔlɔ wa l’andja w’otondo ɛtɛkɛta wawasha otshutshumalo, ɔkɛyi ndo lonyangu.
3 Bible akatatshi dia lo nshi y’ekomelo ka dikongɛ di’akambo nɛ dia kɔlɔ, anto efula “wayuyalanga, wayulanga ukundji, wayosema, wayutakula, wayotengana, wayutuna aui w’ambutshi, hawukana lusaka, waha ololo. Vo wayuyala waha la ngandji ka mete, akanga w’ududu, amamanyishi, wahayakimela, akanga w’usihi, atunyi w’akambu w’ololo. Vo wayuyala afungi, akanga a puki, akanga a ndjambiya, anangi wa engenongeno, wuleki wa [Nzambi].” Koko vɔ wambolekanya ndo lâsɔ nɛ dia ‘anto wa kɔlɔ wambohama otsha lo kɔlɔ koleki.’—2 Tim. 3:2-4, 13.
4. Ngande waya andja lo nshi yaso nyɛ?
4 Akambo asɔ tshɛ hawokoke tâmbiya nɛ dia Ɔtɛkɛta wa Nzambi mɛnyaka hwe dia ‘andja w’otondo wekɔ lo nɔmbwama oma le kanga kɔlɔ.’ (1 Joa. 5:19) ‘Andja w’otondo’ mendanaka la tshunda di’ase pɔlitikɛ, ɛtɛmwɛlɔ ndo amundji w’ekanda kâmɛ la dihomɔ diakimanyiya dia nsala pɔlɔpangandɛ. Aha la tâmu, Satana Diabolo kokaka mbelamɛ ɔnɛ ‘ɔnɔmbɔdi w’andja ɔnɛ’ ndo ‘nzambi ka dikongɛ nɛ di’akambo.’ (Joa. 14:30; 2 Kor. 4:4) Andja wekɔ lo taleke ndana nɛ dia Satana ekɔ la nkɛlɛ k’efula ndo nde mbeyaka dia ambôtshikalɛ paka etena ka mondo dia Jehowa mbodiaka. (Eny. 12:12) Ande esambelo kakondjaso lo mbeya dia kem’edja Nzambi ayanga ndanya Satana la dikongɛ diande di’akambo ndo dimbola diakoke Satana diayanga kadimɔma lee!—Etat., tshap. 3; Jobo, tshap. 2.
Lokumu l’ɔlɔlɔ lasambishama lo nkɛtɛ k’otondo
5. Ngande wakotshama prɔfɛsiya kendana l’olimu w’esambishelo lo nshi y’ekomelo nyɛ?
5 Kɛnɛ kakatatshi Yeso kekɔ lo kotshama lo nshi ya pâ yasɛnaso nyɛ. Nde akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mat. 24:14) Esambishelo ka lokumu l’ɔlɔlɔ la Diolelo diaki Nzambi kɛsɔ kekɔ lo salema woho wahatasalemaka ndoko lushi. Ɛlɔ kɛnɛ, olekanyi Ɛmɛnyi wa Jehowa 7 500 000 wokahanyemi lo tshumanelo dia l’andja w’otondo ndekana 107 000 wekɔ lo nsambisha Diolelo diaki Nzambi l’ɛnyɛlɔ ka Yeso lakadietɛ ɔtɛ a dui w’esambishelo ndo wa wetshelo ande. (Mat. 4:17) Etombelo wele l’esambishelo kɛsɔ ele, wanɛ walela wekɔ lo sambema efula. Ngasɔ mbediɔ nɛ dia l’ɛnɔnyi weke kambeta, anto 570 601 wakabatizama dia nkoma Ɛmɛnyi wa Jehowa.
6. Atokimanyiya dia nkamba olimu w’esambishelo lo yɛdikɔ y’efula?
6 Dia mɛnya ɔnɛ olimu w’esambishelo wambokambema lo yɛdikɔ yahawatakambemaka, Ɛmɛnyi wa Jehowa wôkadimola ekanda walembetshiya Bible l’ɛtɛkɛta ndekana 500. Dui dia ngasɔ diatasalemaka l’ɔkɔndɔ w’ana w’anto. Olimu ndo ohamelo w’etenyi ka la nkɛtɛ k’okongamelo waki Jehowa ekɔ dui dia diambo mɛtɛ. Otondonga aha nyuma k’ekila kaki Nzambi mbatɔlɔmbɔla ndo mbatokimanyiya, tshike dui dia ngasɔ totodiosalema l’andja ɔnɛ walɔmbwama oma le Satana. Lam’ele lokumu l’ɔlɔlɔ lekɔ lo sambishama lo nkɛtɛ k’otondo, asekaso ambetawudi ndo wanɛ walela wetawɔ losango la Diolelo wekɔ lo nkondja esambelo k’oma l’Afundelo.
