1, 2. a) Diwala diakɔna diayosha anto ɔngɛnɔngɛnɔ wa mamba l’olongo? b) Naa ambola wa mbɔma lo kɛnɛ kendana la diwala sɔ?

MBALA tshɛ nɔngɔsɔla diwala nɔmbaka etena k’otale. Koko lo sawo nɛ tayɔtɛkɛta dia diwala dimɔtshi dia laande, mbuta ate diwala diaki nkumekanga kɛmɔtshi. Ɔsɔ ayonga diwala dia mamba nɛ dia aya ɛnɔnyi oko 2000 wediɔ lo nɔngɔswama. Koko etena kamboleka nsukana dia diwala sɔ salema. Keem’edja, mishiki w’ɔngɛnɔngɛnɔ wayanga pomama l’olongo ndo olongo wayemba ɔnɛ: “Nyotombole Jah, nɛ dia Jehowa Nzambi kaso, Kanga-Wolo-Tshɛ aya nkumekanga. Nyɛsɔ tɔngɛnɛngɛnɛ ndo toleke monga l’ɔngɛnɔngɛnɔ ndo tootombole, nɛ dia wonya wa diwala dia Ɔna Ɔkɔkɔ wambokoka ndo wadɛnde amboyalɔngɔsɔla.”—Ɛny. 19:6, 7.

² Yeso Kristo mbele “Ɔna ɔkɔkɔ” ndo kanga diwala diayosha anto ɔngɛnɔngɛnɔ l’olongo. (Jni. 1:29) Ahɔndɔ wa diwala wa ngande wɔlɔtshinde? Akɔna ele otshukami? Ngande wayalɔngɔsɔlande dia diwala sɔ? Etena kakɔna kayosalema diwala diakɔ? Diwala sɔ diayosha anto wa l’olongo ɔngɛnɔngɛnɔ, ko onde ndo wanɛ wele l’elongamelo ka nsɛna pondjo pondjo la nkɛtɛ mbayonga l’ɔngɛnɔngɛnɔ ɔsɔ? Tayanga nsɛdingola ambola anɛ  la nsaki ka sho mbeya woho wayeta diwala sɔ etena katatatetemala nsɛdingola Osambu 45.

3, 4. a) Weho w’ahɔndɔ wa ngande wayɔlɔta Otshuki, ndo kakɔna kayofudia ɔngɛnɔngɛnɔ wele la nde? b) Waa na wele “ana amantu wa khumi ya dikanga” ndo ‘wadi aki nkumekanga’ wangɛnangɛna kaamɛ la Otshuki?

³ Adia Osambu 45:8, 9. Yeso Kristo lele Otshuki ayɔlɔta ahɔndɔ wa diwala wa nkumekanga. Mbokɛmaka dia nde ayɔlɔta ahɔndɔ wele ‘l’opumu woleki ɔlɔlɔ’ wa diangɔ diele oko, mirɛ la kasia diaki l’atei wa diangɔ diakakambaka la ɛlɔmbɛdi a laadiko wakakitaka anto esɔ l’Isariyɛlɛ w’edjedja.—Etum. 30:23-25.

⁴ Mishiki wayohomama l’olongo wayofudia ɔngɛnɔngɛnɔ wele l’Otshuki oko wayasukana diwala diande. Ɔngɛnɔngɛnɔ ɔsɔ wekɔ ndo le ‘wadi aki nkumekanga,’ mbuta ate etenyi ka l’olongo k’okongamelo waki Nzambi kokengami ndo la “ana amantu wa khumi ya dikanga,” mbuta ate andjelo w’ekila. Ayonga dui di’ɔngɛnɔngɛnɔ efula dia mboka awui w’oma l’olongo wata ɔnɛ: “Nyɛsɔ tɔngɛnɛngɛnɛ ndo toleke monga l’ɔngɛnɔngɛnɔ . . . nɛ dia wonya wa diwala dia Ɔna Ɔkɔkɔ wambokoka.”

5. Akɔna ele “wadi aki Ɔna Ɔkɔkɔ”?

⁵ Adia Osambu 45:10, 11. L’ɔkɔngɔ wa sho mbeya ɔnɛ lele Otshuki, ko akɔna ele otshukami? Otshukami ɔsɔ kengama la djui y’anto yatanema l’etshumanelo kalɔmbwama oma le Yeso Kristo. (Adia Ɛfɛsɔ 5:23, 24.) Vɔ wayolɛ kaamɛ la Kristo Mɛsiya lo Diolelo dia nde. (Luka 12:32) Akristo w’akitami 144000 asɔ, tetemalaka “ndjela Ɔna Ɔkɔkɔ l’ahole tshɛ watshɔnde.” (Ɛny. 14:1-4) Vɔ wayonga “wadi aki Ɔna Ɔkɔkɔ” ndo wayodjasɛ la nde l’olongo.—Ɛny. 21:9; Jni. 14:2, 3.

