1. Naa waaso amɔtshi wakondja ɛlɔngɔlɔngɔ w’Akristo efula?

TEKƆ lo nsɛna lo tena dia wolo. Nshi nyɛ, miliyɔ y’anto wekɔ lo ndja l’ɔtɛmwɛlɔ wa mɛtɛ woho wahatasalemaka ndooko lushi. (Ɛny. 7:9, 10) Ɛlɔngɔlɔngɔ l’esekaseka efula wambeya akambo efula wa lo lɔsɛnɔ etena kasambishawɔ anto akina awui wa mɛtɛ wa lo Bible. (Ɛny. 22:17) Ɛlɔngɔlɔngɔ ɛmɔtshi wekɔ lo mbetsha anto Bible ndo wekɔ lo mbakimanyiya dia monga la nsɛnɔ y’amɛna. Akina wekɔ lo nsambisha lokumu l’ɔlɔlɔ l’ohetoheto lo bɛtshi dia nkɛtɛ diatɛkɛtawɔ ɛtɛkɛta ekina. (Osam. 110:3; Is. 52:7) Kakɔna kahombayɛ nsala dia wɛ lawɔ ndjasha l’olimu ɔsɔ?

2. Ngande wele ɛnyɛlɔ ka Timɔte mɛnyaka dia Jehowa mbishaka kaanga ɛlɔngɔlɔngɔ ɛkɛndɛ? (Enda osato wele lo mbɔtwɛlɔ.)

² Oko weyɛ ɔlɔngɔlɔngɔ, wɛ koka nsala ɛsɔnwɛlɔ wakoka ndjokokimanyiya dia monga la waɛsɛ l’olimu waki Nzambi. Ɛnyɛlɔ, Timɔte k’ose Lustɛra akɔshi tɛdikɔ t’amɛna takayokonyaka dia nde ndjonga misiɔnɛrɛ etena kakinde aya suke la nkotsha ɛnɔnyi 20 kana eke kodikotshaka ɛnɔnyi 20 l’ɛmɔtshi. (Etsha 16:1-3) Mɛnamaka dia ngɔndɔ ngana oma laasɔ, l’ɔkɔngɔ w’ɔpɔstɔlɔ Pɔɔlɔ monɔ oma l’etshumanelo ka la Tɛsalɔnika kaki keke kambatema l’ɔtɛ wakandahɛnyahɛnyama efula lɛkɔ, nde akayotoma Timɔte laki eke dikɛnda la Tɛsalɔnika dia tokeketsha anangɛso. (Etsha 17:5-15; 1 Tɛs. 3:1, 2, 6) Oko le yɛ, ngande wakayaoke Timɔte etena kakandalongola ɔkɛndɛ ɔsɔ?

3. Naa yɛdikɔ yoleki ohomba yakoka ɔlɔngɔlɔngɔ mbɔsa, ndo etena kakɔna kakokande ndjiɔsa?

³ Etena kakoka onto mbɔsa tɛdikɔ t’ohomba lo lɔsɛnɔ lande ele etena kekende ɔlɔngɔlɔngɔ kana osekaseka. Koko yɛdikɔ yoleki ohomba yahombayɛ mbɔsa ele ya kambɛ Jehowa. Naa etena koleki dimɛna ka mbɔsa yɛdikɔ shɔ? Jehowa mbutaka ate: “Okone uhoki utungi aye lu nshi yaye y’olongo a pami.” (Und. 12:1) Yoho yoleki dimɛna ya ‘mbohɔ’ Jehowa ele mbokambɛ la tshondo tshɛ. (Euh. 10:12) Yɛdikɔ yamboyɔsa ya kambɛ Nzambi la tshondo tshɛ mbele yɛdikɔ yoleki ohomba. Yɔ yayonga la shɛngiya lo nshi yayɛ yayaye.—Osam. 71:5.

