1, 2. Ɔkɛndɛ akɔna wakasha Jehowa Mɔsɛ, ndo kakɔna kakandoshikikɛ?

NGANDE wotoyoyaoka otondongaka wɛ mbakahombe temala la ntondo k’omboledi ɔmɔtshi woleki wolo la nkɛtɛ, dia tɔtɛkɛta lo wahɔ w’ekambi waki Jehowa? Ondo wɛ otoyaoka dia wɛ hakoke nsala ndooko dui, otoka wɔma ndo otoyaɔsa onto l’anyanya. Ngande wotoyokongɛ ɛtɛkɛta ayɛ wa mbɔtwɛlɔ? Otoyosala dia ɛtɛkɛta ayɛ mbɔsama la nɛmɔ oko otomami waki Nzambi Kanga-Wolo-Tshɛ?

² Dui dia ngasɔ mbakakomɛ Mɔsɛ. Jehowa akatɛ Mɔsɛ “kanga memakana ka wulu, ndeka antu tshe wa la kete” dia nde ayanga mbotoma otsha le Farawɔ dia totshungola wodja waki Nzambi oma lo lɔhɔmbɔ l’Edjibito lɛnɛ akawasoyamaka. (Wal. 12:3) Oko wakadiayɛnamaka, Farawɔ komonga la dilɛmiɛlɔ ndo aki kanga otako. (Etum. 5:1, 2) Mbokɛmaka lande na kakambola Mɔsɛ Jehowa ate: “Dimi leli na, dia ntsho le Farayo, dia ntutundja asi Isariyele uma l’Edjibitu?” Mɔsɛ akayaoke onto l’anyanya ndo lele bu l’akoka. Koko Nzambi akooshikikɛ dia nde hatowotshika ndaamɛ. Jehowa akawotɛ ate: “Dimi layuyala la ye.”—Etum. 3:9-12.

3, 4. a) Wɔma akɔna waki la Mɔsɛ? b) Kɔndɔla okakatanu wakahomana la Mɔsɛ.

³ Wɔma akɔna waki la Mɔsɛ? Mɛnamaka dia nde aki la wɔma w’ɔnɛ Farawɔ hotoolongola ndo hotoohokamɛ oko otomami waki Jehowa Nzambi. Mɔsɛ aki nto la wɔma w’ɔnɛ ase Isariyɛlɛ  hawotetawɔ ɔnɛ Nzambi mbambɔsɔna dia mbatshungola. Diakɔ diakatɛ Mɔsɛ Jehowa ate: “Keli enda, vo hawetawo aui ami, ndu hawumbukela. Vo wayuta vati: [Jehowa] komene le ye.”—Etum. 3:15-18; 4:1.

⁴ Onto tshɛ la l’atei aso koka nkondja wetshelo w’oshika oma l’okadimwelo wakasha Jehowa Mɔsɛ ndo lo woho wakayetaka akambo. Kɛnɛ kele mɛtɛ ele, ondo wɛ atatanemaka la ntondo k’ewandji ɛmɔtshi w’aseka lɛɛta. Ko onde wɛ mongaka l’okakatanu dia ntɛkɛta akambo wendana la Nzambi ndo la Diolelo diande la ntondo k’anto k’anto wahomana layɛ lushi tshɛ? Naka ngasɔ, kete tɔsɛdingole wetshelo wakokaso nkondja oma lo kɛnɛ kakakomɛ Mɔsɛ.

5. Ɛngɔ kakɔna kakasha Jehowa Mɔsɛ ndo ngande wakookimanyiya ɛngɔ kɛsɔ dia minya wɔma ande? (Enda osato wele lo mbɔtwɛlɔ.)

