1, 2. Woho wa lɔsɛnɔ la ngande laki la Adama la Eva ntondo, ndo ambola akɔna wambɔma?

ETENA kakawatongama, Adama la Eva komonga ndooko l’otunyi. Vɔ waki kokele ndo wakadjasɛka lo Paradiso. Vɔ waki la diɔtɔnganelo dia ma ma lam’asawɔ la Otungi awɔ ndo waki oko anande. (Etat. 2:7-9; Luka 3:38) Nzambi akawasha ɔkɛndɛ w’ohomba efula. (Adia Etatelu 1:28.) Akahombe mbɔsa nshi efula dia vɔ ‘ndodia nkɛtɛ ndo ndjiolela.’ Koko dia vɔ ntetemala ‘mbolɛ ditongami tshɛ diele la lɔsɛnɔ la nkɛtɛ,’ Adama la Eva wakahombe nsɛna pondjo pondjo ndo Adama takandahombe ntshika ɔkɛndɛ ɔsɔ lo mvɔ.

² Ko lande na kele akambo wakayotshikitanaka? Lande na kaya atunyi efula wasala diaha anto monga l’ɔngɛnɔngɛnɔ, djekoleko nyɔi lele otunyi woleki woke? Kakɔna kakahombe Nzambi nsala dia nanya atunyi asɔ? Ekadimwelo wa ambola asɔ ndo akina wɔtɔnganɛ la wɔ koka tanemaka lo Bible. Nyɛsɔ tɔsɛdingole akambo amɔtshi w’ohomba wendana la ambola asɔ.

3, 4. a) Didjango diakɔna diakasha Nzambi Adama la Eva? b) Lande na kele aki ohomba dia vɔ nkitanyiya didjango sɔ?

³ Kaanga mbakiwɔ la diɛsɛ dia nsɛna pondjo pondjo, kɛsɔ kɔmɛnyaka dia Adama la Eva takawakoke ndjovɔ. Dia vɔ ntetemala nsɛna, vɔ wakahombe pɛngaka, nnɔ ashi, ndala djɔ ndo ndɛɛka. Kɛnɛ kakalekaka ohomba ele, nsɛnɔ yawɔ yakalemanɛka la diɔtɔnganelo diaki lam’asawɔ la Ombishi wa lɔsɛnɔ. (Euh. 8:3) Mbetawɔ ɛlɔmbwɛlɔ kaki Nzambi mbakaleke monga ohomba dia vɔ ntetemala ngɛnangɛna la lɔsɛnɔ. Jehowa akɛnya Adama dui sɔ hwe la ntondo ka Eva tongama. Lo ngande? “[Jehowa Nzambi] akakokomiya untu ati: Olekaki elua w’etamba tshe wa l’ekambo uku alangaye. Keli, tolekaki elua w’uma l’utamba wa ewu k’akambu w’ololo ndu k’akambu wa kolo, ne dia lushi layuyole, we ayuvo.”—Etat. 2:16, 17.

⁴ “Utamba wa ewu k’akambu w’ololo ndu k’akambu wa kolo” wakɛnyaka lotshungɔ lele la Nzambi la nshikikɛ kɛnɛ kele ɔlɔlɔ la kɛnɛ kele kɔlɔ. Adama akeyaka ntshikitanya ɔlɔlɔ la kɔlɔ nɛ dia nde akatongama l’efanelo ka Nzambi, ndo nde aki la nkum’otema. Otamba ɔsɔ wakɛnyaka dia Adama la Eva waki l’ohomba w’ɛlɔmbwɛlɔ kaki Jehowa nshi tshɛ. Olelo w’elowa w’oma l’otamba ɔsɔ akahombe mɛnya dia vɔ waya la yimba ya dipanda ndo dui sɔ diakahombe mbaela etombelo wa kɔlɔ efula ndo le ana wotowoyota. Dilanya diakawalongola diakɛdima la munga kakawasale.

