1-3. a) Ndjatshumoya ya lo sawo nɛ kɛdikɛdi na, ndo shɛngiya yakɔna yele la dui sɔ le so? b) Ɛnyɛlɔ kakɔna kakatotshikɛ Pɔɔlɔ lo kɛnɛ kendana la kambɛ Nzambi aha la lonyangu?

 OFUNDJI ɔmɔtshi akafunde ate: “Etelo koleki kɔlɔ l’atei wa ditelo dia lofunda kana dia lɔtɛkɛta tshɛ ele: ‘Otomotsha nganɛ lee!’” Ofundji akɔ ko John Whittier, ndo nde akatɛkɛta di’akambo wayotoyatshumoyaka l’ɔkɔngɔ wa sho nsala dui dimɔtshi diambotoyɛna ɔnɛ totohomba nsala woho okina. Tshɛkɛta “ndjatshumoya” yatɛkɛtaso lo sawo nɛ kɛdikɛdi monga la lonyangu la lo yimba, kana la lo tokanyi l’ɔtɛ wa dikambo dimɔtshi diambotosala kana diahatasadi, ndo yɔ koka nto nembetshiya ‘ndela nto.’ Eelo mɛtɛ sho tshɛ salaka akambo wayotoyatshumoyaka l’ɔkɔngɔ diko ɔnɛ takahombe nsala woho okina. Onde wɛ ekɔ lo ndjatshumoya l’ɔtɛ wa dikambo dimɔtshi?

² Anto efula wakasale munga ya weke lo nsɛnɔ yawɔ ndo wakakome polo lo nsala pɛkato ya weke. Akina hawosadi kaanga dikambo ɔtɔi dia kɔlɔ, koko vɔ ndjambolaka kana ɛsɔnwɛlɔ ɛmɔtshi wakawasale lo nsɛnɔ yawɔ wekɔ amɛna. Amɔtshi mendjolaka munga yawɔ yakete ndo tetemalaka menda paka akambo w’otsha la ntondo. Akina wekɔ lo ntetemala ndjatshumoya ɔnɛ “otondonga lakasale nganɛ lee!” l’ɔtɛ wa kɛnɛ kakawasale lo nshi yakete. (Osam. 51:3) Ko wɛ, ngande wayaokayɛ? Onde wɛ mbetawɔka dia wɛ koka kambɛ Nzambi olimu aha la ntetemala nyanga l’ɔtɛ wa munga yakayasale? Onde Bible kekɔ la ɛnyɛlɔ k’onto ɔmɔtshi kakoka tokimanyiya lo dikambo sɔ? Eelo, ɛnyɛlɔ k’ɔpɔstɔlɔ Pɔɔlɔ.

³ L’edja tshɛ ka lɔsɛnɔ lande, Pɔɔlɔ akasale akambo wa kɔlɔ efula ndo w’amɛna. Nde akanyange efula l’ɔtɛ wa kɛnɛ kakandasale lo nshi yakete, koko nde akeke nto woho wa ndeka mbidja yimba l’olimu wakandakambɛka Nzambi. Nyɛsɔ tende woho wakoka ɛnyɛlɔ kande tokimanyiya dia sho kambɛ Nzambi aha la lonyangu.