⁵ Etena kakɛnya Mɔsɛ wɔma ande lo mbuta di’ɛtɛkɛta ande hawotɔsama la nɛmɔ, Nzambi akookimanyiya dia nde ndjɔlɔshana l’awui wakakoke ndjohomana la nde. Dibuku di’Etumbelu mbutaka woho wakasalema akambo ɔnɛ: “[Jehowa] akawumbula ati: Kakona keli lu lunya laye? Ku ndi akukaluya diui ati: Danga. Ku ndi akati ati: Kadjadio lu kete. Ku ndi akadikadja lu kete, ku dio diakayala ului. Mose akûlawo. Keli [Jehowa] akatela Mose ati: Usimbuli lunya laye, uwundi lu wela. Okone ndi akasimbu lunya landi, akawundi, ku vo wakakadimo danga lu lunya landi. Dia vo mbetawo vati: [Jehowa, Nzambi] . . . , akene le ye.” (Etum. 4:2-5) Nzambi akawosha ɛngɔ kɛmɔtshi kakakoke nshikikɛ ɔnɛ losango lande ndja oma le Jehowa. Danga diakakoke mbɔsama oko ɛngɔ k’anyanya lo washo w’anto akina, diakakadimɔ ɛngɔ kasɛna lo wolo waki Nzambi. Dihindo sɔ diakahombe mɛtɛ ndjonga la shɛngiya ya wolo l’ɛtɛkɛta waki Mɔsɛ ndo mɛnya ɔnɛ Jehowa kootomi. Diakɔ diakawotɛ Jehowa ɔnɛ: “Kukimeli danga diku lu lunya laye, ku we ayutshaka tulimbitelu la dio.” (Etum. 4:17) Etena kakakimɛ Mɔsɛ djembetelo ya lowandji l’oma le Nzambi l’anya ande, dui sɔ akawosha dihonga dia nde tɔtɛkɛta akambo waki Nzambi l’eshikelo tshɛ la ntondo k’ase Isariyɛlɛ ndo ka Farawɔ.—Etum. 4:29-31; 7:8-13.

6. a) Naa ɛngɔ kahomba mongaka la so l’anya etena keso l’esambishelo ndo lande na? b) Lembetshiya woho wele “Ɔtɛkɛta wa Nzambi wekɔ la lɔsɛnɔ” ndo woho wewɔ la “wolo.”

⁶ Sho koka mbokama dimbola diakɔ diamɛ etena keso l’esambishelo ɔnɛ: “Kakona keli lu lunya laye?” Mbala efula, Bible mbatongaka l’anya aso ndo sho mongaka suke dia nkamba la tɔ. Kaanga mbakoka anto amɔtshi mɛna Bible oko dibuku di’anyanya, Jehowa tɛkɛtaka la so lo tshimbo ya Bible kakafundama lo wolo wa nyuma k’ekila. (2 Pet. 1:21) Tɔ kekɔ l’alaka waki Nzambi wendana la awui wayokotshama lo ɛlɔmbwɛlɔ ka Diolelo diande. Diakɔ diakafunde ɔpɔstɔlɔ Pɔɔlɔ ate: “Ɔtɛkɛta wa Nzambi wekɔ la lɔsɛnɔ ndo la wolo.” (Adia Hɛbɛru 4:12.) Alaka waki Jehowa tshɛ hawokite tatala nɛ dia nde salaka la wolo dia vɔ kotshama. (Is. 46:10; 55:11) Etena kashihodia onto di’alaka waki Jehowa hawetaka pa, kɛnɛ kadiande lo Bible koka mongaka la shɛngiya ya wolo lo lɔsɛnɔ lande.

7. Ngande wakokaso ‘nembetshiya ɔtɛkɛta w’akambo wa mɛtɛ dimɛna’?

⁷ Jehowa akatosha Ɔtɛkɛta ande wele la lɔsɛnɔ wakokaso nkamba la wɔ dia mɛnya ɔnɛ losango laso lekɔ l’oshika ndo lɔ ndja oma le nde. Diakɔ diele, l’ɔkɔngɔ wa nde fundɛ ase Hɛbɛru, Pɔɔlɔ akayofundɛka Timɔte ɔnande la lo nyuma dia nde ‘nsala la wolo tshɛ dia nembetshiya ɔtɛkɛta w’akambo wa mɛtɛ dimɛna.’ (2 Tim. 2:15) Ngande wakokaso nkamba la dako diaki Pɔɔlɔ sɔ? Lo mbadiaka la dui dia wolo avɛsa amɔtshi w’ohomba wakoka minanda etema w’anto wayotohokamɛ. Traktɛ yakatondjama lo 2013 yakakongɛma l’oyango watokimanyiya dia sho nsala dui sɔ.

