KATHERINE akole l’États-Unis, ndo nde akabatizama ele l’ɛnɔnyi 16. Nde akayashaka efula l’esambishelo koko anto wa l’ɛtshi kande ka nkɛtɛ kondekaka mbetawɔ losango la Diolelo. Nde mbutaka ate: “Lakadiaka ɛkɔndɔ w’anto wakalɔmbaka Nzambi dia nde mbatomɛ onto lakoka ndjowatsha awui wendana Nzambi. Lakakombolaka mpomana l’onto la ngasɔ, koko ndooko lushi lakamakondja diɛsɛ sɔ.”

L’ɔkɔngɔ wa nde nsambisha l’edja k’ɛnɔnyi efula lo ɛtshi ka nkɛtɛ kɛsɔ, Katherine akatatɛ nkanyiya dia ntshɔ otsha lo dihole dikina diakandakoke totana anto wayetawɔ losango la Diolelo. Nde akayambola dia kana nde ayonga l’akoka wa nsala dui sɔ. Polo laasɔ ko paka mingu hiende tsho mbambondookakitɔnaka la nkumbo kande ndo dui sɔ diakawoshaka olengolengo lushi tshɛ. Koko nde aki la nsaki k’oma k’ɛse otema ka nkimanyiya anto akina wakakombolaka mbeya Jehowa. L’ɔkɔngɔ wa nde nsɛdingola ahole wotshikitanyi wakandakombolaka ntshɔ, nde akafundɛ Bɛtɛlɛ ka la Guam ndo akalongola elembetshiyelo wendana l’ahole akɔ. Lo Ngɔndɔ k’esambele 2007, etena kaki Katherine l’ɛnɔnyi 26, nde akonɔ otsha la Saipan disɛnga dimɔtshi dia lo océan pacifique dianganyi la lakawɔ kilɔmɛtrɛ oko 10 000. Etombelo akɔna wakandatokondjaka lɛkɔ?

Lam’akandakome l’etshumanelo kɛmɔtshi ka lɛkɔ, Katherine akatatɛ mbeka la Doris Bible ndo womoto ɔsɔ aki l’ɛnɔnyi 45. L’ɔkɔngɔ wa vɔ mbeka totshapita tosato t’etatelo ta dibuku Bible Etshatɔ, Katherine akayotatɛ ndjakiyanya. Nde mbutaka ate: “Doris aki ombeki w’oshika ndo dimi kokombolaka mboshisha. Lam’ele laasɔ ko latalɔmbɔlaka wekelo wa Bible wa mbala la mbala ndooko lushi, lakɛnyi dia ayoleka dimɛna kadiyɛso kambohokɔ akambo kana kele la nde ɛnɔnyi waamɛ ndjowetshaka Bible.” Katherine akalɔmbɛ Jehowa dia mbokimanyiya dia nde ntana kadiyɛso kele la diewo kakoka mbekaka la Doris. Oma laasɔ Katherine akatshu totɛ Doris ɔnɛ layanga koyangɛ ombetsha okina.

Katherine mbutaka ɔnɛ: “La ntondo ka dimi mbotɛ kɛnɛ kakimi la tɔ l’otema, Doris akambutɛ dia nde ekɔ la okakatanu ɔmɔtshi walangande mbutɛmi. L’ɔkɔngɔ wa dimi mbohokamɛ, lakawotɛ woho wakankimanyiya Jehowa dia dimi nkandola okakatanu wa woho akɔ waamɛ. Nde akankawoya losaka.” Oma laasɔ Doris akatɛ Katherine ɔnɛ: “Jehowa ambokamba la yɛ dia nkimanyiyami. Lushi la ntondo lakayaye lakami, dimi laki oma la mbadia Bible l’etena k’otale. Lakasɛngasɛngaka Nzambi dia nde  tomɛmi onto lakoka nkimanyiyami dia dimi nshihodia Bible. Kombeta edja wɛ akakɔkɔla lo lokuke la mi. Jehowa mɛtɛ akakadimola lo dɔmbɛlɔ diami.” Katherine akatatɛ kɛdia asɔyi etena kakawotɛ Doris ngasɔ. Nde mbutaka ate: “Ɛtɛkɛta waki Doris mbaki mɛtɛ okadimwelo lo dɔmbɛlɔ diami. Jehowa akamɛnya dia lekɔ l’akoka wa ntetemala mbeetsha Bible.”

Doris akabatizama lo 2010, ndo ekɔ lo mbeka l’anto efula Bible. Katherine kotshaka ate: “Lekɔ la lowando efula lo woho wakamakimanyiya onto ɔmɔtshi laki l’otema w’ɔlɔlɔ dia nde nkoma okambi waki Jehowa.” Ɛlɔ kɛnɛ, Katherine ekɔ l’ɔngɛnɔngɛnɔ lo woho wakambande oko ombatshi mboka wa laande lo disɛnga dia Kosrae lo océan pacifique.

