1, 2. Ngande wotshikitanyi ekambi wa Jehowa lo woho wakawole ndo wakaweke akambo wa mɛtɛ?

JEHOWA mbele Otungi wa nkumbo. (Ɛf. 3:14, 15) Kaanga ana w’otema ɔtɔi wekɔ la waonga ndo l’akambo wotshikitanyi. Mbeyaka monga ko amɔtshi wakole lale ambutshi awɔ ndo akina wakavusha ambutshi awɔ l’ɔtɛ wa hemɔ, aksida kana mpokoso kekina. Mbeyaka monga nto ko akina haweye ambutshi awɔ.

² Kaanga mbeso sho tshɛ tekɔ atɛmɔdi wa Jehowa, kɛnɛ kele mɛtɛ ele takeke akambo wa mɛtɛ lo toho totshikitanyi. Amɔtshi l’atei aso ‘wakodiama lo akambo wa mɛtɛ’ ndo ambutshi awɔ wakakakatshiya atɔndɔ waki Nzambi l’etema awɔ. (Euh. 6:6, 7) Akina wekɔ wakeke akambo wa mɛtɛ lo tshimbo y’olimu w’esambishelo wasala ekambi wa Jehowa.—Rɔmɔ 10:13-15; 1 Tim. 2:3, 4.

3. Lo akambo akɔna wafɔnaso sho tshɛ?

³ Kaanga mbotshikitanyiso lo akambo wotshiso la diko ango, sho tshɛ fɔnaka lo akambo amɔtshi. Ɛnyɛlɔ, tekɔ lo diɛnɛ la etombelo wa kɔlɔ w’oma lo ohindodi waki Adama ndo takahowɔ eongelo kele keema kokele, pɛkato ndo nyɔi oma le nde. (Rɔmɔ 5:12) Koko kɛsɔ hatoshimbe dia sho mbelɛ Jehowa ɔnɛ “shesu.” Lo Isaya 64:8 Bible mbutaka di’ekambi wa Nzambi wa  lo nshi y’edjedja ɔnɛ: “[Jehowa] li, we keli shesu.” Laadiko dia laasɔ, Yeso akatatɛ dɔmbɛlɔ diande l’ɛtɛkɛta ɛnɛ: “Shɛso lele l’olongo, lokombo layɛ lakidiame.”—Mat. 6:9.

4, 5. Etena kayangaso nsɛdingola lo yɛdikɔ yakɔna yeyaso Jehowa Shɛso, ayonga dimɛna sho nkana yimba lo na?

⁴ Shɛso lele l’olongo toshaka ekokelo kele la so ohomba oko weso ekambi ande watɛndɛ lokombo lande la mbetawɔ. Nde akate ɛtɛkɛta wayela ɛnɛ: “Ne dia ndi [ekɔ ɔtɛmɔdi ami wa mɛtɛ w]atumbukaka ngandji; layuwumbiya, ne dia ndi ateyaka lukumbu lami.” (Osam. 91:14) Mbokɛmaka dia la ngandji tshɛ Jehowa Nzambi totshungolaka oma l’anya w’atunyi aso ndo tokokɛka diaha sho shilama oshiki.

⁵ Dia sho ndeka mbeya Shɛso lele l’olongo, nyɛsɔ tɔsɛdingole akambo asato w’ohomba anɛ: 1) Jehowa ekɔ Ombishi aso. 2) Jehowa ekɔ Okokedi aso. 3) Ndo nde ekɔ Ɔngɛnyi aso woleki dimɛna. Etena kayangaso nsɛdingola akambo asɔ, ayonga dimɛna sho nkana yimba lo diɔtɔnganelo diasaso la Nzambi ndo nshihodia woho wakokaso mbosha kɛnɛmɔ oko wende Shɛso. Ayonga nto dimɛna sho nkana yimba lo ɛtshɔkɔ wombɛ Jehowa wanɛ wayasukanya la nde.—Jak. 4:8.