5. Ngande wakakesama Adama la Eva dia pindolɛ Nzambi?

⁵ L’ɔkɔngɔ wa Eva ntongama, Adama akawewoya didjango diaki Nzambi. Eva akeyaka dui sɔ dimɛna ndo nde aki l’akoka wa dita woho wakidiɔ. (Etat. 3:1-3) Kɛsɔ mbakandasale lam’akinde la ntondo ka etongami kɛmɔtshi kele la mayɛlɛ. Ɔnɛ lakatɛkɛtaka lo tshimbo y’olui aki Satana Diabolo ɔnaki Nzambi la lo nyuma lakalodiama la yimba ya dipanda ndo la nsaki ka monga la lowandji. (Ɛdika la Jakɔba 1:14, 15.) Dia nde nkotsha nsaki yande shɔ, nde akamamatanyiyɛ Nzambi ate nde ekɔ kanga kashi. Nde akashikikɛ Eva ɔnɛ naka vɔ monga la yimba ya dipanda, vɔ hawotovɔ koko wayokoma oko Nzambi. (Etat. 3:4, 5) Eva akawetawɔ, akakotsha nsaki kande ka dipanda lo ndɛ olowa ko akayetawoyaka ndo omɛnde. (Etat. 3:6, 17) Diabolo mɛtɛ akate kashi ka mamba. (Adia 1 Timɔte 2:14.) Lonyangu ko Adama “aketawo diui dia wade[nde].” Kaanga mbakakoke olui mɛnama oko ɔngnɛnyi waki Eva, Satana Diabolo aki otunyi wahokana kɛtshi wakeyaka etombelo wa kɔlɔ wakahombe ndjonga la kɛnɛ kakandatɛka Eva.

6, 7. Ngande wakahembola Jehowa kilombo k’atshi wa pɛkato asɔ?

⁶ Dia nkotsha nsaki ya wɔ, Adama la Eva wakatɔmbɔkwɛ Ɔnɛ lakawasha lɔsɛnɔ ndo kɛnɛ tshɛ kaki la wɔ. Jehowa akɛnaka kɛnɛ tshɛ kaketaka. (1 Ek. 28:9; adia Tukedi 15:3.) Nde akatokotshika anto asato asɔ dia vɔ mɛna munga kakawasale. Oko wende Ombutshi, Jehowa mɛtɛ akanyange efula. (Ɛdika la Etatelu 6:6.) Nde akahombe nsala akambo oko Shushi ndo nde akahombe nkotsha ɛtɛkɛta ande wendana la etombelo wakahombe mbakomɛ.

⁷ Nzambi akatɛ Adama ɔnɛ: “Lushi layuyole [elowa w’oma l’otamba wa ewo k’akambo w’ɔlɔlɔ ndo k’akambo wa kɔlɔ,] we ayuvo.” Adama akakoke mfɔnya ɔnɛ “lushi” lɔsɔ aki lushi lele la wenya 24. L’ɔkɔngɔ wa nde mɔnyɔla didjango diaki  Nzambi, nde akakoke nongamɛ dia Jehowa ayowodiaka ko lushi lakɔ la ntondo ka wonya mbidja. Jehowa akaye oya le wɔ “la dikolo.” (Etat. 3:8) Nde akalombosha Adama la Eva ndo akahembola kilombo lo ndjela ekadimwelo wakawasha. (Etat. 3:9-13) Oma laasɔ, Jehowa akashikikɛ dilanya diakahombe atshi wa kɔlɔ asɔ nongola. (Etat. 3:14-19) Jehowa kondjaka atɔmbɔki asɔ kowonya akɔ waamɛ diaha sangwelo diande diendana la Adama la Eva ndo la tokanula tawɔ mfukutana. (Is. 55:11) Kaanga mbakandashikikɛ dilanya dia nyɔi ndo mbakatatɛ etombelo wa pɛkato mbala kakɔ ɔtɔi, Nzambi aketawɔ di’Adama la Eva mbota ana wakakoke ndjokondja wahɔ oma lo tɛdikɔ takandɔshi. Lo ndjela kanyi ya Nzambi, Adama la Eva wakavu ko lushi lakawasale pɛkato, mbuta ate “lushi” lɔmɔtshi la lo lushi lele la ɛnɔnyi 1000.—2 Pet. 3:8.

8, 9. Shɛngiya yakɔna yakayonga la pɛkato kakasale Adama le tokanula tande? (Enda osato wele lo mbɔtwɛlɔ.)