4. Naa tɛdikɔ t’ohomba tayonga la shɛngiya le ɔlɔngɔlɔngɔ lo woho wakambɛnde Nzambi?

⁴ Ekɔ mɛtɛ diaha yɛdikɔ ya kambɛ Jehowa tsho mbayonga la shɛngiya lo lɔsɛnɔ layɛ. Ɛnyɛlɔ, lushi lɔmɔtshi wɛ ayɔsa yɛdikɔ ya tshukana, nsɔna onto layotshukana la yɛ kana kɛnɛ kakokayɛ salaka dia ndjasɛnya. Ɔsɔ ekɔ tɛdikɔ t’ohomba, koko wɛ pombaka tɔshi ntondo yɛdikɔ ya kambɛ Jehowa l’otema ɔtɔi naka kokaka. (Euh. 30:19, 20) Lande na? Nɛ dia tɛdikɔ tɔsɔ tekɔ la shɛngiya lam’asatɔ. Yɛdikɔ yayoyɔsa lo kɛnɛ kendana la diwala ndo l’olimu ayonga la shɛngiya lo woho wakambɛyɛ Nzambi. (Ɛdika la Luka 14:16-20.) Lo wedi okina, nsaki kayɛ ka kambɛ Nzambi kayonga la shɛngiya lo kɛnɛ kendana la diwala ndo l’olimu. Diakɔ diele, wɛ pombaka mbɔsa tɛdikɔ toleki ohomba la ntondo ka wɛ ndjɔsa tɛdikɔ tokina.—Fil. 1:10.

5, 6. Kɔndɔla ɔkɔndɔ wɛnya dia mbɔsa tɛdikɔ t’amɛna mbishaka onto ɔngɛnɔngɛnɔ lo lɔsɛnɔ. (Enda ndo sawo diele l’ɔtɛ a dui ɔnɛ: “Ɔsɔnwɛlɔ wakamasale etena kakimi dikɛnda” lo numɛlɔ kɛnɛ.)

⁵ L’ɔkɔngɔ wa wɛ mbɔsa yɛdikɔ ya kambɛ Nzambi, wɛ pombaka nsala eyangelo dia mbeya kɛnɛ kakɔlɔmbande dia wɛ nsala, ko oma laasɔ wɛ menda yoho yayoyookambɛ. Ɔnangɛso ɔmɔtshi l’ose Japon akafunde ate: “Lam’akimi l’ɛnɔnyi 14, lakasambisha lushi lɔmɔtshi l’ekumanyi kɛmɔtshi kakɛnyi dia dimi kɔngɛnangɛnaka olimu w’esambishelo. La dilɛmiɛlɔ tshɛ, nde akambutɛ ate: ‘Yuichiro, naka wɛ ambokalola la ngelo, kokanyiya efula k’ɛlɔlɔ wambokosalɛ Jehowa.’ Lakasale kɛnɛ kakandambutɛ ndo l’edja ka nshi efula lakatetemala nkana yimba ndo nsala alɔmbɛlɔ. Lakatatɛ ntshikitanya ekanelo kami ka yimba yema yema ndo kombeta edja, lakɛnyi dia laya l’ɔngɛnɔngɛnɔ wa kambɛ Jehowa. Lakangɛnangɛnaka mbadia awui wendana la waa misiɔnɛrɛ ndo lakayotatɛ nkanyiya woho wakamakoke kambɛ Nzambi la tshondo yami tshɛ.”

⁶ Yuichiro tetemalaka mbuta ate: “Lakatatɛ mbɔsa tɛdikɔ takakoke ndjokimanyiya lushi lɔmɔtshi dia dimi tokambɛ Jehowa lo wedja ekina. Ɛnyɛlɔ, lakɔshi yɛdikɔ ya mbeka Angɛlɛ. Etena kakamashidiya kalasa, lakasɔnɛ olimu wa mbetshaka Angɛlɛ waki kɔmbɔsɛkami wenya efula dia dimi kambaka olimu w’ombatshi mboka. Etena kakamakotsha ɛnɔnyi 20, lakatatɛ mbeka mongolien ndo lakayokondja diɛsɛ dia tenda olui w’anangɛso w’oma la Mongolie. Ɛnɔnyi ehende oma laasɔ, mbuta ate lo 2007, lakayotshɔka la Mongolie. Etena kakamatosambishaka l’ambatshi mboka amɔtshi, lakɛnyi di’anto efula waki la nsaki k’akambo wa mɛtɛ ndo dui sɔ diakatshutshuya dia monɔ lɛkɔ ko taasambisha. Lakakalola la Japon dia toyalɔngɔsɔla. Lakatatɛ nkamba olimu w’ombatshi mboka la Mongolie lo Ngɔndɔ ka nɛi 2008. Koko lɔsɛnɔ keema wɔdu lɛkɔ. Lam’ele anto mbetawɔka losango la Diolelo, dimi mbakimanyiyaka dia vɔ ndjasukanya la Jehowa. Lambɛna dia lakasale ɔsɔnwɛlɔ woleki dimɛna lo lɔsɛnɔ lami.”