6. Naa woshasha ɔmɔtshi wakatosha Jehowa wɛnya dia nde mbele Ombishi wa “woshasha tshɛ w’ɔlɔlɔ”?

⁶ Ombeki Jakɔba akafunde ate: “Woshasha tshɛ w’ɔlɔlɔ ndo wa kokele ndjaka oma l’olongo, oma le She diangɔ dia l’olongo diasha esase.” (Jak. 1:17) Lɔsɛnɔ lekɔ woshasha wa diambo w’oma le Jehowa. (Osam. 36:9) Naka sho nsala lolango laki Nzambi etena kekeso la lɔsɛnɔ, kete tayokondja ɛtshɔkɔ efula l’etena kɛnɛ ndo lɔsɛnɔ la pondjo l’andja w’oyoyo. (Tuk. 10:22; 2 Pet. 3:13) Ko onde dikambo sɔ koka salema lo menda etombelo w’oma lo pɛkato k’Adama?

7. Ngande wakasale Nzambi kɛnɛ kahombama dia sho monga la diɔtɔnganelo dia ma ma la nde?

⁷ Jehowa ekɔ Ombishi a Woke lo toho efula. Ɛnyɛlɔ, kaanga mbele sho tshɛ tekɔ atshi wa pɛkato ndo mbakatahowɔ eongelo kele keema kokele oma le Adama, Jehowa tosalɛka ɔlɔlɔ waheyama mbɛdika dia tokimanyiya. (Rɔmɔ 3:23) Koko lam’ele Jehowa tolangaka efula, nde akasale kɛnɛ kahombama dia sho monga la diɔtɔnganelo dia ma ma la nde. Ɔpɔstɔlɔ Joani akafunde ate: “Oma lo dikambo nɛ mbakɛnama ngandji ka Nzambi le so, nɛ dia Nzambi akatome Ɔnande ɛtɔi lakandote l’andja dia sho nkondja lɔsɛnɔ lo tshimbo yande. Lo dikambo sɔ, aha sho mbakoke Nzambi ngandji, koko nde kakatoke ngandji ndo kakatotomɛ Ɔnande oko olambo wadimanyiya pɛkato yaso.”—1 Jni. 4:9, 10.

8, 9. Ngande wakɛnya Jehowa dia nde ekɔ Ombishi a Woke lo nshi y’Abrahama ndo y’Izaka? (Enda osato wele lo mbɔtwɛlɔ.)

⁸ Lo ntambe 19 N.T.D., dui dimɔtshi diakasalema ndo diɔ mɛnyaka yɛdikɔ yoludi la ngandji yakɔshi Jehowa l’oyango wa wanɛ wele l’okitanyiya le nde ndjokondja lɔsɛnɔ la pondjo. Hɛbɛru 11:17-19 mbutaka ɔnɛ: “Oma lo mbetawɔ, Abrahama lam’akandahembama, aki oko nde ambolambola Izaka. Pami kakalongola alaka l’ɔngɛnɔngɛnɔ kɛsɔ aki suke la nambola tshɔi yande y’ɔna, kaanga mbakawawotɛ ɔnɛ: ‘Ɔnɛ layelamɛ kanula yayɛ ayotomba oma le Izaka.’ Koko nde akɔshi dia Nzambi aki la akoka wa mboolola kaanga oma lo nyɔi, ndo oma lɛkɔ mbakandoolongola lo yoho ya didjidji.” Keema dui dia wolo sho mɛna woho wɔtɔnɛ akambo asɔ nɛ dia Jehowa akakimɔ Ɔnande Yeso Kristo lo wahɔ w’anto tshɛ.—Adia Joani 3:16, 36.

⁹ Aha la taamu, Izaka aki l’ɔngɛnɔngɛnɔ efula lo woho wakinde konambɔma. Nde  aki la lowando lo woho wakasha Nzambi Abrahama ɔkɔkɔ wakakakatɛ nseke lo hioka suke la nde dia nde nambola lo dihole diande. (Etat. 22:10-13) Keema dui dia diambo dia dihole sɔ mbelamɛ ɔnɛ: “Jehowa-Jire (kitshimudi ati: [Jehowa] ayukutsha).”—Etat. 22:14.

10, 11. Waa na walɔmbɔla “olimu wa diokanyelo,” ndo ngande wasalawɔ dui sɔ?

