1, 2. a) Waonga akɔna wayotokimanyiya dia ndɔshana l’ekakatanu? b) Mbetawɔ kɛdikɛdi na? Sha ɛnyɛlɔ.

 KAMBƐ Jehowa toshaka ɔngɛnɔngɛnɔ w’efula. Koko ndo sho mbadiɛnɛ l’ekakatanu wele l’anto akina wa l’andja ɔnɛ, ndo “[t]ekɔ lo nsowa l’ɔtɛ wa kɛnɛ kele ɔlɔlɔ.” (1 Pet. 3:14; 5:8, 9; 1 Kɔr. 10:13) Dia nshika tanga la ntondo k’ekakatanu ɛsɔ, sho pombaka monga la mbetawɔ ndo la dihonga.

² Ko mbetawɔ kɛdikɛdi na? Ɔpɔstɔlɔ Pɔɔlɔ akafunde ate: “Mbetawɔ ele eshikikelo k’ɔnɛ kɛnɛ kalongamɛ onto kayokotshama, djembetelo yetawoya dia kɛnɛ kahɛnama kekɔ mɛtɛ.” (Hɛb. 11:1) Bible k’Ekila mbutaka ɔnɛ: “Mbetawo keli tshina dia akambu walungamelasu, keli uluwanyi w’akambu wahatatenyi.” Ɛnyɛlɔ, naka tambokimɔ falanga dia nsomba lokombo lɔmɔtshi leso tatɛnyi ko wambotosha ekanda alɔ, kete tekɔ la mbetawɔ ɔnɛ lɔ laya laso. Woho akɔ waamɛ mbele, lam’ele tekɔ la mbetawɔ dia Nzambi okokotshaka ɛtɛkɛta ande nshi tshɛ, ekɔ oko tamboshila nkondja kɛnɛ katolakiyande. Mbetawɔ kele la so toshikikɛka dia tayɛna ekotshamelo k’alaka ande wele lo Bible, ndo tekɔ nto l’eshikikelo ɔnɛ akambo wa mɛtɛ wa lo nyuma walongamɛso wayokotshama kaanga mbahatatawaɛnyi.

3, 4. a) Dihonga kɛdikɛdi na? b) Naa yoho mɔtshi yakokaso nkeketsha mbetawɔ kaso ndo monga la dihonga?

³ Dibuku dimɔtshi (The New Interpreter’s Dictionary of the Bible) mbutaka ɔnɛ dihonga kɛdikɛdi “wolo wele l’onto wa ntɛkɛta ndo nsala akambo la ntondo ka wekamu kana ka waale ɔmɔtshi aha la mboka wɔma.” Mbala efula, onto lele la dihonga, ekɔ la wolo ndo salaka akambo aha la mboka wɔma.​—Makɔ 6:49, 50; 2 Tim. 1:7.

⁴ Mbetawɔ ndo dihonga wekɔ waonga w’ohomba efula. Ko tɔshi dia tekɔ l’ohomba wa mbetawɔ ka wolo, koko sho bu la dihonga. Lo dikambo sɔ, anto efula watɛkɛtama lo Bible wekɔ ɛnyɛlɔ ka dimɛna k’anto waki la waonga asɔ. Ɔnkɔnɛ, yoho mɔtshi yakokaso nkeketsha mbetawɔ kaso  ndo monga la dihonga ele, lo nsɛdingola bɛnyɛlɔ di’anto asɔ.

5. Waonga akɔna waki Jashua l’ohomba dia nde nkotsha ɔkɛndɛ ande dimɛna?

⁵ Nyɛsɔ tende yema kɛnɛ kakasalema ambeta ɛnɔnyi 3500. Ɛnɔnyi akumi anɛi w’etondo wakete ntatɛ etena kakatshungola Jehowa ase Isariyɛlɛ oma lo lɔhɔmbɔ la l’Edjibito. Omvutshi Mɔsɛ mbakataawalɔmbɔlaka. Etena kakakotsha Mɔsɛ ɛnɔnyi 120, nde akɛnyi tsho Nkɛtɛ ya daka oma l’etale ndo nde akavu lo dikona dia Nebo. Jashua laki ɔhɛna ande aki onto “[l]akaludiama la nyuma ka yimba.” (Euh. 34:1-9) Ase Isariyɛlɛ waki suke la mbɔsa nkɛtɛ ya Kanana. Dia nkotsha oyango ɔsɔ, Jashua laki ɔnɔmbɔdi awɔ akahombe nyanga lomba l’oma le Nzambi. Nde akahombe monga nto la mbetawɔ le Jehowa, monga la dihonga ndo nkeketala.​—Euh. 31:22, 23.

