1, 2. a) Onto akɔna lele Ɔmɛnyi wa kɔlamelo ndo wa mɛtɛ? b) Kakɔna kalembetshiya lokombo Yeso, ndo ngande wakandasɛnɛ lo yoho yɔtɔnɛ la lokombo lande?

YESO akate ate: “Dia dikambo nɛ mbakamotɔ ndo dia dikambo nɛ mbakamaye l’andja, dia dimi nsambisha akambo wa mɛtɛ.” (Adia Joani 18:33-37.) Yeso akate ɛtɛkɛta ɛsɔ etena kakinde la ntondo ka nguvɛrnɛrɛ Pilato. Yeso akayaeyanya oko Nkumekanga. Ɛnɔnyi efula l’ɔkɔngɔ, ɔpɔstɔlɔ Pɔɔlɔ akayɔtɛkɛtaka dia dihonga diaki la Yeso lo mbuta ɔnɛ, “oko ɔmɛnyi [Yeso] akasale wotelo wa dimɛna wa lo sɛkɛ la ntondo ka Pɔsɔ Pilato.” (1 Tim. 6:13) Koko l’andja waki Satana wambolola la lohetsho ɔnɛ, nɔmbamaka monga la dihonga di’efula l’ɛnyɛlɔ ka Yeso laki “Ɔmɛnyi wa kɔlamelo ndo wa mɛtɛ.”—Ɛny. 3:14.

² Ase Juda tshɛ wakelamɛka ɛmɛnyi wa Jehowa, koko Yeso mbaki Ɔmɛnyi wakaleke woke tshɛ. (Is. 43:10) La ntondo ka Yeso mbotɔ, ondjelo akatɛ Yɔsɛfu laki she ka loodia ɔnɛ: “Kowɔlɛ Yeso, nɛ dia nde mbayoshimbɛ anto oma lo pɛkato yawɔ.” (Mat. 1:20, 21; enda nɔtɛ.) Lokombo Yeso nembetshiyaka lo Hɛbɛru ɔnɛ “Jehowa kele panda.” Jehowa aki l’oyango wa nkamba la Yeso dia ntshungola anto tshɛ oma lo lɔhɔmbɔ la pɛkato la nyɔi. Yeso akatɛ “ɛkɔkɔ wakashishɔ wa lo wodja w’Isariyɛlɛ” dia vɔ wakahombe ndjatshumoya oma lo pɛkato yawɔ l’oyango wa vɔ nyometawɔma le Jehowa. (Mat. 10:6; 15:24; Luka 19:10) Yeso akasambisha awui wendana la Diolelo dia  Nzambi. Makɔ akafunde ate: “Yeso akatshu otsha la Ngalileya atasambisha lokumu l’ɔlɔlɔ laki Nzambi ate: ‘Etena kakashikikɛma kambokoka, Diolelo dia Nzambi diaya suke. Nyoyatshumoya ndo nyetawɔ lokumu l’ɔlɔlɔ.’” (Makɔ 1:14, 15) Yeso aki l’ohetoheto ndo la dihonga etena kakandasambishaka. Ɛnyɛlɔ, la dihonga tshɛ, nde akaanya ewandji w’ɛtɛmwɛlɔ w’ase Juda ndo ɔsɔ ekɔ ɔkɔkɔ ɔmɔtshi wakawodiake l’otamba.—Makɔ 11:17, 18; 15:1-15.

3. Kakɔna kakatombe nshi shato l’ɔkɔngɔ wa nyɔi ka Yeso?

³ Dui dia diambo ko, lushi la sato l’ɔkɔngɔ wa vɔ ndjaka Yeso nyɔi ka l’esehe, Jehowa akawolola aha la demba dia l’emunyi, koko oko etongami ka lo nyuma kahavu. (1 Pet. 3:18) Yeso akalɔtɛ demba dia l’emunyi dia nde nshikikɛ anto ɔnɛ nde ambolɔ. Lushi lakandolɔ, Yeso akɛnama mbala tshanu y’etondo le ambeki ande wotshikitanyi.—Mat. 28:8-10; Luka 24:13-16, 30-36; Jni. 20:11-18.

