1. Ngande wakoka dibuku di’Akambu w’Asi Lewi tokimanyiya?

TSHƐKƐTA ekila tanemaka mbala efula lo dibuku di’Akambu w’Asi Lewi oleki lo abuku akina wa lo Bible. Lam’ele atɛmɔdi wa mɛtɛ tshɛ waki Jehowa nɔmbamaka dia monga ekila, nshihodia dibuku di’Akambu w’Asi Lewi ndo monga la lowando lɔkɔ ayotokimanyiya dia sho monga ekila.

2. Naa awui amɔtshi w’ohomba watanema lo dibuku di’Akambu w’Asi Lewi?

² Dibuku di’Akambu w’Asi Lewi diakafundama oma le ɔprɔfɛta Mɔsɛ ndo diɔ diekɔ etenyi kɛmɔtshi ka “Afundelo tshɛ” wele ohomba dia mbetsha. (2 Tim. 3:16) Lo yɛdikɔ ya l’atei atei, lokombo Jehowa tanemaka mbala oko dikumi l’oseka tshapita tshɛ ya lo dibuku diakɔ. Naka sho nshihodia dibuku di’Akambu w’Asi Lewi, kete dui sɔ ayotokimanyiya dia sho mbewɔ kɛnɛ tshɛ kakoka ndjɔtɛngamisha lokombo laki Jehowa. (Lew. 22:32) Woho wakamba dibuku nɛ la etelo k’ɔnɛ “dimi keli [Jehowa,]” pombaka tohola dia sho nkitanyiya Nzambi. Lo sawo nɛ ndo diayela, tayɛna awui amɔtshi w’ohomba watanema lo dibuku di’Akambu w’Asi Lewi, diele woshasha w’oma le Nzambi watokimanyiya dia sho ndjasha lo ɔtɛmwɛlɔ w’ekila.

3, 4. Wɔtshɛlɔ waki Arɔna l’anande w’apami aki didjidji dia na? (Enda osato wele lo mbɔtwɛlɔ.)

³ Adia Akambu w’Asi Lewi 8:5, 6. Jehowa akasɔnɛ Arɔna oko ɔlɔmbɛdi a laadiko l’Isariyɛlɛ ndo anande w’apami oko ɛlɔmbɛdi lo waahɔ wa wodja. Arɔna aki didjidji dia Yeso Kristo ndo anande w’apami waki didjidji di’Akristo w’akitami. Ko onde woho wakɔtshama Arɔna aki didjidji dia wɛdiamelo wa Yeso? Ndooko, nɛ dia lam’ele Yeso komonga la pɛkato ndo “la ɛkɔmɔ” nde komonga l’ohomba wa mbɛdiama. (Hɛb. 7:26; 9:14) Koko woho wakɔtshama Arɔna akendanaka la wɛdiɛlɔ ndo la losembwe laki Yeso. Ko laasɔ, wɔtshɛlɔ w’ana w’apami waki Arɔna alembetshiyawɔ?

⁴ Wɔtshɛlɔ w’ana w’apami waki Arɔna aki didjidji dia wanɛ wakasɔnama dia tonga ɛlɔmbɛdi l’olongo. Onde batisimu k’akitami kaki la diɔtɔnganelo la wɛdiamelo w’ana w’apami waki Arɔna? Ndooko, nɛ dia batisimu hanya pɛkato koko tɔ kekɔ djembetelo yɛnya di’onto amboyakimɔ tshɛ le Jehowa Nzambi. Wɔtshɛlɔ w’akitami salemaka lo ndjela “ɔtɛkɛta” ndo kɛsɔ mbalɔmbaka dia vɔ nkamba la wetshelo waki Kristo lo nsɛnɔ yawɔ. (Ɛf. 5:25-27) Ɔnkɔnɛ, vɔ wambokidiamaka ndo wambɛdiamaka. Ko kayotota dia “ɛkɔkɔ ekina”?—Jni. 10:16.

