1. Kakɔna kɔsa dihole dia laande lo ɔtɛmwɛlɔ aso?

ONDO wɛ ambɛnaka lokombo Jehowa lofundami lo mvudu mɔtshi ya lo sɛkɛ kana yombawɔ disɛlasɛla (musées). Aha la taamu, dui sɔ diakakotola yambalo yayɛ ndo diakakɔngɛnyangɛnya. Le so sho Ɛmɛnyi wa Jehowa, lokombo l’oshika laki Nzambi mbɔsaka dihole dia laande lo ɔtɛmwɛlɔ aso. L’andja w’otondo, ndooko anto akina wakamba la lokombo laki Nzambi lɔsɔ oko sho. Koko ekɔ awui akina walɔmbama laadiko dia nkamba la lokombo laki Nzambi. Lam’ele tekɔ la diɛsɛ dia monga Ɛmɛnyi ande, sho pombaka nsala awui wɛnya dia tekɔ lo mbɔlɛmiya.

2. Ahombaso nsala laadiko dia nkamba la lokombo laki Nzambi?

² Aha woho wakambaso tsho la lokombo laki Nzambi mbakokaso mbetawɔma le nde. Sho pombaka nsɛna lo yoho y’ɔtɔnganɛ la atɔndɔ ande wendana la lɔkɛwɔ. Diakɔ diele, Bible toholaka ɔnɛ ekambi waki Jehowa pombaka “[mimɔ] uma lu kolo.” (Osam. 34:14) Ɔpɔstɔlɔ Pɔɔlɔ akayɔtɛkɛtaka hwe lo kɛnɛ kendana la tɔndɔ sɔ etena kakandafunde ɔnɛ: “Onto tshɛ latɛndɛ lokombo la Jehowa atshike akambo wa kɔlɔ.” (Adia 2 Timɔte 2:19.) Oko weso ekambi waki Jehowa, ngande wakokaso ndjashikikɛ ɔnɛ tambotshika awui wa kɔlɔ?

3, 4. Dui diakɔna diamboyanga waa nomb’ewo y’awui wa lo Bible edja efula dia mbeya, ndo lande na?

³ Tende oma lɛnɛ akɔsɛ Pɔɔlɔ ɛtɛkɛta ande watanema lo 2 Timɔte 2:19. Divɛsa nɛ tɛkɛtaka dia “ehikamelo ka wolo kaki Nzambi” ndo dia nsango hiende yofundami lɔkɔ. Losango la ntondo mbutaka dia “Jehowa mbeyaka anto ande,” ndo lɔ mbɔsama oma lo Walelu 16:5. (Enda sawo dietshi.) Losango la hende mbutaka dia “onto tshɛ latɛndɛ lokombo la Jehowa atshike akambo wa kɔlɔ,” ndo aya edja efula kele waa nomb’ewo y’awui wa lo Bible wekɔ lo nyanga dia mbeya kitshimudi ya losango lɔsɔ. Lande na?

⁴ Mɛnamaka dia ondo ɛtɛkɛta waki Pɔɔlɔ ɛsɔ wakɔsama oma l’Afundelo wa lo Hɛbɛru. Koko ndooko divɛsa dia l’Afundelo wa Hɛbɛru diafɔna tshɛ lo tshɛ la ɛtɛkɛta waki Pɔɔlɔ ɛsɔ. Ko kakɔna kakandalange mbuta etena kakandafunde ɔnɛ: “Onto tshɛ latɛndɛ lokombo la Jehowa atshike akambo wa kɔlɔ”? Losango la ntondo laki Pɔɔlɔ lakɔsama oma lo Walelu tshapita 16 yatɛkɛta dia ɔtɔmbɔkwɛlɔ wa Kɔra. Onde ndo losango la hende mbatɛkɛta dia ɔtɔmbɔkwɛlɔ ɔsɔ?

5-7. Akambo akɔna wakete lo nshi ya Mɔsɛ wakayɔtɛkɛtaka Pɔɔlɔ nto lo 2 Timɔte 2:19? (Enda osato wele lo mbɔtwɛlɔ.)

⁵ Bible mbutaka dia Datana nde la Abirama ana waki Eliyabɛ wakayele Kɔra ndo vɔ mbakatshutshuya olui w’anto dia tɔmbɔkwɛ Mɔsɛ la Arɔna. (Wal. 16:1-5) Vɔ wakatatɛ mɔnyɔla Mɔsɛ ndo lowandji lakawosha Nzambi. Atɔmbɔki asɔ wakatetemala ntshikala kaamɛ la ekambi waki Jehowa wa kɔlamelo ndo vɔ wakadjaka lonyuma lawɔ lo waale. Lam’akakoke etena ka Jehowa mɛnya otshikitanu lam’asa atɛmɔdi ande wa kɔlamelo la atɔmbɔki, nde akasha didjango dimɔtshi diokɛma hwe.