4. Akambo akɔna wa kɔlɔ wakasale Pɔɔlɔ lo nshi yakete?

⁴ Etena kakinde Ofarisɛ, ɔpɔstɔlɔ Pɔɔlɔ akasale akambo  wa kɔlɔ wakandayonyanga l’ɔkɔngɔ. Ɛnyɛlɔ, nde akahɛnyahɛnya ambeki efula wa Kristo. Ɔkɔndɔ wa lo Bible mɛnyaka dia yema tshitshɛ l’ɔkɔngɔ w’atunyi ndjaka Stɛfano, “Saolo [lakayeyamaka oko Pɔɔlɔ] akatatɛ mpɛnyahɛnya etshumanelo la ngala tshɛ. Nde akɔtɔka lo luudu la luudu ndo akatondjaka apami la wamato l’andja ko akawadjaka lo lokanu.” (Etsha 8:3) Nombewo kelɛwɔ Albert Barnes akate ate tshɛkɛta ya lo Grɛkɛ yokadimɔmi ɔnɛ “mpɛnyahɛnya la ngala tshɛ,” mɛnyaka “ohetoheto ndo nkɛlɛ k’efula kaki la [Saolo] lo mpɛnyahɛnya Akristo.” Barnes mbutaka ate “Saolo aki la nkɛlɛ ka mamba lo dikambo di’ɔtɛmwɛlɔ wate kana nyama ka ngala.” Oko wakinde ɔtɛmɔdi w’ose Juda, Saolo akafɔnyaka di’ɔsɔ aki ɔkɛndɛ wakawosha Nzambi, mbuta ate wa mpɛnyahɛnya Akristo. Ɔnkɔnɛ, nde akasalɛ Akristo akambo la ngala k’efula, lo ‘manɛ dia nshila apami ndo wamato oshiki.’​—Etsha 9:1, 2; 22:4. a

5. Lembetshiya woho wakatshike Saolo mpɛnyahɛnya ambeki wa Yeso l’ɔtɛ wakawasambishaka akambo wendana la Kristo.

⁵ L’ɔkɔngɔ diko, Saolo akayoyadjɛ oyango dia ntshɔ polo la Damasɛkɛ dia tonda Akristo tshɛ ko ndja la wɔ la Jɛrusalɛma, lɛnɛ akawahombe ndjosoyama efula oma le ase Sheke. Koko, kɛnɛ kakandalange nsala kɛsɔ kokotshama, nɛ dia nde aki la dikambo la Ɔtɛ w’etshumanelo k’Akristo. (Ɛf. 5:23) Etena kakinde lo mboka, Yeso akɛnɛ le nde ndo Saolo akakome tshungu etena kakandɛnyi osase wa dihindo w’oma l’olongo. Oma laasɔ, Yeso akawotɛ dia nde ntshɔ la Damasɛkɛ dia nde nyomotowotɛ awui akina. Sho mbeyaka kɛnɛ kakayosalemaka l’ɔkɔngɔ diko.​—Etsha 9:3-22.

6, 7. Kakɔna kɛnya ɔnɛ Pɔɔlɔ aketawɔ dia nde akasale munga ya weke ntondo?

⁶ Kam’akandakome Okristo, Pɔɔlɔ akatshike mpɛnyahɛnya Akristo ndo lo dihole dia nde monga otunyi wa Lokristo la mɛtɛ, nde akatatɛ nsambisha akambo wendana la lɔ. Koko nde akayofunda lo dikambo diande ndamɛ ate: “Aha la taamu, nyakoke lɔkɛwɔ laki la mi ntondo lo ɔtɛmwɛlɔ w’ase Juda dia dimi lakatetemala mpɛnyahɛnya etshumanelo ka Nzambi la ngala tshɛ ndo lakayange dia kihandjola.” (Ngal. 1:13) L’ɔkɔngɔ diko, nde akayɛnyaka lonyangu lande l’ɔtɛ w’akambo wakandasale ntondo, etena kakandafundɛ ase Kɔrɛtɔ, ase Filipɛ ndo Timɔte. (Adia 1 Kɔrɛtɔ 15:9; Flpɛ. 3:6; 1 Tim. 1:13) Kaanga mbaki Pɔɔlɔ la lonyangu l’ɔtɛ w’akambo wa kɔlɔ wakandasale ntondo, nde kɔsɛma lo mbuta ɔnɛ vɔ koosalema. Nde aketawɔ ɔnɛ nde akasale munga ya weke efula.​—Etsha 26:9-11.

⁷ Nombewo kekina kelɛwɔ Frederic Farrar akafunde ate etena kakanyiyaso woho “wakahɛnyahɛnya Pɔɔlɔ Akristo lo yɛdikɔ y’efula, mbakokaso mboka lonyangu l’efula lakandahombe monga la lɔ ndo woho wakahombe anto mbɔɔnyɔla.” Lo tena dimtɔshi, ondo etena kakateembolaka ɔpɔstɔlɔ Pɔɔlɔ tshumanelo, anangɛso l’akadiyɛso wakawɛnaka mbala ka ntondo wakawombolaka ɔnɛ: ‘Wɛ mbele Pɔɔlɔ lakatɔhɛnyahɛnyaka?’—Etsha 9:21.

