AMBETA ɛnɔnyi ɛmɔtshi wele Roald nde la Elsebeth, atshukanyi wele la ɛnɔnyi 40 l’ɛmɔtshi waki la lɔsɛnɔ la dimɛna ndo wakadjasɛka la Bergen, osomba wa hende lo wodja wa Norvège lo woke. Roald nde la Elsebeth kaamɛ l’ɔnawɔ la womorato ndo la pami, wakayashaka efula l’akambo wa lo nyuma. Roald aki ekumanyi l’etshumanelo ndo Elsebeth aki ombatshi mboka, etena kele Isabel w’ɔnawɔ la womoto nde la Fabian k’ɔnawɔ la pami waki apandjudi.

Koko lo Ngɔndɔ ka divwa 2009, ase nkumbo kɛsɔ wakɔshi yɛdikɔ ya nsala dui dimɔtshi, mbuta ate tshɔka dia tosambisha lomingu lɔmɔtshi lo ɛtshi kɛmɔtshi ka nkɛtɛ k’anganyi etale. Roald nde la Elsebeth kaamɛ la Fabian leke l’ɛnɔnyi 18, wakatshu otsha lo disɛnga dia Nordkyn diele lo prɔvɛnsɛ ka Finnmark la wedi wa cercle arctique. Etena kakawakome lo ngelo kelɛwɔ Kjøllefjord, vɔ wakasambisha kaamɛ l’anangɛso l’akadiyɛsɔ wakatshu vɔ lawɔ lɛkɔ dia tosambisha. Roald mbutaka ate: “Lam’ele laki l’ɔngɛnɔngɛnɔ efula l’etatelo ka lomingu lɔsɔ, lakɔshi yɛdikɔ ya ndjakongɛ dimɛna l’oyango wa dimi nsambisha lomingu l’otondo.” Koko lo lomingu lakɔ laamɛ, Roald akashisha ɔngɛnɔngɛnɔ ande la shashimuya. Kakɔna kakatombe?

Roald mbutaka ate: “Aha la dimi nongamɛ, Mario lakakambaka oko ombatshi mboka la Finnmark akatombola dia kana sho koka monɔ otsha la Lakselv dia tokimanyiya etshumanelo kaki l’apandjudi 23.” Roald akaambe efula nɛ dia nde konongamɛka dui sɔ. Nde mbutaka ate: “Dimi la Elsebeth takakongɛ dia ntshɔ tokimanyiya lɛnɛ ele ohomba efula w’apandjudi, koko paka etena kayola ana ndo kayowomɔ oma la ngelo.” Koko, kaanga nshi ngana yakawatosambisha lo ɛtshi ka nkɛtɛ kɛsɔ, Roald akɛnyi di’anto efula wakalangaka mbeya Jehowa. Vɔ waki l’ohomba w’ekimanyielo l’etena kakɔ, koko aha l’ɔkɔngɔ wa nshi mɔtshi. Roald mbutaka ate: “Kɛnɛ kakawatɔlɔmbɛ kɛsɔ kakafukutanya nkum’otema kami ndo dimi kondala djɔ l’edja ka nshi efula.” Oma laasɔ, Mario akatshu nde la Roald kaamɛ la nkumbo kande otsha la Lakselv, ngelo kanganyi la Kjøllefjord ka lo sidɛ, kilɔmɛtrɛ oko 240. Mario akalangaka dia Roald nde la nkumbo kande ntshɔ tembola etshumanelo kawɔ ka tshitshɛ.

Lam’akawakome la Lakselv, Andreas lele ekumanyi kɛmɔtshi lɛkɔ akawaetshetsha lo ngelo ndo akawaɛnya Mbalasa ka Diolelo. Ase etshumanelo wakaalongola la wangasanu tshɛ ndo wakatɛ Roald nde la Elsebeth ɔnɛ naka vɔ nangaka, vɔ mbeyaka monɔ lɛkɔ dia taakimanyiya. La yema y’ɔmɔnɔmɔnɔ, Andreas akate dia nde akashile nɔngɔsɔla ɔkɔnya ɔmɔtshi dia nkɔnya Roald nde la Fabian. Kakɔna kakahombe Roald nde la nkumbo kande nsala?