⁸ Onde pɛkato kakasale Adama kakakoke ndjonga la shɛngiya ndo le ana wakawahombe ndjoota? Eelo. Rɔmɔ 5:12 mbutaka ɔnɛ: “Oko wakɔtɔ pɛkato l’andja oma le onto ɔtɔi ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.” Abɛlɛ mbaki kanga kɔlamelo la ntondo lakavu. (Etat. 4:8) Oma laasɔ, ana waki Adama akina wekɔ lo ntshunda esombe ndo wekɔ lo mvɔ. Onde vɔ wakahowɔ pɛkato la nyɔi? Ɔpɔstɔlɔ Pɔɔlɔ kadimulaka ɔnɛ: “Oma lo ohendodi w’onto ɔtɔi, anto efula wakɔsama oko atshi wa pɛkato.” (Rɔmɔ 5:19) Pɛkato la nyɔi kakahowɔ anto oma le Adama akayokomaka atunyi wa wolo wele anto wele keema kokele hawokoke mbaewɔ. Hatokoke nembetshiya l’eshikikelo tshɛ woho wakasambiyama ana waki Adama pɛkato la nyɔi, koko dui sɔ mɛnamaka dia vɔ wakakihowɔ oma lo etombelo adiɔ.

⁹ Bible mbɛdikaka nyɔi ndo pɛkato kakatahowɔ la “ukumbo watukumbaka antu tshe, ee, ukumbo watukumbaka wedja tshe.” (Is. 25:7) Okombɔ washimba anto dia nsɛna ɔsɔ ekɔ dui diɛnya anto tshɛ paa k’efula. Diakɔ diele, “anto tshɛ wekɔ lo mvɔ oma le Adama.” (1 Kɔr. 15:22) Pɔɔlɔ akayoyaokaka dimbola ɔnɛ: “Onto akɔna ayotshungola oma lo demba nɛ diayokonya lo nyɔi?” Onde ekɔ onto okina lakakoke nsala dui sɔ? *—Rɔmɔ 7:24.

10. a) Naa avɛsa amɔtshi wa lo Bible wɛnya dia Jehowa ayonya nyɔi kakela Adama? b) Kakɔna kɛnya avɛsa asɔ lo dikambo dia Jehowa ndo di’Ɔnande?

¹⁰ Jehowa mbakakoke ntshungola Pɔɔlɔ. L’ɔkɔngɔ wa nde ntɛkɛta dikambo ‘di’okombɔ,’ Isaya akayofundaka ate: “[Jehowa] ambunya nyoi pundju. Ndi ayukitula asoi tshe uma lu ashu awo, ndi ayunya wudja andi uma lu sonyi tshe ka la kete.” (Is. 25:8) Oko watosalaka ombutshi dia minya kɛnɛ kasoya anande ndo nkitola wasɔyi oma lo washo awɔ, Jehowa ngɛnangɛnaka minya nyɔi kakela Adama. Dia nsala dui sɔ, nde ekɔ la okimanyedi ɔmɔtshi. Lo 1 Kɔrɛtɔ 15:22 Bible mbutaka ɔnɛ: “Oko wele anto tshɛ wekɔ lo mvɔ oma le Adama, mbele ndo anto tshɛ wayonga la lɔsɛnɔ oma le Kristo.” L’ɔkɔngɔ wa Pɔɔlɔ ndjambola ɔnɛ: “Onto akɔna ayotshungola,?” nde akatetemala mbuta ate: “Lambosha Nzambi losaka nɛ dia nde mbayotshungola lo tshimbo ya Yeso Kristo  Nkumɛso.” (Rɔmɔ 7:25) Mbokɛmaka dia ngandji kakatshutshuya Jehowa dia ntonga anto kookitakita l’ɔtɛ wakatɔmbɔkɔ Adama la Eva. Ndo Yeso lakakambe kaamɛ la Jehowa dia ntonga atshukanyi wa ntondo koshisha ngandji kande ka shikaa oya le tokanula taki Adama. (Tuk. 8:30, 31) Ko ngande wakakoke otshungwelo ɔsɔ salema?

