1, 2. a) Kakɔna kakalangaka ewandji w’ɛtɛmwɛlɔ ɛmɔtshi mbeya, ndo ngande wakaakadimola Petero? (Enda osato wele lo mbɔtwɛlɔ.) b) Kakɔna kakakimanyiya Petero dia nde monga la dihonga lo diaaso sɔ?

YEMA tshitshɛ l’ɔkɔngɔ wa Yeso mvɔ, ɔpɔstɔlɔ Petero akatanema la ntondo k’olui ɔmɔtshi w’apami waki la lohetsho l’efula otsha le nde. Vɔ waki ewandji w’ɛtɛmwɛlɔ w’ase Juda waki la wolo efula ndo vɔ mbaki lo kiɔkɔ ya nyɔi kaki Yeso. Apami asɔ wakɔlɔmbɛ dia nde mbalembetshiya dui dimɔtshi. Petero aki oma la nkɔnɔla pami kɛmɔtshi kakotɔ ekuse, ndo apami asɔ wakalange mbeya oma lɛnɛ akaye wolo ɔsɔ ndo lo lokombo l’onto akɔna akandasale dihindo sɔ. La dihonga tshɛ, ɔpɔstɔlɔ Petero akakadimola ate: “Lo lokombo la Yeso Kristo y’ose Nazarɛtɛ, ɔnɛ lakanyahanɛ l’otamba, ko Nzambi mboolola oma lo nyɔi, lo lokombo lande kambɔkɔnɔ pami kele la ntondo kanyu kɛnɛ.”—Ets. 4:5-10.

² La ntondo ka laasɔ, Petero akanguna Yeso mbala shato y’etondo la wɔma tshɛ. (Makɔ 14:66-72) Ko kakɔna kakayowoshaka dihonga etena kakinde la ntondo k’ewandji w’ɛtɛmwɛlɔ ɛsɔ? Nyuma k’ekila mbakookimanyiya ndo Petero aki l’eshikikelo ɔnɛ Yeso akolɔ. Ko kakɔna kakooshikikɛ mɛtɛ ɔnɛ Yeso akolɔ? Ndo kakɔna katoshikikɛ sho lawɔ ɔnɛ Yeso mɛtɛ akolɔ?

3, 4. a) Weho akɔna wa eolwelo wakasalema la ntondo k’apɔstɔlɔ waki Yeso mbotɔ? b) Weho akɔna wa eolwelo wakasale Yeso?

³ Kanyi y’ɔnɛ onto lambovɔ koka nsɛna nto komonga dui  di’oyoyo le apɔstɔlɔ waki Yeso nɛ dia eolwelo kakasalemaka kaanga la ntondo ka vɔ mbotɔ. Vɔ wakeyaka ɔnɛ Nzambi akasha ɔprɔfɛta Elidja ndo Elisha wolo wa mbolola anto. (1 Khum. 17:17-24; 2 Khum. 4:32-37) Pami kɛmɔtshi akolɔ etena kakawakasha odo ande la diombo diaki Elisha ndo kakatosakanaka demba diande la weka waki Elisha. (2 Khum. 13:20, 21) Akristo wa lo ntambe ka ntondo waketawɔka ɛkɔndɔ wa lo Afundelo ɛsɔ oko wetawɔso dia Ɔtɛkɛta waki Nzambi wekɔ mɛtɛ.

⁴ Woho akɔ waamɛ mbele, sho tshɛ takanandema efula etena kakatadia ɛkɔndɔ wa lo Bible wɛnya woho wakolola Yeso anto. Etena kakandolola tshɔi y’ɔna pami laki wadi aki odo ɔmɔtshi, weho akɔ tshɛ nyango akaambe efula. (Luka 7:11-15) Lo diaaso dikina, Yeso akolola ɔna womoto laki l’ɛnɔnyi 12. Ambutshi ande waki la lɔkɔnyɔ ntondo wakambe ndo wakonge la ɔngɛnɔngɛnɔ etena kakawɛnyi di’ɔnawɔ ambolɔ. (Luka 8:49-56) Ndooko onyake, anto waki laawɔ wakangɛnangɛna efula etena kakawɛnyi Lazaro ambolɔ ele la yonge ya dimɛna.—Jni. 11:38-44.