Fabian akate mbala kakɔ ɔtɔi ate: “Dimi bu la nsaki ka monɔ lendo.” Kanyi ya ntshika angɛnyi ande wakole la nde l’etshumanelo kawɔ, ko todjasɛ lo ngielongelo ya tshitshɛ kombɔngɛnyangɛnya. Ndo nto, laasɔ ko nde atamane kalasa kande k’awui wa kura. Koko, etena kakawambola Isabel (laki aya l’ɛnɔnyi 21) dia kana nde nangaka monɔ, nde akate ate: “Kɛsɔ mbokomokombolaka.” Koko nde akakotsha ate: “Lakakane yimba efula ndo lakayambolaka ɔnɛ ‘onde ekɔ yɛdikɔ ya dimɛna? Langa ntshika angɛnyi ami? Ko kana dimi pombaka ntshikala lo etshumanelo kami lɛnɛ akɛndakɛnda akambo dimɛna?’” Yɛdikɔ yakɔna yakɔshi Elsebeth lo dikambo sɔ? Nde mbutaka ate: “Lakɛnyi di’ɔsɔ aki ɔkɛndɛ wambosha Jehowa nkumbo kaso, koko lakakanyiyaka nto dia luudu laso lakiso ma la nɔngɔsɔla ndo diangɔ diaso di’efula diaki lɔkɔ diakatadiɛnɛ l’edja k’ɛnɔnyi 25 dia dikondja.”

Kam’akashile lomingu la laande, Roald nde la nkumbo kande wakakalola otsha la Bergen, koko vɔ wakakanyiyaka anangɛwɔ l’akadiyɛwɔ w’Akristo wa la Lakselv, lɛnɛ anganyiwɔ la wɔ kilɔmɛtrɛ oko 2 100. Elsebeth mbutaka ate: “Lakalɔmbaka Jehowa efula lo dikambo diawɔ ndo lakasawolaka l’angɛnyi wakatatokondja lɛkɔ lo tomanɛka foto ndo keketshanaka.” Roald mbutaka ate: “Lakahombe nsala nshi efula dia mbetawɔ kanyi ya monɔ. Ndo nto, lakahombe nsɛdingola akambo dimɛna nɛ dia shoamɛ mbakahombe toyasɛnyaka. Ko kakɔna kakatasale dia nkotsha oyango ɔsɔ? Lakalɔmbɛ Jehowa efula, lakasawola la nkumbo kami ndo l’anangɛso akina wambohokɔ akambo.” Fabian mbutaka ate: “Lo yɛdikɔ yakamatalekaka nkana yimba lo dikambo sɔ, mbakamatalekaka nshihodia ɔnɛ dimi bu la shadiya ya ntona dia monɔ lɛkɔ. Lakalɔmbɛ Jehowa mbala efula ndo nsaki kami ka monɔ kakayafulaka yema yema.” Ko Isabel nde akandasale? Dia nde ndjalɔngɔsɔla dimɛna la ntondo ka vɔ monɔ, nde akatatɛ nkamba oko ombatshi mboka l’etshumanelo kawɔ. L’ɔkɔngɔ wa nde nsambisha oko ombatshi mboka l’edja ka ngɔndɔ shamalo ndo lo salaka wekelo wa Bible w’onto ndamɛ mbala la mbala, nde akayɔsa yɛdikɔ ya monɔ.

Lam’ele vɔ waki la nsaki ka ntshɔ dia tokimanyiya lɛnɛ ewɔ l’ohomba efula w’apandjudi, nkumbo kɛsɔ kakɔshi yɛdikɔ ya nkotsha oyango ɔsɔ. Roald akakambaka olimu wa dimɛna efula, koko nde akalɔmbɛ vakashi y’ɔnɔnyi w’otondo. Owandji ande w’olimu akawotɛ dia lo dihole dia mbetsha ɔnɔnyi w’otondo, nde mbeyaka kambaka nshi ngana tsho, mbuta ate mingu hiende ko momuya mingu shamalo. Roald mbutaka ate: “Difuto diami diakakitakita efula l’ɔtɛ wa dui sɔ, koko takasɛnaka la yema yakawafutaka.”

Elsebeth mbutaka ate: “Omɛmi akamumbola dia sho nyanga luudu la Lakselv ko mbidja afutedi lo luudu laso la la Bergen. Dui sɔ diakatɔsɛ wenya efula, koko takaditondoya. L’ɔkɔngɔ w’etena kɛmɔtshi, anaso wakayokondjaka tolimulimu, wakatatɛ tokimanyiya lo kɛnɛ kendana l’osombelo wa mbo ya ndɛ ndo lo ofutelo wa mboka.”

Isabel mbutaka ate: “Lam’ele osomba wakatonɔ waki tshitshɛ efula, laki l’okakatanu dia ntana djemulimu dia ndjakotshɛka ehomba ami oko ombatshi wemi mboka. Lo tena dimɔtshi, lakayoshisha elongamelo  ka ntana olimu.” Koko, lo mbetawɔ nkamba tolimulimu tɔmɔtshi takandatane, Isabel akayonga l’akoka wa ndjakotshɛ ehomba ande. Ko Fabian nde akandasale? Nde mbutaka ate: “Dia nshidiya kalasa kami, lakatakambaka tolimulimu tɔmɔtshi oko onto leeka. Ngasɔ mbakamasale etena kakimi la Lakselv. L’ɔkɔngɔ wa dimi nsala ɛgzamɛ ɔmɔtshi ndo nkotsha, wakambidje l’olimu wendana l’akambo wa kura.”