7. Ɛsɔnwɛlɔ akɔna wahomba ɛlɔngɔlɔngɔ nsala, ndo ɛnyɛlɔ kakɔna kakaatshikɛ Mɔsɛ?

⁷ Onto l’onto pombaka mbɔsa tɛdikɔ tande ndamɛ lo kɛnɛ kendana la woho wayondokamba la lɔsɛnɔ lande oko wende Ɔmɛnyi wa Jehowa. (Jas. 24:15) Hatokoke kɔsɛ  yɛdikɔ ya tshukana, onto lahomba tshukana la yɛ kana olimu wahombayɛ nkamba. Aha sho mbahomba kotɛ woho w’olimu wahombayɛ nkamba ndo kalasa yahombayɛ mbɔtɔ. Lande na? Nɛ dia ɛlɔngɔlɔngɔ ɛmɔtshi w’Akristo mbidjasɛ lo ngelo yele anto bu l’ekondjelo efula, koko akina mbidjasɛ l’esomba wa weke wele anto wekɔ l’ekondjelo k’efula. Aha la taamu, lonto, akoka, diewo, ehomba ndo mbetawɔ kele l’ɛlɔngɔlɔngɔ ntshikitana lo ndjela ahole wadjasɛwɔ. Ondo wɛ ntshikitana l’ɛlɔngɔlɔngɔ ekina oko wakatshikitana Mɔsɛ l’ɛlɔngɔlɔngɔ ekina w’ase Hɛbɛru l’Edjibito. Ɛnyɛlɔ, oko wakinde ɔnaki ɔna Farawɔ la womoto, Mɔsɛ aki l’ɔngɔnyi ndo akɔtɔ kalasa y’ase Edjibito koko ɛlɔngɔlɔngɔ ekina w’ase Hɛbɛru waki ɛhɔmbɔ. (Etum. 1:13, 14; Etsha 7:21, 22) Oko wasɛnayɛ lo tena dia wolo mbakawasɛnaka ndo vɔ. (Etum. 19:4-6) Onto l’onto akahombe nsɔna woho wakandahombe nkamba la lɔsɛnɔ lande. Mɔsɛ lo wedi ande akasale ɔsɔnwɛlɔ wa dimɛna.—Adia Hɛbɛru 11:24-27.

8. Anto akɔna wakoka nkimanyiya ɛlɔngɔlɔngɔ walanga mbɔsa tɛdikɔ lo nsɛnɔ yawɔ?

⁸ Jehowa ekɔ lo kokimanyiya dia wɛ nsala ɛsɔnwɛlɔ w’amɛna lo nshi yayɛ y’ɔlɔngɔlɔngɔ. Nde ekɔ lo kosha alako wele oko atɔndɔ wakoka nkamba la yɛ etena kekeyɛ ɔlɔngɔlɔngɔ. (Osam. 32:8) Laadiko dia laasɔ, ambutshi ayɛ w’Akristo ndo dikumanyi dia l’etshumanelo koka kokimanyiya dia wɛ nkamba l’atɔndɔ akɔ. (Tuk. 1:8, 9) Ɛsɔ tɔsɛdingole atɔndɔ asato wa lo Bible wakoka kokimanyiya dia wɛ nsala ɛsɔnwɛlɔ w’amɛna wakoka monga la shɛngiya y’ɔlɔlɔ lo nshi yayɛ yayaye.

9. a) Ngande wakatosha Jehowa nɛmɔ etena kakandatotonge? b) Tɔndɔ diata ɔnɛ “nyotetemale nyanga ntondo Diolelo” mbishaka ɛlɔngɔlɔngɔ waaso akɔna?