5. Lande na kakokaso mbuta ɔnɛ ɛkɔkɔ ekina wekɔ lo mbɛdiama l’ekimanyielo k’Ɔtɛkɛta waki Nzambi?

⁵ Ana w’apami waki Arɔna komonga didjidji dia “olui a woke” wa ɛkɔkɔ ekina waki Yeso. (Ɛny. 7:9) Ko onde wanɛ wakabatizama asɔ mongaka ekila ndo mbɛdiamaka lo tshimbo y’Ɔtɛkɛta wa Nzambi? Eelo. Etena kadiawɔ Bible, wanɛ wele la elongamelo ka nsɛna lanɛ la nkɛtɛ shihodiaka ohomba ndo etombelo wele la dikila dia Yeso diakatshulɔma, vɔ mongaka la mbetawɔ lo kɛnɛ kadiawɔ ndo kambaka “olimu w’ekila la yanyi ndo l’otsho.” (Ɛny. 7:13-15) Etombelo wele la woho watatetemala akitami ndo ɛkɔkɔ ekina mbɛdiama, mɛnamaka nɛ dia vɔ ‘wekɔ la lɔkɛwɔ l’ɔlɔlɔ.’ (1 Pet. 2:12) Jehowa mongaka l’ɔngɛnɔngɛnɔ etena kɛnande pudipudi ndo kaamɛ kele lam’asa Akristo w’akitami ndo ɛkɔkɔ ekina wahokamɛ la yambalo tshɛ Yeso lele Olami awɔ w’ɛkɔkɔ.

6. Woho akɔna wa ndjasɛdingola wakoka monga la wahɔ le so?

⁶ Woho wakɛdiamaka ɛlɔmbɛdi wa l’Isariyɛlɛ w’edjedja lo demba ekɔ la kitshimudi y’efula le ekambi waki Jehowa ɛlɔ kɛnɛ. Mbala efula wanɛ weka la so Bible mɛnaka dia ahole watɛmɔlaso mongaka pudipudi ndo sho ndɔtaka dimɛna ndo la kɔmba. Koko ɛdiamelo ka ɛlɔmbɛdi tokimanyiyaka dia mbeya ɔnɛ onto tshɛ la dɛ lo okongo waki Jehowa wele ɔtɛmwɛlɔ ande, pombaka monga “la utema a pudipudi.” (Adia Osambu 24:3, 4; Is. 2:2, 3.) Sho pombaka kambɛ Nzambi olimu w’ekila la timba, etema ndo alemba wa pudipudi. Kɛsɔ nɔmbaka ndjasɛdingolaka mbala la mbala ndo nsala etshikitanu wahombama dia sho monga ekila. (2 Kɔr. 13:5) Ɛnyɛlɔ, onto lambobatizama lenda esato wɛnyawɔ anto etakataka koka ndjambola ɔnɛ ‘onde lekɔ lo mɛnya dia lekɔ ekila?’ Oma laasɔ, nde koka nkondja ekimanyelo dia ntshika mbekelo ka kɔlɔ kɛsɔ.—Jak. 5:14.

7. Ɛnyɛlɔ kakɔna kakatshike Yeso kafɔna l’awui watanema lo Akambu w’Ase Lewi 8:22-24?

⁷ Etena kakakome Arɔna ɔlɔmbɛdi a laadiko l’Isariyɛlɛ, Mɔsɛ akookite nde l’anande w’apami dikila lo tui dia l’omi, lo oma lohita la lonya l’omi ndo lo lohita la woke la lokolo lande l’omi. (Adia Akambu w’Asi Lewi 8:22-24.) Woho wakawakambe la dikila akɛnyaka dia ɛlɔmbɛdi wakahombaka monga l’okitanyiya lo nsala kɛnɛ tshɛ kakawakokaka nsala dia nkamba lotumu la wɔ.  Woho akɔ waamɛ mbele, Ɔlɔmbɛdi a laadiko Yeso akatshikɛ Akristo w’akitami ndo ɛkɔkɔ ekina ɛnyɛlɔ ka kokele. Nde akayele ɛlɔmbwɛlɔ kaki Nzambi, akasalaka lolango la Jehowa ndo akasɛnɛ lɔsɛnɔ l’ekila.—Jni. 4:31-34.

8. Kakɔna kahomba atɛmɔdi waki Jehowa tshɛ nsala?

⁸ Akristo w’akitami ndo ɛkɔkɔ ekina pombaka ndjela ɛnyɛlɔ k’olowanyi k’Ɔlɔmbɛdi awɔ a laadiko. Atɛmɔdi waki Jehowa tshɛ pombaka nkitanyiya wadjango watanema lo Ɔtɛkɛa wa Nzambi ndo mbewɔ nyangiya nyuma kande. (Ɛf. 4:30) Vɔ pombaka ‘sembolɛ ekolo awɔ mboka.’—Hɛb. 12:13.

9. a) Kakɔna kakate anangɛso asato wakakambe kaamɛ la ase Olui-walɔmbɔla? b) Ngande wakoka kɛnɛ kakawate kokimanyiya dia wɛ ntetemala monga ekila?