6. a) Lo Jashua 23:6, vɔ tɔlɔmbaka dia monga la dihonga dia nsala na? b) Wetshelo akɔna wakondjaso oma lo Etsha 4:18-20 ndo 5:29?

⁶ Lomba, dihonga ndo mbetawɔ kakakɛnɛmɔla Jashua etena kakawalɔka l’ase Kanana kakakeketsha ase Isariyɛlɛ. Koko dia nɛndja lo ta sɔ, ase Isariyɛlɛ wakahombe monga la dihonga dia nsala kɛnɛ kakawatɛ Jashua. Otsha l’ekomelo ka lɔsɛnɔ lande, etena kakandalakanaka la wɔ, Jashua akatɛ ase Isariyɛlɛ ate: “Nyuyali la dihunga, dia nama la ntsha aui tshe wufundami lu buku dia elembe wa Mose. Tanyetolaki lu lunya la pami kana la lomoso.” (Jas. 23:6) Sho lawɔ tekɔ l’ohomba wa dihonga dia nkitanyiya Jehowa lo tena tshɛ, ɛnyɛlɔ etena katɔsɛngiya anto akina dia sho nsala kɛnɛ kahɔtɔnɛ la lolango la Nzambi. (Adia Etsha 4:18-20; 5:29.) Naka sho nɔmba efula ndo ndjaɛkɛ le Jehowa, kete nde ayotokimanyiya dia sho nsala akambo la dihonga tshɛ.

7. Kakɔna kakahombe Jashua nsala dia nde monga la dihonga ndo ntondoya?

⁷ Dia monga la dihonga diahombama dia nsala lolango laki Nzambi, sho pombaka mbekaka Ɔtɛkɛta ande ndo kitanyiyaka kɛnɛ kele lɔkɔ. Kɛsɔ mbakatɛ Jehowa Jashua dia nsala etena kakandonge ɔhɛna wa Mɔsɛ. Nde akawotɛ ate: “Ukikitali, uyali la dihunga efula, dia nama elembe tshe wakakutela ukambi ami Mose ololo. . . . Aui w’uma lu buku ne di’elembe, tawumoki uma l’unyo aye. Ukanaki la wo yimba ndu la yanyi ndu l’utshu, dia we nkitanyiya aui tshe wufundami loko. Osoku mbayuyuluwanya elimu aye ndu mbayuyuhumo lukulu l’olo lu akambu tshe wayuyutshaka.” (Jas. 1:7, 8) Lam’ele Jashua akayele dako sɔ, ‘lɔsɛnɔ lande lakalowana.’ Naka sho lawɔ nsala akambo oko Jashua, kete tayonga la dihonga di’efula ndo tayotondoya lo olimu wakambɛso Nzambi.

8. Divɛsa dia l’ɔnɔnyi ɔnɛ diakɔsama oma lo mukanda akɔna, ndo lande na kataso ɔnɛ ɛtɛkɛta wa lɔkɔ wayotokimanyiya?

⁸ Jashua mɛtɛ akaleke keketshama etena kakandoke Jehowa awotɛ nto ate: “Ukikitali, uyali la dihunga. Tateki asulu, tukaki woma, ne dia [Jehowa, Nzambi k]aye, ayutayalaka la ye lu ahuli tshe wayuyutatshokaka.” (Jas. 1:9) Ndo sho lawɔ, Jehowa ekɔ kaamɛ la so. Ɔnkɔnɛ, “ta[ta]teki asulu” kana mboka “woma” etena keso la ntondo k’ekakatanu. Tolembete dia kɛnɛ kakaleke nkeketsha Jashua ele ɛtɛkɛta w’ɔnɛ: “Ukikitali, uyali la dihunga. . . . [Jehowa, Nzambi k]aye ayutayalaka la ye.” Ɛtɛkɛta ɛsɔ wa lo Jashua 1:9 mbakasɔnama oko divɛsa dia l’ɔnɔnyi ɔnɛ. Ɛtɛkɛta  ɛsɔ ndo bɛnyɛlɔ dikina di’anto waki la mbetawɔ ndo la dihonga diayotokeketsha l’ɔnɔnyi ɔnɛ w’otondo.