4. Kakɔna kakasale Yeso nde l’ambeki ande l’ɔkɔngɔ wa nde mbolɔ, ndo ɔkɛndɛ akɔna wakandawasha?

⁴ Mbala ka tanu kakɛnama Yeso le apɔstɔlɔ, nde akayaeyanya le wɔ ndo le anto akina waki kaamɛ la wɔ. Etena kakandɛnana la wɔ kɛsɔ, Yeso akawaohola awui wakafundama lo Ɔtɛkɛta wa Nzambi ndo “nde akadihola timba tawɔ dia vɔ nshihodia Afundelo.” Oma laasɔ, vɔ wakayoshihodiaka dia nyɔi ka Yeso oma le atunyi wa Nzambi ndo eolwelo kande ka diambo kakatatami edja efula lo Bible. L’ekomelo ka losanganya lakandɔtɔ la wɔ l’ɔkɔngɔ wa nde mbolɔ, Yeso akawasha ɔkɛndɛ ɔmɔtshi. Nde akawatɛ ɔnɛ: “Lo lokombo lande mbahomba esambishelo salema lo wedja tshɛ dia anto ndjatshumoya ko vɔ dimanyiyama pɛkato yawɔ, ntatɛ oma la Jɛrusalɛma.” Nde akakotsha ate: “Nyu pombaka monga ɛmɛnyi w’akambo asɔ.”—Luka 24:44-48.

5, 6. a) Lande na kakate Yeso ɔnɛ: “Nyayoyala ɛmɛnyi ami”? b) Naa sangwelo di’oyoyo diaki Jehowa diakatatɛ ambeki waki Yeso mbewoya?

⁵ Nshi 40 l’ɔkɔngɔ wa ɛnamelo ka Yeso k’ekomelo, apɔstɔlɔ ande wakayoshihodiaka ɛtɛkɛta waki Yeso w’ɔnɛ: “Nyayoyala ɛmɛnyi ami la Jɛrusalɛma, lo Judeya y’otondo, la Samariya polo ndo l’ahole woleki etale wa lo nkɛtɛ.” (Ets. 1:8) Lande na kakawatɛ Yeso ɔnɛ: “Nyayoyala ɛmɛnyi ami,” koko kombatɛ ɔnɛ nyayoyala ɛmɛnyi wa Jehowa? Nde akawatɛ ngasɔ, nɛ dia lam’ele ambeki ande waki ase Isariyɛlɛ, vɔ wakashile monga ɛmɛnyi wa Jehowa. Diakɔ diele, lo mbatɛ ngasɔ, Yeso akalange mbuta dia vɔ wakahombe nyomonga ndo ɛmɛnyi ande. Ko laasɔ, dui sɔ alembetshiyadiɔ?

⁶ Ambeki waki Yeso wakahombe ntatɛ mbewoya nsangwelo di’oyoyo diaki Jehowa, mbuta ate dui dioleki etshungwelo k’ase Isariyɛlɛ oma l’Edjibito ndo oma lɛnɛ akiwɔ lo lɔhɔmbɔ la Babilɔna la fwa. Dui diakɔ ko, nyɔi la eolwelo kaki Yeso Kristo kakimanyiya anto dia vɔ ntshungɔ oma lo lɔhɔmbɔ la pɛkato la nyɔi. Lo Pɛntɛkɔsta ka lo 33 T.D., ambeki waki Yeso wakatatɛ mbewoya anto “akambo wa diambo waki Nzambi,” ndo anto efula wakasambishama waketawɔ akambo akɔ. Oko wende lo lonya l’omi la She l’olongo, Yeso ekɔ lo mɛna woho wataleke lokombo lande monga la kitshimudi y’efula le nunu di’anto wayatshumoya ndo wɛnya mbetawɔ le nde oko wakombola Jehowa.—Ets. 2:5, 11, 37-41.

7. Kakɔna kɛnya akambo wakasalema lo Pɛntɛkɔsta ka lo 33 T.D.?

⁷ Akambo wakasalema lo Pɛntɛkɔsta ka lo 33 T.D., mɛnyaka l’eshikekelo tshɛ ɔnɛ  Jehowa aketawɔ olambo wa kokele waki Yeso di’anto dimanyiyama pɛkato. (Hɛb. 9:11, 12, 24) Oko wakalembetshiya Yeso, nde akaye “aha dia anto mbokambɛ olimu, koko dia ndjokambɛ anto akina olimu ndo nkimɔ anima ande oko oshinga w’etshungwelo dikambo di’anto efula.” (Mat. 20:28) “Anto efula” wakahombe ndjokondja wahɔ oma l’olambo waki Yeso kokomɛ tsho le ase Juda wakayatshumoya. Koko lolango laki Nzambi ele “[di’]anto tshɛ shimbamɛ,” nɛ dia oshinga w’etshungwelo waki Yeso ‘minyaka pɛkato ya l’andja.’—1 Tim. 2:4-6; Jni. 1:29.