8. Ngande wakayaoke Pɔɔlɔ l’ɔtɛ w’ɔlɔlɔ waheyama mbɛdika ndo ngandji kakawoke Jehowa nde la Yeso, ndo wetshelo akɔna wakondjaso?

⁸ Koko Pɔɔlɔ aketawɔ dia ekɔ paka oma l’ɔlɔlɔ waheyama mbɛdika waki Nzambi mbakandalongola ɔkɛndɛ wa nsambisha lokumu l’ɔlɔlɔ. Nde akakambe la etelo k’ɔnɛ ɔlɔlɔ waheyama mbɛdika waki Nzambi mbala oko 90 lo mikanda ande 14, oleki afundji akina wa Bible. (Adia 1 Kɔrɛtɔ 15:10.) Pɔɔlɔ akangɛnangɛna efula l’ɔtɛ wakawosalɛ akambo la kɛtshi tshɛ, ndo nde kokondja ɔlɔlɔ waheyama mbɛdika waki Nzambi okondjakondja. Nde “akakambe olimu efula” ndeka apɔstɔlɔ akina tshɛ. Ɛnyɛlɔ Pɔɔlɔ mɛnyaka dia naka sho mbishola pɛkato ndo ntshikitanya yoho yaso ya lɔsɛnɔ, kete ndoko onyake, Jehowa ayotodimanyiya lo tshimbo y’olambo wa tshungo waki Yeso. Ande wetshelo wa dimɛna  wakondja anto tshɛ wafɔnya ɔnɛ olambo wa tshungo wa Yeso hawokoke monga la wahɔ le wɔ l’onto ndo l’onto lee! (Adia 1 Timɔte 1:15, 16.) Kaanga mbakasoya Pɔɔlɔ Yeso, nde akayofunda lo dikambo diande ate: “Ɔna Nzambi . . . akamboke ngandji ndo . . . akayakimɔ dikambo diami.” (Ngal. 2:20; Etsha 9:5) Lo mɛtɛ, Pɔɔlɔ akayeya dia bu dimɛna kambɛ Nzambi la lonyangu. Onde ndo wɛ mbɛna di’ekɔ ngasɔ?

9, 10. a) Lande na kanyanga ekambi wa Jehowa efula? b) Ko lande na kele bu dimɛna ntetemala monga la lonyangu l’ɔtɛ wa kɛnɛ kakatasale lo nshi y’edjedja?

⁹ Onde wɛ akasale akambo amɔtshi woyonyanga kakianɛ? Onde wɛ aketsha wenya ayɛ efula ndo wolo ayɛ lo akambo w’anyanya? Onde wɛ akasale akambo amɔtshi waki l’etombelo wa kɔlɔ le anto akina, ko kana wɛ ekɔ lo nyanga l’ɔtɛ woyɛna dia wɛ akahombe nsala dui dimɔtshi lo yoho yotshikitanyi? Dimbola diambɔma ele, kakɔna kahombayɛ nsala wony’ɔnɛ?