9. Ngande wakɛnya Rahaba mbetawɔ ndo dihonga?

⁹ Etena kakatome Jashua atɔpi ahende otsha lo nkɛtɛ ya Kanana, Rahaba womoto la numba akawashɛ ndo akalɔmbɔla atunyi awɔ otsha lo mboka kekina. Lam’ele nde akasale akambo la mbetawɔ ndo la dihonga, Rahaba nde l’anto wa lo luudu lande wakashimbamɛ etena kakalanyema osomba wa Jeriko oma le ase Isariyɛlɛ. (Hɛb. 11:30, 31; Jak. 2:25) Rahaba akatshike lɔkɛwɔ lande la mindo ndo akatatɛ nsala lolango la Jehowa. Anto amɔtshi wambokoma Akristo ɛlɔ kɛnɛ diɛsɛ la mbetawɔ, la dihonga ndo wambɔsa yɛdikɔ ya nsala etshikitanu l’ɛnyɛlɔ ka Rahaba l’oyango wa ngɛnyangɛnya Nzambi.

10. L’atei w’akambo akɔna wakashikikala Ruta l’ɔtɛmwɛlɔ wa mɛtɛ, ndo ɛtshɔkɔ akɔna wakandakondja?

¹⁰ L’ɔkɔngɔ wa nyɔi ka Jashua, Ruta w’ose Mɔaba akashikikala l’ɔtɛmwɛlɔ wa mɛtɛ la dihonga tshɛ. Oko wakinde wadi aki odo w’ose Isariyɛlɛ, ondo nde akeyaka awui amɔtshi wendana la Jehowa. Naɔmi k’okilo ande laki nde lawɔ wadi aki odo akadjasɛka la Mɔaba, koko akɔshi yɛdikɔ ya nkalola otsha l’Isariyɛlɛ l’osomba wa Bɛtɛlɛhɛma. Etena kakiwɔ lo mboka, Naɔmi akatɛ Ruta dia nde nkalola lakawɔ, koko Ruta akokadimola ate: “Tuntshutsh[u]yaki dia dimi nkutshika kuyanga mamitwana la ye. . . . Wudja aye, wayuyala wudja ami, ndu [Nzambi k]aye, ayuyala [Nzambi k]ami.” (Ruta 1:16) L’ɔkɔngɔ diko, Bɔaza k’owɔtɔ waki Naɔmi akayotshukaka Ruta, ko nde akayota ɔna ndo akayokoma lɔtshɛtshɛ la Davidɛ ndo Yeso. Lo mɛtɛ, Jehowa tshɔkɔlaka anto wele la mbetawɔ ndo la dihonga.​—Ruta 2:12; 4:17-22; Mat. 1:1-6.

11. Ngande wakɛnya Jehɔyada nde la Jehosheba ya wadɛnde dihonga, ndo dui sɔ diakakimanyiya dia nkotsha na?

¹¹ Dihonga ndo mbetawɔ kele la so keketshamaka etena keyaso dia Nzambi ekɔ kaamɛ la wanɛ wadja nsɛnɔ yawɔ lo waale l’ɔtɛ wetshawɔ wahɔ w’asekawɔ ambetawudi la ntondo ka wawɔ hita. Ɛnyɛlɔ, tɔsɛdingole kɛnɛ kakasale ɔlɔmbɛdi wa laadiko, Jehɔyada nde la wadɛnde Jehosheba. L’ɔkɔngɔ wa nyɔi ka nkumekanga Ahaziya, Ataliya wa nyango akadiake anto tshɛ wa lo nkumbo ka nkumekanga, onyake Jɔashi, ko nde akahema ndamɛ l’okudi. Koko Jehɔyada nde la Jehosheba wakadje nsɛnɔ yawɔ lo waale lo mbishɛ Jɔashi y’ɔnaki Ahaziya lo luudu lawɔ l’edja k’ɛnɔnyi esamalo w’etondo. Ɔnkɔnɛ, lo ɔnɔnyi w’esambele, Jehɔyada akakonya Jɔashi nkumekanga ndo akadiake Ataliya. (2 Khum. 11:1-16) L’ɔkɔngɔ diko, Jehɔyada akayosukɛ nkumekanga Jɔashi lo ɔlɔngɔswɛlɔ wa tɛmpɛlɔ. Ndo etena kakavu Jehɔyada ele l’ɛnɔnyi 130, nde akakundɛma lɛnɛ akakundɛmaka nkumi ya dikanga “ne dia ndi akatshaka ololo lu Isariyele lu ashu wa [Nzambi], akatshela wa lu luudu landi ololo.” (2 Ek. 24:15, 16) Laadiko dia laasɔ, dihonga diaki la Jehɔyada nde la wadɛnde Jehosheba akakimanyiya di’ɔlɔndji wa lowandji namema ntatɛ le Davidɛ polo le Mɛsiya.