6. Lande na kɔsama Akristo w’akitami oko “ona umuntu a khum’ekanga,” ndo lande na kalɔmbamawɔ dia vɔ ‘mbohɛ wedja awɔ’?

⁶ Ɔnɛ layanga monga otshukami bu tsho “ona umuntu,” koko nde ekɔ nto “ona umuntu a khum’ekanga.” (Osam. 45:13) Ko ele “khum’ekanga” kɛsɔ? Akristo w’akitami wekɔ lo mbɔsama oko “ana” wa yanyi waki Jehowa. (Rɔmɔ 8:15-17) Lam’ele vɔ wayotonga otshukami wa l’olongo, Bible mbutɛka Akristo w’akitami dia vɔ ‘mbohɛ wedja awɔ ndo mvudu ya washɛwɔ.’ Vɔ pombaka mbidjaka yimba lo “akambo wa l’olongo, koko aha akambo wa la nkɛtɛ.”—Kɔl. 3:1-4.

7. a) Ngande walɔngɔsɔla Kristo womoto layondotshuka? b) Ngande wɔsa womoto ɔnɛ layonga omɛnde?

⁷ Ambeta ntambe efula yele Kristo ekɔ lo nɔngɔsɔla womoto layondotshuka dia vɔ nsala diwala diawɔ l’olongo. Ɔpɔstɔlɔ Pɔɔlɔ akate ate: “Kristo [akalange] etshumanelo ndo [akayakimɔ] dikambo diatɔ, dia nde kikidia, kiɛdia la ashi w’ɔtɛkɛta wa Nzambi, dia nde mɛnya lotombo l’etshumanelo le nde ndamɛ, aha la tɔ monga la vadi kana enyanga enyanga kana la akambo akina wa woho ɔsɔ, koko dia tɔ monga ekila ndo aha la ɛkɔmɔ.” (Ɛf. 5:25-27) Pɔɔlɔ akatɛ Akristo w’akitami wa la Kɔrɛtɔ k’edjedja ate: “Dimi nyokaka kandjema, la woho wa kandjema k’oma le Nzambi dikambo dimɛ lakanyolake dia nyotshukanya la omi ɔtɔi, Kristo ndo dimi nangaka nyɛnyanya la nde oko osekaseka w’emuma wele pudipudi.” (2 Kɔr. 11:2) Kristo Yeso lele Otshuki, mbuta ate Nkumekanga Yeso Kristo ngɛnangɛnaka lonyuma lele la womoto layondotshuka. Otshukami mbɔɔsaka oko “nkumɛnde” ndo mbokɛka adwe oko omɛnde la lo nshi yayaye.

8. Lande na kele otshukami kokaka mbɔsama mɛtɛ oko onto lele “la lutumbu tshe”?

⁸ Adia Osambu 45:13, 14a. Bible mbutaka dia otshukami ayoyala “la lutumbu tshe” etena kayosalema diwala. Lo Ɛnyɛlɔ 21:2, otshukami ɔsɔ mbɛdikamaka la osomba wa Jɛrusalɛma y’oyoyo “wamboyalɛnga dia ntshɔ le omɛnde.” Osomba wa l’olongo ɔsɔ wekɔ la “lotombo la Nzambi” ndo vɔ pɛtaka ngai ngai “oko lɔwɔkɔ loleki oshinga wolo, oko lɔwɔkɔ la jaspɛ lahɛta oko lɔwɔkɔ la kristalɛ.” (Ɛny. 21:10, 11) Dibuku di’Ɛnyɛlɔ nembetshiyaka woho wele Jɛrusalɛma y’Oyoyo ngai ngai. (Ɛny. 21:18-21) Diakɔ diele, keema dui dia diambo lo woho wakɛnya omembi w’esambo dia otshukami akɔ ekɔ “la lutumbu tshe.” Eelo, diwala sɔ diayosalema l’olongo.