⁹ Tetemala nyanga ntondo Diolelo la losembwe la Nzambi. (Adia Mateo 6:19-21, 24-26, 31-34.) Jehowa akatosha nɛmɔ lo totonga la lotshungɔ la nsɔna kɛnɛ kalangaso. Nde hatɔlɔmbɛ dia sho mbetshaka wenya aso tshɛ l’esambishelo. Koko Yeso akatosha tɔndɔ di’ohomba efula dia sho nyanga ntondotondo Diolelo. Yoho yayoyokamba la tɔndɔ sɔ ayokosha waaso dia wɛ mɛnya Nzambi ngandji kawokayɛ, woho wayakiyanyayɛ dikambo di’anto akina ndo lowando lele la yɛ lo lɔsɛnɔ la pondjo lalongamɛso. Naka wɛ olanga tshukana kana nkamba olimu, kete yambola kana ɛsɔnwɛlɔ ayɛ wayokokonya dia ndjakiyanyaka di’ehomba ayɛ wa l’emunyi kana wayɛnya ohetoheto wele la yɛ lo kɛnɛ kendana la Diolelo diaki Nzambi ndo losembwe lande.

10. Kakɔna kakasha Yeso ɔngɛnɔngɛnɔ, ndo ɛsɔnwɛlɔ akɔna wayokela ɔngɛnɔngɛnɔ?

¹⁰ Onga l’ɔngɛnɔngɛnɔ lo kambɛ anto akina. (Adia Etsha 20:20, 21, 24, 35.) Yeso akatetsha tɔndɔ di’ohomba efula sɔ. Nde aki l’ɔngɛnɔngɛnɔ nɛ dia nde aketsha lolango la She la ntondo ka lolango lande. Yeso aki l’ɔngɛnɔngɛnɔ lo menda woho waketawɔka anto waki l’etema w’ɛlɔlɔ lokumu l’ɔlɔlɔ la Diolelo. (Luka 10:21; Jni. 4:34) Ondo wɛ ambongaka l’ɔlɔ waya lo nkimanyiya anto akina. Naka wɛ mbɔsa tɛdikɔ toleki weke lo lɔsɛnɔ layɛ lo ndjela atɔndɔ wakatetsha Yeso asɔ, kete wɛ ayonga l’ɔngɛnɔngɛnɔ w’efula ndo Jehowa ayɔngɛnangɛna.—Tuk. 27:11.

11. Lande na kakashisha Baruka ɔngɛnɔngɛnɔ ande, ndo dako diakɔna diakawosha Jehowa?

¹¹ Ɔngɛnɔngɛnɔ woleki woke ndjaka lo kambɛ Jehowa. (Tuk. 16:20) Dui sɔ mbakohɛ Baruka wa sekeletɛlɛ kaki Jɛrɛmiya. L’etena kɛmɔtshi, nde kɔngɛnangɛna ntetemala kambɛ Jehowa. Jehowa akawotɛ ate: “We atuyayangelaka akambu a waki? Tâyangaki! Enda, dimi lutsha mbela elanyelu le antu tshe, keli dimi layukusha lumu laye, uku engo ka dimbu le ye lu ahuli tshe wayuyutatshokaka.” (Jer. 45:3, 5) Oko le yɛ, onde Baruka akakoke monga l’ɔngɛnɔngɛnɔ lo nyanga diangɔ dia weke ko kana lo shimbamɛ  l’elanyelo ka Jɛrusalɛma l’ɔtɛ wakandakambɛka Nzambi la kɔlamelo?—Jak. 1:12.

12. Ɔsɔnwɛlɔ akɔna wakasale Ramiro dia nde monga l’ɔngɛnɔngɛnɔ lo lɔsɛnɔ?

¹² Ɔnangɛso Ramiro ekɔ l’atei wa wanɛ wakakondja ɔngɛnɔngɛnɔ waya lo kambɛ anto akina. Nde mbutaka ate: “Dimi lakotɔ lo nkumbo ka wola kadjasɛ lo ngelo kɛmɔtshi ka l’akona wa Andes. Laki la diaaso dia mbɔtɔ kalasa y’adidi etena kaketawɔ enondo ami dia futɛmi akuta. Koko laasɔ ko dimi oma la batizama ndo ombatshi mboka ɔmɔtshi akambutɛ dia sho tosambisha l’osomba ɔmɔtshi wa tshitshɛ. Takatshu lɛsɔ, lakatekaka woho wa minyaka divo dia dimi kondjaka woho wa ndjakimanyiyaka. Anto efula waketawɔka akambo wakataasambishaka. Oma laasɔ, lakayotshɔka l’etshumanelo kakasalaka nsanganya l’ɔtɛkɛta okina. Kakianɛ, aya oko ɛnɔnyi dikumi wakambami olimu wa lo tena tshɛ. Ndooko kalasa yotomɔtɔ ko mbelami ɔngɛnɔngɛnɔ wambonga la mi lo nkimanyiya anto dia mbeka akambo wa mɛtɛ l’ɔtɛkɛta awɔ wa lootɔ.”

