‘Eelo kayɛ kayale eelo koko aha keema’
Ekumanyi kɛmɔtshi kakamba lo kɔmite ka diɔtɔnganelo la mpitadi akokana dia nsambisha Lushi la lomingu la mpindju nde la ɔnangɛso ɔmɔtshi l’ɔlɔngɔlɔngɔ. La mpindju ka pɛɛ, ɔnangɛso ɔmɔtshi lele wadɛnde akasale aksida lo mutuka ambootelefɔnɛ oma lo lopitadi dia nde ndjowɛnyanya l’onganga wayetawɔ nsakɛ wadɛnde aha la mbidja dikila. Dui sɔ diambokonya ekumanyi kɛsɔ diaha nde nɛmiya randevu wakawashana nde la ɔlɔngɔlɔngɔ ɔsɔ l’oyango wa nde ntshɔ dia tokimanyiya ɔnangɛso lo lopitadi.
Mama kɛmɔtshi kodia anande ahende ndamɛ ambelamɛ oma le atshukanyi amɔtshi wa l’etshumanelo kawɔ dia vɔ tetsha dikɔlɔ dimɔtshi kaamɛ. Kam’otende anande dikambo sɔ, vɔ wambɔngɛnangɛna efula. Vɔ wekɔ lo kongɛ dikɔlɔ sɔ l’asolo walomɔlomɔ. Lonyangu ko lushi ɔtɔi la ntondo ka lushi lɔsɔ, atshukanyi asɔ wambotɛ mama kɛsɔ dia hawotohomana woho wakawokana nɛ dia wambohomana la dikambo dimɔtshi dia wanyandja. L’ɔkɔngɔ diko, atshukanyi asɔ wamboyowotɛ ɔnɛ vɔ kɔnɛmiya ɛtɛkɛta awɔ dikambo angɛnyi awɔ amɔtshi wakawaelɛ dikɔlɔ diakɔ diaamɛ ko vɔ waketawɔ.
Lam’ele tekɔ Akristo, sho pombaka kotshaka kɛnɛ kataso. Hatohombe pondjo mbuta ‘eelo ko ndjota keema.’ (2 Kɔr. 1:18) Koko oko wadiɛnya bɛnyɛlɔ pende dingo, aha mbala tshɛ mbahomba akambo salemaka ngasɔ. Mbala mɔtshi, sho mbeyaka ndjotshikitanya ɛtɛkɛta aso l’ɔtɛ wayaso bu la woho okina wa nsala. Kaanga ɔpɔstɔlɔ Pɔɔlɔ akahomana la dui dia ngasɔ.
WAKASƆNGWƐ PƆƆLƆ ƆNƐ NDE HAKOTSHA ƐTƐKƐTA ANDE
Lo 55 T.D., etena kaki Pɔɔlɔ l’Ɛfɛsɔ lo lɔkɛndɔ lande la sato la misiɔnɛrɛ, nde akakongɛ dia tenyanya mer Égée dia nde mbeta la Kɔrɛtɔ ko totshɔ la Makɛdɔniya. Etena kakandatakalolaka otsha la Jɛrusalɛma, nde akakongɛ dia mbeta la Kɔrɛtɔ mbala ka hende ondo dia tɔsa weshasha wakawakimɔ dikambo di’anangɛso wa la Jɛrusalɛma. (1 Kɔr. 16:3) Ngasɔ mbediɔ nɛ dia 2 Kɔrɛtɔ 1:15, 16, mbutaka ɔnɛ: “Ɔnkɔnɛ, lam’ele laki la eshikikelo kɛsɔ, dimi lakalange ndja mbala ka hende le nyu dia nyu nyomɔngɛnangɛna nto. L’ɔkɔngɔ wa dimi memala yema lalenyu ko mbeta otsha la Makɛdɔniya, dimi layotadje le nyu lam’ayomokalola oma la Makɛdɔniya, ko nyu ndjotshindɛ yema otsha la Judeya.”