Tosambake asekaso ambetawudi
7. a) Lande na kahatahombe nongamɛ dia Jehowa tonyɛ asui tshɛ l’etena kɛnɛ? b) Ngande weyaso dia sho kokaka mbikikɛ ɛhɛnyɔhɛnyɔ ndo asui?
7 L’andja ɔnɛ wambolola l’awui wa kɔlɔ ndo asui, ekɔ mɛtɛ dia sho kokaka mpomana l’awui amɔtshi watosha ɔkɛyi. Hatokoke nongamɛ dia Nzambi tonyɛ awui tshɛ watoshishɛ ɔngɛnɔngɛnɔ wele la so ndo watosha ɔkɛyi la ntondo ka nde ndanya dikongɛ nɛ di’akambo. L’etena kɛnɛ, olowanyi aso otsha le Jehowa mbɔtɔka lo wâle etena kahomanaso l’ɛhɛnyɔhɛnyɔ wakatatami nɛ dia sho sukɛka lowandji lande. (2 Tim. 3:12) Koko lam’ele Shɛso lele l’olongo tosambaka, sho kokaka monga oko Akristo w’akitami wa la Tɛsalɔnika k’edjedja wakakikɛ ɛhɛnyɔhɛnyɔ ndo asui la mbetawɔ.—Adia 2 Tesalonika 1:3-5.
8. Ngande wɛnya Afundelo dia Jehowa sambaka ekambi ande?
8 Aha la tâmu, Jehowa ekɔ lo nsamba ekambi ande. Ɛnyɛlɔ, etena kakânɛ nkumekanga ka womoto ka kɔlɔ Jezabɛlɛ ɔprɔfɛta Elidja dia mbodiaka, nde akashisha dihonga, akalawɔ ndo akakome polo lo nkombola nyɔi. Koko lo dihole dia nde pangwɛ Elidja, Jehowa akôsambe ndo akôkeketsha dia nde ntetemala l’olimu ande w’ɔprɔfɛta. (1 Khum. 19:1-21) Woho wasamba Jehowa ekambi ande kokaka nto mɛnama oma l’akambo wakakomɛ Akristo wa l’etshumanelo ka lo ntambe ka ntondo. Ɛnyɛlɔ, Bible mbutaka dia ‘etshumanelo ka Judeya y’otondo ndo ka la Ngalileya ndo ka la Samariya kakonge l’etena ka wɔladi ndo kakakeketshama.’ Ndo nto, ‘lam’ele tɔ kakakɛndakɛndaka lo wɔma wa Jehowa ndo l’esambelo ka nyuma k’ekila, tɔ kakatetemala mpama.’ (Etsha 9:31) Ande lowando lele la so dia sho lawɔ ‘sambema oma le nyuma k’ekila’ lee!
9. Lande na kasambemaso etena kekaso akambo wendana la Yeso?
9 Oko weso Akristo, sho sambemaka etena kekaso akambo wendana la Yeso Kristo ndo kayelaso ɛnyɛlɔ kande. Yeso akate ate: “Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya. Nyembe lokoho lami, nyeki akambu uma le mi. Ne dia dimi la memakana la ndjakitshakitsha l’utema, ku nyu nyayutana mumuya l’etema anyu. Ne dia lokoho lami leko ololo, la ushiko ami weko usadi.” (Mat. 11:28-30) Mbeka woho wakɔsaka Yeso anto la nɛmɔ ndo mbokoya ɛnyɛlɔ kande ka dimɛna ayotokimanyiya dia minya ɔkɛyi wakoka monga la so.
10, 11. Waa na wakoka nsamba anto akina l’etshumanelo?
10 Sho kokaka sambema nto oma le asekaso Akristo. Ɛnyɛlɔ, tɔsɛdingole woho wakimanyiya dikumanyi dia lo tshumanelo wanɛ wadiɛnɛ l’ɔkɛyi. Ombeki Jakɔba akafunde ate: “Untu eko la hemo [ka lo nyuma] l’atei anyu? Ndi eti dikumanyi dia ekelizia, vo wôlombele.” Etombelo akɔna wayonga la dui sɔ na? “Dombelo dia mbetawo diayushimbela kanga hemo, ku Khumadiondjo ayuwulula. Naka ndi akatshi kolo, kolo yandi yayudimanyema.” (Jak. 5:14, 15) Ase etshumanelo akina kokaka tosamba vɔ lawɔ.