Marelius nde la Kesia ka wadɛnde vɔ lawɔ wakalangaka ntshɔ dia tokamba lɛnɛ ewɔ l’ohomba efula w’apandjudi. Marelius lele l’ɛnɔnyi 29 mbutaka ɔnɛ: “Asawo ndo ɛkɔnya wakasalema lo kɛnɛ kendana l’olimu w’ombatshi mboka lo nsanganya ya weke, akatshutshuya dia dimi nkana yimba dia mpamia olimu ami.” Koko, Kesia lele l’ɛnɔnyi 26, akɔsaka dia nde hakoke monɔ ko ntshika ase nkumbo kande. Nde mbutaka ate: “Laki la wɔma wa mangana l’anto wakamokaka ngandji.” Ndo nto, Marelius akakambaka lushi l’otondo dia mfuta luudu lakawafutɛka. Nde mbutaka ate: “L’ekimanyielo ka Jehowa ndo lo mbɔlɔmba efula, takasale etshikitanu ndo takonɔ.” Ntondotondo, vɔ waketshaka wenya efula lo mbekaka Bible. L’ɔkɔngɔ diko, vɔ wakayosondja luudu lawɔ, wakatshike olimu awɔ ndo wakonɔ otsha l’osomba wa Alta, lo nɔrdɛ ka Norvège lo Ngɔndɔ k’enanɛi 2011. Dia vɔ ndjasɛnya lɛkɔ oko wakiwɔ ambatshi mboka, Marelius akakambaka oko kɔtabɛlɛ ndo Kesia akakambaka oko kapita lo makashinyi ɔmɔtshi.

Knut nde la Lisbeth, atshukanyi wele l’ɛnɔnyi 35 wakanandema efula oma l’ɛkɔndɔ wele lo Annuaire wa wanɛ wakatshu dia tokamba lɛnɛ akiwɔ l’ohomba efula w’apandjudi wa Diolelo. Lisbeth mbutaka ate: “Bɛnyɛlɔ sɔ diakatokimanyiya dia sho nkana yimba dia ntshɔ tokimanyiya lo wedja ekina, koko lakengengaka nɛ dia laki la taamu ɔnɛ onto oko dimi hakokaki nsala dui dia ngasɔ.” Koko, vɔ wakɔshi tɛdikɔ tahombama dia nkotsha oyango awɔ ɔsɔ. Knut mbutaka ate: “Takasondja luudu laso, takalame falanga ndo takonɔ kaamɛ la mama kami. L’ɔkɔngɔ diko, dia menda kana sho kokaka ntshɔ dia tokamba lo wodja okina, takonɔ l’etshumanelo kasala nsanganya lo Angɛlɛ la Bergen l’edja k’ɔnɔnyi w’otondo ndo takatodjasɛka laka waa Lisbeth.” Edja efula la ntondo, Knut nde la Lisbeth waki la nsaki ka ntshɔ lo wodja okina ndo wakande lɔkɛndɔ l’otale efula otsha lo wodja wa Uganda. Vɔ wakakalolaka la Norvège dia tokamba djemulimu mɔtshi ngɔndɔ hiende lo ɔnɔnyi. Kɛsɔ akaakimanyiyaka dia vɔ nkondja woho wa ndjasɛnya ndo ntetemala monga esambisha wa lo tena tshɛ la Ouganda.

Ɛtshɔkɔ akɔna wakakondja ekambi ɛsɔ tshɛ waketawɔ dia tokimanyiya anto akina? Roald mbutaka ate: “Lanɛ, teetsha wenya efula kaamɛ oko ase nkumbo oleki la Bergen. Tamboleka monga la diɔtɔnganelo dia dimɛna lo nkumbo. Ehamelo wambosala anaso wekɔ tshondo y’ɔtshɔkɔ.” Nde kotshaka ate: “Laadiko dia laasɔ, tambɔdia demba lo kɛnɛ kendana l’ekiyanu wa lomombo la lo demba. Diɔ diaya bu nto la nɛmɔ woho wakatadiɔsaka ntondo.”

Elsebeth akɛnyi ohomba wa mbeka ɔtɛkɛta okina. Lande na? Lo ɛtshi ka nkɛtɛ kaki etshumanelo ka  Lakselv mbaki ndo ngelo ka Karasjok lɛnɛ akalekaka mbidjasɛ dioho dielɛwɔ Sami, mbuta ate anto wakaye oma lo ngelo ya lo nɔrdɛ ka Norvège, Suède, Finlande ndo Russie. Dia monga l’akoka wa nsambisha anto asɔ, Elsebeth akatatɛ mbeka ɔtɛkɛta wa Sami. Kakianɛ nde owasambisha awui amɔtshi l’ɔtɛkɛta ɔsɔ. Onde nde ekɔ lo ngɛnangɛna ɛtshi kande ka nkɛtɛ k’oyoyo kɛsɔ? Nde mbutaka ate: “Lekɔ lo nɔmbɔla ambeki wa Bible asamalo. Lekɔ l’ɔngɛnɔngɛnɔ w’efula dia nkamba lanɛ.”