⁶ Bible mbutaka ɔnɛ: “[Jehowa] akakaluya Mose diui ati: Uteli ului w’antu wati: Nyumo uma l’edjaselu ka Kora, ka Datana, la k’Abirama. Mose akunela, akatshu le Datana, le Abirama. Ku dihangamendi dia Isariyele wakûyeli. Ndi akasengasenga ului w’antu ati: Nyuneli uma la mvudu y’apema y’antu wa kolo ane. Tanyunandaki diango diawo, nyutukulanyema kame la wo lu kolo yawo tshe. Okone vo wakamo uma lasuki la edjaselu ka Kora, ka Datana, la k’Abirama.” (Wal. 16:23-27) Oma laasɔ, Jehowa akadiake wanɛ tshɛ wakatɔmbɔkɔ. Koko atɛmɔdi ande wa kɔlamelo wakatshikala la lɔsɛnɔ l’ɔtɛ wakawamɔ oma lale anto asɔ ndo wakawatshike akambo wa kɔlɔ.

⁷ Ɛtɛkɛta waki Pɔɔlɔ watanema lo 2 Timɔte 2:19 wata ɔnɛ “Jehowa mbeyaka anto ande,” mbɔsama oma lo Walelu 16:5. Lo mfunda ɔnɛ “onto tshɛ latɛndɛ lokombo la Jehowa atshike akambo wa kɔlɔ,” ondo Pɔɔlɔ akatɛkɛtaka di’akambo wele lo Walelu 16:23-27. Diakɔ diele, sho koka mbuta ɔnɛ lo nsango yakɔ hiende shɔ, Pɔɔlɔ ekɔ lo ntɛkɛta di’awui akɔ waamɛ. Wetshelo akɔna wakondjaso oma lo nsango shɔ? Wetshelo wakondjaso ele, Jehowa sɛdingolaka etema, mbeyaka wanɛ wele ekambi ande wa kɔlamelo ndo nde kombolaka dia vɔ ndjaanganya l’anto wa kɔlɔ.

8. Lande na kele aha nkamba tsho la lokombo Jehowa kana monga lo etshumanelo k’Akristo kete onto ambetawɔma le Jehowa?

⁸ Lo ntɛkɛta di’akambo wakete lo nshi ya Mɔsɛ asɔ, Pɔɔlɔ akoholaka Timɔte ohomba wa mbɔsa yɛdikɔ aha la ntshimbatshimba dia nkokɛ diɔtɔnganelo di’oshinga wolo diasande la Jehowa. Lo nshi ya Mɔsɛ, aha nkamba tsho la lokombo Jehowa, kete onto ambetawɔma le nde. Woho akɔ waamɛ mbele, ekɔ awui akina walɔmbama di’Okristo nsala laadiko dia monga lo etshumanelo k’Akristo. Atɛmɔdi wa mɛtɛ waki Nzambi  pombaka mbɔsa yɛdikɔ aha la ntshimbatshimba ya ntshika akambo wa kɔlɔ. Kitshimudi yakɔna yaki la dui sɔ le Timɔte? Ndo wetshelo akɔna wakoka ekambi waki Jehowa nkondja oma lo dako diaki Pɔɔlɔ sɔ?

9. Shɛngiya yakɔna yakonge la “taamu t’enginya ndo t’anyanya” l’etshumanelo k’Akristo ka lo ntambe ka ntondo?

⁹ Bible mbishaka alako wa nshikaa wendana l’awui amɔtshi wa kɔlɔ wahomba Akristo ntshika. Ɛnyɛlɔ, l’ɔkɔngɔ wa nde mbutɛ Timɔte ɛtɛkɛta wele lo 2 Timɔte 2:19, Pɔɔlɔ akanyomowotɛ “diaha  . . . mbidjana taamu lo dikambo dia tɔtɛkɛta” ndo “[mb]ewɔ ɛtɛkɛta w’anyanya.” (Adia 2 Timɔte 2:14, 16, 23.) Ase etshumanelo amɔtshi waketshaka wetshelo w’apɔstazi ndo akina wakatondjaka asawo w’anyanya wakakonyaka anto dia mbidjana taamu tahɛnɛ pe. Kaanga mbele asawo ɔsɔ kɔndɔshanaka mbala kakɔ ɔtɔi la Bible, vɔ wakadjaka diatɔnelo l’etshumanelo. Etombelo waki l’awui asɔ ele, ewanu wahɛnɛ pe wakatatɛ monga ndo lonyuma l’anto lakɔtɔ lo waale. Diakɔ diakɛnya Pɔɔlɔ ohomba wa “[mb]ewɔ taamu t’enginya ndo t’anyanya.”