8. Kakɔna kakate omendji w’olimu ɔmɔtshi lo kɛnɛ kendana la traktɛ yaso y’eyoyo?

⁸ Traktɛ y’eyoyo shɔ yakakongɛma woho  akɔ waamɛ. Diakɔ diele, etena keyaso woho wa nkaha kɛmɔtshi l’atei ayɔ, kete tayonga l’akoka wa nkaha kina tshɛ. Onde yɔ yekɔ wɔdu kahɛ anto? Omendji w’olimu ɔmɔtshi wa la Hawaï l’États-Unis, akafunde ate: “Sho kondeka mbeya etombelo w’ɛlɔlɔ wakahombe ndjonga la dihomɔ di’eyoyo sɔ lo esambishelo ka luudu la luudu kana ka lo sɛkɛ.” Nde akɛnyi dia yoho yakakongɛma traktɛ shɔ, tshutshuyaka anto dia mbisha okadimwelo aha la ntshimbatshimba ndo dui sɔ konyaka lo sawo mbala kakɔ ɔtɔi. Nde mbutaka ngasɔ nɛ dia dimbola ndo ekadimwelo wotshikitanyi tanemaka lo lɛkɛ la ntondo la traktɛ. Ompokami honge la wɔma ɔnɛ nde koka ndjosha okadimwelo wa kɔlɔ.

9, 10. a) Ngande watokimanyiya traktɛ yaso y’eyoyo dia nkamba la Bible? b) Traktɛ kakɔna katolekaka nkamba la yɛ ndo lande na?

⁹ Traktɛ tshɛ kakakongɛma lo yoho yele paka sho mbadia divɛsa dimɔtshi di’ohomba. Tɔshi ɛnyɛlɔ ka traktɛ kele l’ɔtɛ a dui ɔnɛ: Onde asui wayokomɛ lushi lɔmɔtshi? Oyadi ompokami aso ambokadimola ate “eelo,” “keema” kana “ondo,” aha la mbuta awui efula, tshɔka la nde l’etei ka traktɛ lo etenyi kata ɔnɛ “kɛnɛ kata Bible.” Oma laasɔ, adiɛnde Ɛnyɛlɔ 21:3, 4.

¹⁰ Woho akɔ waamɛ, etena kakahɛso anto traktɛ kele l’ɔtɛ adui ɔnɛ: Ngande wɔsayɛ Bible?, bu kɔlɔ di’ompokami aso nsɔna okadimwelo ɔmɔtshi wele lo lɛkɛ la ntondo la traktɛ. Oma laasɔ, tshɔka la nde l’etei ka traktɛ ndo tɛnde ɔnɛ “Bible mbutaka ɔnɛ ‘Afundelo tshɛ wakafundama l’ɛlɔmbwɛlɔ ka nyuma kaki Nzambi.’” Wɛ koka nkotsha ɔnɛ “divɛsa sɔ nembetshiyaka awui efula.” Oma laasɔ, fola Bible kayɛ ndo adiɛnde 2 Timɔte 3:16, 17.

11, 12. a) Kakɔna katotoshaka ɔngɛnɔngɛnɔ l’esambishelo? b) Ngande wakoka traktɛ y’eyoyo nyɛ kokimanyiya dia wɛ nsala waendelo w’eyoyo?

¹¹ Kɛnɛ kayosala ompokami l’ɔkɔngɔ wa sho mbosha traktɛ ka ntondo mbayoshikikɛ kana kokaka sho nyomadia la nde traktɛ kekina ndo nkɛtshanya la nde. Mbala efula, laadiko dia mbisha onto traktɛ, sho mongaka l’ɔngɛnɔngɛnɔ etena kadiɛso onto divɛsa ɔtɔi kana ahende mbala ka ntondo kahomanaso la nde. Oma laasɔ, wɛ koka ndjotetemala nkɛtshanya la nde.

