Etena kakimi l’ɛnɔnyi dikumi eto lo 1985, ana w’ase Cambodge wakaye dia ndjɔtɔ lo kalasa yakamɔtɔka lo prɔvɛnsɛ ka Columbus, l’osomba wa Ohio l’États-Unis. Ɔmɔtshi l’atei awɔ akeyaka yema y’Angɛlɛ. L’ekimanyielo k’esato, nde akatatɛ kɔndwɛmi ɛkɔndɔ wa wɔma wendana la woho wakawasoyaka anto, wakawaadiakaka ndo wakalawɔka amɔtshi l’atei awɔ. Mbala tshɛ kakamohɔka anasɔ l’otsho lakalelaka. Lakakombolaka mbasambisha awui wendana la elongamelo ka Paradiso ndo ka eolwelo, koko vɔ kombokaka ɔtɛkɛta ami. Kaanga mbakimi leke dikɛnda, lakatatɛ mbeka ɔtɛkɛta wa cambodgien dia dimi mbetsha asekami wa la kalasa awui wendana la Jehowa. Koko dimi kondekaka nshihodia shɛngiya yakahombe ndjonga la yɛdikɔ shɔ lo lɔsɛnɔ lami.

Lakadiɛnɛ dia mbeka ɔtɛkɛta wa cambodgien. Nkɔkɔ ate kwɛ, tshike lakatshike mbeka ɔtɛkɛta ɔsɔ mbala hiende y’etondo, koko Jehowa akakimanyiya lo tshimbo y’ambutshi ami. L’edjedja ka wonya, embetsha ami l’asekami wa la kalasa wakayotatɛ mbishami kanyi ya nyanga olimu wa falanga efula. Koko lam’ele lakakombolaka nkamba olimu w’ombatshi mboka, lakasɔnɛ dia mbɔtɔ kalasa ya sekɔndɛrɛ tsho kele kakondja olimu wahɔmbɔsɛka lushi l’otondo dia dimi nkotsha oyango ami. Lakokanaka l’ambatshi mboka amɔtshi dia sambishaka la wɔ l’ɔkɔngɔ wa kalasa. Lakayakimɔ la lolango dia mbetsha asekami ambeki Angɛlɛ ndo dui sɔ diakayombelaka wahɔ efula l’ɔkɔngɔ.

Etena kakimi l’ɛnɔnyi 16, lakoke dia anangɛso l’akadiyɛso amɔtshi watɛkɛta cambodgien wekɔ la Long Beach, Californie, l’États-Unis. Lakatɛnanaka la wɔ ndo lakatekaka woho wa mbadia cambodgien. Kam’akamalongola dipɔlɔmɛ, lakatatɛ nkamba olimu w’ombatshi mboka ndo lakatetemala nsambisha asukanyi aso wakatɛkɛtaka cambodgien. Lam’akamayokotshaka ɛnɔnyi 18, lakatatɛ mbɔsa akumi wa monɔ otsha la Cambodge. Kaanga mbakidiɔ dihole dia waale, lakeyaka dia lo anto miliyɔ dikumi wadjasɛ la Cambodge, paka anto angana ato mbambosambishama. L’etena kɛsɔ, aki paka etshumanelo ɔtɔi kaki l’apandjudi 13 lo wodja w’otondo. Laki l’ɛnɔnyi 19 etena kakamakome mbala ka ntondo la Cambodge. Ɛnɔnyi ehende oma laasɔ, lakayonɔka otsha lɛkɔ. Lakakondja olimu waki kɔmbɔsɛkami lushi l’otondo wa kadimolaka ndo mbetshaka anto Angɛlɛ dia nkondja woho wa ndjasɛnya ndo sambishaka. L’ɔkɔngɔ diko, lakayotshukaka wadi laki la mi eyango waamɛ. Dimi la nde tekɔ l’ɔngɛnɔngɛnɔ lo woho wambotokimanyiya ase Cambodge efula dia vɔ nkoma Ɛmɛnyi wa Jehowa.

Jehowa akambisha ‘kɛnɛ kalanga otema ami.’ (Osam. 37:4) Olimu wa mbetɛ anto ambeki mbele olimu woleki tshɛ dimɛna. L’edja k’ɛnɔnyi 16 wamomosala la Cambodge, etshumanelo ɔtɔi kaki l’apandjudi 13 kambota tshumanelo 12 ndo elui 4.—Kɔndwama oma le Jason Blackwell.