“Lekɔ l’ɛkɔmɔ l’etena kɛnɛ, koko aha pondjo pondjo”

Kɔndwama oma le Sara van der Monde

Anto mbutɛkami mbala la mbala ɔnɛ: “Sara, wɛ mɔnamɔnaka wonya tshɛ. Lande na keyɛ l’ɔngɛnɔngɛnɔ nshi tshɛ nganɛ?” Dimi mbatɛka ɔnɛ lekɔ l’elongamelo ka lânde. Elongamelo kakɔ ko: “Lekɔ l’ɛkɔmɔ l’etena kɛnɛ, koko aha pondjo pondjo.”

LAKÔTƆ lo 1974 lo wodja wa France la Paris. Aki tshondo y’okakatanu dia dimi mbotɔ ndo l’ɔkɔngɔ diko wakayosholaka dia lakôtɔ la hemɔ kɛmɔtshi ka lo wɔɔngɔ. Takimi l’akoka wa nsutshasutsha anya ndo ekolo ami lo yoho ya dimɛna ndo dimi kɔtɛkɛtaka lo yoho yakoka anto mboka dimɛna. Ndo nto, lakayonga la hemɔ k’ekunya ndo laki kanga tohemɔhemɔ.

Etena kakamakotsha ɛnɔnyi ehende, takonɔ la Melbourne lo wodja w’Australie. L’ɔkɔngɔ w’ɛnɔnyi ehende, papa akatolawɔ dimi la mama. Ɔsɔ mbaki mbala kami ka ntondo ka ndjaoka suke la Nzambi. Mama laki Ɔmɛnyi wa Jehowa akatshɔka la mi lo nsanganya y’Akristo lɛnɛ akamateya dia ekɔ Nzambi kɛmɔtshi kamboka ngandji ndo kakokɛ. Ewo kɛsɔ kâmɛ la ngandji kakambokaka mama akakimanyiya dia monga la wɔladi kânga mbele lɔsɛnɔ laso lakatshikitana.

Ndo nto, mama akambetsha woho wa nɔmba Jehowa. Kakianɛ, dɔmbɛlɔ aya wɔdu le mi oleki ntɛkɛta. Etena kalɔmbami, dimi bu l’ohomba wa ntondja ɛtɛkɛta, koko dimi mbaeyaka lo yimba. Ndo nto, kânga mbahoke anto kɛnɛ katami dimɛna, lekɔ l’eshikikelo ɔnɛ Jehowa mbokaka kɛnɛ tshɛ kawotɛmi oyadi kânga dimi kita lo yimba kana ntɛkɛta la dikokoma.—Osam. 65:2.

Lɔsɛnɔ lele l’ekakatanu

Etena kakamakotsha ɛnɔnyi etanu, hemɔ kami ka lo wɔɔngɔ kakaleke pekami polo lo yɛdikɔ yele dia nkɛndakɛnda laki l’ohomba w’esongo. Lakatshingatshingaka efula lam’akamatakɛndakɛndaka. Etena kakamakotsha ɛnɔnyi 11, takimi nto l’akoka wa nkɛndakɛnda. L’ɔkɔngɔ diko, takimi nto l’akoka wa mbudɛ kana mpolɔ oma lo mbeto aha l’ekimanyielo ka woho ɔmɔtshi wa mashinyi wakakɛndakɛndaka la kura wakambidiyaka ko kitshami lo kɔsa k’etshimbi kakɛndakɛnda lo wolo wa mɔtɛrɛ kakɛndjakɛndjami l’ekimanyielo ka lowolo lɔmɔtshi l’otale.