5. Ngande wakatshikitana eolwelo kaki Yeso la weho ekina wa eolwelo wakasalema la ntondo?

⁵ Apɔstɔlɔ wakeyaka ɔnɛ eolwelo ka Yeso kakatshikitana la weho ekina wa eolwelo wakasalema la ntondo. Anto wakolɔma wakolɔ l’alemba wa l’emunyi ndo wakayovɔka nto, koko Yeso akolɔ la demba dia lo nyuma diahavu. (Adia Etsha 13:34.) Petero akafunde dia Yeso “akadiakema lo demba, koko akayala la lɔsɛnɔ lo nyuma.” Laadiko dia laasɔ, “nde ekɔ lo lonya l’omi la Nzambi, nɛ dia nde akatshu l’olongo. Andjelo, ewandji ndo akanga wa nkudu wakayala l’ɛse kande.” (1 Pet. 3:18-22) Weho wa eolwelo wakasalema la ntondo ka Yeso waki mɛtɛ wa diaambo ndo wa lo yoho ya dihindo, koko vɔ hawokoke mbɛdikama la eolwelo ka diambo ka Yeso.

6. Shɛngiya yakɔna yaki la eolwelo kaki Yeso le ambeki ande?

⁶ Eolwelo ka Yeso kaki la shɛngiya ya mamba le ambeki ande. Yeso kotshikala edja lo nyɔi oko wakafɔnyaka atunyi ande. Nde akolɔ oko etongami ka lo nyuma kele la wolo efula ndo ndooko onto lakakoke mbodiaka nto. Eolwelo kande kakɛnyaka dia nde aki Ɔna Nzambi, ndo woho wakeyaka apɔstɔlɔ ande dui sɔ akaakimanyiya diaha vɔ monga la lɔkɔnyɔ koko dia monga l’ɔngɛnɔngɛnɔ w’efula. Laadiko dia laasɔ, wɔma waki la wɔ wakahɛnyama la dihonga. Eolwelo kaki Yeso mbaki ehikamelo ka sangwelo diaki Jehowa ndo ka lokumu l’ɔlɔlɔ lakawasambishaka la dihonga polo ndo l’ahole wa tale.

7. Kakɔna kasala Yeso nshi nyɛ, ndo ambola akɔna wambɔma?

⁷ Oko weso ekambi waki Jehowa, sho mbeyaka dia Yeso komonga tsho onto loleki woke. Nde ekɔ la lɔsɛnɔ ɛlɔ kɛnɛ ndo ekɔ lo nɔmbɔla olimu w’esambishelo wendana l’anto tshɛ wa la nkɛtɛ. Oko wende Nkumekanga koolɛ lo Diolelo diaki Nzambi, keem’edja Yeso Kristo ayanga minya awui tshɛ wa kɔlɔ oma la nkɛtɛ ndo kikadimola paradiso kayodjasɛka anto pondjo pondjo. (Luka 23:43) Dui sɔ hadiokoke salema otondongaka Yeso kombolɔ. Ko, kakɔna katetawoya ɔnɛ nde mɛtɛ akolɔma oma lo nyɔi? Ndo kakɔna kalembetshiya eolwelo kande le so?

8, 9. a) Lande na kakalɔmbɛ ewandji w’ɛtɛmwɛlɔ w’ase Juda dia diombo diaki Yeso namema? b) Kakɔna kakatombe etena kakakome wamato laa diombo?

⁸ L’ɔkɔngɔ wa Yeso ndjakema, ewandji w’ɛlɔmbɛdi ndo Afarisɛ wakaye le Pilato  ko wakawotɛ ɔnɛ: “Owandji, tambohɔ dia kanga lokeso ɔnɛ akate lam’akinde la lɔsɛnɔ ate: ‘L’ɔkɔngɔ wa nshi shato, dimi layolɔ.’ Ɔnkɔnɛ, etawɔ dia diombo namema polo lushi la sato diaha ambeki ande ndjova odo, ko vɔ ndjotɛ anto ɔnɛ: ‘Nde ambolɔ!’ ko kashi k’ekomelo kɛsɔ ndjoleka ka ntondo.” Pilato akawatɛ ɔnɛ: “Asɔlayi vɔ anɛ. Watshu watolame diombo oko watanyu.” Ko vɔ wakasale ngasɔ.—Mat. 27:62-66.

⁹ Wakatodjaka odo waki Yeso lo diombo dia lo wooko wa dive diakafamamɛ la dive dia woke. Lo dihole sɔ mbakakombolaka ewandji w’ɛtɛmwɛlɔ w’ase Juda dia Yeso tshikalaka lɛkɔ pondjo pondjo aha la nde mbolɔ. Koko Jehowa akakanyiyaka akambo lo yoho yotshikitanyi. Etena kakaye Mariya w’ose Mangadala la Mariya okina laa diombo lushi la sato, vɔ wakayotanaka dia dive diakangitɔmi oma la soko ndo ondjelo ɔmɔtshi mbidjasɛ laadiko adiɔ. Ondjelo akatɛ wamato asɔ ɔnɛ nyende l’eteyi diombo diaya hwe. Nde akawatɛ ɔnɛ “nde bu lanɛ, nɛ dia nde ambolɔ.” (Mat. 28:1-6) Yeso aki mɛtɛ la lɔsɛnɔ!