9. Akɔna ele “nkumekanga” lele wadɛnde ayɔlɔmbwama otsha le nde, ndo ahɔndɔ wa ngande wayɔlɔta wadi akɔ?

⁹ Otshukami ayɔlɔmbwama otsha le otshuki, mbuta ate Nkumekanga Mɛsiya. Nde ekɔ lo mbɔlɔngɔsɔla ndo ekɔ lo ‘mbɛɛdia la ashi w’ɔtɛkɛta wa Nzambi.’ Otshukami ekɔ “ekila ndo aha l’ɛkɔmɔ.” (Ɛf. 5:26, 27) Nde ekɔ lo ndjalɔngɔsɔla dia nde ntomba dimɛna lushi la diwala. Ndo ngasɔ mbayondoyala. Lo mɛtɛ, “Ekutu andi wakatelama la eshinga wa paunyi,” ndo nde ‘ayɔlɔmbwama otsha le Nkumekanga ɔlɔtshi okutu ande wele l’alangi wa weho la weho.’ Lo lushi la diwala di’Ɔna Ɔkɔkɔ, “waka[sha wadɛnde] lotshungɔ la nde ndɔta dihɔndɔ dia swaswa dia ngaingai ndo dia pudipudi, nɛ dia dihɔndɔ dia swaswa sɔ diekɔ didjidji di’etsha w’ɛlɔlɔ w’ekilami.”—Ɛny. 19:8.

10. Etena kakɔna kayosalema diwala di’Ɔna Ɔkɔkɔ?

¹⁰ Adia Ɛnyɛlɔ 19:7. Etena kakɔna kayosalema diwala dia Ɔna Ɔkɔkɔ? Kaanga mbele “wadɛnde amboyalɔngɔsɔla” dia diwala, avɛsa wele l’ɛse hawɔtɛkɛta diotondo wa diwala, koko vɔ mɛnyaka woho wayonga etenyi k’ekomelo ka mfɔnu ka woke. (Ɛny. 19:11-21) Ko onde dui sɔ nembetshiyaka dia diwala sɔ diayosalema la ntondo ka Otshuki nshidiya ɔlɛndjɛlɔ ande? Ndooko, nɛ dia waɛnɛlɔ wa lo dibuku di’ɛnyɛlɔ hawɔlɔngi lakambo lo ndjela woho wayowoyasalemaka. Osambu 45 ndjɔtɛkɛtaka dia diwala dia Nkumekanga Yeso Kristo paka l’ɔkɔngɔ wa nde nkimɛ lokuwa la ta ndo l’ɔkɔngɔ wa nde ‘nɛndja’ atunyi ande.—Osam. 45:3, 4. 

11. Ngande wayɔlɔngama akambo l’ɔlɛndjɛlɔ waki Kristo?

¹¹ Diakɔ diele, sho kokaka mbuta ɔnɛ awui wayosalema lo yoho nyɛ: Ntondotondo, “womoto la numba ka lokolokolo,” mbuta ate Babilɔna ka Woke lele tshunda di’ɛtɛmwɛlɔ wa kashi wa l’andja w’otondo ayolanyema. (Ɛny. 17:1, 5, 16, 17; 19:1, 2) Oma laasɔ, Kristo ayolanya dikongɛ dia kɔlɔ diaki Satana dia la nkɛtɛ lo tshimbo y’Aramangɛdɔna, mbuta ate “ta dia lushi la woke la Nzambi Kanga-Wolo-Tshɛ.” (Ɛny. 16:14-16; 19:19-21) L’ekomelo a shimu, Nkumekanga Yeso ayoyokomiya ɔlɛndjɛlɔ ande lo mbidja Satana la ɛdiɛngɛ ande lo lokanu lɛnɛ ahawatonga l’akoka wa nsala kaanga dui ɔtɔi.—Ɛny. 20:1-3.

12, 13. a) Etena kakɔna kayosalema diwala dia Ɔna Ɔkɔkɔ? b) Waa na wayonga l’ɔngɛnɔngɛnɔ lo diwala dia Ɔna Ɔkɔkɔ l’olongo?