Ndekana anangɛso l’akadiyɛso lokama w’oma lo ahole wotshikitanyi (wele l’ɛnɔnyi lam’asa 19 la 79) wakatshu dia tokimanyiya l’ahole wewɔ l’ohomba efula w’apandjudi la Micronésie. Erica lakonɔ nde la wɔ otsha la Guam lo 2006 etena kakinde la ɛnɔnyi 19, akakɛnɛmɔla woho w’ohetoheto akɔ waamɛ. Nde mbutaka ate: “Nkamba olimu w’ombatshi mboka lɛnɛ ele anto la nsaki ka mbeka akambo wa mɛtɛ mbishaka ɔngɛnɔngɛnɔ efula. Lekɔ la lowando efula le Jehowa lo woho wakandankimanyiya dia nkamba olimu w’ombatshi mboka. Vɔ mɛtɛ mbele olimu woleki dimɛna lo lɔsɛnɔ.” Erica ekɔ l’ɔngɛnɔngɛnɔ lo woho wakambande oko ombatshi mboka wa laande la Ebeye lo disɛnga dia la Marshall. Teye dia ntshɔ dia tokimanyiya lo wodja okina mbelaka ekakatanu. Tayanga nsɛdingola ekakatanu esato watohomanaka l’apandjudi lo wedja ekina ndo woho wakaakandola wanɛ wakonɔ la Micronésie.

Yoho ya lɔsɛnɔ. L’ɔkɔngɔ wa Simon nkoma lo disɛnga dia Palau lo 2007 etena kakinde l’ɛnɔnyi 22, nde akɛnyi dia nde okondja yema ya dikuta tshitshɛ lo mbɛdika la woho wakandakondjaka l’Angleterre lo wodja ande. Nde mbutaka ate: “Lakɔshi yɛdikɔ yaha nsomba kɛnɛ tshɛ kakombolami. La shɛnɔdi tshɛ, lɔɔsɔna diangɔ dia ndɛ diahombami nsomba ndo lootshɔka tosomba diangɔ paka lo ahole wokitshikitshi oshinga. Naka ɛngɔ kami kɛmɔtshi kambolana, dimi nyangaka mbolo y’emusu ko dimi nyanga onto lakoka nɔngɔsɔlɛmi tɔ.” Ɛlɔlɔ akɔna wambondokondja lo woho wasɛnande l’ɔsɛnɔ l’ɔsɛlɛngɛ? Simon mbutaka ate: “Dui sɔ diambonkimanyiya dia mbeya kɛnɛ kele mɛtɛ ohomba lo lɔsɛnɔ ndo woho wakokami ngɛnangɛna la kɛnɛ kele la mi. Jehowa mɛtɛ ambokimanyiya lo waaso wotshikitanyi. L’edja k’ɛnɔnyi esambele wamomokamba la Palau, lushi tshɛ dimi tanaka yangɔ ya ndɛ ndo dihole dia ndala.” Jehowa kimanyiyaka wanɛ wasɛna lɔsɛnɔ l’ɔsɛlɛngɛ nɛ dia vɔ nyangaka ntondo Diolelo.—Mat. 6:32, 33.

Olengolengo. Erica mbutaka ate: “Laki la diɔtɔnganelo dia dimɛna l’ase nkumbo kami ndo lakayakiyanyaka ɔnɛ olengolengo ami koka toonga la shɛngiya ya kɔlɔ l’olimu ami w’esambishelo.” Kakɔna kakandasale? Nde mbutaka ate: “La ntondo ka dimi ntshɔ lakadia asawo efula wa lo Tshoto y’Etangelo wɛnya woho wa ndɔshana l’olengolengo. Dui sɔ diakalɔngɔsɔla otema ami dia teya woho wa tokikɛ olengolengo. Lo sawo dimɔtshi, mama kɛmɔtshi akashikikɛ  ɔnande la womoto lo mbotɛ ate ‘Jehowa ayokokimanyiya oleki ndo woho wotomokokimanyiya.’ Dui sɔ diakankeketsha mɛtɛ.” Hannah nde la Patrick y’omɛnde wekɔ lo nkamba la Majuro disɛnga dimɔtshi dia la Marshall. Hannah akatondoya olengolengo waki la nde lo ndjasha efula le ase etshumanelo kakawonɔ. Nde mbutaka ate: “Dimi kaloyaka Jehowa losaka lo woho wakandatosha nkumbo k’onto l’ɔnango ka l’andja w’otondo ndo dimi mbaɔsaka oko ase nkumbo kami. Diɛsɛ l’ekimanyielo kawɔ ka la ngandji, mbemi l’akoka wa nkamba lɛnɛ ewɔ l’ohomba w’apandjudi.”