13. Lande na kele etena keke onto ɔlɔngɔlɔngɔ mbele etena koleki dimɛna ka kambɛ Jehowa la tshondo tshɛ?

¹³ Ohɔke Otungi ayɛ lo nshi yayɛ y’ɔlɔngɔ a pami. (Adia Undaki 12:1.) Totake ɔnɛ paka lambokondja olimu wa dimɛna ko dimi ndjokambɛ Jehowa l’ɔkɔngɔ. Etena kekeyɛ ɔlɔngɔlɔngɔ mbele etena ka dimɛna kahombayɛ ntatɛ kambɛ Jehowa. Ɛlɔngɔlɔngɔ efula bu l’ɛkɛndɛ wa lo nkumbo, wekɔ la yoonge ya dimɛna ndo wekɔ l’akoka wa nkamba elimu wa wolo. Ko kakɔna kayoyosalɛ Jehowa lo nshi yayɛ y’ɔlɔngɔlɔngɔ? Mbeyaka monga ko wɛ ekɔ la nsaki ka nkoma ombatshi mboka, ntshɔ dia tokamba l’ɛtshi ka nkɛtɛ katɛkɛtawɔ ɔtɛkɛta okina kana wɛ mbeyaka mɛna yoho kina yakokayɛ ndeka nkimanyiya etshumanelo keyɛ. Oyadi oyango akɔna tshɛ wayoyoyadjɛ dia kambɛ Nzambi, wɛ ayonga l’ohomba wa nkamba djimulimu dia ndjasɛnyaka. Ko olimu wa ngande wayoyokamba? Ndo kalasa yakɔna yahombayɛ mbɔtɔ dia ndjalɔngɔsɔla dia ndjokamba olimu akɔ?

14. Awui akɔna wahomba ɔlɔngɔlɔngɔ mbidja yimba etena kɔsande tɛdikɔ ta lo nshi yayaye?

¹⁴ Atɔndɔ asato wa lo Bible womaso la nsɛdingola koka kokimanyiya dia wɛ nsɔna elimu wakokayɛ nkamba. Ekɔ mɛtɛ di’embetsha ayɛ mbeyaka elimu ɛmɔtshi wakokayɛ nkamba lo ngelo kanyu. Kana kɔmpanyi kɛmɔtshi ka lɛɛta mbeyaka kosha olimu wa nkamba ndo kotɛ ɔnɛ lanɛ mbayoyolowanya lɔsɛnɔ layɛ. Alako w’oma l’ahole akina mbeyaka kokimanyiya, koko paka wɛ nsɛna ɔlɔlɔ. Anto wahoke Jehowa ngandji mbeyaka monɛ ngandji k’akambo wa l’andja ɔnɛ l’otema ayɛ. (1 Jni. 2:15-17) Naka wɛ kawoya washo lo akambo wakɔsɛngɔla anto wa l’andja ɔnɛ dia wɛ nsala, kete otema ayɛ mbeyaka ndjokokesa esadi eto.—Adia Tukedi 14:15; Jer. 17:9.

15, 16. Waa na wakoka mbisha ɛlɔngɔlɔngɔ alako woleki amɛna wendana l’elimu wa nkamba?