⁹ Tɔsɛdingole kɛnɛ kakate anangɛso asato wele l’elongamelo ka ndjɔsɛna lanɛ la nkɛtɛ wakakambe kaamɛ l’ase Olui-walɔmbɔla l’edja k’ɛnɔnyi akumi. Ɔmɔtshi akate ate: “Ɔnɛ mɛtɛ ekɔ diɛsɛ di’olimu dia laande ndo woho wakambaso kaamɛ la wɔ ntena la ntena ambotokimanyiya dia mɛna ɔnɛ kaanga mbewɔ akitami, anangɛso asɔ wekɔ anto wele keema kokele. Oyango ami l’edja k’ɛnɔnyi, aki wa monga l’okitanyiya le wanɛ walɔmbɔla.” Ɔnangɛso la hende akate ate: “Avɛsa wele oko 2 Kɔrɛtɔ 10:5 wata dia “nkitanyiya Kristo” akankimanyiya dia dimi monga l’okitanyiya ndo nkamba kaamɛ la wanɛ walɔmbɔla. Okitanyiya ɔsɔ pombaka monga w’oma k’ɛse otema.” Ɔnangɛso la sato akate ate: “Nanga kɛnɛ kalanga Jehowa ndo mpetsha kɛnɛ kahetshande, ntetemala nyanga ɛlɔmbwɛlɔ kande ndo salaka kɛnɛ kɔɔngɛnyangɛnya nembetshiyaka monga l’okitanyiya otsha le okongamelo ande ndo otsha le wanɛ wakamba la nde dia nde nkotsha sangwelo diande diendana la nkɛtɛ.” Ɔnangɛso ɔnɛ akɛnyi dia Nathan Knorr lakayokomaka ose Olui-walɔmbɔla aketawɔ awui wakatondjama lo Tshoto y’Etangelo ya 1925 lo sawo diaki l’ɔtɛ a dui ɔnɛ “eotwelo ka wodja” kaanga mbele anto amɔtshi wakayaokaka ambola lo kɛnɛ kendana la wetshelo akɔ. Okitanyiya wa ngasɔ akambiya ɔnangɛso ɔsɔ efula. Naka wɛ nkana yimba la kɛnɛ kakate anangɛso asato wɔtɛkɛtshiso, kete dui sɔ ayokokimanyiya dia wɛ monga ekila lo monga la okitanyiya.

10. Lande na kele ekɔ ohomba nkitanyiya ɔlɛmbɛ waki Nzambi wendana la dikila?

¹⁰ Adia Akambu w’Asi Lewi 17:10. Jehowa akadjangɛ ase Isariyɛlɛ diaha vɔ ndɛ ‘woho tshɛ wa dikila.’ Akristo vɔ la wɔ nɔmbamaka diaha ndɛ dikila dia nyama kana di’onto. (Ets. 15:28, 29) Sho hatokombola dia Nzambi ‘ndjotoka nkɛlɛ’ ndo ndjotonya oma lo etshumanelo kande. Sho mbolangaka ndo kombolaka mbokitanyiya. Oyadi etena kandamaso la hemɔ ka wolo, sho pombaka ndjashikikɛ diaha mbetawɔ awui ndo tokanyi t’anto wahakambɛ Jehowa ndo wahokitanyiya. Sho mbetawɔka dia mbɔsama anto w’anyanya l’ɔtɛ wahatetawɔ nkamba la dikila nɛ dia takasɔnɛ dia nkitanyiya Nzambi. (Judɛ 17, 18) Kakɔna kayotokimanyiya dia sho ‘ndjashikikɛ’ diaha ndɛ dikila kana ntona wodjelo wa dikila?—Euh. 12:23.

