PETERO akalele efula l’ɔkɔngɔ wa nde manguna Yeso. Nde akahombe ndowanya lonyuma lande nɛ dia Yeso akakombolaka nkamba la nde dia nkimanyiya anto akina. Diakɔ diakawotɛ Yeso ate: “Lam’ayoyoyatshumoya, kokeketsha ananyɔ.” (Luka 22:32, 54-62) Petero akayongaka ekundji k’etshumanelo k’Akristo ka lo ntambe ka ntondo. (Ngal. 2:9) Woho akɔ waamɛ mbele, ɔnangɛso laki ekumanyi koka ndjonga l’akoka wa nyomonga la diɛsɛ sɔ nto ndo monga l’ɔngɛnɔngɛnɔ wa nkeketsha asekande Akristo lo nyuma.

Anangɛso amɔtshi wakashisha waɛsɛ awɔ wa dikumanyi koka ndjoyaoka dia vɔ hawoyokoka nsala ndooko dui. Julio * laki ekumanyi l’edja kolekanyi ɛnɔnyi 20 lo Amɛrikɛ wa lo sidɛ mbutaka ate: “Nɔngɔsɔla asawo, membola analengo ndo nama ɛkɔkɔ mbele akambo wakamalekaka nanga lo lɔsɛnɔ lami. Mbala kakɔ ɔtɔi, lakashisha diɛsɛ diami ndo lakatatɛ ndjaɔsa oko onto l’anyanya. Ɔsɔ mɛtɛ aki etena ka wolo efula le mi.” Ɛlɔ kɛnɛ, Julio aya nto ekumanyi.

Ombeki Jakɔba akafunde ate: ‘Analengo le, etena kahomananyu la ehemba wotshikitanyi, nyowaɔshi oko dui di’ɔngɛnɔngɛnɔ.’ (Jak. 1:2) Jakɔba akatɛkɛtaka dia ehemba waya oma lo ɔlɔshamelo ndo oma lo eongelo kaso k’anto wele keema kokele. Nde akatɛkɛtaka dia nsaki yaso ya lokaki, shɔnɔdi ndo awui akina. (Jak. 1:14; 2:1; 4:1, 2, 11) Etena katohokola Jehowa, dui sɔ koka tosha paa l’asolo. (Hɛb. 12:11) Koko dui sɔ hadiohombe toshishɛ ɔngɛnɔngɛnɔ aso.

Oyadi tamboshisha diɛsɛ diaso l’etshumanelo, teye dia teke la diaso dia mɛnya mbetawɔ kaso ndo ngandji kokaso Jehowa. Sho koka nto nkana yimba lo ɛkɔkɔ wakatotshutshuya dia sho nkoma ekumanyi. Sho koka ndjambola ɔnɛ: Onde lakakome ekumanyi paka lo wahɔ ami hita, l’ɔtɛ wa ngandji  kokami Nzambi ndo wakamashikikɛ dia etshumanelo kekɔ kaki Nzambi ndo ɔnɛ tɔ koka kokamɛ la kɛtshi tshɛ? (Ets. 20:28-30) Wanɛ wakashisha waɛsɛ awɔ wa dikumanyi ko wekɔ lo ntetemala nkamba olimu w’ekila l’ɔngɛnɔngɛnɔ mɛnyaka anto tshɛ mbidja ndo Satana ɔnɛ vɔ nangaka Jehowa l’otema ɔtɔi.

Etena kakahokɔma nkumekanga Davidɛ oma lo pɛkato ya weke yakandasale, nde aketawɔ ohokwelo ndo akadimanyiyama. Davidɛ akembe ate: ‘Kanga ohedia ndo otshi wa kɔlɔ ladimanyiyama munga yande mongaka la ɔtshɔkɔ. Onto laha l’onongo la ntondo ka Jehowa ndo laha la lokeso l’otema ande, ele la ɔtshɔkɔ.’ (Osam. 32:1, 2) Ohokwelo wakalongola Davidɛ akolowanya ndo akawetɛ olami w’ɛkɔkɔ waki Nzambi w’oshika.

Mbala efula, anangɛso wayokomaka dikumanyi nto, ndjoyalaka alami w’ɛkɔkɔ w’eshika oleki woho wakiwɔ ntondo. Ɔnangɛso laya nto ekumanyi mbutaka ɔnɛ: “Wonya ɔnɛ lamboleka nshihodia yoho ya dimɛna ya nkokɛ wanɛ wasala munga.” Ekumanyi kekina mbutaka nde la wɔ ate: “L’etena kɛnɛ mbomoleka mbɔsa la nɛmɔ diɛsɛ diami dia nkambɛ analengo.”