10. Tolembetelo takɔna takasha Pɔɔlɔ tɛnya dia Yeso akolɔ?

¹⁰ Awui wakayosalemaka nshi 40 l’ɔkɔngɔ, wakɛnya dia Yeso mɛtɛ akolɔma. Ɔpɔstɔlɔ Pɔɔlɔ akafundɛ Akristo wa la Kɔrɛtɔ awui wakete asɔ lo tshena pe ate: “L’atei w’akambo woleki ohomba wakamanyetsha mbele ndo kɛnɛ kakamalongola kata ɔnɛ: Kristo akavu dikambo dia pɛkato yaso lo ndjela Afundelo, akakundɛma, akolɔ lushi la sato lo ndjela Afundelo, ndo akɛnama le Kɛfasi, ko oma laasɔ le apɔstɔlɔ ande dikumi l’ahende. Oma laasɔ, nde akɛnama mbala kakɔ ɔtɔi le anangɛso ndekana nkama tshanu wele efula ka l’atei awɔ wekekɔ la lɔsɛnɔ, kaanga mbele amɔtshi wambolalaka djɔ lo nyɔi. L’ɔkɔngɔ wa laasɔ, nde akɛnama le Jakɔba ko oma laasɔ le apɔstɔlɔ tshɛ. Koko l’ekomelo, nde akayɛnamaka ndo le mi wate kana oko le ɔna lambotɔ osondjo.”—1 Kɔr. 15:3-8.

11. Lo woho akɔna wakasalema eolwelo kaki Yeso “lo ndjela Afundelo”?

¹¹ Dui dia ntondo ele, eolwelo kande kakasalema “lo ndjela Afundelo.” Ɔtɛkɛta waki Nzambi wakatewoyisha eolwelo kaki Yeso. Ɛnyɛlɔ, Davidɛ akafunde ɔnɛ “ulangimi” waki Nzambi hotshikala lo diombo. (Adia Osambu 16:10.) Lo pɛntɛkɔsta ka lo 33 T.D., ɔpɔstɔlɔ Petero akakambe la ɛtɛkɛta watanema lo prɔfɛsiya kɛsɔ lo dikambo diaki Yeso lo mbuta ɔnɛ: “[Davidɛ] akɛnyi la ntondo ko akatɛkɛta dikambo dia eolwelo ka Kristo dia Nzambi hatowohɛ l’odimu a pɛngando ndo demba diande hadiotɔhɔnda.”—Ets. 2:23-27, 31.

12. Waa na wakɛnyi Yeso lakolwama?

¹² Dui dia hende ele, kɛnɛ kata efula k’anto wakɛnyi dui sɔ. L’edja kolekanyi nshi 40 l’ɔkɔngɔ wa nde mbolɔ, Yeso akɛnama le ambeki ande lo ekambɔ lɛnɛ aki diombo, lo mboka k’otsha la Emayo ndo l’ahole akina. (Luka 24:13-15) Lo waaso asɔ, nde akatɛkɛta la wɔ l’onto ndo l’onto mbidja ndo Petero ndo nde akayɛnanaka la wɔ lo elui. Mbokɛmaka lande na kakɛnama Yeso lakolɔ le anto ndekana 500. Dui diɛnyi anto efula la washo awɔ hadiokoke mbidjama taamu.

13. Ngande wele ohetoheto waki l’ambeki waki Yeso wakɛnyaka dia vɔ waki l’eshikikelo ɔnɛ Yeso akolɔ?

¹³ Dui dia sato ele, ohetoheto waki l’ambeki ande etena kakawasambishaka dia eolwelo kande. Woho wakasambishaka ambeki waki Yeso dia eolwelo kande akaakonya dia vɔ pembama, soyama ndo ndjakema. Otondongaka Yeso  kombolwama ndo otongaka ɔsɔ ekɔ dui dia kashi, lande na kakakoke Petero mbidja lɔsɛnɔ lande lo waale? Lande na kakandasambisha eolwelo kaki Kristo la ntondo ka ewandji w’ɛtɛmwɛlɔ wakahetshaka Yeso ndo wakɔtɔ sheke dia mbodiaka? Petero nde l’ambeki akina wakasale ngasɔ nɛ dia vɔ waki l’eshikelo ɔnɛ Yeso aki la lɔsɛnɔ ndo ɔnɛ nde mbakalɔmbɔlaka olimu w’esambishelo. Laadiko dia laasɔ, eolwelo kaki Yeso kakashikikɛka ambeki ande ɔnɛ vɔ la wɔ wayolɔ. Ɛnyɛlɔ, Stɛfano akavu ele l’eshikelo ɔnɛ nde ayolwama.—Ets. 7:55-60.