11. Yɛdikɔ yakɔna yakɔshi Jehowa dia nkimanyiya anto?

¹¹ Eongelo k’anto wele keema kokele ndo nyɔi ndja oma lo pɛkato kakasale Adama ndo oma lo kilombo ka la losembe kaki Jehowa. (Rɔmɔ 5:12, 16) Bible mbutaka ɔnɛ: “Oma lo pɛkato k’onto ɔtɔi weho tshɛ w’anto wakanyema.” (Rɔmɔ 5:18) Kakɔna kakakoke Jehowa nsala dia minya nyɔi la pɛkato aha la nsekola atɔndɔ ande? Okadimwelo tanemaka lo ɛtɛkɛta waki Yeso w’ɔnɛ: “Ɔna onto akaye . . . [dia] nkimɔ anima ande oko oshinga w’etshungwelo dikambo di’anto efula.” (Mat. 20:28) Etongami ka ntondo ka lo nyuma kaki Jehowa akɛnya dia nde akotɔ lanɛ la nkɛtɛ oko onto la kokele ndo ɔnɛ nde koka nkimɔ oshinga w’etshungwelo. Onde oshinga w’etshungwelo ɔsɔ akɛnya dia Jehowa ekɔ la losembwe?—1 Tim. 2:5, 6.

12. Lo woho akɔna wele oshinga w’etshungwelo akafute kɛnɛ kakashisha Adama?

¹² Oko wakinde onto la kokele, Yeso aki la lɔsɛnɔ la woho akɔ waamɛ la lɔnɛ laki la Adama la ntondo ka nde nsala pɛkato. Sangwelo diaki Jehowa aki dia ndodia nkɛtɛ l’ana waki Adama wa kokele. Lam’ele Yeso aki la ngandji ka mamba otsha le She ndo otsha le tokanula taki Adama, nde akakimɔ lɔsɛnɔ lande l’onto la kokele oko olambo. Nde mɛtɛ akakimɔ lɔsɛnɔ lande la kokele lakɛdima la lɔnɛ lakashisha Adama. L’ɔkɔngɔ diko, Jehowa akolola ɔnande oko etongami ka lo nyuma. (1 Pet. 3:18) Jehowa aketawɔ olambo waki Yeso wa kokele ndo dui sɔ diakakimanyiya dia nde mfuta kɛnɛ kakashisha Adama ndo mbisha anto tshɛ elongamelo ka lɔsɛnɔ lele oko lɔnɛ laki la Adama. Mbokɛmaka dia Yeso akɔshi dihole diaki Adama. Pɔɔlɔ akalembetshiya ate: “Akafundama ɔnɛ: ‘Adama, onto la ntondo akayala anima wasɛna.’ Adama w’ekomelo akayala nyuma kasha lɔsɛnɔ.”—1 Kɔr. 15:45.

13. Kakɔna kayosala “Adama w’ekomelo” dia nkimanyiya anto wakavu?

¹³ Etena kayokoka kele “Adama w’ekomelo” ayosalɛ anto tshɛ akambo oko “nyuma kasha lɔsɛnɔ.” Efula ka tokanula taki Adama wayolɔma. Lande na? Nɛ dia vɔ waki la lɔsɛnɔ ntondo ko wakayovɔka. Vɔ wayonga l’ohomba wa eolwelo dia nyomɔsɛna lanɛ la nkɛtɛ.—Jni. 5:28, 29.

14. Yɛdikɔ yakɔna yakɔshi Jehowa dia minya eongelo kele keema kokele k’oma le Adama?

¹⁴ Ngande wayotshungɔ anto tshɛ oma lo eongelo kawɔ k’anto wele keema kokele? Dia nsala dui sɔ, Jehowa akakenge Diolelo diayɔlɔmbɔma oma le “Adama w’ekomelo” kaamɛ la wanɛ wakasɔnama oma la nkɛtɛ. (Adia Ɛnyɛlɔ 5:9, 10.) Wanɛ wayotokamba kaamɛ la Yeso l’olongo wakashile nshihodia kɛnɛ kalembetshiya monga anto wele keema kokele. Lo ɛnɔnyi kinunu wayowolɛ, vɔ wayokimanyiya anto wa la nkɛtɛ dia vɔ nkoma kokele, dui diele anto bu l’akoka wa disala vɔamɛ.—Ɛny. 20:6.