Fabian lakamba nshi nyɛ oko ombatshi mboka wa pondjo ndo oko okambi wakimanyiya, mbutaka dia nde la Isabel wakakimanyiya ɛlɔngɔlɔngɔ esato wa l’etshumanelo kawɔ k’oyoyo waki l’ohomba w’ekeketshelo dia vɔ ndeka ndjasha l’akambo wa lo nyuma. Kakianɛ, ɛlɔngɔlɔngɔ akɔ esato woyasha efula l’esambishelo. Ahende l’atei awɔ wambobatizama ndo wakakambe oko ambatshi mboka wa tshanda lo Ngɔndɔ ka sato 2012. Ɔmɔtshi la l’atei awɔ lakatatɛ mbɔla lo nyuma, akasha Fabian nde la Isabel losaka lo woho wakawokimanyiya dia nde “nyomokeketala lo nyuma.” Fabian mbutaka ate: “Lakonge l’ɔngɛnɔngɛnɔ w’efula etena kakandataka akambo asɔ. Ande ɔngɛnɔngɛnɔ waya lo nkimanyiya onto ɔmɔtshi lo nyuma lee!” Isabel mbutaka ate: “Lo ntshɔ dia tokamba lo wodja okina, ‘lakonganɛ ko lakɛnyi dia Jehowa ekɔ ɔlɔlɔ.’” (Osam. 34:8) Nde kotshaka ate: “Laadiko dia laasɔ, nkamba lanɛ ekɔ dui dia dimɛna efula.”

Marelius nde la Kesia waya la lɔsɛnɔ l’ɔsɛlɛngɛ, koko lele l’ɔngɛnɔngɛnɔ. Etshumanelo ka la Alta kakawonɔ kaya kakianɛ l’apandjudi 41. Marelius mbutaka ate: “Etena kokami sso l’ɔkɔngɔ, dimi keketshamaka efula lo menda woho wambotshikitana nsɛnɔ yaso. Sho mbishaka Jehowa losaka efula lo woho wotookambɛ oko ambatshi mboka lanɛ. Ɔsɔ mbele dui dialeka tosha ɔngɛnɔngɛnɔ.” Kesia kotshaka ate: “Lakɛnyi di’ekɔ ohomba ndjaɛkɛ tshɛ le Jehowa ndo nde akatokotshɛka ehomba aso. Lakɛnyi nto dia mangana l’ewotɔ ami akakimanyiya dia dimi mbɔsa wenya wakatetshaka kaamɛ la nɛmɔ. Hakoke pondjo nyanga l’ɔtɛ wa yɛdikɔ yakatɔshi.”

Ko ngande wele Knut nde la Lisbeth lo wodja wa Ouganda? Knut kɔndɔlaka ate: “Lakɔshi etena ka ndjaekesanyiya la mbekelo ya lɛkɔ. Taki l’okakatanu wendana l’ashi, la kura ndo hemɔ ya l’otema yakatɛnya paa oma l’etatelo, koko yakayoshila, ndo tɔɔlɔmbɔla wekelo wa Bible efula.” Lisbeth nde lawɔ mbutaka ate: “Ekɔ tongelongelo tɔmɔtshi tosukanyi la so tele, dia nkoma lɛkɔ, onto pombaka nsala wonya wa tango l’etenyi, koko esambishelo katakomaka lɛkɔ. Etena katshɔso lɛkɔ dia tosambisha, sho tanaka anto waadɛ Bible ndo watɔlɔmba dia sho mbeka la wɔ. Mbeka Bible l’anto wele l’okitshakitsha wa ngasɔ ekɔ dui di’ɔngɛnɔngɛnɔ wahadjama anya!”

Ande ɔngɛnɔngɛnɔ wele la Ɔnɔmbɔdi aso Yeso Kristo etena kɛnande oma l’olongo woho wele olimu w’esambishelo wakandatatɛ watakambema dimɛna ndo watakokanɛ lo nkɛtɛ k’otondo lee! Lo mɛtɛ, ekambi waki Nzambi tshɛ mongaka l’ɔngɛnɔngɛnɔ w’efula etena kayakimɔwɔ la lolango dia nkotsha didjango diaki Yeso diata ɔnɛ: “Nyetɛ anto wa lo wedja tshɛ ambeki.”​—Mat. 28:19, 20.