14. Kakɔna kaketawoya ɔnɛ Yeso ekɔ la lɔsɛnɔ?

¹⁴ Dui dia nɛi ele, woho weso la tolembetelo tɛnya dia nde ekɔ lo nɔmbɔla oko Nkumekanga ndo ekɔ Ɔtɛ w’etshumanelo k’Akristo. Etombelo wele la dui sɔ ele, Lokristo la mɛtɛ lekɔ lo tatetemala mfula. Onde dui sɔ diotosalema otondongaka Yeso kombolɔ? Ondo toototeya awui wendana la Yeso otongaka nde kombolɔ. Tekɔ mɛtɛ la ɛkɔkɔ w’eshika watetawoya dia nshi nyɛ Yeso ekɔ la lɔsɛnɔ, ekɔ lo nɔmbɔla ndo ekɔ lo tosha ɛlɔmbwɛlɔ etena kasambishaso lokumu l’ɔlɔlɔ l’ahole wa tale efula.

15. Lande na kele eolwelo kaki Yeso toshaka dihonga dia nsambisha?

¹⁵ Eolwelo kaki Yeso toshaka dihonga dia nsambisha. L’edja ka ɛnɔnyi 2000, atunyi waki Nzambi wambokamba la toho totshikitanyi dia memadia lokumu l’ɔlɔlɔ la Diolelo, mbuta ate apɔstazi, wɛngiya, awui wa ngala, oshimbelo w’olimu aso, dikɔmɔki ndo odiakelo. Koko ‘ndooko yoho yakatondoya’ dia memadia esambishelo ka lokumu l’ɔlɔlɔ la Diolelo ndo olimu wa mbetɛ anto ambeki. (Is. 54:17) Sho hatoke anto kana ɛhɔmbɔ waki Satana wɔma. Yeso ekɔ kaamɛ la so ndo ekɔ lo tosukɛ oko wakandadilake. (Mat. 28:20) Tekɔ mɛtɛ l’ɛkɔkɔ w’eshika waha mboka wɔma nɛ dia oyadi kɛnɛ tshɛ kayosala atunyi aso, vɔ hawototodiha enyɔ.

16, 17. a) Ngande wele eolwelo kaki Yeso shikikɛka dia kɛnɛ tshɛ kakandetsha kaki mɛtɛ? b) Lo ndjela Joani 11:25, wolo akɔna wakasha Nzambi Yeso?

¹⁶ Eolwelo kaki Yeso shikikɛka kɛnɛ tshɛ kakandetsha. Pɔɔlɔ akafunde ate naka Kristo kombolɔ, kete mbetawɔ k’Akristo ndo olimu w’esambishelo wotonga anyanya. Nomb’ewo kɛmɔtshi k’awui wa lo Bible akafunde ate: “Naka Kristo kombolɔ, . . . Kete Akristo wekɔ aladi ndo wekɔ lo mbetawɔ kashi ka woke.” Otondongaka Yeso kombolɔ, tshike ɛkɔndɔ wa lo Evanjiliɔ wotonga tsho oko toshimu tɛnya woho wakadiakema pami kɛmɔtshi k’ɔlɔlɔ ndo ka lomba oma le atunyi ande. Lam’ele Kristo akolɔ, kɛsɔ shikikɛka di’awui tshɛ wakandetsha wekɔ mɛtɛ mbidja ndo kɛnɛ kakandate lo kɛnɛ kendana la nshi yayaye.—Adia 1 Kɔrɛtɔ 15:14, 15, 20.

¹⁷ Yeso akate ate: “Dimi lekɔ eolwelo la lɔsɛnɔ. Onto tshɛ longa la mbetawɔ le mi, oyadi kaanga nde kovɔka, nde ayoyala la lɔsɛnɔ nto.” (Jni. 11:25) Ɛtɛkɛta w’amɛna ɛsɔ wayokotshama ndo haweta paa. Jehowa akasha Yeso wolo wa mbolola aha tsho wanɛ wayolɔ dia tɔsɛna lɔsɛnɔ la lo nyuma l’olongo koko ndo dia mbolola miliyɔ y’anto wayɔsɛna lanɛ la nkɛtɛ. Olambo wadimanyiya pɛkato waki Yeso ndo eolwelo kande nembetshiyaka ɔnɛ nyɔi hatonga nto. Onde ewo k’akambo asɔ hakokeketsha dia wɛ mbikikɛ la dihonga tshɛ ehemba wakoka mpomana la yɛ oyadi la ntondo ka nyɔi?