Omembi w’esambo ɔmɔtshi akafunde ate: ‘Jehowa hatoyangaka munga nshi tshɛ.’ (Osam. 103:9) Diakɔ diele, hatohombe mfɔnya ɔnɛ Jehowa hakoke nyomoyaɛkɛ le onto lakasale munga ka woke. Ricardo laki ekumanyi edja efula ndo lakayoshishaka diɛsɛ sɔ mbutaka ate: “Lakakɔmɔ l’ɔtɛ wa munga yami hita ndo woho wakamayaɔsaka dia halokoke nsala ndooko dui akanshimbe l’etena k’otale diaha dimi nyomonga ekumanyi. Lakashisha elongamelo k’ɔnɛ anto koka ndjaɛkɛ lemi nto. Koko lakayotatɛ nkimanyiya anangɛso, lakayonga l’akoka wa nɔmbɔla wekelo wa Bible, nkeketsha analengo lo mbalasa ka Diolelo ndo nsambisha kaamɛ la wɔ. Awui asɔ mbakankimanyiya dia dimi nyomonga la elongamelo ndo ɛlɔ kɛnɛ laya nto ekumanyi.”

Tokumbɛkumbɛ koka nkonya ɔnangɛso dia nshisha ɔkɛndɛ ande w’ekumanyi. Ayonga dimɛna sho mbokoya ɛnyɛlɔ kaki Davidɛ lakalawɔ l’ɔtɛ wakawokaka Saolo kandjema. Davidɛ konanga nsɔmbɔya  Saolo kaanga etena kakandakondja waaso wa nsala dui sɔ. (1 Sam. 24:4-7; 26:8-12) Etena kakavu Saolo lo ta, Davidɛ akasale otanda ande ndo akate dia Saolo ndo Jɔnatana y’ɔnande waki “ambukami ngandji la anangemi” ande. (2 Sam. 1:21-23) Davidɛ kombolamɛ tokumbɛkumbɛ.

Naka wambotosalɛ akambo lo yoho yahatakombola vɔ tosalɛ, hatonga dimɛna sho momba tokumbɛkumbɛ. Ɛnyɛlɔ, William laki ekumanyi l’edja k’ɛnɔnyi oko 30 la Grande-Bretagne, akayoshishaka diɛsɛ diande ndo akalamɛ dikumanyi dimɔtshi di’asekande tokumbɛkumbɛ. Kakɔna kakawokimanyiya dia nde nyomoyonga l’ekanelo k’ɔlɔlɔ? Nde mbutaka ate: “Wadielo wa dibuku dia Jɔbɔ mbakankimanyiya. Lakate nte, naka Jehowa akakimanyiya Jɔbɔ dia nde mbidja ki lam’asande l’asekande asato, kete Jehowa ayokimanyiya dia dimi mbidja wɔladi lam’asami la dikumanyi.”—Jobo 42:7-9.

Naka wɛ akatshike diɛsɛ diayɛ dia nama ɛkɔkɔ waki Nzambi, kete ayonga dimɛna wɛ ndjambola lande na kakayasale dui sɔ. Onde l’ɔtɛ wakiyɛ l’awui wakakotshindjaka wɔɔngɔ? Onde awui akina wakayolekaka monga ohomba lo lɔsɛnɔ la yɛ? Onde munga y’anto akina mbakayokɔkɔmɔlaka? Oyadi l’ɔtɛ w’ɔkɔkɔ akɔna tshɛ, eya dia woho wakiyɛ ekumanyi akakoshaka diaaso dia nkimanyiya anto akina lo toho efula. Asawo wakayashaka, ɛnyɛlɔ kayɛ k’ɔlɔlɔ ndo wembwelo ayɛ akakimanyiyaka ɛkɔkɔ dia vɔ mbikikɛ ehemba. Woho wakayakambaka oko ekumanyi la kɔlamelo akakɔngɛnyangɛnyaka ndo Jehowa la wɔ akangɛnangɛnaka.—Tuk. 27:11.

Jehowa akakimanyiya anangɛso efula dia vɔ nyomonga l’ɔngɛnɔngɛnɔ ndo la nsaki ka nɔmbɔla etshumanelo. Naka wɛ akatshike diɛsɛ diayɛ dia ekumanyi kana akadishisha, eya dia wɛ koka ‘nyomokombola olimu w’omendji.’ (1 Tim. 3:1) Pɔɔlɔ ‘kotshika nɔmba’ di’Akristo wa la Kɔlɔsayi ntetemala ndodiama la ewo ka lolango laki Nzambi “dia [vɔ] nkɛndakɛnda lo yoho yalanga Jehowa ndo mbɔngɛnyangɛnya lo akambo tshɛ.” (Kɔl. 1:9, 10) Naka wɛ ambonyomonga ekumanyi nto, kete eya dia Jehowa ayotetemala kosha wolo, solo dia lotutsha ndo ɔngɛnɔngɛnɔ. Lo nshi y’ekomelo nyɛ, ekambi waki Jehowa wekɔ l’ohomba w’ekimanyielo ka lo nyuma k’oma le alami w’ɛkɔkɔ wele la ngandji. Onde wɛ ekɔ suke ndo mbetawɔka la lolango dia nkeketsha ananyɔ?