¹⁰ Etena kakanaso yimba lo woho wele Jehowa Ombishi a Woke, tekɔ la lowando lo ɔkɛndɛ waki la Yeso Kristo nɛ dia kaanga ɔpɔstɔlɔ Pɔɔlɔ akafunde ate: “Tambɛna shoate: Onto ɔtɔi akavu dikambo dia anto tshɛ, ɔnkɔnɛ anto tshɛ wakavu. Nde akavwɛ anto tshɛ diaha wanɛ wasɛna ntetemala nsɛna dikambo diawɔ vɔamɛ, koko wasɛnɛ dikambo dia ɔnɛ lakaavwɛ ndo lakolɔ.”—2 Kɔr. 5:14, 15.

¹¹ L’ɔtɛ wa ngandji kakawokaka Nzambi ndo lowando laki la wɔ lo diɛsɛ dia mamba diaki la wɔ dia mbokambɛ, Akristo wa lo ntambe ka ntondo waketawɔ l’ɔngɛnɔngɛnɔ tshɛ “olimu wa diokanyelo.” Olimu w’esambishelo ndo wa mbetɛ anto ambeki wakawakambe mbakayotokimanyiya dia sho monga la diɔtɔnganelo dia dimɛna la Nzambi, mbɔtɔ la nde ɔngɛnyi ndo monga anande wa lo nyuma. Ɛlɔ kɛnɛ, Akristo w’akitami wekɔ lo nkamba olimu akɔ waamɛ. Kɛnɛ kasalawɔ oko wewɔ atomami wa Nzambi ndo wa Kristo mbakimanyiya anto w’etema ɛlɔlɔ dia vɔ kotwama le Jehowa ndo monga ambetawudi.—Adia 2 Kɔrɛtɔ 5:18-20; Jni. 6:44; Etsha 13:48.

12, 13. Ngande wakokaso mɛnya lowando laso otsha le Jehowa lo menda kɛnɛ tshɛ kambondotosha?

¹² Akristo tshɛ wele l’elongamelo ka ndjɔsɛna pondjo pondjo lo Paradiso kala nkɛtɛ wekɔ lo nkimanyiya akitami l’olimu w’esambishelo dia mɛnya lowando lele la wɔ otsha le Jehowa Ombishi a Woke. L’olimu ɔsɔ, sho kambaka la Bible kele l’atei wa weshasha wa nɛmɔ wakandatosha. (2 Tim. 3:16, 17) Naka sho nkamba dimɛna l’Ɔtɛkɛta waki Nzambi l’esambishelo, kete tayokimanyiya anto akina dia monga la elongamelo ka lɔsɛnɔ la pondjo. Woshasha okina wakatosha Jehowa dia tokimanyiya dia sho nkamba olimu ɔsɔ ele nyuma kande k’ekila. (Zek. 4:6; Luka 11:13) Oko wɛnyamadiɔ lo Annuaire des Témoins de Jéhovah tshɛ watomba, tekɔ lo nkondja etombelo w’amɛna efula oma l’olimu ɔsɔ. Ande nɛmɔ diele la so dia mbisha lonya l’olimu ɔsɔ dia ntombola Shɛso ndo Ombishi aso lee!

¹³ Lo menda kɛnɛ tshɛ kambotosha Nzambi, onto tshɛ la l’atei aso ayambole ɔnɛ: ‘Onde lekɔ lo nsambisha la wolo ami tshɛ dia dimi mɛnya Jehowa woke woke wa lowando lele lami l’ɔtɛ wa kɛnɛ kamondotosha? Lo toho takɔna takokami ndjalowanya dia monga opandjudi wa lokumu l’ɔlɔlɔ wele la diewo di’efula?’ Sho koka mɛnya lowando laso otsha le Nzambi lo ntetemala mbetsha wahɔ wa Diolelo lo dihole dia ntondo lo nsɛnɔ yaso. Naka sho nsala ngasɔ, kete Jehowa ayokotsha ehomba aso. (Mat. 6:25-33) Ngandji katoka Nzambi totshutshuyaka dia sho nsala kɛnɛ tshɛ kakokaso nsala dia nsala kɛnɛ kalangande ndo ngɛnyangɛnya otema ande.—Tuk. 27:11.

