Ambola w’oma le ambadi

Onde sho kokaka mbuta wonya shikaa wakawahanɛ Yeso Kristo l’otamba?

Dimbola sɔ diambombɔma nɛ dia mɛnamaka di’ɛkɔndɔ wakasambiyama watɛkɛta dia nyɔi ka Yeso wakafunde Mako nde l’ɔpɔstɔlɔ Joani ntshikitana. Mako akafunde ate: “Lam’akakumi unya l’eshidi divwa la pindju, vo wakûhane l’utamba [w’asui].” (Mako 15:25) Joani lo wedi ande akafunde ate: “Unya aki l’atei w’ote” mbakakimɔ Pilato Yeso le ase Juda dia vɔ mbohanɛ l’otamba. (Joa. 19:14-16) Waa nomb’ewo y’awui wa lo Bible mbishaka elembetshiyelo wotshikitanyi l’oyango wa mɛnya di’abuku asɔ ahende mbɔtɔnɛka. Bible haleke ntɛkɛta awui efula wɛnya otshikitanu wele lam’asa ɛkɔndɔ ehende ɛsɔ. Koko, naka sho nsɛdingola woho wakâdiaka anto wenya lo nshi shɔ, kete tayoshihodia ɛkɔndɔ ehende ɛsɔ dimɛna.

Lo ntambe ka ntondo, anto komonga la tango ndo wakashikikɛka wenya lo ndjela woho wakayatombaka wonya. Koko, ehotwelo ndo edjelo ka wonya akatshikitanaka ɔnɔnyi l’ɔnɔnyi. Diakɔ diele, wenya wa nshi shɔ aki wenya wa lɔfɔnya. Afundelo w’Akristo wa lo Grɛkɛ tɛkɛtaka mbala efula dia awui waketaka l’eshidi divwa wa pindju, l’eshidi dikumi l’ehende ndo l’eshidi esato l’ɔkɔngɔ a midi, mbuta ate oya lo wenya ɛsɔ.—Mat. 20:3, 5; Etsha 10:3, 9, 30.

Ɛkɔndɔ wa l’Evanjiliɔ nɔngaka akambo wakasalema l’ekomelo ka lɔsɛnɔ laki Yeso la nkɛtɛ woho akɔ wâmɛ. Evanjiliɔ akɔ ɛnɛi mɛnyaka di’ɛlɔmbɛdi ndo dikumanyi wakahomana kâmɛ ndo wakatɔlɛ Yeso la ntondo ka Pɔnsɔ Pilato nguvɛrnɛrɛ k’ose Rɔma. (Mat. 27:1; Mako 15:1; Luka 22:66; Joa. 18:28) Mateo, Mako ndo Luka wakɛnya dia oma lo wonya wa samalo etena kaki Yeso l’otamba, wodjima wakayala lo nkɛtɛ k’otondo polo ndo lo “eshidi esatu.”—Mat. 27:45, 46; Mako 15:33, 34; Luka 23:44.

Dui dimɔtshi diakoka monga la shɛngiya lo woho wakadiemaka wenya etena kakahanema Yeso l’otamba w’asui diɔ nɛ: Wakɔsaka dia nkɔmɔla anto eshingɔ aki l’atei w’akambo wakawahombaka salɛ wanɛ wakawahanɛka l’etamba w’asui. Mbala efula, dikɔmɔki sɔ diaki wolo efula ndo diakakonyaka anto wakakɔmamaka polo lo nyɔi. Ondo Yeso akakɔmama efula, diakɔ diakandetawɔ dia pami kekina mbɛmbɛ otamba ande w’asui l’ɔkɔngɔ wa nde mbɛmba lo tshanda mɔtshi. (Luka 23:26; Joa. 19:17) Naka mɛtɛ mbakawakɔmɔlaka anto la ntondo ka vɔ ndjâhanɛ l’etamba, kete wenya ɛmɔtshi wakahombe mbeta la ntondo ka vɔ ndjohanɛ Yeso l’otamba. Anto wotshikitanyi kokaka mbisha wenya wotshikitanyi wakawahanɛka anto l’etamba lo ndjela kɛnɛ kakawasalaka l’etena kɛsɔ.

Ɔpɔstɔlɔ Joani akayofunda Evanjiliɔ ande ɛnɔnyi akumi l’ɔkɔngɔ w’Evanjiliɔ esato wa ntondo. Ɔnkɔnɛ, nde akakoke mbeya awui kambe wendana l’Evanjiliɔ ekina esato wakafundama ntondo. Lo mɛtɛ, mɛnamaka dia Joani akatɛkɛta dia wenya wotshikitanyi la wɛnɛ wakatɛkɛta Mako. Koko, dui sɔ toshikikɛka dia Joani kosangola tsho kɛnɛ kakafunde Mako l’Evanjiliɔ ande. Joani nde la Mako wakasambiyama oma le Nzambi dia mfunda Evanjiliɔ. Kânga mbele Afundelo hawotosha elembetshiyelo efula wendana l’otshikitanu ɔsɔ, sho koka ndjaɛkɛ l’ɛkɔndɔ wa l’Evanjiliɔ.