18. Eshikikelo kakɔna katosha eolwelo kaki Yeso?

¹⁸ Eolwelo kaki Yeso toshaka eshikikelo ɔnɛ anto wa la nkɛtɛ wayolomboshama lo ndjela atɔndɔ wa la ngandji waki Jehowa. Etena kakandatɛka olui w’apami la wamato  wa la Atɛna w’edjedja, Pɔɔlɔ akate ate: “[Nzambi] ayolombosha nkɛtɛ k’otondo la losembwe lo tshimbo y’onto lakandasɔnɛ, ndo anto tshɛ kokaka monga l’eshikikelo dia kilombo kɛsɔ kayosalema, nɛ dia nde akolola onto akɔ oma lo nyɔi.” (Ets. 17:31) Yeso ekɔ Shushi yakasɔnama oma le Nzambi ndo sho koka monga l’eshikikelo ɔnɛ nde ayolombosha anto la wɛdimo ndo la ngandji.—Adia Isaya 11:2-4.

19. Monga la mbetawɔ lo eolwelo kaki Yeso totshutshuyaka dia nsala na?

¹⁹ Monga la mbetawɔ lo eolwelo kaki Yeso totshutshuyaka dia nsala lolango la Nzambi. Otondongaka aha nyɔi k’olambo kaki Yeso ndo eolwelo kande ka diambo, tshike tekɔ paka lo lɔhɔmbɔ la pɛkato la nyɔi. (Rɔmɔ 5:12; 6:23) Otondongaka Yeso kombolɔ tshike tototaka ɔnɛ: “Nyɛsɔ tole ndo tɔnɔ, nɛ dia tayovɔ loyi.” (1 Kɔr. 15:32) Sho hatoke washo lo ɛngɛnɔngɛnɔ wa lo lɔsɛnɔ, koko sho mbɔsaka la nɛmɔ elongamelo ka eolwelo ndo tekɔ l’ɛkɔkɔ w’eshika wa ndjela ɛlɔmbwɛlɔ kaki Jehowa lo akambo tshɛ.

20. Kakɔna kɛnya eolwelo kaki Yeso lo kɛnɛ kendana la woke woke waki Nzambi?

²⁰ Elowelo kaki Yeso shikikɛka woke woke waki Jehowa ɔnɛ lele “ofutshi wa wanɛ wooyanga l’otema ɔtɔi.” (Hɛb. 11:6) Ande wolo ndo lomba lakakambe la Jehowa dia mbolola Yeso otsha lo lɔsɛnɔ lahavu l’olongo lee! Laadiko dia laasɔ, Nzambi akɛnya dikoka diande dia nkotsha asangwelo ande. Dui sɔ mendanaka ndo la daka diaki Nzambi diɛnya dia “kanula” mɔtshi ya laande akahombe ndjokamba olimu w’ohomba efula dia mɛnya lotshungɔ lele la Nzambi la mbolɛ l’andja w’otondo. Dia daka sɔ kotshama, akahombama dia Yeso mvɔ ndo mbolwama.—Etat. 3:15.

21. Kakɔna kalembetshiya elongamelo ka eolwelo le yɛ?

²¹ Shi ekɔ dimɛna sho monga la lowando le Jehowa lo woho wakandatosha elongamelo ka eolwelo? Afundelo toshikikɛka ɔnɛ: “Enda! Hiombo yaki Nzambi yaya kaamɛ la anto, ndo nde ayodjasɛ kaamɛ la wɔ, ko vɔ wayoyala anto ande. Nzambi ndamɛ ayoyala kaamɛ la wɔ. Nde ayokitola asɔyi tshɛ oma lo washo awɔ, ndo nyɔi hatoyala nto, delo hadiotoyala nto, kaanga ndjawi kaanga kandji hatoyala nto. Akambo wa ntondo wamboshila.” Ɔpɔstɔlɔ Joani laki la kɔlamelo mbakafunde dui dia diambo sɔ ndo wakawotɛ ɔnɛ: “Funda, nɛ dia ɛtɛkɛta ɛnɛ wekɔ wa kɔlamelo ndo mɛtɛ.” Onto akɔna akɛnya Joani wɛnɛlɔ ɔsɔ? Yeso Kristo ɔnɛ lakolwama mbakawɛnyawɔ.—Ɛny. 1:1; 21:3-5.