12. Kakɔna kakasale Ɛbɛdɛ-mɛlɛkɛ kɛnya ɔnɛ nde aki la dihonga?

¹² Ɛbɛdɛ-mɛlɛkɛ laki ɔlɛnga lo luudu la nkumekanga Zedekiya, akadje lɔsɛnɔ lande lo waale l’ɔtɛ wa Jɛrɛmiya. Etena kakawasɔngwɛ Jɛrɛmiya awui wa kashi, nkumekanga akookimɔ l’anya w’ewandji w’ase Juda, ko vɔ wakatowodjaka lo difuku dia lɔtɛkɛ dia nde tovɔ lɔkɔ. (Jer. 38:4-6) Kaanga mbakandɛnaka dia nde ayodja lɔsɛnɔ lande lo waale lam’ele Jɛrɛmiya akahetshamaka, Ɛbɛdɛ-mɛlɛkɛ akatshu dia tɛnana la nkumekanga Zedekiya dia tɔlɔmba dia vɔ mbotshungola. Zedekiya aketawɔ dui sɔ ndo akatondja epele 30 dia vɔ ntshɔ kaamɛ la Ɛbɛdɛ-mɛlɛkɛ dia totondja Jɛrɛmiya oma lo difuku. L’ɔkɔngɔ diko, lo tshimbo ya Jɛrɛmiya, Nzambi akayoshikikɛka Ɛbɛdɛ-mɛlɛkɛ ɔnɛ nde hatovɔ etena kayolanyema Jɛrusalɛma oma le ase Babilɔna. (Jer. 39:15-18) Mbokɛmaka mɛtɛ dia Nzambi tshɔkɔlaka anto wasala akambo la dihonga.

13. Ngande wakɛnya ase Hɛbɛru asato dia vɔ waki la dihonga, ndo wetshelo akɔna wakondjaso oma l’ɔkɔndɔ ɔsɔ?

 ¹³ Dui dikina diakakomɛ ekambi esato waki Jehowa w’ase Hɛbɛru lo ntambe k’esambele N.T.D., mɛnyaka nto ɔnɛ Nzambi tshɔkɔlaka anto wele la mbetawɔ ndo dihonga. Nkumekanga Nɛbukadinɛza akasanganya ɛlɔhɛ tshɛ wa la Babilɔna ndo akawadjangɛ di’onto tshɛ ntɛmɔla kimɛta kande ka paonyi. Onto tshɛ lakatonaka kitɛmɔla akahombaka ndjakema lo nkuka ka dja. Koko la dilɛmiɛlɔ tshɛ, ase Hɛbɛru asato, Shadrakɛ, Meshakɛ ndo Abɛdɛ-Nengo wakatɛ nkumekanga Nɛbukadinɛza vate: “Ulungi, [Nzambi k]asu, latutotemolaka eko la wulu wa ntushimbela uma lu khuka ka dja; ndu ndi ayutushimbela uma lu anya aye, we khum’ekanga. Kuyanga aha osoku we khum’ekanga, eye wati: Shu hatukhusela ditemolatemola diaye adui, kana ntemola kimeta ka paunyi kene kakayeme.” (Dan. 3:16-18) Ɔkɔndɔ ɔsɔ wahahanya asolo wɛnya woho wakashimbamɛ ase Hɛbɛru asato asɔ wekɔ lo Danyele 3:19-30. Kaanga mbele ondo hatotohomana la ohemba wa vɔ todja lo nkuka ka dja dia sho mvɔ, tekɔ lo mpomana l’ehemba efula wakoka toshishɛ olowanyi aso ndo sho koka monga l’eshikikelo ɔnɛ Nzambi ayotɔtshɔkɔla naka sho monga la mbetawɔ ndo la dihonga.