11 Mbala efula, wamato sawolaka l’asekawɔ aha l’okakatanu. Djekoleko akadiyɛso w’epalanga wele la diewo di’efula mbishaka akadiyɛso w’esekaseka alako w’amɛna efula. Mbeyaka monga ko Akristo w’epalanga wambotshunda lo nyuma asɔ wambohomanaka l’akambo wa woho akɔ wâmɛ. Kɛtshi kele la wɔ ndo waonga akina kokaka monga tshondo y’ekimanyielo. (Adia Tito 2:3-5.) Lo mɛtɛ, dikumanyi ndo anto akina wa l’etshumanelo kokaka ndo pombaka nsamba “akanga w’etema a weodu.” (1 Tes. 5:14, 15) Ayonga dui dia dimɛna dia sho mbohɔ ɔnɛ Nzambi “tosambaka lo asui tshɛ dia sho monga l’akoka wa nsamba wanɛ wele l’asui.”—2 Kor. 1:4, NW.
12. Lande na kele ekɔ ohomba sho mbɔtɔka lo nsanganya y’Akristo?
12 Yoho ya dimɛna yakokaso sambema ele mbɔtɔka lo nsanganya y’Akristo lɛnɛ atotokeketshamaka l’awui w’oma lo Bible. Bible tɛnyaka dia Judasɛ nde la Silasi “wakalaki anyawo aui efula, wakâkikitsha.” (Etsha 15:32) La ntondo ndo l’ɔkɔngɔ wa nsanganya, sho kokaka nsawola l’asekaso ambetawudi asawo wakeketsha. Ɔnkɔnɛ, oyadi kânga tekɔ lo nsowa l’awui amɔtshi watokiyanya, tatokakitɔnake l’anto akina nɛ dia ntsha dui sɔ hokandola ekakatanu ɛsɔ. (Tuk. 18:1) Lo dihole dia nsala ngasɔ, tokambe la dako diaki ɔpɔstɔlɔ Paulo diata ɔnɛ: “Tukananeli untu l’untu dia ntomboshanya lu ngandji la lu elimu w’ololo. Tatukimoki nsangana kame, uku eli etshelu k’amotshi, keli tukikitshanyaki. Tuleki ntsha okone, ne dia nyambena nyati: Lushi lako laya suki.”—Heb. 10:24, 25.
Esambelo k’oma l’Ɔtɛkɛta waki Nzambi
13, 14. Ɛnya woho wakoka Afundelo tosamba.
13 Oyadi tekɔ Okristo wambobatizama kana onto leke kaditatɛka mbeka akambo wendana la Nzambi ndo asangwelo ande, Ɔtɛkɛta waki Nzambi kokaka tosamba lo yɛdikɔ y’efula. Paulo akafunde ate: “Akambu tshe wakawafundi ntundu wakafundama dia ntulakanya dia shu ndjala la elungamelu uma lu etetemalu la uma lu ekikitshelu ka lu afundelu.” (Romo 15:4) Afundelo w’Ekila kokaka tosamba ndo ‘tosha akoka tshɛ dia sho monga la kɛnɛ tshɛ kahombama dia nsala elimu tshɛ w’ɛlɔlɔ.’ (2 Tim. 3:16, 17) Mbeya akambo wa mɛtɛ wendana l’asangwelo waki Nzambi ndo monga l’elongamelo ka lo nshi yayaye kokaka mɛtɛ tosamba lo yɛdikɔ y’efula. Ɔnkɔnɛ, nyɛsɔ tokambake l’Ɔtɛkɛta waki Nzambi ndo ekanda w’Akristo nɛ dia dui sɔ diayotosamba ndo diayotokondjɛ wahɔ lo toho efula.
14 Yeso akatotshikɛ ɛnyɛlɔ k’ɔlɔlɔ lo nkamba l’Afundelo dia mbetsha ndo nsamba anto akina. Ɛnyɛlɔ, l’ɔkɔngɔ wa eolwelo kande, lo diaaso dimɔtshi nde ‘akalembetshiya ambeki ande ahende Afundelo dimɛna dimɛna.’ Etena kakandasawolaka la wɔ, etema awɔ wakanandema efula. (Luka 24:32) L’ɛnyɛlɔ kaki Yeso, ɔpɔstɔlɔ Paulo ‘akakanaka l’anto yimba oma l’Afundelo.’ Etena kakinde la Bɛrɔya, ampokami ande “waketawo dui l’uhetu: wakayangiayangia la lushi la lushi lu afundelu.” (Etsha 17:2, 10, 11) Shi ekɔ dikambo dia dimɛna dia sho mbadiaka Bible lushi la lushi ndo nkondja wahɔ oma lɔkɔ ndo oma l’ekanda w’Akristo watosamba la watosha elongamelo lo nshi y’ofukutanu nyɛ?