¹² Lɛkɛ l’ekomelo la traktɛ tshɛ lekɔ la dimbola dimɔtshi l’ɛse ka ɔtɛ a dui ɔnɛ: “Dimbola dia nkana la diɔ yimba” ndo avɛsa amɔtshi tanemaka l’ɛse, wakokanyu ndjɔkɛtshanya lo wendelo w’oyoyo. Lo traktɛ kele l’ɔtɛ a dui ɔnɛ: Ngande wɔsayɛ nshi yayaye?, dimbola diakokanyu ndjɔkɛtshanya mbala kayaye ele ɔnɛ: “Ngande wayotshikitanya Nzambi andja ɔnɛ lo yoho ya dimɛna efula?” Avɛsa anɛ mbatanema l’ɛse: Mateo 6:9, 10  ndo Danyele 2:44. Lo traktɛ kele l’ɔtɛ a dui ɔnɛ: Onde mɛtɛ anto wakavu wayɔsɛna nto?, dimbola diele la wɔ mbutaka ɔnɛ: “Lande na katshundaso esombe ndo kavɔso?” Avɛsa anɛ mbatanema l’ɛse: Etatelu 3:17-19 ndo Rɔmɔ 5:12.

13. Lembetshiya woho wakokaso nkamba la traktɛ yaso dia ntatɛ mbeka l’anto Bible.

¹³ Tokambe la traktɛ yaso dia ntatɛ mbeka l’anto Bible. Naka onto skanɛ kodɛ QR kele lo lɛkɛ l’ekomelo la traktɛ, dui sɔ diayowokimanyiya dia nde ntana awui amɔtshi wele lo sitɛ kaso k’Ɛtɛrnɛtɛ wakoka mbokeketsha dia nde mbeka Bible. Traktɛ nyɛ mbikaka epole ɔsɛkɛ lo akambo watanema lo biukubuku Lokumu l’ɔlɔlɔ l’oma le Nzambi! ndo yɔ tomaka onto lo sawo dimɔtshi dia lo biukubuku yakɔ.Ɛnyɛlɔ, traktɛ kele l’ɔtɛ a dui ɔnɛ: Akɔna alɔmbɔla andja ɔnɛ mɛtɛ? tomaka onto lo wekelo 5. wa biukubuku yakɔ. Traktɛ kele l’ɔtɛ a dui ɔnɛ: Ele sheke y’ɔngɛnɔngɛnɔ wa lo nkumbo? tomaka onto lo wekelo 9. Naka sho kambaka la traktɛ nyɛ l’oyango wakayakongɛma, kete tayokambaka la Bible mbala ka ntondo kahomanaso l’onto ndo lo waendelo w’eyoyo. Etombelo wayonga la dui sɔ ele, tayonga l’ambeki wa Bible efula. Naa yoho kina yakokaso nkamba l’Ɔtɛkɛta waki Nzambi dia sho ndeka nkondja etombelo w’amɛna l’esambishelo?

14, 15. Ngande wakokayɛ mbokoya Pɔɔlɔ etena keyɛ l’esambishelo?

¹⁴ Pɔɔlɔ aki la saki k’efula ka nsambisha “anto efula.” (Adia 1 Kɔrɛtɔ 9:19-23.) Tolembete dia Pɔɔlɔ akakombolaka “nkotola ase Juda, . . . nkotola wanɛ wayela ɛlɛmbɛ, . . . nkotola wanɛ wahayele ɛlɛmbɛ, . . . nkotola wanɛ wele wɔdu.” Lo mɛtɛ, nde akakombolaka nsambisha “weho w’anto tshɛ dia lo toho tshɛ [nde] nshimbɛ amɔtshi.” (Ets. 20:21) Ngande wakokaso mbokoya Pɔɔlɔ etena kayalɔngɔsɔlaso dia ntshɔ dia tosambisha “weho w’anto tshɛ” wele lo ɛtshi kaso ka nkɛtɛ?—1 Tim. 2:3, 4.

¹⁵ Bɛnyɛlɔ dia mbɔtwɛlɔ tondjamaka lo Olimu aso wa Diolelo ngɔndɔ tshɛ. Hemba nkamba la bɛnyɛlɔ diakɔ. Koko naka ekɔ akambo amɔtshi watshindja anto wa l’ɛtshi kanyu ka nkɛtɛ wɔɔngɔ, ayoleka dimɛna wɛ nkamba la mbɔtwɛlɔ y’ɔtɔnɛ l’akambo akɔ. Kanaka yimba l’awui wele lo ɛtshi ka nkɛtɛ kadjasɛyɛ, lo kɛnɛ kendana l’anto akina wa l’ɛtshi kayɛ ka nkɛtɛ ndo lo dui dialeka mbakiyanya. Oma laasɔ, ko wɛ nsɔna divɛsa dimɔtshi diendana la dui diakɔ. Lo kɛnɛ kendana la dikambo sɔ, Omendji ɔmɔtshi w’otshimbedi mbutaka woho wakawakambe la Bible nde la wadɛnde ate: “Ampokami aso efula mongaka suke dia tohokamɛ etena kadiaso divɛsa ɔtɔi, katɛkɛtaso lo tshena pe ndo etena kasembɔso tɔɔ lo dui diele ohomba. L’ɔkɔngɔ wa sho mbisha ompokami aso mɔyɔ oko wele mbekelo kaso tele la Bible yaso yofɔmi l’anya, sho mbadiaka divɛsa.” Tɔsɛdingole bɛnyɛlɔ dimɔtshi di’awui wa tshindja anto wɔɔngɔ, ambola ndo avɛsa amɔtshi wakokayɛ nkamba lawɔ lo ɛtshi kayɛ ka nkɛtɛ.