14. Kakɔna kɛnya dia Jehowa okotshungolaka ekambi ande?

¹⁴ Omembi w’esambo Davidɛ akembe ate: “Dimi leko usi wula la uhumbi, keli Khumadiondjo atunkanelaka. We keli ukimanyedi ami ndu utshungudi ami.” (Osam. 40:17) Jehowa okotshungolaka ekambi ande oko olui naka vɔ wambɔhɛnyahɛnyama woho w’anyanya oma le atunyi awɔ. Ande lowando lele la so le Nzambi l’ɔtɛ watondotokimanyiyaka lo tena  dia ngasɔ ndo l’ɔtɛ wa weshasha wa lo nyuma watoshande aha la mpekɔ lee!

15. Sha ɛnyɛlɔ kɛnya woho wakakokɛ ombutshi ɔmɔtshi wa ngandji ɔnande.

¹⁵ Papa koka anande ngandji kotshaka ehomba awɔ ndo mbakokɛka etena kewɔ lo waale. Ɛnyɛlɔ, ɔnangɛso ɔmɔtshi hohɛ woho wakookokɛ she etena kakinde eke dikɛnda. L’ɔkɔngɔ wa vɔ nshidiya olimu w’esambishelo, wakahombe nsahɔ lushi lɔmɔtshi dia vɔ tokoma la ngelo. Lam’ele mvula kakalɔ la pindju, lushi lɔsɔ lakɔtɔ elola. Dia vɔ nsahɔ, wakahombe tafumbɔfumbɔka laadiko di’ave. Ɔna ɔsɔ akete la ntondo ka she, akatɔsɛlɛmɔ ko ntambɛ l’ashi. Ande lowando laki l’ɔna ɔsɔ lo woho wakootepola she esadi eto oma l’ashi dia mbokokɛ ko mbɛmba lo dihɛka lee! Woho akɔ waamɛ mbele, Shɛso lele l’olongo tokokɛka oma lo andja ɔnɛ waki Satana wele oko lushi la dingunda. Jehowa mɛtɛ ekɔ Okokedi woleki tshɛ dimɛna.—Mat. 6:13; 1 Jni. 5:19.

16, 17. Ngande wakakimanyiya ndo wakakokɛ Jehowa ase Isariyɛlɛ etena kakawalɔshanaka l’ase Amalɛka?

¹⁶ Woho wakokɛ Jehowa anto la ngandji tshɛ akɛnama l’ɔkɔngɔ wa nde ntshungola ase Isariyɛlɛ oma l’Edjibito ndo etena kakandaakokɛ lo yoho ya dihindo dia vɔ ntenyanya ndjale ka Beela lo 1513 N.T.D. Etena kakawalekana oswe dia tokoma lo dikona dia Sinayi vɔ wakatokomaka la Rɛfidimɛ.

¹⁷ Lo ndjela daka dia lo Etatelu 3:15, ondo Satana akayangaka la wolo tshɛ diaaso dia ndɔsha ase Isariyɛlɛ wakɛnamaka oko vɔ bu la okokedi. Diɔ diakɔ diakandakambe l’ase Amalɛka wanɛ waki atunyi awɔ. (Wal. 24:20) Tende kɛnɛ kakasale Jehowa lo tshimbo y’apami anɛi wa kɔlamelo, mbuta ate Jashua, Mɔsɛ, Arɔna ndo  Hura. Etena kakalɔshaka Jashua ase Amalɛka, Mɔsɛ, Arɔna la Hura wakemala lo dikona diaki suke la dihole dia ta. Ndjaaka Mɔsɛ ambemɛ anya l’olongo, kete ase Isariyɛlɛ wamboleka atunyi awɔ wolo. Laasɔ, etena kakandoke anya dɔkɔkɔ, Arɔna nde la Hura wakookimɛ l’anya. Lam’ele Jehowa akakimanyiya ase Isariyɛlɛ ndo akaakokɛ, “Jashua akalembia Amaleka la wudja andi.” (Etum. 17:8-13) Mɔsɛ akalɔngɔsɔla dihole di’elambwelo laawɔ ndo akadielɛ “Jehowa-Nisi (kitshimudi ati: [Jehowa] keli ekuhu kami ka koi).”—Adia Etumbelu 17:14, 15.

18, 19. Ekokelo kakɔna kasha Jehowa ekambi ande lo etena kaso kɛnɛ?