¹⁰ Anto efula ɛlɔ kɛnɛ wekɔ lo nyanga. Nyanga kɛdikɛdi ndjasalɛ kɔlɔ, ndjakiyanya ɔtɛkɔya kana ndjahɛnyahɛnya ndo dui sɔ mbishaka onto ɔkɛi w’efula. Onde ndjakiyanya ayotokimanyiya dia nkandola akambo weso la wɔ? Ndoko kaanga yema. Ohɔsa dia wɛ ekɔ lo nanga ntshɔ otsha lo dihole dimɔtshi di’etale efula, koko wɛ ambɔsa yɛdikɔ ya ntshɔ lo kɔsa k’etshimbi. Wɛ mbeyaka nshisha wolo ayɛ tshɛ, nɛmba demba, ndo mbala mɔtshi wɛ hokoma lɛnɛ atayatshu. Ɔnkɔnɛ, lo dihole dia wɛ ndjakiyanya l’ɔtɛ wa dikambo dimɔtshi, wɛ pombaka nsala kɛnɛ tshɛ keyɛ l’akoka dia nkandola dikambo diakɔ. Ɛnyɛlɔ, wɛ kokaka nɔmba onto lakayasalɛ kɔlɔ edimanyielo, ondo l’oyango wa nɔngɔsɔla diɔtɔnganelo dia dimɛna diele lam’asanyu. Wɛ kokaka nto nsala la wolo dia mbewɔ oseka dikambo tshɛ diakoka ndjokokonya dia nsala munga kakɔ kaamɛ, diaha wɛ ndjonga l’ekakatanu lo nshi yayaye. Lo tena dimɔtshi, wɛ pombaka mbikikɛ etombelo wa kɔlɔ w’oma lo munga yakayasale. Koko, ndjakiyanya hokandola ekakatanu wele la yɛ, hokokimanyiya dia wɛ kambɛ Nzambi tshɛ lo tshɛ, ndo ndoko wahɔ wayoyokondja.

11. a) Ahombaso nsala dia Jehowa toka kɛtshi ndo tɛnya ɔlɔlɔ ande waheyama mbɛdika? b) Lo ndjela Afundelo, kakɔna kahombaso nsala dia sho monga la ki ka lo yimba?

 ¹¹ Anto amɔtshi mbetawɔka ndjakiyanya amboleka l’ɔtɛ wa munga yakawasale lo nshi yakete, ndo dui sɔ ndjakonyaka dia vɔ ndjaɔsa dia vɔ bu ohomba lo washo wa Nzambi. Vɔ fɔnyaka dia Nzambi hayokoka mbaoka kɛtshi l’ɔtɛ wa munga y’efula ndo ya weke yakawasale. Koko kɛnɛ kele mɛtɛ ele, oyadi kɔlɔ ya ngande yakatasale lo nshi yakete, sho kokaka ndjatshumoya, ntshika kɔlɔ yakɔ ndo nɔmba Nzambi edimanyielo. (Etsha 3:19) Jehowa ayotoka kɛtshi ndo ayotɛnya ɔlɔlɔ ande waheyama mbɛdika, oko wakandasalɛ anto efula. Nde ayotodimanyiya naka sho monga l’okitshakitsha, la losembwe ndo ndjatshumoya l’otema ɔtɔi. Nzambi akasale ngasɔ lo dikambo dia Jɔbɔ lakate ate: “Diako mbamumuyamia, mbamumuyatshumuya ludjashi lu ditshu la l’utuku.” (Jobo 42:6) Afundelo totɛka kɛnɛ kahombaso nsala dia sho monga la ki ka lo yimba ɔnɛ: “One latusheka kolo yandi, hatongonaka. Keli one latushulaka ndu latosekaka kolo yandi, ayukama ketshi.” (Tuk. 28:13; Jak. 5:14-16) Ɔnkɔnɛ, sho pombaka mbishwɛ Nzambi munga yaso, mbɔlɔmba dia nde todimanyiya ndo ndjatshumoya. (2 Kɔr. 7:10, 11) Naka sho nsala akambo asɔ tshɛ, kete Ɔnɛ ‘latodimanyiyaka lo yɛdikɔ y’efula’ ayotoka kɛtshi.​—Is. 55:7.

12. a) L’ɛnyɛlɔ ka Davidɛ, naa yoho ya dimɛna ya ndɔshana la nkum’otema katɛndja onongo? b) Lo woho akɔna wakoka Jehowa monga la lonyangu, ndo lande na kele mbeya dui sɔ tokimanyiyaka? (Enda kiombo.)

