Davidɛ akafunde ate: “Latenyi untu ololo asekama, kuyanga an’andi walomba ma.” Nde akate ngasɔ lo menda kɛnɛ kakookomɛ ndaamɛ. Nde akeyaka dia ekokelo ka Nzambi bu l’elelo. (Osam. 37:25) Ɛtɛkɛta waki David ɛsɔ, hawolange mbuta di’ekambi waki Jehowa hawohombaki pondjo kɛnɛ kakombolawɔ kana kalangawɔ.

Lo tena dimɔtshi, Davidɛ akatenyanya tena dia wolo ndo akahombe mbo ya ndɛ, ɛnyɛlɔ etena kakandatalawɔka Saolo. L’etena kɛsɔ, Davidɛ aki paka la mbo ya ndɛ yema tshitshɛ ndo nde akalɔmbɛ mbo ya ndɛ lo dikambo dia nde ndo dia wanɛ waki la nde. (1 Sam. 21:1-6) Mbokɛmaka dia lo diaaso sɔ, Davidɛ ‘akalɔmbɛ mbo ya ndɛ.’ Koko lo ntena dia wolo sɔ, nde akeyaka dia Jehowa kombookalɛ. Kɛnɛ kele mɛtɛ ele, ndooko dihole diɛnya Bible ɔnɛ Davidɛ aki djɔmbɔ ya mbo ya ndɛ.

Lo Mateo 6:33, sho tanaka eshikikelo kakasha Yeso dia Nzambi ayokotshaka ehomba w’ekambi ande wasala dia mbetsha wahɔ wa Diolelo lo dihole dia ntondo lo nsɛnɔ yawɔ. Nde akate ɔnɛ: “Ɔnkɔnɛ, nyotetemale nyanga ntondo Diolelo la losembwe laki Nzambi, ko nde ayonyokotshɛ diangɔ dikina sɔ tshɛ [mbidja ndo mbo ya ndɛ, kɛnɛ ka nnɔ ndo ahɔndɔ.]” Koko Yeso akate nto dia l’ɔtɛ w’ɛhɛnyɔhɛnyɔ, “anango” mbeyaka ndjonga la ndjala. (Mat. 25:35, 37, 40) Kɛsɔ mbakakomɛ ɔpɔstɔlɔ Pɔɔlɔ. Lo tena dimɔtshi nde akandama la ndjala ndo la mposa k’ashi.—2 Kɔr. 11:27.

Jehowa totɛka dia tayɔhɛnyahɛnyama lo toho efula. Nde mbeyaka ntshika dia sho mpomba diangɔ dimɔtshi l’oyango wa nde mbisha okadimwelo lo tɔfwɛfwɛ taki Diabolo. (Jobo 2:3-5) Ɛnyɛlɔ, anangɛso amɔtshi wakatɔlama lo mpango ya nkanu y’ase Nazi, waki lo waale w’efula l’ɔtɛ wakawaahɛnyahɛnyaka wolo. Woho wakahombe anangɛso mbo ya ndɛ aki yoho mɔtshi yakakambe la Satana dia mbashishɛ olowanyi awɔ. Lam’ele anangɛso asɔ waki la kɔlamelo le Jehowa, nde kombakalɛ. Nde akatshike dia vɔ mpomana la ohemba ɔsɔ, oko watondotshikaka di’Akristo tshɛ pembama lo toho totshikitanyi. Aha la taamu, Jehowa toongaka osukɔ le wanɛ tshɛ wetawɔ nsowa l’ɔtɛ wa lokombo lande. (1 Kɔr. 10:13) Sho koka nama lo yimba ɛtɛkɛta watanema lo Filipɛ 1:29: “Nyu nyakalongola diɛsɛ, aha tsho dia monga la mbetawɔ le Kristo, koko ndo dia nsowa lo dikambo diande.”

Jehowa akalake dia nde ayoyalaka kaamɛ l’ekambi ande. Ɛnyɛlɔ, lo Isaya 54:17, nde akate ate: “Ehumo tshe kambutshulama dia ndo la ye huluwana.” Daka sɔ ndo akina shikikɛka ekambi waki Nzambi lo tshɛ kawɔ ɔnɛ, nde ayowakokɛka. Ɔnkɔnɛ, Okristo tshɛ koka ntenyanya ehemba oyadi wɛnɛ wakoka mbokonya polo lo nyɔi.