14. Lo ndjela Danyele tshapita 6, ngande wakasale Danyɛlɛ akambo la dihonga, ndo etombelo akɔna wakonge?

¹⁴ Danyɛlɛ nde lawɔ akɛnya dia nde aki la mbetawɔ ndo la dihonga etena kakasɛngiya atunyi ande nkumekanga Dariyo dia nde mbidjanga ɔnɛ “untu tshe l’atei a nshi akumi asatu, layotemola etemolatemola kemotshi kana untu ukina, laha we, we khum’ekanga, ndi kakadjemi lu difuku dia tambwe.” Kam’akeye Danyɛlɛ ɔnɛ nkumekanga ambetawɔ didjango sɔ, “ndi akatshu utsha la luudu landi, len’aki adidishi wa luudu landi la mbetama la ladiku hwe, lu leke l’utsha la Jerusalema. Ndi akakhuseka adui tena satu la lushi la lushi, akalombaka [Nzambi k]andi, akawukaka lusaka, uku akandatshaka ntundu.” (Dan. 6:6-10) L’ɔkɔngɔ diko, wakayodjaka Danyɛlɛ lo difuku dia tambwɛ, koko Jehowa akooshimbɛ l’ɔtɛ wa dihonga diande.​—Dan. 6:16-23.

15. a) Ɛnyɛlɔ kakɔna kendana la mbetawɔ ndo la dihonga kakatotshikɛ Akula nde la Piriskila? b) Ɛtɛkɛta waki Yeso wele lo Joani 13:34 alembetshiyawɔ, ndo ngande wɛnyana Akristo efula ngandji ka ngasɔ?

¹⁵ L’ɔtɛ w’akambo amɔtshi wahatɛkɛta Bible, Akula nde la Piriskila ka wadɛnde ‘wakadje nsɛnɔ yawɔ lo waale l’ɔtɛ wa Pɔɔlɔ.’ (Etsha 18:2; Rɔmɔ 16:3, 4) La dihonga tshɛ, vɔ wakasale akambo lo yoho yɔtɔnɛ l’ɛtɛkɛta waki Yeso wata ɔnɛ: “Dimi lambonyosha ɔlɛmbɛ w’oyoyo dia nyu mbokana ngandji. Nyokane ngandji lam’asanyu oko wakamanyoke ngandji.” (Jni. 13:34) Ɛlɛmbɛ wa Mɔsɛ wakadjangaka di’onto nanga  wonyande onto oko wayalangande. (Lew. 19:18) Koko ɔlɛmbɛ waki Yeso wekɔ “oyoyo” lo woho ɔnɛ wele onto kokaka nkimɔ lɔsɛnɔ lande lo wahɔ w’anto akina, oko wakandadisale ndamɛ. Akristo efula mɛnyaka ngandji ka ngasɔ la dihonga tshɛ etena ketawɔwɔ ‘mbidja nsɛnɔ yawɔ lo waale’ lo mbishɛ asekawɔ ambetawudi diaha vɔ ndjakema oma le atunyi awɔ.​—Adia 1 Joani 3:16.

16, 17. Ehemba akɔna wakadje mbetawɔ k’Akristo amɔtshi wa lo ntambe ka ntondo lo waale, ndo ngande wafɔnawɔ la wahomana l’Akristo amɔtshi ɛlɔ kɛnɛ?

¹⁶ Lo ɛnyɛlɔ ka Yeso, Akristo wa lo ntambe ka ntondo wakatɛmɔlaka paka Jehowa la dihonga tshɛ. (Mat. 4:8-10) Vɔ wakatone ntshumba tshɔ, mbuta ate tshelo yakasalaka anto dia ntɛmɔla nkumekanga k’ase Rɔma. (Enda osato.) Lo dibuku diande dimɔtshi (Wanɛ wahomba ndjakema [lo Angɛlɛ]), Daniel Mannix akafunde ate: “Akristo angana ato mbakasɛkaka mbetawɔ kawɔ kaanga mbakawaalamɛka dja ya tshɔ lo difuku dia mbatshumba. Ose lokanu tshɛ akalɔmbamaka dia ntɔla tshɔ ko todja lo difuku dia dja, oma laasɔ ko vɔ mbosha mukanda wɛnya dia nde ambokimɔ olambo ko mbotondja oma lo lokanu. Ntondo k’onto nsala dui sɔ, wakoolembetshiyaka dimɛna ɔnɛ aha nkumekanga mbatɛmɔlande, koko dia mɛnya tsho ɔnɛ nde mbetawɔka dia nkumekanga ekɔ nzambi lo menda dihole dia laadiko diele la nde dia nkumekanga ka Rɔma. Koko, Akristo suke la tshɛ kombetawɔ dia vɔ mbatondja oma lo lokanu lo yoho shɔ.”