¹² Dɔmbɛlɔ ekɔ yoho ya dimɛna efula yatokimanyiya Nzambi. Davidɛ akakɛnɛmɔla tokanyi tande lo dɔmbɛlɔ dia la mbetawɔ diakandasale diele lo dibuku di’Esambo. (Adia Osambu 32:1-5.) Oko wakadiɛnya Davidɛ ndamɛ, nkum’otema kande kakatawɛndjaka onongo etena kakinde la pɛkato. Mɛnamaka dia nde akayakinyaka ndo akashisha ɔngɛnɔngɛnɔ ande l’ɔtɛ wakinde kombishola pɛkato yakandasale. Kakɔna kakayokimanyiyaka Davidɛ dia nde dimanyiyama ndo monga l’ɔngɛnɔngɛnɔ? Ele paka etena kakandashola pɛkato yande le Nzambi. Jehowa akoke alɔmbɛlɔ waki Davidɛ ndo nde akookeketsha dia nde ntetemala nsala kɛnɛ kele ɔlɔlɔ. Woho akɔ mbele, naka wɛ nɔmba Jehowa l’otema ɔtɔi, kete nde ayohokakamɛ alɔmbɛlɔ ndo ɛsɛngɔsɛngɔ ayɛ. Naka munga yakayasale lo nshi yakete yekɔ lo kotshindja wɔɔngɔ, kete kitshakitsha asolo, sala etshikitanu wahombama ndo yala l’eshikikelo ɔnɛ Jehowa ayokodimanyiya.​—Osam. 86:5.

13, 14. a) Lo na ahombaso ndeka ndjakiyanya? b) Ambola akɔna wayotokimanyiya dia ndjasɛdingola lo woho weso kakianɛ?

¹³ Ekɔ mɛtɛ di’onto kokaka nkondja wetshelo lo nsɛdingola kɛnɛ kakandasale lo nshi yakete, koko nde kokaka monga l’ɔngɛnɔngɛnɔ lo menda akambo wa la ntondo. Laasɔ, lo dihole dia sho ntetemala ndjakiyanya dia munga yakatasale, sho pombaka mbidja yimba l’akambo wasalaso nshi nyɛ ndo wayotosala lo nshi yayaye. Yambola ɔnɛ: ‘Ɛnɔnyi engana oma lanɛ, onde layoyoyatshumoya l’ɔtɛ wa kɛnɛ kasalami nshi  nyɛ, lo mbuta ɔnɛ lakahombe nsala woho wotshikitanyi? Onde lekɔ lo ntetemala monga la kɔlamelo yayokimanyiya dia dimi mbewɔ nsala akambo wakokami ndjonyanga lo nshi yayaye?

¹⁴ Oko wayaleke nsukana mfɔnu ka woke, ayonga dimɛna ɔmɔmɔ la l’atei aso ndjaoka ambola anɛ: ‘Shi ondo dimi pombaka nyomoyasha efula l’olimu waki Nzambi? Lande na kahamonge ombatshi mboka? Kakɔna kashimba dia dimi nkotsha kɛnɛ kalɔmbama dia monga okambi wakimanyiya? Onde lekɔ lo nsala la wolo dia ndɔta l’onto l’oyoyo? Onde dimi lekɔ mɛtɛ woho w’onto walanga Jehowa dia nde mbɔtɔ l’andja w’oyoyo?’ Lo dihole dia ndjakiyanya tsho l’ɔtɛ weyɛ atasale awui asɔ, kamba la ambola ango dia wɛ ndjasɛdingola ndo menda kana wɛ ekɔ lo ndjasha tshɛ l’olimu waki Jehowa. Mbokamaka hwe dia sho kokaka ntetemala monga la yoho ya lɔsɛnɔ yayotokimanyiya diaha sho ndjoyatshumoya l’ɔtɛ wa kɛnɛ kakatasale.​—2 Tim. 2:15.

15, 16. a) Kakɔna kakayahombia anto amɔtshi l’oyango wa mbetsha wahɔ wa Diolelo lo dihole dia ntondo? b) Lande na kahayahombe pondjo ndjatshumoya l’ɔtɛ wakaayahombia l’oyango wa mbetsha wahɔ wa Diolelo lo dihole dia ntondo?