Mɛnamaka dia lo mukanda wakandaafundɛ ntondo, Pɔɔlɔ akalake ase Kɔrɛtɔ dia nde ayeta lalewɔ. (1 Kɔr. 5:9) Koko yema tshitshɛ oma laasɔ, ase luudu laki Klowe wakayotɛ Pɔɔlɔ ɔnɛ ewanu wahɛnɛ pe wekɔ l’etshumanelo. (1 Kɔr. 1:10, 11) Diakɔ diakatshikitanya Pɔɔlɔ ekongelo kande ko tokaatomɛ mukanda weelamɛ nshi nyɛ ɔnɛ 1 Kɔrɛtɔ. Lo mukanda ɔsɔ, Pɔɔlɔ akawasha alako ndo engwelo la ngandji tshɛ. Nde akawatɛ nto dia nde ambotshikitanya ekongelo kande dikambo nde ayotoketa la Makɛdɔniya ko nde ndjolekɛ la Kɔrɛtɔ.—1 Kɔr. 16:5, 6. *
Mɛnamaka dia etena kakalongola anangɛso wa la Kɔrɛtɔ mukanda ɔsɔ, ase etshumanelo amɔtshi wakayataka dia vɔ “ndeka apɔstɔlɔ” wakate dia Pɔɔlɔ hakotsha ɛtɛkɛta ande. Pɔɔlɔ akawambola ate: “Lam’akamasangoyaka dia nsala ngasɔ, dimi kɔmbɔsa dikambo sɔ oko dui di’anyanya, shi mɛtɛ? Kana onde dimi lakakongɛka akambo yoho ya lo demba woho wele dimi mbuta nte: ‘Eelo, eelo’ ko l’ɔkɔngɔ dimi ndjota nte: ‘Keema, keema’?”—2 Kɔr. 1:17; 11:5.
Sho mbeyaka ndjambola ɔnɛ: Onde ɔpɔstɔlɔ Pɔɔlɔ akɔsaka “dikambo sɔ oko dui di’anyanya”? Ndooko. Tshɛkɛta yokadimɔmi ɔnɛ “anyanya” mbelaka kanyi y’onto lele la nemi hiende, mbuta ate onto lahawɛkɛ otema ndo lahakotsha ɛtɛkɛta ande. Dimbola di’ɔnɛ: “Onde dimi lakakongɛka akambo yoho ya lo demba?” diakahombe nkimanyiya ase Kɔrɛtɔ dia vɔ mboka ɔnɛ woho wakatshikitanya Pɔɔlɔ ekongelo kande hɛnya dia nde aki kanga nemi hiende.
Pɔɔlɔ akɛnya dia vɔ wakataka kashi lo mbafundɛ ate: “Oko wele Nzambi la kɔlamelo, kɛnɛ kanyotɛso hayala eelo, ko l’ɔkɔngɔ keema.” (2 Kɔr. 1:18) Aha la taamu, Pɔɔlɔ aketsha wahɔ w’anango wa la Kɔrɛtɔ lo dihole dia ntondo etena kakandatshikitanya ekongelo kande. Lo 2 Kɔrɛtɔ 1:23, Bible mbutaka dia Pɔɔlɔ akatshikitanya ekongelo kande ‘diaha nde mbisha ase Kɔrɛtɔ paa kamboleka.’ Lo nsala ngasɔ, nde akawasha diaaso dia vɔ ndjalowanya la ntondo ka nde ndjokoma le wɔ. Oko wakandalongamɛka etena kakinde la Makɛdɔniya, Tito akatɛ Pɔɔlɔ ɔnɛ mukanda wakandafundɛ ase Kɔrɛtɔ akaatshutshuya dia vɔ nyanga ndo ndjatshumoya ndo dui sɔ diakasha Pɔɔlɔ ɔngɛnɔngɛnɔ w’efula.—2 Kɔr. 6:11; 7:5-7.
“AMƐƐ” WATƐSO NZAMBI
Woho wakawasɔngwɛ Pɔɔlɔ ɔnɛ nde hakotsha ɛtɛkɛta ande akakoke nkonya anto diaha vɔ monga la mbetawɔ lo losango lakandasambishaka. Koko nde akohola ase Kɔrɛtɔ dia nde akaasambishaka lokumu l’ɔlɔlɔ lendana la Yeso Kristo. Nde akawatɛ ate: “Nɛ dia Ɔna Nzambi, Kristo Yeso lakatanyosambisha dimi la Silvano la Timɔte komonga eelo, ko ndjonga keema, koko eelo kakayala paka eelo lo dikambo diande.” (2 Kɔr. 1:19) Onde Yeso Kristo laki ɛnyɛlɔ le Pɔɔlɔ aki onto lakiwɔ kokokaka mbɛkɛ otema? Ndooko. Etena kakinde lanɛ la nkɛtɛ ndo kakandasambishaka, Yeso akataka mɛtɛ keto lushi tshɛ. (Jni. 14:6; 18:37) Naka akambo wakasambishaka Yeso waki mɛtɛ ndo eshika ndo naka Pɔɔlɔ akasambishaka awui akɔ waamɛ, kete esambishelo kande kaki mɛtɛ.
