ETENA kakatombe ekambi waki Nzambi oma la Babilɔna otsha la Jɛrusalɛma lo 537 N.T.D., Jehowa akawatɛ ɔnɛ: “Nyolongosole esese, nyutedia afuku, nyunya ave.” (Is. 62:10) Ohokanyiya woho wakakoke ase Juda amɔtshi nsala dui sɔ. Ondo wanɛ wakatshu ntondo wakalɔngɔsɔla mboka, tedia menga ndo afuku. Kɛsɔ mbakakoke nkimanyiya asekawɔ wakayayaka l’ɔkɔngɔ awɔ oya la Jɛrusalɛma.

Sho koka ndjela ɛnyɛlɔ kɛsɔ lo kɛnɛ kendana la eyango aso wa lo nyuma. Jehowa kombolaka dia ekambi ande nkotsha eyango awɔ wa lo nyuma lo minya oseka wekamu tshɛ. Bible totɛka ɔnɛ: “Ushishimi mbuka ololo ka we mbeta, ku akambu aye tshe wayushikikala.” (Tuk. 4:26) Oyadi wɛ ekɔ ɔlɔngɔlɔngɔ kana bu, wɛ koka nkondja wahɔ oma lo dako sɔ.

Ondo wɛ ambokaka onto ɔmɔtshi ata lo kɛnɛ kendana la ɔlɔngɔlɔngɔ kana osekaseka ɔnɛ: ‘Nde mɛtɛ ayosala akambo wa weke otsha la ntondo.’ Ɛlɔngɔlɔngɔ wekɔ la wolo wa demba, shasɔki ndo kombolaka ntondoya lo lɔsɛnɔ. Bible mbutaka ɔnɛ: “Wulu w’elongo w’apami mbeli lutumbu lawo.” (Tuk. 20:29) Ɔlɔngɔlɔngɔ kana osekaseka wakamba l’akoka ndo la wolo ande l’olimu wa Jehowa koka nkotsha eyango ande wa lo nyuma ndo monga la ɔngɛnɔngɛnɔ wa mɛtɛ.

Akoka wele l’ɛlɔngɔlɔngɔ l’esekaseka mbɔsamaka la nɛmɔ efula l’andja ɔnɛ. Naka ɔlɔngɔlɔngɔ kana osekaseka w’Okristo ekɔ la yimba lo kalasa, kete ondaki, ombetsha ndo osekande ɔmɔtshi koka mbodja pɛpɔ dia nde mbɔtɔ kalasa y’etale l’oyango wa ndjonga onto la woke l’andja ɔnɛ. Mbala efula naka ɔlɔngɔlɔngɔ kana osekaseka w’Okristo ekɔ l’akoka wa tɔkɛnyɔ, anto wa l’andja ɔnɛ mbotɛka ɔnɛ wayowosukɛ dia nde ndeka ndjalowanya. Onde wɛmɛ, kana onto ɔmɔtshi leyayɛ ambohomanaka l’okakatanu wa ngasɔ? Kakɔna kakoka nkimanyiya Okristo dia nsala ɔsɔnwɛlɔ la lomba?

 Bible koka tokimanyiya dia sho ndjaatɛ mboka koleki dimɛna lo lɔsɛnɔ. Undaki 12:1 mbutaka ɔnɛ: “Uhoki utungi aye lu nshi yaye y’olongo a pami.” Naa yoho yoleki dimɛna yakokaka ɔlɔngɔlɔngɔ ‘mbohɔka otungi ande’?

Tende kɛnɛ kakakomɛ Eric * ladjasɛ l’Afrikɛ wa l’owɛstɛ. Nde akangɛnangɛnaka nkɛnya ponde ndo etena kakandakotsha ɛnɔnyi 15, nde akasɔnama lo ekipɛ ka wodja. Nde akakokaka nongamɛ dia nongola diɛsɛ dia tolowanyema l’Erɔpɛ dia nde ndjokoma ɔkɛnyi wa ponde wa manamana. Ko ngande wakandayokambaka la dako dia lo Bible diata ɔnɛ: ‘Ohɔke Otungi ayɛ’? Ndo wetshelo akɔna wakokayɛ nkondja wɛ l’anto akina oma l’ɔkɔndɔ ɔsɔ?

Etena kakandɔtɔka kalasa, Eric akatatɛ mbeka Bible l’Ɛmɛnyi wa Jehowa. Diɛsɛ la wekelo ɔsɔ, nde akayeyaka dia Otungi ande ayonya lo pondjo ekakatanu tshɛ wa l’andja ɔnɛ. Eric akayoshihodiaka ohomba wa nkamba la wenya ndo la wolo ande dia nsala lolango la Nzambi. Dia nkotsha oyango ɔsɔ, Eric akɔshi yɛdikɔ yaha nde ntshɔ toyalowanya lo awui wa ponde. Oma laasɔ, nde akabatizama ndo akahame lo nyuma. L’ɔkɔngɔ diko, nde akayokoma okambi wakimanyiya ndo akayelamɛka lo Kalasa ka Bible k’anangɛso w’enyemba.

Ondo Eric otokoka ndjonga la falanga ndo la lokumu, otondoyalowanya lo ponde. Koko nde akayɛnaka mɛtɛ ka tɔndɔ dia lo Bible diata ɔnɛ: “Ukundji eli usumba a wulu le kanga ongonyi. Vo weli eheli k’ave k’utali lu tukanyi tandi.” (Tuk. 18:11) Ekokelo kakoka onto nkondja lo tshimbo ya lomombo ekɔ paka lo tshanda mɔtshi. Laadiko dia laasɔ, wanɛ wayanga dia monga akanga w’ɛngɔnyi ‘ndjaatshatshaka la lonyangu l’efula.’—1 Tim. 6:9, 10.