16. Lembetshiya woho wakokaso nkamba la Isaya 14:7 l’esambishelo.

¹⁶ Naka wɛ mbidjasɛ lo ɛtshi ka nkɛtɛ kele anto bu la wɔladi, dia tatshiya sawo wɛ koka mimbola ompokami ayɛ ɔnɛ: “Onde wɛ fɔnyaka dia lushi lɔmɔtshi anto ‘wayodjasɛ lo andja wele la wɔladi, wele bu l’awui waatshindja wɔɔngɔ ndo wada ekoko w’ɔngɛnɔngɛnɔ’? Kɛsɔ mbata Isaya 14:7. Wɛ koka nkotsha ɔnɛ: Bible kekɔ l’alaka efula waki Nzambi wɛnya di’anto wayoyonga lo wɔladi lo nshi yayaye.” Oma laasɔ, wɛ koka mbadiyɛ daka dimɔtshi oma lo Bible.

17. Ngande wakokayɛ nkamba la Mateo 5:3 dia ntatshiya sawo?

¹⁷ Onde wɛ ekɔ lo mbidjasɛ lo ɛtshi ka nkɛtɛ kele apami wekɔ l’okakatanu dia ntana woho wa nsɛna? Naka ngasɔ, wɛ koka ntatshiya sawo lo mimbola ompokami ayɛ ɔnɛ: “Oko leyɛ, falanga ngana yakoka onto monga la yɔ di’ase nkumbo kande monga l’ɔngɛnɔngɛnɔ?” L’ɔkɔngɔ wa nde nkadimola  wɛ koka nkotsha ɔnɛ: “Anto efula wekɔ lo nkondja falanga yoleki nyɛ yafɔnyayɛ koko ase nkumbo yawɔ bu l’ɔngɛnɔngɛnɔ. Ko laasɔ, ahombama di’onto monga l’ɔngɛnɔngɛnɔ?” Oma laasɔ, ko wɛ mbadiyɛ Mateo 5:3 ndo mbɔlɔmba dia nyu ntatɛ mbeka Bible.

18. Ngande wakokaso nkamba la Jeremiya 29:11 dia nkeketsha anto?

¹⁸ Onde anto wa l’ɛtshi kayɛ ka nkɛtɛ, wekɔ lo diɛnɛ l’etombelo wa kɔlɔ w’oma lo mpokoso kɛmɔtshi keke kasalema? Wɛ koka ntatɛ nsawola l’anto wa woho ɔsɔ lo mbatɛ ɔnɛ: “Lamboya ndjokokeketsha. (Adia Jeremiya 29:11.) Ndo mbolande ɔnɛ: Onde wɛ akɛnyi awui asato wakombola Nzambi dia sho monga la wɔ, mbuta ate ‘wɔladi, nshi yayaye ndo elongamelo?’ Shi ekɔ dui di’ekeketshelo dia mbeya ɔnɛ Nzambi tokombolɛka lɔsɛnɔ la dimɛna. Ko ngande wakoka dui sɔ salema?” Oma laasɔ, tshɔka la nde lo sawo diɔtɔnɛ la dui sɔ lo biukubuku Lokumu l’ɔlɔlɔ.