Aha la taamu, Jehowa ekɔ ‘Nzambi k’akambo wa mɛtɛ.’ (Osam. 31:5) Ngasɔ mbediɔ nɛ dia Pɔɔlɔ akayofunda ate: “Oyadi efula kakɔna kele alaka waki Nzambi, vɔ tshɛ wakayala eelo lo tshimbo yande,” mbuta ate Kristo. Olowanyi wa kokele wakatshikala la Yeso lanɛ la nkɛtɛ, akakimanyiya anto diaha monga kaanga la yema ya taamu lo alaka wa Jehowa. Pɔɔlɔ akakotsha ate: “Ɔnkɔnɛ, paka lo tshimbo yande [Yeso] mbatɛso Nzambi shate: ‘Amɛɛ’ dia mbotombola.” (2 Kɔr. 1:20) Yeso ekɔ tshondotondo y’eshikikelo kana “Amɛɛ” w’ɔnɛ alaka tshɛ waki Jehowa Nzambi wayokotshama.
Oko watotaka Jehowa nde la Yeso mɛtɛ nshi tshɛ, Pɔɔlɔ nde lawɔ akataka nshi tshɛ mɛtɛ. (2 Kɔr. 1:19) Nde komonga kanga nemi hiende, mbuta ate onto lakashaka alaka lo “yoho ya lo demba.” (2 Kɔr. 1:17) Nde ‘akakɛndakɛndaka la nyuma.’ (Ngal. 5:16) Nde aketshaka wahɔ w’anto lo dihole dia ntondo. Eelo kande kaki paka eelo.
ONDE EELO KAYƐ KEKƆ PAKA EELO?
Ɛlɔ kɛnɛ, anto wahakitanyiya ɛlɛmbɛ wa lo Bible wekɔ la mbekelo kaha kotshaka alaka awɔ l’ɔtɛ wa tokambokambo t’anyanya kana l’ɔtɛ w’akambo amɔtshi waangɛnyangɛnya. Mbala efula, “eelo” k’amundji w’okanda amɔtshi hayongaka “eelo” oyadi diokanelo diakafundama lo mikanda. Ɛlɔ kɛnɛ, anto efula wɔsaka diwala oko asanga. Woho watadɛ lofulo l’awala wahandjɔ mɛnyaka di’anto efula mbɔsaka diwala oko diokanelo dia lo tshanda mɔtshi ndo vɔ koka nkakitɔna wonya tshɛ walangawɔ.—2 Tim. 3:1, 2.
Ko onde eelo kayɛ mongaka paka eelo? Oko wadiɛnya mbɔtwɛlɔ ka sawo nɛ, naka ambotokomɛ dia mbitola randevu ɔmɔtshi onge l’ɔtɛ w’akambo wa wanyandja, koko aha l’ɔtɛ weso akanga wa nemi hiende. Koko oko weyɛ Okristo, naka wɛ ambosha onto daka kana nyambookana dui dimɔtshi, wɛ pombaka nsala kɛnɛ tshɛ kakokayɛ nsala dia nkotsha ɛtɛkɛta ayɛ. (Osam. 15:4; Mat. 5:37) Naka wɛ nsala ngasɔ, kete anto wayokeya oko kanga mɛtɛ, mbuta ate onto latokotshaka nshi tshɛ kɛnɛ katande. (Ɛf. 4:15, 25; Jak. 5:12) Naka anto wambeya dia wɛ mbutaka mɛtɛ, vɔ koka ndeka kosha lotui etena kayoyaasambishaka lokumu l’ɔlɔlɔ la Diolelo dia Nzambi. Ɔnkɔnɛ, nyɛsɔ tosale la wolo dia eelo kaso mongaka paka eelo.
^ Yema tshitshɛ l’ɔkɔngɔ wa nde mfunda 1 Kɔrɛtɔ, Pɔɔlɔ akete la Tɔrɔa dia tokoma la Makɛdɔniya ndo lɛsɔ mbakandatofunda mukanda wa 2 Kɔrɛtɔ. (2 Kɔr. 2:12; 7:5) L’ɔkɔngɔ diko, nde akayotshɔka la Kɔrɛtɔ.