¹⁵ L’ɔkɔngɔ wa wɛ mbeya elimu wakokayɛ nkamba, wɛ ayonga l’ohomba w’alako w’eshika dia mbɔsa yɛdikɔ. (Tuk. 1:5) Waa na mɛtɛ wakoka kokimanyiya dia wɛ nsɔna olimu lo ndjela atɔndɔ watanema lo Bible? Hokamɛ anto woka Jehowa ngandji, wakolanga, wakeya ndo weya akambo wele la yɛ dimɛna. Vɔ wayokokimanyiya dia nsɛdingola akoka ndo nsaki yele la yɛ. Kɛnɛ kayowokotɛ mbeyaka kokimanyiya dia wɛ nyomokana yimba lo eyango ayɛ. Ande diɛsɛ diele la yɛ naka ambutshi ayɛ wekɔ Akristo lee! Ndo nto, dikumanyi di’Akristo dia l’etshumanelo kayɛ wekɔ apami wahokɔ akambo wakoka kokimanyiya. Oma laasɔ, kosawolake l’ambatshi mboka ndo emendji weteta. Okawɔ ambola wele oko: Lande na kakawɔshi yɛdikɔ ya kambɛ Nzambi olimu wa lo tena tshɛ? Ngande wakawatatɛ nkamba olimu w’ombatshi mboka, ndo ngande wakawayakimɔ l’olimu akɔ? Ɛlɔlɔ akɔna wambowokondja?—Tuk. 15:22.

¹⁶ Wanɛ wakeya dimɛna koka kosha alako la shɛnɔdi tshɛ. Ɛnyɛlɔ, ohɔsa dia wɛ ekɔ lo nanga mimɔ oma lo kalasa ya sekɔndɛrɛ nɛ dia wɛ halange nkamba olimu wa wolo walɔmba kalasa shɔ. Onto ɔmɔtshi lakoka ngandji mbeyaka nsɛdingola eyango wele la yɛ ko kokimanyiya dia wɛ mana kalasa ya sekɔndɛrɛ lo dihole dia nde kotɛ dia wɛ mimɔ nɛ dia dui sɔ diayoyokokimanyiya dia wɛ ndjoleka kambɛ Jehowa.—Osam. 141:5; Tuk. 6:6-10.

17. Tɛdikɔ takɔna tahombaso mbewɔ?

¹⁷ Onto tshɛ lakambɛ Jehowa ayotanema l’akambo wakoka mboshishɛ mbetawɔ kande ndo mbaanganya la Jehowa. (1 Kɔr. 15:33; Kɔl. 2:8) Koko elimu ɛmɔtshi mbeyaka mbela Akristo waale wa lo nyuma efula ndeka elimu ekina. Onde wɛ atɛnaka onto ɔmɔtshi ‘lakashisha mbetawɔ kande oko masuwa wambohandjɔ’ l’ɔtɛ w’olimu wakambande? (1 Tim. 1:19) Ayonga dui dia lomba mbewɔ mbɔsa tɛdikɔ takoka ndjodja diɔtɔnganelo diasayɛ la Jehowa lo waale.—Tuk. 22:3.

18, 19. Naka onto ɔmɔtshi atonge la nsaki ka kambɛ Jehowa, kakɔna kahombande nsala?

¹⁸ Naka wɛ ekɔ la nsaki ka kambɛ Jehowa l’etei k’otema, kete ekɔ dimɛna wɛ nkamba la waaso wele l’ɛlɔngɔlɔngɔ dia kambɛ Jehowa. Sala ɛsɔnwɛlɔ wakoka ndjokokimanyiya dia wɛ kambɛ Jehowa lo tena dia wolo.—Osam. 148:12, 13.

¹⁹ Lo wedi okina, kakɔna kahombayɛ nsala naka wɛ atonge la nsaki ka kambɛ Jehowa? Tetemala nkeketsha mbetawɔ kayɛ. L’ɔkɔngɔ w’ɔpɔstɔlɔ Pɔɔlɔ ndjasha efula lo elimu wakakoke Nzambi mbɔtshɔkɔla, nde akafunde ate: “Naka nyekɔ la kanyi yotshikitanyi lo dikambo dimɔtshi, Nzambi ayonyosholɛ kanyi y’ɔlɔlɔ. L’oseka dikambo tshɛ, oyadi lo yɛdikɔ yakɔna yambotohama, totetemale ntshɔ otsha la ntondo lo yoho ya dimɛna lo ndjela lokolo lakɔ laamɛ.” (Fil. 3:15, 16) Nyeye dia Nzambi nyokaka ngandji ndo ɔnɛ alako ande mboleki amɛna. Nde koka nyokimanyiya dia mbɔsa tɛdikɔ t’amɛna lo nshi yanyu y’ɛlɔngɔlɔngɔ.