11. Lande na kakokaso mbuta dia fɛtɛ ka lushi la Ekesanelo komonga anyanya?

¹¹ Woho wakakambaka ɔlɔmbɛdi a laadiko wa l’Isariyɛlɛ w’edjedja la dikila lo fɛtɛ ka l’ɔnɔnyi ka lushi la Ekesanelo, tokimanyiyaka dia sho nshihodia kanyi ya Nzambi lo kɛnɛ kendana la dikila. Dikila diakakambemaka olimu wa laande. Diɔ diakadimanyiyaka pɛkato ya wanɛ wakayangaka kɛtshi kaki Jehowa. Dikila dia ngɔmbɛ ndo dia mbudi diakahombaka mɔngama la ntondo k’ofidi w’ɔshɛtɛ wa sheke. (Lew. 16:14,  15, 19) Tshelo shɔ akashaka Jehowa diaaso dia nde dimanyiyɛ ase Isariyɛlɛ pɛkato yawɔ. Laadiko dia laasɔ, Jehowa akadjanga dia naka onto ambotodiaka nyama, nde akahombaka nsedia dikila ndo difɛ nkɛtɛ nɛ dia “lumu la etungatunga tshe leko dikila diato.” (Lew. 17:11-14) Onde ɔsɔ aki tshelo y’anyanya? Ndooko. Okambelo wa la dikila lushi la fɛtɛ ka Ekesanelo ndo didjango dia nsedia dikila lo nkɛtɛ mbɔtɔnɛka la didjango dia ntondo diakadjangɛ Jehowa Nɔa la tokanula tande lo kɛnɛ kendana la dikila. (Etat. 9:3-6) Jehowa Nzambi akashimbe olelo wa dikila dia nsukɛ lɔsɛnɔ. Kakɔna kalembetshiya dui sɔ le Akristo?

12. Lo woho akɔna wele mukanda wakafundɛ Pɔɔlɔ Akristo wa la Hɛbɛru mɛnyaka diɔtɔnganelo diele lam’asa dikila la edimanyielo ka pɛkato?

¹² Etena kakafundɛ ɔpɔstɔlɔ Pɔɔlɔ Akristo wa la Hɛbɛru lo kɛnɛ kendana la wolo wa mbɛdia wele la dikila, nde akaalembetshiya ate: “Lo ndjela Ɛlɛmbɛ, suke la ɛngɔ tshɛ mbɛdiamaka la dikila ndo ndooko edimanyielo kayala naka dikila hadiotshulɔmi.” (Hɛb. 9:22) Elambo wa nyama waki la nɛmɔ lo tshanda mɔtshi tsho. Pɔɔlɔ akɛnya dia elambo wakakimɔka ase Isariyɛlɛ akawaoholaka dia vɔ waki atshi wa pɛkato ndo waki l’ohomba wa ɛngɔ kekina dia vɔ dimanyiyama pɛkato yawɔ lo pondjo. Ɛlɛmbɛ waki “didjidji dia akambo w’ɛlɔlɔ wakahombe ndja, koko aha etondo w’akambo akɔ.” (Hɛb. 10:1-4) Ko ngande wakahombe anto dimanyiyama pɛkato?

13. Ngande wayaokayɛ lo woho wakakimɔ Yeso oshinga wa dikila diande le Jehowa?

¹³ Adia Ɛfɛsɔ 1:7. Nyɔi k’olambo kaki Yeso Kristo ‘lakayakimɔ la lolango’ dia wahɔ aso kekɔ la kitshimudi ya woke le anto tshɛ woolanga ndo walanga She. (Ngal. 2:20) Ɔnkɔnɛ, kɛnɛ kakasale Yeso l’ɔkɔngɔ wa nyɔi ndo wa eolwelo kande totshungolaka nɛ dia tekɔ lo dimanyiyama pɛkato yaso. Yeso akakotsha kɛnɛ kaki didjidji lo Ɛlɛmbɛ wa Mɔsɛ lo lushi la fɛtɛ ka Ekesanelo. Lushi lɔsɔ, ɔlɔmbɛdi a laadiko akɔsaka dikila di’oma lo nyama y’elambo ya lo Dihole dioleki ekila dia lo tabɛrnakɛlɛ. L’ɔkɔngɔ diko lo tɛmpɛlɔ ka Sɔlɔmɔna wakayosalaka woho akɔ waamɛ  ndo wakalambolaka olambo akɔ la ntondo ka Nzambi. (Lew. 16:11-15) Woho akɔ waamɛ mbele, Yeso akadɛ l’olongo ndo akatolambolaka Jehowa oshinga wa dikila diande. (Hɛb. 9:6, 7, 11-14, 24-28) Sho pombaka monga la lowando lo woho wadimanyiyamaso pɛkato ndo weso la nkum’etema ya pudipudi l’ɔtɛ weso la mbetawɔ lo dikila diaki Yeso.

14, 15. Lande na kele ekɔ ohomba nshihodia ndo nkitanyiya ɔlɛmbɛ waki Jehowa wendana la dikila?