Toho tokina takokaso nsamba anto akina
15, 16. Naa akambo amɔtshi wakokaso nsala dia nkimanyiya ndo nsamba asekaso Akristo?
15 Sho kokaka nkimanyiya ndo nsamba asekaso Akristo lo toho efula totshikitanyi. Ɛnyɛlɔ, sho kokaka tosombɛ epalanga wa l’etshumanelo kana asekaso ambetawudi wele la hemɔ diangɔ diele la wɔ ohomba. Sho kokaka salɛ anto akina ntumu dia mɛnya dia sho ndjashaka le wɔ. (Fil. 2:4) Mbala mɔtshi, sho kokaka mandola asekaso ambetawudi l’ɔtɛ wa waonga awɔ w’amɛna wele oko ngandji, lokaho, dihonga ndo mbetawɔ.
16 Dia nsamba epalanga, sho kokaka towaenda ndo mbahokamɛ la yambalo tshɛ etena katotɛwɔ awui wakahomana la wɔ ndo ɛtshɔkɔ wakawakondja l’olimu wa Jehowa. Shi dui sɔ kokaka tokeketsha ndo tosamba? Sho kokaka tadia la wɔ Bible kana ekanda w’Akristo etena katshɔso towaenda. Mbala mɔtshi, sho kokaka nsɛdingola la wɔ sawo diayekama lo Wekelo wa Tshoto y’Etangelo wa lomingu lakɔ kana awui wayekama lo Wekelo wa Bible wa l’etshumanelo wa lomingu lakɔ. Sho kokaka menda kâmɛ la wɔ DVD dimɔtshi diakatondjama oma le ɔhɔmbɔ wa kɔlamelo ndo wa kɛsɔ. Oma lâsɔ, sho kokaka nto mbadia kana nkɔndɔla awui amɔtshi wakeketsha watanema l’ekanda w’Akristo.
17, 18. Oko weso ekambi wa kɔlamelo waki Jehowa, lande na kakokaso monga l’eshikikelo dia nde ayotosukɛ ndo ayotosamba?
17 Naka tambɛna di’osekaso Okristo ekɔ l’ohomba w’esambelo, sho kokaka mbodja l’alɔmbɛlɔ aso. (Romo 15:30; Kol. 4:12) Etena kadiɛnɛso l’ekakatanu wa lo lɔsɛnɔ ndo kadjaso welo l’etete dia nsamba anto akina, sho kokaka monga la mbetawɔ ndo l’eshikikelo kaki l’omembi w’esambu lakembe ɔnɛ: “Ukitsha wutshu aye le [Jehowa], ku ndi ayukembelawo. Ndi hetawo untu ololo nsutshasutshama.” (Osam. 55:22) Lo mɛtɛ, Jehowa ayotosambaka tena tshɛ ndo nde ayosukɛka ekambi ande wa kɔlamelo.
18 Nzambi akatɛ atɛmɔdi ande wa lo nshi y’edjedja ate: ‘Dimi dimɛ katonyosambaka.’ (Is. 51:12) Jehowa ayotosalɛ woho akɔ wâmɛ ndo ayotɔtshɔkɔla l’ɔlɔlɔ wasalɛso anto akina ndo l’ɛtɛkɛta w’amɛna wawatɛso dia mbakeketsha. Oyadi tekɔ l’elongamelo ka ntshɔ l’olongo kana ka nsɛna la nkɛtɛ, ɔmɔmɔ la l’atei aso kokaka sambema l’ɛtɛkɛta wa Paulo wakandafundɛ Akristo w’akitami ɛnɛ: “Khumesu Jesu Kristu ndame, la [Nzambi] Shesu, lakatulangi ndu lakatusha ekikitshelu ka pundju la elungamelu k’ololo uma lu ngandji ka mamba, akikitsha etema anyu, ndu anyushikike lu elimu w’ololo tshe la lu aui!”—2 Tes. 2:16, 17.
Onde wɛ âkohɔ?
• Polo lo yɛdikɔ yakɔna yakambema olimu aso wa nsamba wanɛ walela?
• Naa awui amɔtshi wakokaso nsala dia nsamba anto akina?
• Ngande wɛnya Afundelo dia Jehowa sambaka ekambi ande?
[Ambola wa wekelo]
[Osato wa lo lɛkɛ 28]
Onde wɛ sambaka wanɛ walela?
[Osato wa lo lɛkɛ 30]
Akɛnda kana epalanga kokaka keketshana