10. Ahombaso nsala naka tambotanema la ntondo ka wetshelo w’apɔstazi?

¹⁰ Ɛlɔ kɛnɛ, wetshelo w’apɔstazi hawoyoleka tanema l’etshumanelo. Etena katanemaso la ntondo ka wetshelo ɛmɔtshi wahatumbi oma lo Bible oyadi oma lende otumbiwɔ, sho pombaka mbaatona aha la ntshimbatshimba. Ayonga dui di’enginya naka sho ntatɛ mbidjana la waa apɔsta taamu okoko l’okoko, lo mesajɛ wa l’Ɛtɛrnɛtɛ kana lo toho tokina. Oyadi oyango aso ekɔ wa mbakimanyiya, naka sho sawolaka l’anto wa ngasɔ, kete tambɔnyɔla Nzambi. Lo dihole dia sho nsala ngasɔ, sho pombaka ntona ndo mbewɔ wetshelo w’apɔstazi.

11. Dui diakɔna diakoka ndjokonya lo “taamu t’enginya,” ndo ngande wakoka dikumanyi mbisha ɛnyɛlɔ k’ɔlɔlɔ?

¹¹ Laadiko dia wetshelo w’apɔstazi, ekɔ awui akina wakoka ndjofukutanya wɔladi wa l’etshumanelo. Ɛnyɛlɔ, naka ase etshumanelo monga la tokanyi totshikitanyi lo kɛnɛ kendana la tɔkɛnyɔ, kete dui sɔ koka ndjokonya lo “taamu t’enginya ndo t’anyanya.” Kɛnɛ kele mɛtɛ ele, naka onto ndjasha lo tɔkɛnyɔ tasekola atɔndɔ waki Jehowa wendana la lɔkɛwɔ, kete dikumanyi hawohombe ndjiha washo l’oyango wa mbewɔ taamu. (Osam. 11:5; Ɛf. 5:3-5) Koko dikumanyi hawohombe mfundɛ ase etshumanelo dia vɔ kɛnyaka paka tɔkɛnyɔ talangawɔ. Lo dihole dia vɔ nsala ngasɔ, vɔ ndjelaka dako diele l’Afundelo diata ɔnɛ: “Nyolamake ɛkɔkɔ wa Nzambi wakandanyosha ɔkɛndɛ, . . .  aha la mbahemɛ wanɛ wakanyosha Nzambi ɔkɛndɛ wa mbalama, koko nyoyale bɛnyɛlɔ di’ɛlɔlɔ le ɛkɔkɔ.”—1 Pet. 5:2, 3; adia 2 Kɔrɛtɔ 1:24.

12, 13. a) Ahombaso nsala lo kɛnɛ kendana la weho wa tɔkɛnyɔ tahombaso kɛnya, ndo naa atɔndɔ wa lo Bible wahombaso nkamba la wɔ? b) Ngande wakokaso nkamba l’atɔndɔ wele lo odingɔ 12 lo awui wendana l’onto ndaamɛ?

¹² Okongamelo hɛnya listɛ la filmɛ, tɔkɛnyɔ ta lo vidɛo, abuku kana esambo wahombaso mbewɔ. Lande na? Ekɔ ngasɔ nɛ dia Bible keketshaka onto tshɛ la l’atei aso dia nde mbekiya “akoka [ande] w’ekanelo ka yimba . . . la oyango wa ntshikitanya ɔlɔlɔ la kɔlɔ.” (Hɛb. 5:14) Bible mbishaka atɔndɔ wakoka nkimanyiya Okristo dia nsala ɔsɔnwɛlɔ wendana la tɔkɛnyɔ. Lo awui tshɛ wa lo lɔsɛnɔ laso, oyango aso pombaka monga wa “nshikikɛ kɛnɛ ketawɔma le Nkumadiɔndjɔ.” (Ɛf. 5:10) Bible mbetshaka dia ewandji wa nkumbo wekɔ la yema ya lowandji, diakɔ diele vɔ koka mbɔsa yɛdikɔ diaha weho ɛmɔtshi wa tɔkɛnyɔ kɛnyama lo nkumbo yawɔ. *—1 Kɔr. 11:3; Ɛf. 6:1-4.