8. Polo lo yɛdikɔ yakɔna yakasambisha ambeki waki Yeso, ndo kakɔna kakaakimanyiya dia nsala dui sɔ?

⁸ Ambeki waki Yeso wa lo ntambe ka ntondo wakasambishaka akambo wendana la Yeso la dihonga tshɛ. Kakɔna kakaakimanyiya dia nsala dui sɔ? Vɔ kosala dui sɔ l’akoka awɔ hita. Vɔ wakalɔmbɛ Jehowa dia nde mbasha nyuma kande k’ekila dia vɔ ntetemala nsambisha. (Adia Etsha 5:30-32.) Ɛnɔnyi oko 27 l’ɔkɔngɔ wa Pɛntɛkɔsta ka lo 33 T.D., akɛnama dia “losango l’akambo wa mɛtɛ wa lokumu l’ɔlɔlɔ” lakasambishama le ase Juda ndo le wanɛ waki komonga ase Juda, mbuta ate “lakasambishama lo etongelo tshɛ kele l’ɛse olongo.”—Kɔl. 1:5, 23.

9. Oko wakataditshi Yeso, kakɔna kakayokomɛka etshumanelo k’Akristo ka lo ntambe ka ntondo?

⁹ Lonyangu ko, awui wa kɔlɔ wakayɔtɔka yema yema l’etshumanelo k’Akristo ka lo ntambe ka ntondo. (Ets. 20:29, 30; 2 Pet. 2:2, 3; Judɛ 3, 4) Oko wakadiɛnya Yeso “kanga kɔlɔ,” mbuta ate Satana mbakɔtshiya wetshelo w’apɔstazi ɔsɔ l’etshumanelo ndo dui sɔ diakahombe fulanɛ ko minganyiya Lokristo la mɛtɛ polo “[l’]ekomelo k’andja.” (Mat. 13:37-43) Jehowa aketɛ Yeso Nkumekanga, diakɔ diele ntatɛ lo Ngɔndɔ ka dikumi 1914, takatatɛ nsɛna lo “nshi y’ekomelo” ya dikongɛ di’akambo dia kɔlɔ diaki Satana.—2 Tim. 3:1.

10. a) Naa datɛ dia laande diakewoyaka Akristo w’akitami? b) Kakɔna kakasalema lo Ngɔndɔ ka dikumi 1914, ndo kakɔna kakɛnama?

¹⁰ Akristo w’akitami wakasambisha edja efula la ntondo ɔnɛ Ngɔndɔ ka dikumi 1914 ayonga datɛ dia laande. Prɔfɛsiya ka Danyɛlɛ katɛkɛta di’otamba w’otale wakahembɔma ndo wakahombe ndjotomba nto l’ɔkɔngɔ wa “tena esambeli” mbakaakimanyiya dia mbeya dui sɔ. (Dan. 4:16)  Yeso akatɛkɛta di’etena kakɔ kaamɛ ɔnɛ ɔsɔ ayonga “etena kakashikikɛma k’ase wedja” lo prɔfɛsiya kande kendana la woongelo ande ndo “ekomelo k’andja.” Kaanga lo 1914, ɔnɔnyi wa diambo, anto tshɛ wakakoke mɛna ‘djembetelo ya woongelo wa Kristo’ oko Nkumekanga k’oyoyo ka lo Diolelo diaki Nzambi. (Mat. 24:3, 7, 14; Luka 21:24) Ntatɛ oma ko etena kɛsɔ, “akambo wa diambo waki Nzambi” mendanaka nto la woho wakahenya Jehowa Yeso l’okudi oko Nkumekanga ka Diolelo diande.

11, 12. a) Kakɔna kakatombe lo 1919? b) Kakɔna kakɛnama hwe lo 1935? (Enda osato wele lo mbɔtwɛlɔ.)