¹² Etena kavɔ Akristo w’akitami wasɛna l’etena ka woongelo wa Kristo kɛnɛ, vɔ mbolɔmaka dia tɔsɛna l’olongo. Yema tshitshɛ l’ɔkɔngɔ w’elanyelo ka Babilɔna ka Woke, Yeso ayotshumanya atshikadi tshɛ wa l’olui w’otshukami. (1 Tɛs. 4:16, 17) La ntondo ka ta di’Aramangɛdɔna ntatɛ ko wanɛ tshɛ wakenga olui “w’otshukami” wamboshila mbidɛ l’olongo. L’ɔkɔngɔ wa ta sɔ mbayosalema diwala di’Ɔna Ɔkɔkɔ.  Ɔsɔ ayonga diwala di’ɔngɛnɔngɛnɔ efula. Lo Ɛnyɛlɔ 19:9 Bible mbutaka ɔnɛ: “Diɛsɛ le wanɛ wakelamɛ lo dambo dia dikɔlɔ dia diwala dia Ɔna Ɔkɔkɔ.” Anto 144000 wakenga olui w’otshukami wayonga l’ɔngɛnɔngɛnɔ wa mamba. Nkumekanga lele Otshuki nde lawɔ ayonga l’ɔngɛnɔngɛnɔ w’efula etena kayondonga kaamɛ la wanɛ wayolɛ la nde ‘walɛ ndo wanɔ lo mɛsa ande lo Diolelo diande.’ (Luka 22:18, 28-30) Koko ɔngɛnɔngɛnɔ wa diwala dia Ɔna Ɔkɔkɔ hokomɛ tsho le Otshuki la otshukami.

¹³ Oko wakatadiɛnyi, nyemba y’andjelo wa l’olongo wayemba ɔnɛ: “Nyɛsɔ tɔngɛnɛngɛnɛ ndo toleke monga l’ɔngɛnɔngɛnɔ ndo tootombole, nɛ dia wonya wa diwala dia Ɔna Ɔkɔkɔ wambokoka ndo wadɛnde amboyalɔngɔsɔla.” (Ɛny. 19:6, 7) Ko kayotota lo dikambo di’ekambi waki Jehowa wele la nkɛtɛ? Onde ndo vɔ mbayonga l’ɔngɛnɔngɛnɔ ɔsɔ?

14. Lo ndjela Osambu 45, waa na wele “esekaseka w’antu” wasukɛ olui w’otshukami?

¹⁴ Adia Osambu 45:12, 14b, 15. Omvutshi Zɛkariya akatatshi dia lo nshi y’ekomelo anto w’oma lo wedja wayosangana kaamɛ la djui y’atshikadi w’akitami. Nde akafunde ate: “Lu shi sho, antu dikumi w’uma l’eteketa tshe wa wedja wayukimela usi Juda otoi l’uhimbu wa dihondo diandi, wata vati: Shu tayutsho kame la nyu, ne dia shu takuki lukumu ati: [Nzambi] eko kame la nyu.” (Zek. 8:23) Lo Osambu 45:12 Bible mbelɛka “antu dikumi” asɔ ɔnɛ “Ona umuntu a la Tura” ndo ɔnɛ “akanga w’engonyi wuleki wa lu wudja.” Vɔ mbelaka atshikadi w’akitami woshasha dia vɔ ‘mbetawɔma le wɔ’ ndo nkondja ekimanyielo ka lo nyuma. Oma ko 1935, miliyɔ y’anto wakatatɛ mbetawɔ dia atshikadi w’akitami ‘mbaakonya anto  w’ɛlɔlɔ.’ (Dan. 12:3) Akristo wa kɔlamelo asɔ wasukɛ akitami wambɛdia nsɛnɔ yawɔ ndo waya dimuma lo yoho ya lo nyuma. “Esekaseka w’antu” asɔ wakayakimɔ le Jehowa ndo wakɛnya dia wekɔ la kɔlamelo otsha le Otshuki.

15. Ngande wakamba “esekaseka w’antu” dihɛka lo dihɛka la atshikadi wa l’olui w’otshukami weke la nkɛtɛ?

¹⁵ Atshikadi wa l’olui w’akitami wekɔ la lowando l’efula otsha le “esekaseka w’antu” asɔ lo woho wasambishawɔ anto wa la nkɛtɛ tshɛ “lokumu l’ɔlɔlɔ la Diolelo” l’ohetoheto tshɛ. (Mat. 24:14) “Nyuma k’ekila la otshukami wekɔ lo ntetemala mbuta vate: ‘Yaka!’” ndo wanɛ tshɛ woka mbutaka vɔ lawɔ ɔnɛ: “Yaka!” (Ɛny. 22:17) Aha la taamu lam’akoke “ɛkɔkɔ ekina” woho wakataka Akristo w’akitami wakenga olui w’otshukami vate “yaka!” vɔ lawɔ wakayele lokolo la wɔ lo mbuta ɔnɛ “yaka!”—Jni. 10:16.