¹³ Atɔndɔ wa lo Bible wɔtɛkɛtshiso la  diko, koka tokimanyiya dia sho nsala ɛsɔnwɛlɔ w’eshika lo awui akina wa lo lɔsɛnɔ. Ɛnyɛlɔ, anto wekɔ la tokanyi totshikitanyi lo kɛnɛ kendana la ɔlɔtɔ, ɔlɔngɔswɛlɔ wa divo, esakelo, olelo ndo awui akina wa lo lɔsɛnɔ wendana l’onto ndaamɛ. L’oseka dui tshɛ, naka ndooko tɔndɔ dia lo Bible diosekɔmi, kete bu ohomba mbidjana taamu lo kɛnɛ kahomba asekaso Akristo nsala, “nɛ dia okambi wa Nkumadiɔndjɔ hahombe ndɔ ta, koko nde pombaka monga la memakana otsha le anto tshɛ.”—2 Tim. 2:24.

14. Ɛnyɛlɔ kakɔna kakakambe la Pɔɔlɔ dia ntɔtɔmiya ohomba wa mbewɔ lɔngɛnyi la kɔlɔ?

¹⁴ Naa yoho kina yakoka ‘onto tshɛ latɛndɛ lokombo la Jehowa ntshika akambo wa kɔlɔ’? Yoho mɔtshi ele, lo ntshika monga kaamɛ la wanɛ wasala awui wa kɔlɔ. Aki dui dia dimɛna lo woho wakayokambaka Pɔɔlɔ la ɛnyɛlɔ kekina l’ɔkɔngɔ wa nde nkamba la etelo k’ɔnɛ “ehikamelo ka wolo ka Nzambi.” Nde akatɛkɛta nto dia “luudu la woke” lele “aha paka diangɔ dia paonyi la dia mfɛsa to mbatongaka [lɔkɔ], koko ndo diangɔ dia esongo ndo dia awomba, dimɔtshi dikambo dia okambelo wa nɛmɔ efula ndo dikina dia okambelo w’anyanya.” (2 Tim. 2:20, 21) Oma laasɔ, nde akakeketsha Akristo dia vɔ ‘ndjaɛdia’ lo nkakitɔna la ‘diangɔ di’anyanya’ sɔ.

15, 16. Wetshelo akɔna wakokaso nkondja oma lo ɛnyɛlɔ kaki Pɔɔlɔ ka “luudu la woke”?

¹⁵ Kakɔna kalembetshiya ɛnyɛlɔ kakambe la Pɔɔlɔ kɛsɔ? “Luudu la woke” koka mbɛdikama la etshumanelo k’Akristo ndo “diangɔ” dia lo luudu koka mbɛdikama l’ose etshumanelo tshɛ. Diangɔ dimɔtshi dia lo luudu mbeyaka ndjolana l’ɔtɛ wediɔ suke la diangɔ dimɔtshi dia mindo kana dia kɔlɔ. Kanga luudu pombaka nkakitola diangɔ dia pudipudi la nɛ diele mindo ɛnyɛlɔ nɛ diakamba la nde lo kuku.

¹⁶ Ngasɔ mbediɔ lo kɛnɛ kendana l’ekambi waki Jehowa ɛlɔ kɛnɛ. Naka sho kombolaka ntshikala pudipudi lo awui tshɛ wa lo lɔsɛnɔ laso, kete sho pombaka  ndjaanganya l’ose etshumanelo tshɛ latona dia nkitanyiya atɔndɔ waki Jehowa. (Adia 1 Kɔrɛtɔ 15:33.) Lam’ele sho pombaka ndjaangaya l’ose etshumanelo tshɛ latona nkitanyiya atɔndɔ waki Jehowa, shi sho pombaka ndeka ‘ndjaanganya’ la wanɛ wele l’andja w’etshumanelo? Sho pombaka nsala dui sɔ nɛ dia anto wele l’andja w’etshumanelo wekɔ ‘anangi wa falanga, hawokitanyi ambutshi, bu la kɔlamelo, amamanyishi, akanga w’ekonda, kema la ngandji ka lam’asa ase nkumbo, afungi ndo anangi w’ɛngɛnɔngɛnɔ lo dihole dia monga anangi wa Nzambi.’—2 Tim. 3:1-5.