¹¹ L’ɔkɔngɔ wa nde nkoma Nkumekanga, Yeso akatatɛ ntshungola Akristo w’akitami oma lo lɔhɔmbɔ la “Babilɔna ka Woke.” (Ɛny. 18:2, 4) Etena kakahembɔ Ta dia ntondo di’andja w’otondo lo 1919, Akristo w’akitami wakatatɛ nsambisha l’andja w’otondo awui wendana la panda kaki Nzambi ndo la Diolelo diande diakashikikɛma. Akristo asɔ wakasambisha efula ndo etombelo waki la dui sɔ ele, nunu di’anto efula waketawɔ losango ndo wakakome Akristo w’akitami.

¹² Ntatɛ oma ko 1935, akɛnama hwe dia Kristo akashile ntatɛ ntshumanya miliyɔ “[y’]ɛkɔkɔ ekina” woye oma lo wedja tshɛ dia vɔ nkenga “olui a woke.” Lo ɛlɔmbwɛlɔ k’Akristo w’akitami, anto wa l’olui a woke vɔ lawɔ wekɔ lo mbokoya dihonga diaki la Yeso lo nsambisha lo sɛkɛ dia vɔ mɛnya ɔnɛ vɔ wambokondja panda ka Nzambi ndo Kristo. Lo ntetemala nsambisha ndo lo monga la mbetawɔ l’oshinga w’etshungwelo waki Kristo, Akristo asɔ wayonga la diɛsɛ dia panda lo “mfɔnu ka woke” nɛ dia l’etena kɛsɔ mbayonga ekomelo k’andja waki Satana.—Jni. 10:16; Ɛny. 7:9, 10, 14.

13. Oko weso Ɛmɛnyi wa Jehowa, kakɔna kahombaso ndjashikikɛ dia nsala, ndo ngande wakokaso ndjashikikɛ ɔnɛ tayotondoya dui sɔ?

¹³ Sho pombaka ntetemala mbɔsa la nɛmɔ diɛsɛ diele la so dia monga Ɛmɛnyi “[w’]akambo wa diambo” wasala Jehowa Nzambi ndo alaka ande wendana la nshi yayaye. Kɛnɛ kele mɛtɛ ele, dia monga woho w’ɔmɛnyi wa ngasɔ bu yana ya dikambo. Efula k’anangɛso wekɔ lo nsambisha lo bɛtshi dia nkɛtɛ diele anto hawɛnya nsaki, mbaɔnyɔlaka ndo mbahɛnyahɛnyaka. Sho koka nsala oko wakasale ɔpɔstɔlɔ Pɔɔlɔ nde l’asekande. Nde akate ate: “Takakondja dihonga oma le Nzambi kaso dia nyewoya lokumu l’ɔlɔlɔ laki Nzambi l’atei w’ɔlɔshamelo wa wolo.” (1 Tɛs. 2:2) Koko tatohekɔke pondjo. Lo dihole dia sho mpekɔ, sho pombaka mbɔsa yɛdikɔ ya wolo ya ntetemala nɛ dia dikongɛ diaki Satana diayanga ndanyema. (Is. 6:11) Hatokoke nsala dui sɔ la wolo aso hita, koko lo mbokoya ɛnyɛlɔ k’Akristo wa lo ntambe ka ntondo, sho pombaka nɔmbaka Jehowa  nyuma kande nɛ dia lo tshimbo ya tɔ mbayondotosha “wolo woleki wɔnɛ wokongaka l’onto.”—Adia 2 Kɔrɛtɔ 4:1, 7; Luka 11:13.

14, 15. a) Ngande wakɔsamaka Akristo lo ntambe ka ntondo T.D., ndo kakɔna kakate ɔpɔstɔlɔ Petero lo dikambo diawɔ? b) Ngande wahombaso ndjaoka naka tambɔhɛnyahɛnyama l’ɔtɛ weso Ɛmɛnyi wa Jehowa?

