Onde wɛ âkohɔ?

Onde wɛ akadia numɛlɔ ya Tshoto y’Etangelo yeke katomba la yambalo tshɛ? Naka ngasɔ, kete enda dia kana wɛ kokaka nkadimola ambola wayela anɛ:

• Kakɔna kakalange Nzambi mbuta etena kakandatɛ ase Lɛwi ɔnɛ: “Dimi keli uhiku aye”?

Waoho akina w’ase Isariyɛlɛ waki la bɛtshi dia nkɛtɛ, koko Jehowa mbaki “uhiku” w’ase Lɛwi. (Wal. 18:20) Kânga mbakiwɔ konongola ɛtshi ka nkɛtɛ, vɔ waki la diɛsɛ dia lânde di’olimu. Ndo nto, Jehowa akâkotshɛka ehomba awɔ wa l’emunyi. Ɛlɔ kɛnɛ, wanɛ wetsha wahɔ wa Diolelo lo dihole dia ntondo kokaka monga l’eshikikelo dia Nzambi ayowakotshɛ ehomba awɔ wa l’emunyi.—9/15, lɛkɛ 7-8, 13.

• Waa na wahomba mbetsha ana awui wa Nzambi?

Kânga mbakoka anto akina mbakimanyiya, ambutshi vɔamɛ mbele anto wa ntondo wahomba mbetsha anawɔ awui wa Nzambi ndo woho walangande dia nkumbo monga.—10/1, lɛkɛ 7.

• Lande na kahombayɛ salɛ olonganyi ayɛ akambo la dilɛmiɛlɔ?

Dilɛmiɛlɔ kimanyiyaka atshukanyi dia vɔ monga l’ɔngɛnɔngɛnɔ ndo dia diwala diawɔ nomba. Diɔ mbakimanyiyaka nto dia monga l’ɔlɔ ndo la lotui tshitshi. Sunganaka mɛtɛ dia vɔ mbidja welo dia monga la dilɛmiɛlɔ.—10/1, lɛkɛ 12.

• Onde wɛ pombaka mfuta elambo?

Etena kakambola afundji l’Afarisɛ Yeso dia kana Nzambi mbetawɔka dia mfuta elambo le ewandji wa leeta w’ase Rɔma, nde akâkadimola ate: “Nyusha Kayisa diango dia Kayisa. Nyusha [Nzambi] diango dia [Nzambi].” (Mako 12:13-17) Mandji y’ana w’anto, mbuta ate “Kayisa” salaka falanga ndo mbidjɛka anto ɛlɛmbɛ dia vɔ ndjɔsa la nɛmɔ. Ndo nto, vɔ kimanyiyaka anto lo toho efula. Ɔnkɔnɛ, Nzambi hatone dia vɔ nɔmba elambo.—10/1, lɛkɛ 14, 15.

• Ngande wakokayɛ mbeya ɔtɛmwɛlɔ wa mɛtɛ?

Akristo wa mɛtɛ mbɔsaka Bible oko Ɔtɛkɛta waki Nzambi. Vɔ nɛmiyaka lokombo lande Jehowa ndo vɔ sambishaka awui wendana la Diolelo diande. Vɔ hawɔtɔ l’awui wa l’andja ɔnɛ wa kɔlɔ ndo vɔ mbokanaka ngandji ka shikaa lam’asawɔ.—10/1, lɛkɛ 16, 17.

• Onde Nzambi mbɔsaka dia dioho dimɔtshi di’anto ndeka waoho akina?

Ndooko. Bible mbuta hwe ɔnɛ: “Nzambi kema la shonodi y’antu. Keli ndi mbetawoka wa lu wedja tshe, wane wawuka woma la watsha akambu w’ololo.”—Etsha 10:34, 35.—10/1, lɛkɛ 26.

• Kakɔna kakoka nkimanyiya Okristo dia mbeya woho wa tɔkɛnyɔ tele amɛna?

Ele lo nsɔna tɔkɛnyɔ t’amɛna ndo takoka ngɛnyangɛnya Nzambi. Diakɔ diele, ayonga dimɛna sho ndjambola ɔnɛ: Kakɔna kele lɔkɔ? Etena kakɔna kayashami lo tɔkɛnyɔ? Waa na watɔkɛnyaka la mi?—10/15, lɛkɛ 9-12.

• Ngande wakoka ɛtɛkɛta wele lo Tukedi 7:6-23 tokimanyiya dia mbewɔ wendelo w’esato wɛnyawɔ anto etakataka?

Avɛsa anɛ tɛkɛtaka di’ɔlɔngɔlɔngɔ ɔmɔtshi w’enginya wakatetaka lo mboka kakadjasɛka womoto la numba ndo nde akatale lo djonga. Ɛlɔ kɛnɛ, ayonga ɔlɔlɔ sho mbewɔ sitɛ y’Ɛtɛrnɛtɛ yɛnya esato walomialomia nsaki ya demba ndo nyanga ekimanyielo kaki Nzambi lo dɔmbɛlɔ la ntondo k’esato ɛsɔ totombɛ.—11/15, lɛkɛ 9-10.