17. Kakɔna kakasale ase Isariyɛlɛ waki la kɔlamelo aha la ntshimbatshimba?

¹⁷ Etena kakatɛ Jehowa ase Isariyɛlɛ ɔnɛ: “Nyumo uma l’edjaselu ka Kora, ka Datana, la k’Abirama,” Bible mɛnyaka dia ‘Mbala kakɔ ɔtɔi, vɔ wakamɔ.’ (Wal. 16:24, 27) Vɔ kotshimbatshimba dia mimɔ oma lale atɔmbɔki asɔ kana nsala akambo la wengengo. “Vo wakamo uma lasuki la edjaselu.” Wanɛ waki la kɔlamelo asɔ kombetawɔ mbidja nsɛnɔ yawɔ lo waale. Okitanyiya awɔ komonga wa laadiko di’ɛlɔmɔ. Vɔ wakatshikala pudipudi la ntondo ka Jehowa ndo wakatone awui wa kɔlɔ. Wetshelo akɔna wakondjaso oma lo ɛnyɛlɔ kɛsɔ?

18. Kakɔna kakalange Pɔɔlɔ mbuta etena kakandahɛmɔla Timɔte dia nde ndawɔ “nsaki y’ɛlɔngɔlɔngɔ”?

¹⁸ Sho pombaka mbɔsa yɛdikɔ aha la ntshimbatshimba ndo l’eshikikelo tshɛ dia nkokɛ diɔtɔnganelo diasaso la Jehowa. Pɔɔlɔ akakeketshaka Timɔte lo mbotɛ ɔnɛ: “Lawɔ nsaki y’ɛlɔngɔlɔngɔ.” (2 Tim. 2:22) Etena kakandofundɛ ɛtɛkɛta ɛsɔ, ondo ko Timɔte ambolekanya ɛnɔnyi 30, nɛ dia kaanga epalanga w’anto koka monga la nsaki ya kɔlɔ “y’ɛlɔngɔlɔngɔ.” Etena kakandandamaka la nsaki ya ngasɔ, Timɔte akahombaka ‘ndjilawɔ.’ L’ɛtɛkɛta ekina, Timɔte akahombe ‘ntshika akambo wa kɔlɔ.’ Yeso nde lawɔ, akayɔtɛkɛtaka dui dia woho akɔ waamɛ lo mbuta ɔnɛ: “Naka sso diayɛ kotakanyaka, kete kundoladiɔ ndo kashadiɔ.” (Mat. 18:9) Ɛlɔ kɛnɛ, Akristo walanga nkamba la dako sɔ ndo nkokɛ diɔtɔnganelo diasawɔ la Nzambi pombaka mbɔsa yɛdikɔ aha la ntshimbatshimba ndo l’eshikikelo tshɛ.

19. Kakɔna kakasale Akristo amɔtshi dia ndjakokɛ oma lo waale wa lo nyuma?

¹⁹ Efula ka wanɛ wakanɔka wanu lo tshambandeko la ntondo ka vɔ ndjokoma Ɛmɛnyi wa Jehowa ndjɔsaka yɛdikɔ yaha nnɔ kaanga piɔpɔ. Akina ndjotshikaka ndjasha kaanga lo weho ɛmɔtshi wa tɔkɛnyɔ tele bu kɔlɔ, nɛ dia tɔ koka ndjaatakanya. (Osam. 101:3) Ɛnyɛlɔ, la ntondo ka nde nkoma Ɔmɛnyi wa Jehowa, ɔnangɛso ɔmɔtshi akayashaka lo ɔnwɛlɔ wa nkombe y’emula nsaki ya demba. L’ɔkɔngɔ wa nde mbeka akambo wa mɛtɛ, nde akayotshikaka nnɔ lokombe kaanga lo waa fɛtɛ y’Ɛmɛnyi wa Jehowa l’oyango waha nde ndjemula nsaki ya mindo kana tokanyi ta kɔlɔ taki la nde ntondo. Koko, bu kɔlɔ di’Akristo nnɔ yema ya wanu, nkɛnya lokombe kana nsala awui akina wele bu kɔlɔ. Kɛnɛ kele mɛtɛ ele, sho tshɛ pombaka monga la shɛnɔdi ndo nkokɛ diɔtɔnganelo diasaso la Jehowa.

20. Kaanga mbele bu yana ya dikambo dia ‘ntshika akambo wa kɔlɔ,’ kakɔna katokeketsha dia nsala dui sɔ?

²⁰ Ekɔ tshondo ya diɛsɛ dia mbelamɛ ɔnɛ Ɔmɛnyi wa Jehowa. Koko ekɔ awui akina walɔmbama laadiko dia laasɔ, mbuta ate ‘ntshika akambo wa kɔlɔ’ ndo ‘mimɔ oma lo kɔlɔ.’ (Osam. 34:14) Eelo mɛtɛ, nsala ngasɔ bu yana ya dikambo. Koko ekɔ tshondo y’ekeketshelo dia mbeya ɔnɛ Jehowa okolangaka “anto ande” ndo wanɛ wookitanyiya.—2 Tim. 2:19; adia 2 Ekondo 16:9a.