¹⁸ Jehowa kokɛka wanɛ tshɛ wawoka ngandji ndo wawokitanyiya. L’ɛnyɛlɔ k’ase Isariyɛlɛ waki la Rɛfidimɛ, sho nɔmbaka Nzambi dia nde tokokɛ naka atunyi aso wambotɔlɔsha. Jehowa okotokokɛka oko olui oma lo tolonga taki Diabolo. Sho tshɛ koka mbohɔ mbala efula yakakokɛ Jehowa anangɛso l’akadiyɛso l’ɔtɛ wakiwɔ konanga ndjatambiya l’akambo wa pɔlitikɛ. Kɛsɔ mbakasalema lo wedja ekina ndo l’Allemagne etena kakolɛka Hitler lo ɛnɔnyi wa 1930 ndo l’etatelo k’ɛnɔnyi wa 1940. Wadielo ndo okanelo wa yimba l’ɛkɔndɔ wele lo Annuaire wɛnya woho wakakokɛ Jehowa ekambi ande lo tena di’ɔlɔshamelo ayokeketsha wɛkamu aso le Jehowa oko wende eshamelo kaso.—Osam. 91:2.

¹⁹ Jehowa toshaka waohwelo wele tshondo y’ekokelo le so lo tshimbo y’etenyi ka la nkɛtɛ k’okongamelo ande ndo y’ekanda aso. Waohwelo asɔ wambotokimanyiya efula lo ɛnɔnyi weke kambeta. Lam’ele andja ɔnɛ wamboyatambiya tshavu lo akambo wa mindo ndo lo wendelo w’esato wɛnyawɔ anto etakataka, Jehowa ekɔ lo tosha waohwelo w’eshika diaha sho ndjotala lo tolonga tɔsɔ. Ɛnyɛlɔ, sho nongolaka alako watewola diaha sho mbokana l’angɛnyi wa kɔlɔ lo tshimbo y’Ɛtɛrnɛtɛ. *—1 Kɔr. 15:33.

20. Ekokelo ndo ɛlɔmbwɛlɔ kakɔna kakondjaso lo etshumanelo k’Akristo?

²⁰ Ngande wakokaso mɛnya dia tekɔ lo ‘mbetshama oma le Jehowa’? Ele lo nkitanyiya wadjango ande. (Is. 54:13) Sho kondjaka ɛlɔmbwɛlɔ ndo ekokelo kele la so ohomba lo etshumanelo nɛ dia dikumanyi diatanema lɛkɔ mbishanaka alako ndo ekimanyielo. (Ngal. 6:1) Ngandji k’efula katoka Jehowa mɛnamaka lo tshimbo y’“apami wele oko weshasha” asɔ. (Ɛf. 4:7, 8) Ko ngande wahombaso mbɔsa alako watoshawɔ? Nzambi ayotɔtshɔkɔla naka sho mbalɛmbɛ ndo mbakitanyiya.—Hɛb. 13:17.

21. a) Kakɔna kahombaso ndjashikikɛ dia nsala? b) Kakɔna kayotɔsɛdingola lo sawo diayela?

²¹ Nyɛsɔ toyashikikɛ dia nɔmbwamaka la nyuma k’ekila dia sho mɛnya ɔnɛ tekɔ lo mbetawɔ ɛlɔmbwɛlɔ ka Shɛso lele l’olongo. Sho pombaka nto kanaka yimba la yoho ya lɔsɛnɔ lakasɛnɛ Ɔnande Yeso Kristo lele tekɔ lo nsala la wolo dia mbokoya ɛnyɛlɔ kande ka kokele. L’ɔtɛ wakinde l’okitshakitsha polo lo nyɔi, Yeso akalongla difuto dia mamba. (Flpɛ. 2:5-11) L’ɛnyɛlɔ ka Yeso, tayɔtshɔkwama naka sho ndjaɛkɛ le Jehowa l’etema aso tshɛ. (Tuk. 3:5, 6) Ɔnkɔnɛ, nyɛsɔ tɔsake Jehowa oko Ombishi ndo Okokedi woleki tshɛ. Ande ɔngɛnɔngɛnɔ ndo diɛsɛ diele la so dia monga ekambi ande lee! Ngandji kawokaso kayofula naka sho nkana yimba lo woho wende Ɔngɛnyi aso. Sawo diayela diayotɛnya woho wele Jehowa Ɔngɛnyi aso woleki dimɛna.