¹⁴ Ɛlɔ kɛnɛ, miliyɔ y’anto ndjafunaka ɔnɛ wekɔ Akristo, “koko vɔ [mangunaka Nzambi] oma l’etsha awɔ nɛ dia vɔ wekɔ wɔnɔnyi, bu la okitanyiya ndo hawetawɔma dia nkamba weho tshɛ w’elimu w’ɛlɔlɔ.” (Tito 1:16) Hatohombe mbohɛ ɔnɛ Akristo wa lo ntambe ka ntondo wakahetshama oma le anto efula wa lo nshi yawɔ. Diakɔ diakafunde ɔpɔstɔlɔ Petero ate: “Naka wekɔ lo ntɛkɛta kɔlɔ dikambo dianyu l’ɔtɛ wa lokombo la Kristo, kete nyekɔ l’ɔngɛnɔngɛnɔ, nɛ dia . . . nyekɔ la . . . nyuma kaki Nzambi.”—1 Pet. 4:14.

¹⁵ Onde Ɛmɛnyi wa Jehowa ɛlɔ kɛnɛ, vɔ ‘tɛkɛtaka kɔlɔ lo dikambo diawɔ l’ɔtɛ wa Kristo’? Eelo, nɛ dia hatosambisha tsho awui wendana la Jehowa, koko sho sambishaka ndo awui wendana la Yeso ndo ɔnɛ nde mbele Nkumekanga ka Diolelo diaki Nzambi. Yeso nde lawɔ akahɛnyahɛnyama l’ɔtɛ wakinde Ɔmɛnyi wa Jehowa. Nde akatɛ atunyi ande ate: “Dimi lakaye lo lokombo la Papa, koko nyu konongolami.” (Jni. 5:43) Diakɔ diele, naka wambotɔhɛnyahɛnya l’ɔtɛ weso Ɛmɛnyi wa Jehowa, sho pombaka mbohɔka ɔnɛ Jehowa ekɔ lo tetawɔ ndo ɔnɛ tekɔ “la nyuma” kande k’ekila.

16, 17. a) Ngande wayaoka Ɛmɛnyi wa Jehowa lo kɛnɛ kendana l’olimu w’esambishelo? b) Kakɔna kamboyoyashikikɛ dia ntetemala nsala?

¹⁶ Tohɔ nto di’anto efula wa l’andja w’otondo wekɔ lo mbetawɔ akambo wa mɛtɛ. Oyadi tekɔ lo ɛtshi ka nkɛtɛ kasambishama dimɛna, tekɔ lo ntetemala mpomana l’anto wangɛnangɛna mboka akambo wa mɛtɛ ndo sho mongaka nto l’ɔngɛnɔngɛnɔ w’efula wa mbaewoya losango la panda. Sho pombaka kalolɛka anto wɛnya saki, mbeka la wɔ Bible naka kokaka, mbakimanyiya dia vɔ nambola nsɛnɔ yawɔ le Jehowa ndo batizama. Naka sho nsala ngasɔ, kete tayoyaoka oko wakayaoke Sarie ladjasɛ l’Afrique du Sud, lakayasha l’ohetoheto l’esambishelo l’edja kolekanyi ɛnɔnyi 60. Nde mbutaka ate: “Lekɔ la lowando l’efula nɛ dia paka lo tshimbo y’oshinga w’etshungwelo waki Yeso mbakokami monga la diɔtɔnganelo dia dimɛna la Jehowa, Omboledi w’andja w’otondo ndo lekɔ l’ɔngɛnɔngɛnɔ dia mbeyanya lokombo lande la diambo.” Nde la Martinus w’omɛnde wambokimanyiya anto efula mbidja ndo anawɔ asato dia vɔ nkoma atɛmɔdi wa Jehowa. Sarie kotshaka ate: “Ndooko olimu okina wakoka mbisha onto ɔngɛnɔngɛnɔ ko ndeka olimu w’esambishelo ndo lo tshimbo ya nyuma k’ekila, Jehowa toshaka sho tshɛ wolo weso la wɔ ohomba dia sho ntetemala l’olimu washimbɛ nsɛnɔ.”

¹⁷ Oyadi tambobatizamaka kana taakayange batizama, tekɔ l’ɔkɔkɔ w’oshika wa monga la lowando lo diɛsɛ diele la so dia monga l’etshumanelo ka l’andja w’otondo k’Ɛmɛnyi wa Jehowa. Ɔnkɔnɛ, nyɛsɔ totetemale ndjasha l’esambishelo ndo toyaɛdia oma l’andja ɔnɛ wa kɔlɔ waki Satana. Naka sho nsala ngasɔ, kete tayotombola Shɛso lele l’olongo, leso la diɛsɛ dia mbelamɛ lo lokombo lande la diambo.