16. Diɛsɛ diakɔna diakasha Jehowa ɛkɔkɔ ekina?

¹⁶ Atshikadi w’akitami nangaka ɛkɔkɔ ekina ndo wekɔ l’ɔngɛnɔngɛnɔ dia mbeya ɔnɛ Jehowa lele She aki otshuki akasha ɛkɔkɔ ekina diɛsɛ dia vɔ lawɔ monga l’ɔngɛnɔngɛnɔ l’ɔtɛ wa diwala dia Ɔna Ɔkɔkɔ diayosalema l’olongo. Omembi w’esambo akatewoyisha dia “esekaseka w’antu . . . wayolombwama l’ongenongeno.” Vɔ mɛtɛ wayonga l’ɔngɛnɔngɛnɔ w’efula etena kayosalema diwala dia Ɔna Ɔkɔkɔ l’olongo. Diakɔ diata dibuku di’Ɛnyɛlɔ ɔnɛ “olui a woke w’anto” memala “la ntondo ka kiti ka lowandji ndo la ntondo k’Ɔna Ɔkɔkɔ.” Vɔ wekɔ lo kambɛ Jehowa olimu w’ekila lo sɛkɛ dia la nkɛtɛ dia tɛmpɛlɔ kande ka lo nyuma.—Ɛny. 7:9, 15.

17, 18. Ngande wayokita diwala dia Ɔna Ɔkɔkɔ dikuma, ndo Kristo ayokoma She waa na lo Ɛlɔmbwɛlɔ kande k’ɛnɔnyi kinunu?

¹⁷ Adia Osambu 45:16. “esekaseka w’antu” wayonga l’ɔngɛnɔngɛnɔ w’efula etena kayowɛna etombelo w’ɛlɔlɔ w’oma lo diwala di’Ɔna Ɔkɔkɔ l’andja w’oyoyo. L’etena kɛsɔ Otshuki ayolola ‘watshɛnde’ wa lo demba dia vɔ monga ana ande wa la nkɛtɛ. (Jni. 5:25-29; Hɛb. 11:35) Oma l’atei awɔ mbayondɔsɔna “ewandji lu kete tshe.” Aha la taamu, Kristo ayɔsɔna dikumanyi dimɔtshi oma l’atei wa dikumanyi dia kɔlamelo dia nshi nyɛ dia vɔ tɔlɔmbɔlaka l’andja w’oyoyo.—Is. 32:1.

¹⁸ L’edja k’Ɛlɔmbwɛlɔ kande k’ɛnɔnyi kinunu, Kristo ayokoma nto she anto akina. Lo mɛtɛ, wanɛ tshɛ wele l’elongamelo ka ndjokondja lɔsɛnɔ la pondjo wayolikondja ndooko onyake nɛ dia vɔ wekɔ la mbetawɔ l’olambo w’etshungwelo waki Yeso. (Jni. 3:16) L’etena kɛsɔ, Yeso ayokoma ‘Shɛwɔ ka pondjo.’—Is. 9:6, 7.

19, 20. Awui wa diambo wofundami l’Osambu 45 tshutshuyaka Akristo wa mɛtɛ tshɛ dia nsala na?

¹⁹ Adia Osambu 45:1, 17. Lo mɛtɛ, akambo wɔkɔndwami l’Osambu 45 mendanaka l’Akristo tshɛ. Atshikadi w’akitami wekɔ lo nongamɛ dia tɛnana l’asekawɔ ndo la Otshuki l’olongo. Kɛsɔ tshutshuyaka ɛkɔkɔ ekina dia vɔ ndeka nɛmbɛ Yeso, Nkumekanga ka lotombo ndo wekɔ la lowando lo diɛsɛ diele lawɔ dia nkamba kaamɛ l’atshikadi wa l’olui w’otshukami. L’ɔkɔngɔ wa diwala diawɔ, Kristo nde l’anto wa lo Diolelo diande wayela lokema l’ɛtshɔkɔ le anto tshɛ wa la nkɛtɛ.—Ɛny. 7:17; 21:1-4.

²⁰ Etena kakongɛso “dikambu dimotshi di’ololo” diendana la Nkumekanga Mɛsiya sɔ, onde dui sɔ hatotshutshuya dia sho ‘mbeyanya lokombo lande’? Ɔnkɔnɛ, nyɛsɔ tosale la wolo dia sho monga l’atei a wanɛ ‘wayotombolaka Nkumekanga Yeso pondjo pondjo.’