Diɛsɛ ko, ɛlɔngɔlɔngɔ l’esekaseka efula w’Akristo, wekɔ l’ɔngɛnɔngɛnɔ ndo la ekokelo ka pondjo l’ɔtɛ wakambawɔ olimu wa lo ntena tshɛ. Eric mbutaka ate: “Lekɔ l’ɔngɛnɔngɛnɔ w’efula dia monga lo ekipɛ k’anto wakambɛ Jehowa olimu wa lo ntena tshɛ. Ɔsɔ ekɔ ekipɛ koleki dimɛna ndo dimi mbokaka Jehowa losaka lo woho wakandamɛnya yoho yoleki dimɛna ya monga l’ɔngɛnɔngɛnɔ ndo ntondoya lo lɔsɛnɔ.”

Kayotota lo dikambo dia yɛ? Lo dihole dia wɛ ndjandjɛ eyango wa l’andja ɔnɛ, lande na kahayayalɔngɔsɔlɛ “mboka” lo ntatɛ nkamba olimu w’ombatshi mboka?—Enda kiombo yele l’ɔtɛ a dui ɔnɛ: “ Lakakondja wahɔ wele totomokondja lo kalasa y’adidi.”

Etena kakawatshu dia tembola Bɛtɛlɛ ka l’États-Unis, wadi l’omi amɔtshi wakatɛna di’ase nkumbo ka Bɛtɛlɛ wekɔ l’ɔngɛnɔngɛnɔ wa mamba. Kadiyɛso akayofundaka ate: “Mbala tshɛ kakatatshɔka lo Bɛtɛlɛ, takakeketshamaka efula.” Vɔ wakayɔsaka yɛdikɔ ya nkamba la wenya ndo la wolo awɔ lo olimu wa lo ntena tshɛ.

Koko dui dimɔtshi diakawadjɛka wekamu dia vɔ nkamba olimu ɔsɔ. Lushi lɔmɔtshi, vɔ wakakane yimba la divɛsa dia lushi la lushi diakawasɛdingola. Divɛsa diakɔ aki Joani 8:31, lɛnɛ ata Yeso ɔnɛ: “Naka nyu ntshikala lo wetshelo ami, kete nyu nyekɔ mɛtɛ ambeki ami.” La divɛsa sɔ lo yimba, vɔ wakate ɔnɛ: “Kɛnɛ tshɛ kayotosala dia mbetɛ nsɛnɔ yaso ɛsɛlɛngɛ ekɔ yimba ya ndjahombia.” Vɔ wakasondja luudu la wɔ la woke ndo diangatangata dikina ko wakonɔ otsha lo etshumanelo kɛmɔtshi kaki l’ohomba w’ekimanyielo. Vɔ wekɔ lo nkamba oko ambatshi mboka, koko vɔ mbishaka nto lonya lo olimu wa wokelo wa Mbalasa ya Diolelo ndo vɔ ndjakimɔka la lolango dia nsala elimu lo nsanganya ya distrikɛ. Ngande wayaokawɔ lo elimu wakambawɔ ɛsɔ? Vɔ mbutaka ɔnɛ: “Tekɔ l’ɔngɛnɔngɛnɔ lo woho weso la lɔsɛnɔ l’ɔsɛlɛngɛ ndo wasalaso paka kɛnɛ katokeketsha okongamelo wa Jehowa dia nsala.”

Sɔlɔmɔna akafunde ate: “Ashu aye wendaki utsha la ntundu, ndu toki yaye yasimbo too.” (Tuk. 4:25) L’ɛnyɛlɔ ka shufɛlɛ yatokaka washo paka la ntondo, sho pombaka mbewɔ dikambo tshɛ diakoka toshimba dia sho ndjadjɛ eyango wa lo nyuma ndo mbakotsha.

Naa eyango wa lo nyuma wakokayɛ ndjadjɛ ndo nkotsha? Nkamba olimu wa lo tena tshɛ ekɔ mɛtɛ oyango wa dimɛna. Oyango okina wakokayɛ ndjadjɛ ele, tokimanyiya etshumanelo kele suke la nyu, kewɔ l’ohomba w’apandjudi wa tomanamana dia nkindjakindja ɛtshi kawɔ ka nkɛtɛ. Etshumanelo  kɛmɔtshi mbeyaka monga l’apandjudi wa tomanamana efula, koko tɔ bu la dikumanyi kana ekambi wa nkimanyiya efula. Onde wɛ hakoke ndjadjɛ oyango ɔmɔtshi l’atei wa wɛnɛ woshidiso ɛnɛ? Onde wɛ hakoke nsawola la omendji w’otshimbedi dia nde menda kana wɛ koka tosha lonya? Naka wɛ kombolaka tosha ekimanyiyelo dihole dimɔtshi, kete ayonga ohomba wɛ teyi otale wa lɔkɛndɔ lahombayɛ minda otsha lɛkɔ. *

Tɔtɛkɛtɛ nto di’ɔkɔndɔ wele lo Isaya 62:10. Ondo ase Juda amɔtshi wakakambe olimu wa wolo wa nɔngɔsɔlɛ asekawɔ mboka dia vɔ nkalola aha l’okakatanu oya la Jɛrusalɛma. Naka wɛ kombolaka nkotsha eyango ayɛ wa lo nyuma, kete toyakɔmɔlake. L’ekimanyelo ka Nzambi, wɛ lawɔ koka mbakotsha. Tetemala nɔmba Jehowa lomba, etena kasalayɛ la wolo dia minya awui tshɛ wakodjɛ wekamu. Naka wɛ nsala ngasɔ, kete wɛ ayɛna woho wayokokimanyiya Jehowa dia wɛ “[nshishima] mbuka ololo ka we mbeta.”—Tuk. 4:26.