Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:

Etana kakɔna kakasalema dambo di’Elekanelo lo Nisana 14?

Dikadimwelo dimɔtshi dia Bible mbutaka dia dui sɔ diakasalema “lam’asa akɔlɔ ahende,” mbuta ate la tosho ta shimba kana l’ɔkɔngɔ wa wonya mbɔtɔ koko la ntondo ka wonya mbidja bi. (Etum. 12:6)—12/15, lɛkɛ 18-19.

Naa atɔndɔ wa lo Bible wakoka ɛlɔngɔlɔngɔ nkamba la wɔ dia mbɔsa tɛdikɔ la lomba?

Atɔndɔ asato wakoka mbakimanyiya vɔ anɛ: 1) Nyanga ntondo Diolelo la losembwe laki Nzambi. (Mat. 6:19-34) 2) Monga l’ɔngɛnɔngɛnɔ lo nkambɛ anto akina. (Ets. 20:35) 3) Mbohɔka Otungi ayɛ lo nshi yayɛ y’ɔlɔngɔlɔngɔ. (Und. 12:1)—1/15, lɛkɛ 19-20.

Naa ambahemi wa mfalasa anɛi wakamba olimu ntatɛ oma lo 1914?

Yeso lele ombahemi wa mfalasa ka wɛma akɛdia olongo lo mbitshanya Satana l’ɛdiɛngɛ ande. Ombahemi wa mfalasa ka bela mbele lo kiɔkɔ ya ata wɛnya anto paa ɛlɔ kɛnɛ. Ombahemi wa mfalasa k’odima ekɔ didjidji dia ndjala. Ombahemi wa mfalasa k’ɛkɛsɛkɛsɛ ekɔ didjidji dia nyɔi ndo nde kambaka la waa hemɔ dia ndjaka miliyɔ y’anto. (Ɛny. 6:2-8)—2/1, lɛkɛ 6-7.

Etena kakɔna kayosalema “diwala dia Ɔna ɔkɔkɔ”? (Ɛny. 19:7)

“Diwala dia Ɔna ɔkɔkɔ” diayosalema l’ɔkɔngɔ wa Nkumekanga Yeso Kristo nɛndja tshɛ lo tshɛ, mbuta ate l’ɔkɔngɔ wa Babilɔna ka woke ndanyema ndo wa Ta di’Armangɛdɔna.—2/15, lɛkɛ 10.

Naa ɔkɔkɔ wɛnya di’ase Juda wa lo nshi yaki Yeso ‘wakalongamɛka’ Mɛsiya? (Luka 3:15)

Hatokoke nshikikɛ ɔnɛ ase Juda wa lo ntambe ka ntondo wakashihodiaka dimɛna dimɛna prɔfɛsiya kaki Danyɛlɛ kendana la Mɛsiya oko wotokishihodia ɛlɔ kɛnɛ. (Dan. 9:24-27) Koko ondo vɔ wakoke losango lakasha ondjelo alami w’ɛkɔkɔ amɔtshi kana wakoke kɛnɛ kakate ɔprɔfɛta Ana etena kakandɛnyi wamboya la Yeso lo tɛmpɛlɔ eke ashashi. Ndo nto ambewi w’akambo wa tɔɔtɔ wakaye wayayange “nkumekanga k’ase Juda kotwe.” (Mat. 2:1, 2) Joani obatizanyi nde la wɔ akɛnya dia keema edja Kristo ayɛnama.—2/15, lɛkɛ 26-27.

Ngande wakokaso mbewɔ dia eelo kaso ndjokoma keema? (2 Kɔr. 1:18)

Ɛkɔ mɛtɛ dia l’ɔtɛ w’ɛkɔkɔ ɛmɔtshi, mbeyaka ndjotokomɛ ko hatokotshisha ɛtɛkɛta aso. Koko naka takokana l’onto kana takasha onto daka dimɔtshi, sho pombaka nsala kɛnɛ tshɛ kakokaso nsala dia dikotsha.—3/15, lɛkɛ 32.

Ngande wakokayɛ nshika tanga la ntondo ka wendelo w’esato wɛnyawɔ anto etakataka?

Awui asato wakoka kokimanyiya vɔ anɛ: 1) Minya washo esadi eto naka tambɛna esato wa kɔlɔ. 2) Nama tokanyi taso lo kanyiyaka paka akambo wakeketsha ndo nɔmba Nzambi. 3) Nama ekolo aso lo mbewɔ waa filmɛ kana wɔtwɛlɔ wa lo waa sitɛ yele l’esato wɛnyawɔ anto etakataka.—4/1, lɛkɛ 10-12.

Waale akɔna wakoka monga naka Okristo ntshika nkumbo kande dia toyanga falanga lo wodja okina?

Naka ambutshi hawodjashi kaamɛ l’anawɔ, ana sowaka lo yimba ndo lo demba. Ana mbeyaka ndjonga ko wahoyolanga monga suke la wɔ. Naka olonganyi ɔmɔtshi mɛngɔla edja, kete nde mbeyaka pembama dia nsala loseka.—4/15, lɛkɛ 19-20.

Lande na kakawɔkɔlaka atshi wa kɔlɔ ekolo la ntondo ka mbadiaka?

Ase Rɔma waki la mbekelo ka ndjakaka anto wa kɔlɔ lo otamba. Ase Juda wakalɔmbɛ dia vɔ mbɔkɔla ekolo waki Yeso ndo w’anto ahende wa kɔlɔ wakahanema suke la nde. Vɔ wakone nsala dui sɔ l’oyango w’anto asɔ mvɔ esadi esadi ndo diaha vɔ ntshikala otsho w’otondo l’etamba. (Euh. 21:22, 23)—5/1, lɛkɛ 11.

Naa ambola anɛi wakokaso nama lo yimba etena keso l’esambishelo?

Waa na wasambishami? Dihole diakɔna diasambishami? Etena kakɔna kaasambishami? Woho akɔna wahombami mbaasambisha?—5/15, lɛkɛ 12-15.

Ngande wele ɔnwɛlɔ wa mfɔka ndjakaka anto?

Lo ntambe k’etshi, mfɔka akadiake anto oko 100 000 000. Lo ɛnɔnyi weke kambeta, edinga wa mfɔka odiaki anto oko 6 000 000.—6/1, lɛkɛ 3.