¹⁵ Kayotota lo dikambo di’anto wakayahombia l’oyango wa kambɛ Jehowa olimu wa lo tena tshɛ. Mbeyaka monga ko amɔtshi l’atei awɔ wakatshike elimu wa falanga efula kana okanda, l’oyango wa mbetɛ nsɛnɔ yawɔ ɔsɛlɛngɛ ndo dia mbetsha wenya efula lo wahɔ wa Diolelo. Mbeyaka monga nto k’amɔtshi wakatshikala enyemba, wakatshukana koko wakɔshi yɛdikɔ yaha mbota ana l’oyango wa vɔ nkamba olimu wa lo tena tshɛ, lo Bɛtɛlɛ, lo wokelo wa mbalasa, emendji w’eteta kana olimu wa misiɔnɛrɛ. Onde wɛ oyatshumoya kakianɛ l’ɔtɛ wakayɔshi yɛdikɔ shɔ ndo woyotatshunde lo olimu wa Jehowa ɔsɔ? Onde wɛ oyatshumoya l’ɔtɛ wakaayahombia, lo mbuta ɔnɛ laketsha wenya wetshetsha? Tosalake ngasɔ lam’alangɛ!

¹⁶ Eya dia wɛ akɔshi yɛdikɔ shɔ l’ɔtɛ wa ngandji k’efula kokayɛ Jehowa ndo nsaki kele la yɛ ka nkimanyiya anto akina walanga mbokambɛ. Diakɔ diele, tɔfɔnyake pondjo ɔnɛ wɛ otonga la lɔsɛnɔ la dimɛna otondongaka wɛ kokamba olimu ɔsɔ. Onga l’ɔngɛnɔngɛnɔ w’efula lo mbeya dia kɛnɛ kasalayɛ kekɔ dimɛna dia mamba. Ngɛnangɛna otamanya lo woho wasalayɛ la wolo dia kambɛ Jehowa dimɛna. Nde hohɛki pondjo yimba yayɛ ya ndjahombia. Etena kayondosha ekambi ande lɔsɛnɔ loleki dimɛna, nde ayokofuta lo yoho ya dimɛna efula, yoleki ndo woho wafɔnyayɛ.​—Osam. 145:16; 1 Tim. 6:19.

17, 18. a) Kakɔna kakakimanyiya ɔpɔstɔlɔ Pɔɔlɔ dia nde kambɛ Nzambi aha la lonyangu? b) Ambooyashikikɛ dia nsala lo dikambo di’awui wakete, wa nshi nyɛ ndo wa la ntondo lo woho wahombayɛ kambɛ Jehowa?

¹⁷ Kakɔna kakakimanyiya ɔpɔstɔlɔ Pɔɔlɔ dia nde kambɛ Nzambi aha la lonyangu? Oko wɛnyamidiɔ lo Bible k’Ekila, Pɔɔlɔ akafunde ate: “Dimi lambuhela akambu wa l’okongo, lambokolamela utsha lu akambu weli la ntundu. Dimi lambusamanya utsha lu dihuli diatamatshu, dia nungula difutu.” (Adia Filipi 3:13, 14.) Lo ndjela divɛsa nɛ, Pɔɔlɔ kotetemala ndjakiyanya lo kɛnɛ kendana l’akambo wa kɔlɔ wakandasale etena kakinde l’ɔtɛmwɛlɔ w’ase Juda. Lo dihole dia nsala ngasɔ, nde akasale la wolo dia nde ndjokondja difuto dia lɔsɛnɔ la pondjo lo nshi yayaye.

¹⁸ Sho tshɛ kokaka nkondja wetshelo oma l’ɛtɛkɛta waki ɔpɔstɔlɔ Pɔɔlɔ ɛsɔ. Lo dihole dia sho ndeka nyanga l’ɔtɛ w’akambo wakatasale weso bu l’akoka wa ntshikitanya, sho pombaka mbidja yimba lo akambo wa la ntondo. Ekɔ mɛtɛ dia ondo hatotohɛ munga tshɛ yakatasale lo nshi yakete, koko hatohombe ntetemala ndjaɛndja onongo l’ɔtɛ w’akambo asɔ. Ɔnkɔnɛ, tosale la wolo dia mbohɛ akambo wakete, tokambe Nzambi la wolo aso tshɛ ndo totetemale mbidja yimba lo akambo w’amɛna watokongɛ la ntondo.