¹⁴ Onde wɛ amboshihodia lande na katodjangɛ Jehowa diaha sho ndɛ ‘woho tshɛ wa dikila’? (Lew. 17:10) Onde wɛ ambɛna lande na kele Nzambi mbɔsaka dia dikila diekɔ ekila? Le Jehowa, dikila la lɔsɛnɔ mbɛdima. (Etat. 9:4) Onde wɛ ambetawɔ ɔnɛ sho pombaka mbetawɔ kanyi yaki Jehowa lo kɛnɛ kendana la dikila ndo ɔnɛ sho pombaka nkitanyiya didjango diande dia ndjaanganya la diɔ? Yoho yaamɛ yakoka onto tshɛ la l’atei aso monga lo wɔladi la Nzambi ele lo monga la mbetawɔ l’oshinga w’etshungwelo waki Yeso ndo mbeya dia dikila diekɔ la kitshimudi ya laande le Otungi aso.—Kɔl. 1:19, 20.

¹⁵ Sho tshɛ koka tanema la ntondo k’awui watɔlɔmba dia nkamba la dikila. Aha la nongamɛ, ose nkumbo kaso kana ɔngɛnyi aso ɔmɔtshi, mbeyaka tanema la ntondo k’osakelo wɔlɔmba dia nde mbidja dikila kana bu. La ntondo k’awui asɔ, ekɔ ohomba mbɔsa tɛdikɔ tendana la okambelo wa la tangangɔ t’oma lo dikila ndo woho wahomba aseka enganga nkamba la dikila diaso. Diakɔ diele, ekɔ ohomba sho nsala eyangelo ndo ndjalɔngɔsɔla aha la ntshimbatshimba. Naka sho nsala alɔmbɛlɔ, kete tɛdikɔ tɔsɔ tayotokimanyiya dia sho nshika ntanga ndo aha nsekola tɔndɔ diendana la dikila. Lo mɛtɛ, hatokombola nyangiya Jehowa lo mbetawɔ nsala dui dimɔtshi diele Bible ditonaka. Aseka enganga ndo anto akina efula mbɔsaka dia wodjelo wa dikila mbakimanyiya di’onto ntshikala la lɔsɛnɔ. Koko ekambi waki Jehowa wanɛ wele ekila mbeyaka dia paka Otungi oto mbele la lotshungɔ la mbuta woho wahomba anto nkamba la dikila. Le Jehowa ‘woho tshɛ wa dikila’ wekɔ ekila. Sho pombaka ndjashikikɛ dia nkitanyiya ɔlɛmbɛ ande wendana la dikila. Oma lo ditshelo diaso di’ekila, sho mɛnyaka Nzambi dia sho mbɔsaka la nɛmɔ wolo wele la dikila diaki Yeso diashimbɛ nsɛnɔ, mbuta ate dikila diakimanyiya dia pɛkato y’anto dimanyiyama ndo mbisha anto lɔsɛnɔ la pondjo.—Jni. 3:16.

16. Lande na kahomba ekambi waki Jehowa monga ekila?

¹⁶ Etena kakatshungola Nzambi ase Isariyɛlɛ oma lo lɔhɔmbɔ la l’Edjibito, nde akawatɛ ate: “Dimi leli [Jehowa] lakanyutundja uma lu kete ya Edjibitu, dia ndjala [Nzambi k]anyu. Okone nyuyali ekila, ne dia dimi leli ekila.” (Lew. 11:45) Jehowa akalongamɛka di’ase Isariyɛlɛ monga ekila oko wende ekila. Oko weso Ɛmɛnyi wa Jehowa, sho la wɔ pombaka monga ekila. Kɛsɔ mɛtɛ mbatɔlɔmba dibuku di’Akambu w’Asi Lewi.

17. Kakianɛ, ngande wooyɔsa dibuku dia lo Bible di’Akambu w’Asi Lewi?

¹⁷ Aha la taamu, tambokondja wahɔ lo ɔsɛdingwelo w’awui amɔtshi watanema lo dibuku di’Akambu w’Asi Lewi. Ondo wekelo ɔnɛ wambofudia lowando layɛ lo dibuku dia lo Bible nɛ diakafundama lo ɛlɔmbwɛlɔ ka nyuma k’ekila. Okanelo wa yimba l’awui w’eshika watanema lo dibuku di’Akambu w’Asi Lewi ambofudia eokelo kaso ka ɛkɔkɔ watɛnya dia sho pombaka monga ekila. Ko naa awui amɔtshi wa lo nyuma watanema lo dibuku nɛ diakafundama lo ɛlɔmbwɛlɔ kaki Nzambi? Naa wetshelo ekina wakokaso nkondja oma lɔkɔ lo kɛnɛ kendana la kambɛ Jehowa olimu w’ekila? Tayɔsɛdingola ambola asɔ lo sawo diayela.