¹⁷ Akristo amɔtshi wa nshi nyɛ vɔ lawɔ wakadjama lo mpango ya nkanu y’ase Nazi lɛnɛ akawakoke mvɔ esadi eto, waki la waaso efula wa ntshungɔ oma lo lokanu lo nsinya tsho mukanda wɛnya di’onto ambɔsɛka Jehowa. Koko anto angana ato mbakasinya. Laadiko dia laasɔ, etena kotombi awui wendana la kɔngɔdi lam’asa waa Tutsi la waa Hutu lo wodja wa Rwanda, Ɛmɛnyi wa Jehowa wa lɛkɔ waketawɔ mbidja nsɛnɔ yawɔ lo waale lo kokanɛ lam’asawɔ. Ekɔ ohomba monga la mbetawɔ ndo la dihonga la ntondo k’ehemba wa ngasɔ.

18, 19. Naa bɛnyɛlɔ dimɔtshi diatanema lo Bible di’anto waki la mbetawɔ ndo la dihonga diakoka tokimanyiya dia sho nsambisha dimɛna?

¹⁸ Tekɔ la diɛsɛ dia mbisha lonya l’olimu wa woke wakasha Nzambi ekambi ande, wa mbewoya losango la Diolelo ndo mbetɛ anto ambeki. (Mat. 24:14; 28:19, 20) Ande lowando lele la so le Yeso l’ɔtɛ w’ɛnyɛlɔ kande ka kokele lee! Nde “aketetaka l’osomba l’osomba ndo lo ngelo la ngelo atasambisha lokumu l’ɔlɔlɔ la Diolelo dia Nzambi.” (Luka 8:1) Lo ɛnyɛlɔ kande, sho pombaka monga la mbetawɔ ndo dihonga dia nsambisha losango la Diolelo. Koko diɛsɛ l’ekimanyielo kaki Nzambi, sho kokaka monga la dihonga oko Nɔa laki “osambisha w’akambo w’ɛlɔlɔ” lo “andja wakalole l’anto wa kɔlɔ” waki suke la ndjakema lo Mvula k’elola.​—2 Pet. 2:4, 5.

¹⁹ Dɔmbɛlɔ tokimanyiyaka dia nkotsha ɔkɛndɛ aso wa nsambisha. Ɛnyɛlɔ, etena kakalɔmbɛ ambeki waki Kristo wakahɛnyahɛnyamaka dia vɔ ‘ntɛkɛta awui waki Nzambi la dihonga tshɛ,’ Nzambi akoke dɔmbɛlɔ sɔ. (Adia Etsha 4:29-31.) Naka wɛ mbokaka nsɔnyi dia nsambisha lo luudu la luudu, kete lɔmba Jehowa dia wɛ monga la mbetawɔ ndo la dihonga, ko nde ayokokimanyiya.​—Adia Osambu 66:19, 20. a

20. Oko weso ekambi wa Jehowa, osukɔ akɔna wele la so?

²⁰ Ekɔ tshondo y’okakatanu nsala akambo lo yoho yɔtɔnɛ la lolango laki Nzambi nɛ dia tekɔ lo mpomana l’ehemba l’andja ɔnɛ wa kɔlɔ ndo wambokolɔ dihɔndɔ. Koko Nzambi ekɔ kaamɛ la so ndo Ɔnande mbele Ɔtɛ w’etshumanelo k’Akristo. Ndo nto, tekɔ kaamɛ l’asekaso Ɛmɛnyi wa Jehowa wa l’andja w’otondo ndekana 7 000 000. Kaamɛ la wɔ, nyɛsɔ totetemale monga la mbetawɔ ndo tosambishake lokumu l’ɔlɔlɔ etena kohɔso ɛtɛkɛta wa lo divɛsa diaso dia l’ɔnɔnyi ɔnɛ wata ɔnɛ: ‘Okeketale ndo oyale la dihonga, nɛ dia Jehowa Nzambi kayɛ ekɔ la yɛ.’​—Jas. 1:9.