Lo tena dimɔtshi, hemɔ kɛsɔ mbishakami lonyangu efula. Koko dimi mbohɔka kɛnɛ katotaka ase nkumbo kami ɔnɛ: “Toyakiyanyake dia kɛnɛ kahayakoke nsala. Kosalake paka kɛnɛ keyɛ l’akoka wa nsala.” Ɛtɛkɛta ɛsɔ wakakimanyiya dia mbahema ponda, nkɛndjakɛndja mashuwa, waato, tɔkɔkɔla demba lo mvudu y’apɛma ndo nkɛndjakɛndja vɔatirɛ lo mboka kahaleke mituka mbeteta. Dimi mɛnyaka diewo diami di’osangi lo nsanga asango la mukubu, lo ntɛla ahɔndɔ, lo nsala waa adala, lo mbidja asango l’ehembo w’ahɔndɔ walawɔ la mɛsa ndo lo nkenga mpoke y’awomba.

 L’ɔtɛ wa hemɔ kami, anto amɔtshi ndjambolaka dia kana lekɔ l’akoka wa kambɛ Nzambi oko etongami kele la yimba. Etena kakamakotsha ɛnɔnyi 18, ombetsha ami ɔmɔtshi akakeketsha dia dimi mumɔ oma la ngelo dia ntshika ɔtɛmwɛlɔ waki mama. Nde akandake dia mbishami dihole dia mbidjasɛ. Koko lakawotɛ nte, hasɛkaki mbetawɔ kami pondjo ndo layomɔ oma la ngelo paka etena kayomonga l’akoka wa ndjakotshɛ ehomba ami.

Kombeta edja l’ɔkɔngɔ wa dui sɔ, lakabatizama oko Ɔmɛnyi wa Jehowa. L’ɔkɔngɔ w’ɛnɔnyi ehende, lakonɔ otsha lo yidudu ya tshitshɛ lɛnɛ akondjami anto wasukɛ ndo emi l’akoka wa ndjakotshɛ ehomba ami ɛmɔtshi.

Dui diakimi konongamɛka

L’edja k’ɛnɔnyi efula, lakahomana l’akambo akina wakadje mbetawɔ kami l’ohemba. Lushi lɔmɔtshi, osekami lakɔtɔka la mi kalasa laki nde lawɔ l’ɛkɔmɔ akambutɛ dia dimi tshukana la nde. Mbala ka ntondo kakandambutɛ, lakalange mbetawɔ. Oko esekaseka efula, dimi lawɔ kombolaka dia monga l’olonganyi. Koko tshukana l’onto lele l’ɛkɔmɔ kele oko kayɛ hɛnya dia nyayonga l’ɔngɛnɔngɛnɔ lo diwala. Ndo nto, ɔlɔngɔlɔngɔ ɔsɔ komonga Ɔmɛnyi wa Jehowa oko dimi. Wetshelo wa l’ɛtɛmwɛlɔ aso, elimu ndo eyango waki la so wakatshikitana tshɛ lo tshɛ. Lâsɔ, ngande wototodjasɛ kâmɛ? Lakɔshi nto yɛdikɔ ya nkitanyiya didjango diaki Nzambi diokɛma hwe dia tshukana paka lo Nkumadiɔndjɔ. (1 Kor. 7:39) Ɔnkɔnɛ l’okitshakitsha tshɛ, lakawotɛ dia halokoke tshukana la nde.

Kânga polo ɛlɔ, dimi mbeyaka dia lakɔshi yɛdikɔ ya dimɛna. Aha la tâmu, dimi mbeyaka dia layonga l’ɔngɛnɔngɛnɔ l’andja w’oyoyo watolakiya Nzambi. (Osam. 145:16; 2 Pet. 3:13) L’etena kɛnɛ, lamboyashikikɛ dia nama kɔlamelo yami otsha le Jehowa ndo ngɛnangɛna woho wemi.

Lekɔ lo kongɛ l’asolo walomɔlomɔ lushi layomonɛ oma lo kɔsa k’etshimbi ko nembɔlembɔ oko mpele. Etena kɛsɔ, layoda kioko y’ɔngɛnɔngɛnɔ lata nte: “Laki l’ɛkɔmɔ, koko l’etena kɛnɛ laya la demba dia dimɛna pondjo la pondjo!”