19. Lembetshiya woho wakokaso nkamba la Ɛnyɛlɔ 14:6, 7 lo ɛtshi ka nkɛtɛ kayasha anto lo awui w’ɔtɛmwɛlɔ.

¹⁹ Onde wɛ ekɔ lo mbidjasɛ lo ɛtshi ka nkɛtɛ kele anto ndjashaka lo awui w’ɔtɛmwɛlɔ? Naka ngasɔ, kete wɛ koka ntatshiya sawo l’ompokami ayɛ lo mbombola ɔnɛ: “Naka ondjelo kotɛ dui dimɔtshi onde wɛ ayowohokamɛ? (Adia Ɛnyɛlɔ 14:6, 7.) Lam’ele ondjelo ɔsɔ ekɔ lo mbuta ate ‘nyoke Nzambi wɔma,’ shi ekɔ ohomba sho mbeya woho wa Nzambi katɛkɛta ondjelo ɔsɔ? Ondjelo ɔsɔ tɛnyaka woho wa Nzambi kɛsɔ etena kakandate ate ‘Ɔnɛ lakatonge olongo la nkɛtɛ.’ Ko naa Nzambi kakɔ?” Oma laasɔ, adiɛnde Osambu 124:8, divɛsa diata ɔnɛ: “Ekimanyelu kasu keko lu lukumbu la [Jehowa], lakatungi ulungu la kete.” Laadiko dia laasɔ, lembetshiyande awui akina wendana la Jehowa Nzambi.

20. a) Ngande wakokaso nkamba la Tukedi 30:4 dia mbetsha onto lokombo laki Nzambi? b) Onde wɛ ekɔ la divɛsa dikina diatoyetshaka anto lokombo laki Nzambi?

²⁰ Wɛ koka ntashiya sawo l’ɔlɔngɔlɔngɔ ɔmɔtshi lo mbotɛ ɔnɛ: “Lekɔ lo nanga kadiɛ divɛsa dimɔtshi diele la dimbola di’ohomba efula. (Adia Tukedi 30:4.) Wɛ koka nkotsha ɔnɛ: Ndooko onto lakoka nsala awui wotami lo divɛsa nɛ laadiko di’Otungi * aso. Ko ngande wakokaso mbeya lokombo laki Nzambi kɛsɔ? Layonga l’ɔngɛnɔngɛnɔ dia kɛnya dui sɔ lo Bible.”

21, 22. a) Ngande wakoka divɛsa dimɔtshi di’ohomba ntshikitanya lɔsɛnɔ l’onto? b) Kakɔna kamboyoyashikikɛ dia salaka etena keyɛ l’esambishelo?

²¹ Hateye tshɛ lo tshɛ etombelo wayonga l’avɛsa w’ohomba l’esambishelo. Ɛnyɛlɔ, akadiyɛso wa lo wodja w’Australie wakasambisha osekaseka ɔmɔtshi lakawɔ. Kadiyɛso kɛmɔtshi akawombola ɔnɛ: “Onde wɛ mbeyaka lokombo laki Nzambi?” Oma laasɔ, nde akawadiɛ Osambu 83:18. Osekaseka akɔ mbutaka ɔnɛ: “Lakaambiyama heyama ndo l’ɔkɔngɔ wa vɔ ntshɔ, lakande lɔkɛndɔ la kilɔmɛtrɛ oko 56 lo mutuka, dia tokoma lo dihole dimɔtshi diasondjawɔ waa Bible dia dimi tenda lokombo lɔsɔ lo dikadimwelo dikina dia Bible ndo lo diksiɔnɛrɛ. Etena kakamashikikɛ dia lokombo laki Nzambi ekɔ Jehowa, lakɛnyi dia ndooko kaakamadje taamu.” Etena kakandayotshukanaka nde l’omɛnde, wakatatɛ mbeka Bible aha la la ntshimbatshimba ndo wakayobatizamaka.

²² Ɔtɛkɛta waki Nzambi tshikitanyaka nsɛnɔ ya wanɛ wawadia ndo w’onga la mbetawɔ lo alaka wahatshikitana waki Nzambi. (Adia 1 Tɛsalɔnika 2:13.) Losango lele lo Bible lekɔ la wolo w’efula wa munanda etema w’anto oleki ɛtɛkɛta aso shoamɛ. Diakɔ diele, l’oseka diaso tshɛ diakondjaso, sho pombaka kambaka la Ɔtɛkɛta waki Nzambi, nɛ dia vɔ wekɔ la lɔsɛnɔ.