Bible hɛnya dia kana tshelo ya ntshumba edo yekɔ kɔlɔ kana bu.

Tɔ kekɔ l’ɛkɔndɔ wɛnya dia edo ndo weka w’edo w’anto amɔtshi wakatshumbama. (Jas. 7:25; 2 Ek. 34:4, 5) Ondo wakatshumbaka edo w’anto waki kokokaka kundɛma. Koko aha mbala tshɛ mbakongaka tshelo ya ntshumba edo la kitshimudi shɔ.

Dui sɔ diakɛnama etena kakavu nkumekanga Saolo nde l’anande asato. Vɔ akɔ anɛi wakatodiakema lo ta diakawalɔ l’ase Filistiya. Ɔnande ɔmɔtshi lakavu lokombo lande Jɔnatana laki ɔngɛnyi w’oshika ndo osukɔ waki Davidɛ. Etena kakeye epele w’ase Jabɛshɛ-Ngiliyadɛ kɛnɛ kakatombe, vɔ wakatɔsa odo wa Saolo la w’anande ko wakayaatshumba. Davidɛ akayandolaka ase Isariyɛlɛ asɔ lo dihonga diawɔ.—1 Sam. 31:2, 8-13; 2 Sam. 2:4-6.

Bible mbutaka dia wanɛ wakavu wayolwama. Oyadi onto lambovɔ monyɛma kana bu, Jehowa ekɔ l’akoka wa mboolola. Ase Hɛbɛru asato waki la mbetawɔ wakahande nyɔi lo nkuka ka dja lo ndjela didjango dia nkumekanga Nɛbukadinɛza, waki l’eshikikelo ɔnɛ kaanga vɔ kotshumbamaka, Nzambi ayowaolola. (Dan. 3:16-18) Eshikikelo kɛsɔ mbaki ndo la Ɛmɛnyi wa Jehowa wakalange ndjakema ndo monyɛma lo mpango ya nkanu y’ase Nazi. Ekambi waki Nzambi efula wa kɔlamelo ndjakemaka la waa bɔmbɛ kana mvɔka nyɔi yele edo awɔ hawɛnama. Koko kɛnɛ kele mɛtɛ ele, vɔ tshɛ wayolwama.—Ɛny. 20:13.

Dia Jehowa mbolola onto lakavu, nde bu l’ohomba wa paka demba di’onto lakavu mbongi. Mɛtɛ ka dui sɔ mɛnamaka etena koolola Jehowa Akristo w’akitami dia tɔsɛna l’olongo. L’ɛnyɛlɔ ka Yeso ‘lakolɔma la lɔsɛnɔ la lo nyuma,’ Akristo w’akitami mbolwamaka etondo awɔ l’alemba wa lo nyuma. Vɔ hawodɛ l’alemba awɔ wa l’emunyi otsha l’olongo.—1 Pet. 3:18; 1 Kɔr. 15:42-53; 1 Jni. 3:2.

Elongamelo ka eolwelo kele la so kitshama lo dikoka ndo nsaki kele la Nzambi ka mbolola wanɛ wakavu koko aha lo kɛnɛ kakokawɔ nsala la odo. (Ets. 24:15) Mbeyaka monga ko hatoshihodia kɛnɛ tshɛ kakasale Nzambi dia mbolola anto lo nshi yakete kana kɛnɛ tshɛ kayondosala dia mbolola anto lo nshi yayaye. Koko totetemale nkitsha wɛkamu aso le Jehowa nɛ dia nde akatosha “eshikikelo” k’ɔnɛ eolwelo kayoyala lam’ele nde akolola Yeso.—Ets. 17:31; Luka 24:2, 3.

Akristo pombaka takanyi yimba la mbekelo ya lo ngelo yodjashiwɔ, kɛnɛ kasala ase ngelo ndo ɛlɛmbɛ wa lɛɛta wendana la woho wa nsala la odo. (2 Kɔr. 6:3, 4) Ɔnkɔnɛ, yɛdikɔ yendana la ntshumba odo kana bu ekɔ yɛdikɔ y’onto ndaamɛ kana y’ase nkumbo.