Ntana angɛnyi. Simon mbutaka ate: “Etena kakoma onto lo wodja okina, awui efula tshikitanaka. Lo tena dimɔtshi, dimi koosalaka shɛkɛsɛkɛ ndo anto kooshihodiakami dimɛna.” Erica mbutaka ate: “L’etatelo, lakayaoke okalema, koko dui sɔ diakankimanyiya dia dimi mbidja yimba l’oyango wakamatshu lɛkɔ. Dimi komonɔ lɛkɔ dia waahɔ ami hita koko dia toleka kambɛ Jehowa.” Nde kotshaka ate: “L’edjedja ka wonya, lakayokondjaka angɛnyi w’eshika w’ɔsami la nɛmɔ.” Simon akasale la wolo dia mbeka ɔtɛkɛta wa Palau nɛ dia vɔ mbakakoke mbokimanyiya dia nde ‘dihola otema ande’ otsha le ase etshumanelo ka lɛnɛ akandonɔ. (2 Kɔr. 6:13) Welo wakandadje dia mbeya ɔtɛkɛta ɔsɔ akokimanyiya dia nde monga la diɔtɔnganelo dia ma ma l’anangɛso wa lɛkɔ. Naka wanɛ woye nkamba kaamɛ l’anangɛso l’akadiyɛso wotanyiwɔ, kete vɔ tshɛ wayokoma angɛnyi w’eshika l’etshumanelo. Naa ɛlɔlɔ ekina watokondjaka apandjudi wayakimɔ la lolango dia tokimanyiya lɛnɛ ewɔ l’ohomba efula w’apandjudi?

Ɔpɔstɔlɔ Pɔɔlɔ akate ate: “Onto lonɛ efula ayona efula.” (2 Kɔr. 9:6) Tɔndɔ sɔ mendanaka ndo l’apandjudi wahamia olimu awɔ. Ɛlɔlɔ akɔna ‘wakawatonaka’ la Micronésie?

Polo ndo nshi nyɛ, tekɔ la waaso efula wa ntatɛ mbeka l’anto Bible la Micronésie ndo mɛna ehamelo wa lo nyuma wasala wanɛ weka ndo wakamba la akambo wa mɛtɛ wekawɔ. Patrick nde la Hannah sambishaka nto lo disɛnga dia tshitshɛ dia Angaur, diele l’anto 320. L’ɔkɔngɔ wa vɔ nsambisha ngɔndɔ hiende, vɔ wakahomana la mama kɛmɔtshi k’onyemba. Aha la ntshimbatshimba, nde aketawɔ mbeka Bible ndo akasale etshikitanu wa weke. Hannah mbutaka ate: “L’ɔkɔngɔ wa wekelo tshɛ, etena kakatakakitɔnaka la nde, tatakalola l’akalo aso takendanaka tata ɔnɛ: ‘Jehowa losaka.’” Hannah kotshaka ate: “Dimi mbeyaka dia Jehowa otosala woho ɔmɔtshi dia mama kɛnɛ mbeeya, diakɔ diele diɛsɛ la woho wakataye ndjokamba lɛnɛ ele ohomba efula, tamboyowoshola. Ɔsɔ ekɔ ɔlɔlɔ ɔmɔtshi woleki woke l’atei wa wɛnɛ wambotokondja lo lɔsɛnɔ laso.” Oko wakate Erica, “etena kakimanyiyaso onto ɔmɔtshi dia nde mbeya Jehowa, sho mongaka l’ɔngɛnɔngɛnɔ w’efula.”

Lo wedja efula, ohomba w’apandjudi wa Diolelo wekɔ efula. Onde wɛ lawɔ hakoke monɔ otsha lo ɛtshi ka nkɛtɛ kewɔ l’ohomba w’apandjudi? Lɔmba Jehowa dia nde nkeketsha yɛdikɔ yayɛ ya mpamia olimu ayɛ w’esambishelo. Kɛtshanya la dikumanyi dikambo sɔ, la omendji w’otshimbedi kana la wanɛ wambotshɔka dia tokamba lɛnɛ ewɔ l’ohomba efula w’apandjudi. Naka wɛ ambɔsa yɛdikɔ ya monɔ, kete fundɛ Bɛtɛlɛ kenda ɛtshi ka nkɛtɛ kakɔ ndo mbola elembetshiyelo wendana la ɛtshi kakɔ ka nkɛtɛ. * Sha dikumanyi dia l’etshumanelo kayɛ mukanda akɔ ko vɔ wayokotsha awui amɔtshi la ntondo ka vɔ ntomɛ Bɛtɛlɛ. Naka wɛ nsala ngasɔ, kete wɛ lawɔ koka mbokoya nunu di’anangɛso l’akadiyɛso, mbuta ate ɛlɔngɔlɔngɔ, epalanga, enyemba ndo atshukanyi wakayakimɔ la lolango ndo wakondja ɔngɛnɔngɛnɔ ‘l’olimu wa dinela.’