15, 16. a) Kakɔna kalembetshiya “otunyi w’ekomelo,” ndo etena kakɔna kayowolanyema? b) Lo ndjela 1 Kɔrɛtɔ 15:28, kakɔna kayosala Yeso l’etena kahombama?

¹⁵ L’ekomelo ka Diolelo di’ɛnɔnyi kinunu, anto wele l’okitanyiya wayotshungɔ oma le atunyi awɔ tshɛ wakaye oma lo ɔtɔmbɔkwɛlɔ w’Adama. Bible mbutaka ɔnɛ: “Nɛ dia oko wele anto tshɛ wekɔ lo mvɔ oma le Adama, mbele ndo anto tshɛ wayonga la lɔsɛnɔ oma le Kristo. Koko, onto l’onto l’etena kande: Kristo mbele ɔlɔnga,  oma laasɔ wanɛ wele waki Kristo wayolɔ lo etena ka woongelo ande. Oma laasɔ, l’ekomelo, nde ayokimɔ Diolelo le Nzambi She. Kɛsɔ kayosalema l’ɔkɔngɔ wa nde ndanya waolelo tshɛ ndo mandji tshɛ. Nɛ dia nde pombaka monga Nkumekanga polo lam’ayokitsha Nzambi atunyi ande tshɛ l’ɛse k’ekolo ande. Otunyi w’ekomelo wayolanyema ele nyɔi.” (1 Kɔr. 15:22-26) Nyɔi kakatahowɔ oma le Adama kayonyɛma lo pondjo. “Ukumbo” wɛnya anto tshɛ paa wayonyɛma lo pondjo.—Is. 25:7, 8.

¹⁶ Pɔɔlɔ tetemalaka mbuta ɔnɛ: “Lam’ayɔlɛndjama diangɔ tshɛ le nde, Ɔna ndamɛ ayɔlɛmbɛ Nzambi lakɔlɛndjɛ diangɔ tshɛ dia Nzambi monga laadiko dia tshɛ.” (1 Kɔr. 15:28) Yeso ayolɛ oko wakakongɛ Jehowa. L’ekomelo k’ɛlɔmbwɛlɔ kande, l’ɔngɛnɔngɛnɔ tshɛ nde ayokaloya lowandji le Jehowa ndo ayowɛnya nkumbo k’anto wele kokele.

17. Kakɔna kayokomɛ Satana?

¹⁷ Kakɔna kayokomɛ Satana, ɔnɛ lele lo kiɔkɔ y’awui tshɛ wa kɔlɔ wɛnya anto paa? Okadimwelo tanemaka lo Ɛnyɛlɔ 20:7-15. Satana ayolongola lotshungɔ la mpemba anto tshɛ wele kokele lo ohemba w’ekomelo. Diabolo la wanɛ wayowoyela wayonyɛma lo pondjo lo “nyɔi ka hende.” (Ɛny. 21:8) Lam’ele wanɛ wayonganyiyama asɔ wayonyɛma lo pondjo, mbokɛmaka dia nyɔi ka hende ayonga la shɛngiya lewɔ. Koko “nyɔi ka hende” hatonga la shɛngiya le wanɛ wayotetemala mboka Nzambi ngandji ndo mbokambɛ.

18. Ngande wayokotshama ɔkɛndɛ wakawasha Adama?

¹⁸ Anto wa kokele wayɔtɔlama la ntondo ka Jehowa oko anto wetawɔma dia monga la lɔsɛnɔ la pondjo aha kaanga la otunyi ɔtɔi. Ɔkɛndɛ wakawasha Adama wayokotshama aha la nde monga laawɔ. Nkɛtɛ kayolola la tokanula tande, wayokilɔmbɔlaka ndo wayɔngɛnangɛnaka la lɔsɛnɔ lo toho efula. Ɔnkɔnɛ, tatoshishake pondjo lowando lele la so lo woho wele Jehowa Nzambi ka ngandji ayolanya nyɔi lo pondjo.